འབའ་སྲས།
རང་ས་དྲོད་མོ་འཁྱག་པས་བཅུན་སོང་ད་ནི་བདག་ལ་རྟེན་གཞི་མེད།།
ས་གཞིའི་དབྱིག་གི་སྙིང་བོ་གཏོར་སོང་ད་ནི་བདག་ལ་འབྱོར་བ་མེད།།
ཞི་བདེའི་མེ་ཏོག་སད་ཀྱིས་སྐམ་སོང་ད་ནི་བདག་ལ་བདེ་སྐྱིད་མེད།།
བདག་གི་ཕུ་ནུ་ཕྱི་མར་བརྫངས་སོང་ད་ནི་བདག་ལ་བསྡོངས་གྲོགས་མེད།།
ཅི་ཡང་མེད་པའི་ཐང་སྟོང་ཞིག་ནས་ཁེར་རྐྱང་མགོ་བོ་ཡར་ལ་དགྱེ།།
མིག་མཐའི་མཆི་མའི་དོག་པ་ཕྱིས་ཏེ་ཉི་ཟླའི་བར་གྱི་མཚམས་ལ་བལྟས།།
ཆེ་ཆེར་མཐོ་བའི་བར་སྣང་ཁམས་སུ་འོད་ཅིག་འཚེར་བ་བདག་གིས་མཐོང་།།
སྨིག་རྒྱུ་འཚོལ་བའི་རི་དྭགས་བཞིན་དུ་སྐོམ་པའི་རྐང་པ་མདུན་དུ་བསྒྱུར།།
བྱེས་མའི་ཐང་ལ་རྐང་རྗེས་དཔར་བཞིན་ཐང་ཆད་གོམ་པ་སྲོག་ལ་བསྡོས།།
ནམ་ཞིག་བསླེབ་པའི་ཉིན་མའི་གྲངས་ཀ་རེ་བའི་སོར་མོའི་རྩེ་ནས་བགྲངས།།
ཉིན་དང་མཚན་བྱས་སོང་སོང་མཐའ་མར་གཏིང་རིང་བྲག་གི་ཁ་ཞིག་བསླེབས།།
འཇིགས་སུ་རུང་བའི་བྲག་ཁ་དེ་རུ་སྲིན་མོའི་མཆེ་བ་གཙིགས་ནས་འདུག །
ད་དུང་དོམ་ནག་སྨྱོན་པ་ཁྱུ་ཡིས་བདག་གི་མཐའ་རུ་ཨ་ལོང་སྐྱུས།།
ཅེ་སྤྱང་ཚོགས་ལ་ཁྲག་གིས་མ་ངོམས་ད་དུང་བདག་གི་སྲོག་ལ་རྒོད།།
ཅི་བྱ་སྟོབས་མེད་གྱུར་བའི་དུས་སུ་ལམ་ལམ་འཚེར་བའི་འོད་ཐིག་དེ།།
བདག་གི་གོམ་པའི་མདུན་དུ་ལྷུང་ནས་མ་རུང་ཚོགས་ཀྱི་མཐོང་བ་བཀག །
ལམ་བགྲོད་པ་ཁྱོད་གང་དུ་འགྲོ་འམ་བདག་གིས་ཁྱེད་ལ་བསྐྱེལ་མ་བྱེད།།
འོད་ཐིག་དེ་ཡིས་བྱམས་དང་སྙིང་རྗེ་ཚིག་གིས་བདག་ལ་དེ་ལྟར་དྲིས།།
བདག་གིས་ལན་དུ་ཁྱོད་དང་འདྲ་བའི་འོད་ཀྱི་ཕུང་བོ་བདག་གིས་མཐོང་།།
དེ་ཉིད་མྱུར་ཏུ་འཚོལ་བའི་ཕྱིར་ཏུ་བདག་ནི་རྒྱང་དུ་བགྲོད་ཅེས་སྨྲས།།
དེ་མ་ཐག་ཏུ་བྲག་གི་ཁ་ནས་ཕར་ཕྱོགས་རི་བོའི་རྩེ་མོའི་བར།།
འཇའ་ཚོན་སྣ་ལྔའི་ཟམ་པ་བཙུགས་ཏེ་བདག་ནི་ཕར་ལ་བདེ་བར་བསྐྱེལ།།
ཐུགས་རྗེ་ཆེ་ཞེས་ཡང་ཡང་ཞུས་ནས་འོད་ཀྱི་ཕུང་བོར་ཕྱག་གསུམ་འཚལ།
ངེད་གཉིས་ལག་འཇུ་མཐའ་མ་འཇུས་ནས་རང་རང་འགྲོ་བའི་ལམ་དུ་ཆས།།
སླར་ཡང་བདག་ནི་ཁེར་རྐྱང་ཉིད་དོ་ཁེེར་རྐྱང་ཁེར་མོའི་ལམ་དུ་སོང་།།
སྔོན་བཞིན་སོང་སོང་མཐའ་མ་ཞིག་ལ་རྒྱ་མཚོ་ཆེན་མོའི་འགྲམ་དུ་བསླེབས།།
འཕྱུར་བའི་རྒྱ་མཚོའི་རླབས་ཀྱི་འཕྲེང་བས་བསམ་བཞིན་བདག་ལ་བསུ་བ་ལྟར།།
གཡོ་བའི་རླབས་ཕྲེང་ཕྲེང་བར་བསྒྲིགས་ནས་བདག་གི་མདུན་དུ་ཉེ་བར་གཡོ།།
ཧ་ཅང་དགའ་བའི་སེམས་ཀྱི་ཚོར་བ་རྒྱ་མཚོར་མཆོད་པའི་རྫས་སུ་བཏེགས།།
ཡུན་རིང་གཉེར་བའི་སེམས་ཀྱི་གླུ་དབྱངས་མཚོ་ངོགས་ཆེན་མོའི་དབུས་སུ་གྱེར།།
དེ་ལྟ་མོད་ལ་བདག་གིས་འཚོལ་བའི་བར་སྣང་ཁམས་ཀྱི་འོད་ཐིག་དེ།།
འཛུམ་དང་བཅས་དེ་ལམ་ལམ་འཚེར་བཞིན་མཚོ་ངོགས་ཆེན་པོའི་དབྱིངས་སུ་བབས།།
ད་ནི་བདག་གིས་ཅི་ཞིག་རེ་བ་དེ་ནི་བདག་ལ་སྐལ་བས་ཐོབ།།
མཚོ་འགྲམ་དེ་ནི་ཁྱིམ་དུ་བྱས་ནས་འོད་ཀྱི་ཕུང་བོ་སྐྱབས་སུ་བསྟེན།།
མ་ཕམ་གཡུ་མཚོ་ཁྲག་དང་འདྲེས་པའི་སྐྱོ་གླུ་ཉམ་ཆུང་ངག་གིས་གྱེར།།
གུས་པའི་མགོ་བོ་འོད་ཀྱི་པང་ཁར་བདེ་བར་བསྙེས་ནས་གཉིད་དུ་ཡུར།།
སྲོག་ལ་རྒོད། སྲོག་ལ་རྒོལ་ཞེས་དག་བཅོས་ཡོང་རོགས།