གཅན་འོད་འབར།
བདེ་མོ་བྱོས། སླར་ཡང་མཇལ་ཡོང།
ཆེས་མཐའ་མའི་འབབ་ཚིགས་འདི་ནས།
ཆར་བས་བརླན་པའི་ངོ་གདོང་ལ་བྱིལ་བྱིལ་བྱས་ཤིང།
མཆི་མས་གཤེར་བའི་མིག་ཟུང་ལ་འོ་ཞིག་བྱས།
འགྲོ་ལ་ཉེ་བའི་སེམས་མེད་ཀྱི་རླངས་འཁོར་དེ་དང།
ཀེ་རེར་ལངས་བའི་ལམ་འགྲམ་གྱི་གློག་སྡོང་དེ་དག་ནི།
སྡུག་གིས་གཙེས་པའི་སེམས་ཀྱི་ཨི་ཁུང་དག་ལ་འཛུལ་ཞིང།
སྐྱོ་བས་བསྡམས་པའི་ཤ་གསེབ་རུས་གསེང་ལ་ཟུག་དུས།
ཆར་ཐིགས་ཟགས་པའི་རླངས་འཁོར་གྱི་སྒེའུ་ཁུང་འགྲམ་ན།
ཕྱིར་མིག་འཇོག་པའི་ཡིད་འོང་གི་ངོ་རིས་དེར་བལྟས་ནས།
མི་འདོད་པའི་ལག་པས་བཙན་གྱིས་གཡབ་མོ་བྱས་ཤིང་།
མི་གསལ་བའི་ངག་གིས་ཤུགས་ཀྱིས་ཁ་གཡང་འབོད་པ་དེ་ནི།
ཉིན་མོ་ཞིག་གི་ཆེས་ཐོག་མའི་བརྗེད་དཀའ་བའི་དྲན་རྟེན་འཇོག་སྟངས་དང།
ལོ་ཟླ་ཞིག་གི་ཆེས་མཐའ་མའི་དྲན་སླ་བའི་རྨ་ཁ་བརྐོ་ཚུལ་ཡིན་ངེས་ན།
བདེ་མོ་བྱོས། སླར་ཡང་མཇལ་ཡོང།
ཐག་རིང་ལ་བལྟ་བ།
སྨུག་ཞགས་འཁྱིལ་བའི་ལམ་སྣེ་འདི་ནས།
མགྲིན་པ་འགགས་པའི་འཇོལ་མོ་ཁེར་རྐྱང་འདིས།
མིག་ཆུ་དབྱངས་སུ་འགུགས་པའི་ངང་ཚུལ་ལ་བལྟ་ཞོར།
སྡོང་ལོ་ཤག་སེ་ལྷུང་བའི་སྒྲ་ལ་ཉན་ན།
དམར་པོ་ཆགས་པའི་ཐག་རིང་གི་མཚམས་སྤྲིན་དེའི་ངོགས་དང།
རྡུལ་གྱིས་བཏུམས་པའི་རྒྱང་རིང་གི་རི་བོ་དེའི་རྒྱབ་ན།
ལྡེམ་མེར་འཁྱིལ་བའི་ལྷིང་འཇགས་ཀྱི་རྒྱ་མཚོ་ཞིག་ཡོད་ན།
མུ་མཐའ་བྲལ་བའི་སྔོ་ལྗང་གི་རྩྭ་ཐང་ཞིག་ཡོད་དམ།
ཡང་ན་ཁ་ཕྱོགས་དེ་ནས་འཛུམ་མདངས་བསྣམས་པའི་སུ་དང་གང་ཞིག་འོང་ངེས་སམ།
ཁུ་སིམ་མེར།
རེ་སྒུག་གི་ཐ་མག་ཅིག་མེ་རུ་སྤར་ནས།
གསལ་ལ་མི་གསལ་བའི་རྒྱང་རིང་གི་གནམ་མཐར་ཡང་ཡང་ཅེར་ཞིང།
རིག་ལ་མི་རིག་པའི་ཐག་རིང་གི་རི་བོར་ཡང་ཡང་བལྟས།
འདི་ལྟར། ཅི་ཡང་མི་མངོན་པའི་ཐག་རིང་ལ་ཅེར་ཞིང་སྒུག་པ་ནི།
ང་དང་འཇོལ་མོའི་ལས་དབང་གཞན་ཞིག་ཡིན་སྲིད།
༢༠༡༢།༥།༢༡
ཐག་རིང་ནས་རྒྱང་རིང་ལ་འཆས་པ་ནི། ཐག་ཉེ་ནས་ཉེ་འགྲམ་དུ་བཅར་བའི་སྔ་ལྟས་ཡིན་ལ།
དྲན་གདུང་གི་མནར་བའི་སྡུག་བསྔལ་ནི། བདེ་སྐྱིད་ལ་ཕྱོགས་པའི་མངོན་རྟགས་ཡིན།
དོལ་སྨྱོན་ཞེས་པའི་སྐུ་ཞབས་ལགས། །
ཁྱུག་ཙམ་ཁྱུག་ཙམ་མ་ཡིན་པར། །
ཁ་བརྡའི་དྲྭ་བའི་ལྡུམ་ར་འདིར། །
མཛེས་ཤིང་བརྟན་པར་བཞུགས་སུ་གསོལ། །
མེ་དཀར་ལགས།
ཁ་བརྡ་ང་ཡི་སྙིང་སྡུག་ཡིན།།
ཁྱེད་ཚོ་ང་ཡི་མཛའ་གྲོགས་ཡིན།།
ཁ་བརྡའི་ལྡུམ་ར་མཛེས་པོ་དེར།།
བརྩེ་བའི་མིག་ཟུང་ཅེར་ནས་ཡོད།།
སྣ་ཚོགས་བྱ་བའི་ཡོ་ལང་དང་།།
བློ་འཛིན་ཡིག་ཚད་འཛིན་གྲྭ་སོགས།།
སྐབས་བབ་བྱ་བའི་བྲེལ་ཟིང་གིས།།
རེ་ཞིག་ཁོམ་པ་དཀའ་ཙམ་འདུག།
རྣམ་པ་གཉིས་ཕེབས་པར་དགའ་བསུ་ཞུ།
མུ་མཐུད་ནས་རྩོམ་ཡིག་མང་པོ་འབྲི་རོགས།་ཁྱེད་ཀྱི་རྩོམ་ཡིག་ག་དུས་ཡིན་ཡང་ཀློག་གི་ཡོད།
ཁྱི་ཕྲུག་ལགས་ཕེབས་པར་ཐུགས་རྗེ་ཆེ།