བདུད་ཀྱི་ཆོ་འཕྲུལ་སྒྱུ་མས་ག་ལ་གནོད།

ཆང་སྐྱེས།
 
ཟས་གཙང་སྲས་ཀྱི་བསྟན་འཛིན་གང་གི་སྐུ །
ཉིན་བྱེད་དབང་བོ་བཞིན་དུ་འཚེར་བ་ལ།།
སྲིན་འབུ་མེ་ཁྱེར་ཕྲ་མོ་དག་གིས་ནི།།
འགྲན་པར་བྱེད་པ་རང་ཉིད་ཕུང་བའི་གཞི།།

ལྷག་བསམ་བྱམས་བརྩེ་འོ་མའི་བདག་ཉིད་ཅན།།
འཛམ་གླིང་ཧྲིལ་བོའི་ཞི་བདེའི་དེད་དཔོན་མཆོག།
གང་གི་ཐུགས་ཀྱི་གཟི་བྱིན་འོད་ཟེར་ལ།།
བདུད་ཀྱི་ཆོ་འཕྲུལ་སྒྱུ་མས་ག་ལ་གནོད།།

འགྲོ་བའི་སྡུག་བསྔལ་ཕྱག་གིས་མི་སེལ་ཡང་།།
སེམས་ཀྱི་དཀའ་ངལ་གསུང་གིས་རབ་ཞི་བའི།།
ས་ཡ་དྲུག་གི་མགོན་པོ་མཆོག་ཉིད་ལ།།
ལོག་བཤད་གཏམ་སྦྱོར་བྱས་པ་ཁྲོ་བའི་གཞི།

གངས་སེང་དཀར་མོ་གངས་ན་འགྱིངས་པ་བཞིན།།
སྐྱབས་མགོན་བླ་མ་གོ་ལའི་རྩེ་ན་འཛུམ།།
ད་རེས་འདྲེ་ཡིས་འགྲམ་ལྕག་གཡུགས་པ་འདི །།
རྒྱབ་ན་བདུད་ཀྱི་དཔུང་ཚོགས་ཡོད་པའི་རྟགས།།

བསྟན་བཤིག་གཏེ་བོ་ཞེས་པའི་ཞྭ་མོ་འདི།།
རྒྱ་ནག་གུང་ཁྲན་དམར་ཤོག་གཞུང་གིས་ཀྱང་།།
ད་ལྟའི་བར་དུ་མ་བསྐོན་མ་གཡོག་པར།།
ཨོ་མིང་འཛིན་པས་གཡོག་ལ་བཟོད་ཐབས་བྲལ།།

བོད་མིའི་སྲིད་གཞུང་ཆོས་རིག་ལས་ཁུངས་ཀྱི།།
གཞུང་ཤོག་དཀར་པོ་སྟེང་གི་གསལ་བསྒྲགས་དེ།།
སོ་སའི་ཡིན་པར་བསྒྲུབས་པའི་གསལ་བཤད་ལ།།
ཞིབ་ཏུ་ཉན་ན་ཅི་འདྲའི་སྨྱོ་རྟགས་ཤིག།

སྤྱིར་ན་ང་ཚོ་བོད་པའི་སྤྱི་ཚོགས་ནང་།།
ཞལ་འཛུམ་དགོད་བཞིན་གྲི་ཡིས་འཛུགས་མཁན་ཡོད །།
ཐས་མོ་སྦྱར་ཏེ་སྟ་རེ་གཡུག་མཁན་མང་།།
འདི་དག་བསམ་ན་ཡིད་སེམས་ལྷག་ཏུ་སྡུག།