བཙན་པོའི་སྙིང་སྟོབས། (རང་ལུས་ཞུགས་འབུལ་དང་པེ་ཅིན་སྲིད་གཞུང༌།)

 རྩོམ་པ་པོ། མགར་རྩེ་འཇིགས་མེད།  མཁོ་སྤྲོད་པ།  ཤར་ཕྱོགས་ཁུག་རྟ།

<<བཙན་པོའི་སྙིང་སྟོབས>> ཞེས་པ་འདི་ནི་རྩོམ་པ་པོ་གྲྭ་འགར་རྩེ་འཇིགས་མེད་ལགས་ཀྱིས་བོད་ནང་གི་རང་ལུས་མེར་བསྲེགས་སྐོར་བརྗོད་གཞི་གཙོ་བོར་བཟུང་སྟེ་བྲིས་པའི་དཔེ་དེབ་ཅིག་ཡིན། འདི་ལོའི་ཕྱི་ཟླ་ ༡ པོའི་ནང་རྒྱ་གཞུང་གིས་ཁོང་ཐེངས་གཉིས་པར་འཛིན་བཟུང་བྱས་ཤིང་། ཟླ་འདིའི་ཕྱི་ཚེས་ ༡༤ ཉིན་རྨ་ལྷོ་རྩེ་ཁོག་རྫོང་མི་དམངས་ཁྲིམས་ཁང་གིས་ལོ་ ༥ ཡི་བཙོན་འཇུག་ཁྲིམས་ཐག་བཅད།

རྩོམ་པ་པོ་འགར་རྩེ་འཇིགས་མེད་ལགས་ནི། མདོ་སྨད་རྨ་ལྷོ་རྩེ་ཁོག་རྫོང་དགོན་ཤུལ་སྒར་བ་ནས་སྐྱེས་ཏེ་འགར་རྩེ་དགོན་པའི་ཆོས་སྒོར་ཞུགས། སྔ་ཕྱིར་རྩོམ་ཡིག་བརྒྱ་ལྷག་བོད་ནང་གི་དུས་དེབ་དང་ཚགས་པར་སོགས་སུ་བཀོད་མྱོང་ཞིང་། ༢༠༠༨ ལོར་<<བཙན་པོའི་སྙིང་སྟོབས>> འདོན་ཐེངས་དང་པོ་བཏོན་ཏེ་བོད་ནང་གི་དངོས་ཡོད་གནས་སྟངས་དམར་རྗེན་དུ་བཀོད་ ༢༠༡༡ ཟླ་ ༤ པའི་ནང་རྒྱ་གཞུང་གིས་ཐེངས་དང་པོར་འཛིན་བཟུང་གིས་མནར་གཅོད་མང་པོ་བཏང་ཡོད། 

དཀར་ཆག

 སེམས་ཀྱི་ཟླ་བ།                                                  3

གླེང་གཞི་དང་འབྲེལ་བའི་མདོར་བསྟན། ………………….8

རང་ལུས་ཞུགས་འབུལ་དང་པེ་ཅིན་སྲིད་གཞུང༌། ……… 17

༄༅། ། སེམས་ཀྱི་ཟླ་བ། 

༧གོང་ས་རིན་པོ་ཆེ་བཙན་བྱོལ་དུ་ཕེབས་ནས་མི་ལོ་ལྔ་བཅུ་འཁོར་བའི་དུས་དྲན་དུ་ཕུལ།

ལེགས་བྱས་སྟོང་གི་རྟེན་འབྲེལ་འཛོམས་པས་ཀེ་ལ་ཤ་ཡི་ཡུལ་ལྗོངས་སུ།།

བྱམས་བརྩེ་འོ་མའི་མཚོ་ཆེན་ཀློང་ནས་ཁྱེད་སྐུ་ཟླ་བའི་ལང་ཚོ་བཞད། །

མེ་ཏོག་ཆུན་པོའི་ཕྲུ་གུའི་འཚོ་བ་ཡར་ཀླུང་གཙང་བོའི་འགྲམ་དུ་དྲངས།།

ཕོ་བྲང་དམར་པོའི་གྲུ་ཟུར་ཞིག་ན་རིན་ཆེན་དངུལ་གྱི་ཕུག་རོན་བཞིན།།

 

ཐུ་བྷོད་བཙན་པོའི་ཆོས་སྲིད་འཁོར་ལོ་ནུབ་རིའི་ཕག་ཏུ་ལྷུང་བའི་སྐབས།།

ཤར་ཕྱོགས་བཙན་རྒྱལ་སྲིད་ཀྱི་སྟེགས་བུས་ཁྱེད་ལ་སྐུ་ངོའི་ཕྱྭ་གཡང་འབོད།།

ལུཊ་གཉིས་གསེར་གྱི་ཤིང་རྟའི་འཐེན་ཐག་ཁྱེད་སྐུ་གཞོན་ནུའི་མགྲིན་པར་བཏཊ།།

ན་ཚོད་ཕྲ་བ་མྱུ་གུའི་དུས་ནས་མུན་ནག་བྲག་རིའི་འཕྲང་ལམ་བརྒྱུད།།

 

ཤར་ནས་ལྡིང་བའི་རི་སྤྱང་དམར་པོས་ཁ་བའི་ཞིང་ཁམས་དཀྲིགས་པའི་དུས།།

ཆོས་ལྡན་ཞིང་གི་བརྩེ་བའི་སྤུན་ཟླ་ཁྱུར་མིད་གཏོང་བའི་རྒོ་ཁྱུ་བཞིན།།

ནམ་ཞིག་ཆོལ་གསུམ་སྐྱེད་མོས་ཚལ་ལ་ཆོས་སྲིད་མྱུ་གུ་བཞེངས་པའི་ཕྱིར།།

ས་ཡ་དྲུག་གི་སེམས་ཀྱི་ནོར་བུ་ནུབ་ཕྱོགས་འཕགས་པའི་ཡུལ་ལ་ཕེབས།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ། །

གངས་ཅན་པ་ཡི་རང་ལུས་གཙང་མ་རང་སེམས་དྲོད་མོ་དབང་བའི་ཕྱིར།།

པོ་ཏཱ་ལ་ཡི་ཡིད་བཞིན་ནོར་བུ་རང་བྱུང་སྤྱིལ་བུའི་ཁམས་སུ་བཞུགས།།

རྒྱ་གར་བྱང་མཐའི་རི་ཀླུང་ཞིག་ནས་ཉམ་ཆུང་སྤྲང་བོའི་འཚོ་བ་རོལ།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

འཕུར་ཡ་མེད་པའི་ཕུག་རོན་དཀར་མོའི་གཤོག་རྩལ་ས་མཐའི་གྲོང་ནས་རྒྱས།།

འཛམ་བུ་གླིང་གི་ཆེས་མཐོའི་གཟེངས་རྟགས་གངས་དཀར་བུ་མོའི་མགུལ་དུ་སྒྲོན།།

གཟུར་གནས་དྲན་དབང་སྟོང་གི་དབུས་སུ་སྨྲ་བ་མཆོག་གི་གོ་འཕང་བརྙེས།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

བཙན་བྱོལ་བོད་པའི་སྤྲང་བོའི་འཁོར་ལ་ལྟོ་གོས་སློབ་གསོའི་བདེ་སྐྱིད་སྦྱིན།།

རླུང་དུ་སྤུར་བའི་སེ་འབྲས་དགའ་གསུམ་འཕགས་པའི་གྲོང་དུ་སླར་ཡང་རྒྱས། །

ཧ་ཅང་དོག་པའི་བཀའ་ཤག་གཞུང་ལ་རང་དབང་དམངས་གཙོའི་ལམ་ཆེན་བཞེངས

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

གཞིས་ལུས་སྤུན་ཟླའི་ཁྱེད་རང་དྲན་པའི་མིག་ཆུ་ཡར་ཀླུང་གཙང་བོས་མཚོན།།

ཁྱེད་ཀྱིས་ཕ་ཡུལ་དྲན་པའི་བརྩེ་བ་ཇོ་མོ་གླང་མོས་ཐེག་ཀྱང་དཀའ།།

གཞིས་བྱེས་འཛོམས་པའི་གསོལ་འདེབས་དུང་ཕྱུར་ལྷ་སའི་ཇོ་བོའི་ཐུཊ་ན་གསལ།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ། །

གངས་ཅན་པ་ཡི་རང་ལུས་གཙང་མ་རང་སེམས་དྲོད་མོ་དབང་བའི་ཕྱིར།།

རྒྱ་ནག་དམར་པོའི་འདོད་པའི་མེ་ལྕེ་བྱམས་བརྩེ་འོ་མའི་གྲུ་ཆར་ཀླན། །

རྒྱ་དཀར་སྲིད་དོན་ཉིན་མཚན་འཁོར་ལོ་ཐབས་མཁས་ཉི་ཟླའི་འགྲོས་ཀྱིས་བསྟུན། །

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

ལྷ་ལམ་ངོས་སུ་གནམ་གྲུའི་ཕང་བར་ཕ་གཞིས་དྲོད་མོ་རྒྱང་གཟིགས་མཛད། །

འཛམ་བུ་གླིང་གི་མཐའ་དབུས་ཀུན་ནས་གངས་ཅན་བོད་པའི་བདེ་སྡུག་གླེང་།།

རྒྱ་ནག་དམར་པོས་དངུལ་གྱི་བམ་ཁས་བྱམས་བརྩེའི་རིན་ཐང་ཁྱད་དུ་གསོད།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

བཙན་བྱོལ་ཁྲོད་ཀྱི་ཀླད་མེད་རེ་འགས་མཛད་འཕྲིན་དོ་ཤལ་དྲི་མས་བགོས།།

ཤར་ཕྱོཊ་ཏང་གི་གཞིས་སྡོད་རྒྱུག་ཁྱིས་ངག་བཅོལ་མཚན་དམོད་སྐུར་འདེབས་ཞུས

གཞན་དོན་འཕྲིན་ལས་གུར་ཁང་དབུས་ན་བྱང་ཆུབ་སེམས་དཔའ་སྐྱོ་ངལ་དབེན། །

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

བགྲེས་སོང་སྤུན་ཟླའི་གསོལ་འདེབས་ཁྲི་ཕྲག་ལྷ་སྐུ་མང་བོའི་ཐུགས་ལ་བཅོལ། །

གཞོན་སྐྱེས་སྤུན་ཟླའི་བརྩེ་འཕྲིན་ཁྲི་ཕྲག་ལྷོ་བཞུད་སྤྲིན་པའི་ཕྱག་ལ་གཏོར།།

རེ་ལྟོས་འབུམ་གྱི་ཆུ་གཏེར་ཀློང་ན་ཁྱེད་སྐུ་འགྲུལ་སྐྱེལ་གྲུ་གཟིངས་བཞིན།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

གངས་ཅན་པ་ཡི་རང་ལུས་གཙང་མ་རང་སེམས་དྲོད་མོ་དབང་བའི་ཕྱིར། །

ཨ་རིའི་གྲོང་གི་དབུ་ཁྲིད་རྣམ་པར་རིན་ཆེན་དབུ་ཡིས་གུས་ཕྱག་ཕུལ།།

ཡོ་རོབ་གླིང་གི་སྐུ་ངོ་དག་ལ་བྱམས་བརྩེ་འོ་མའི་གདན་ཆ་བསྒྲིགས།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགསལ།།

རྒྱལ་སྤྱིའི་འཐབ་འཛིང་མེ་རིའི་རྩེ་མོར་ཞི་བདེ་བདུད་རྩིའི་གྲུ་ཆར་གནང་།།

རྒྱལ་ཁབ་མང་བོའི་ཆོས་ལུགས་ལྟ་གྲུབ་མཐུན་སྒྲིལ་གསེར་གྱི་དཔལ་བུས་བྲིས།།

རྒྱལ་ས་མེད་པའི་བཙན་བྱོལ་སྤྱི་ཚོགས་དྲིན་ཅན་མ་ལོའི་བརྩེ་བས་བསྐྱངས།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ། །

བཙན་བྱོལ་བོད་པའི་འཚོ་བའི་ཕྱིར་དུ་འཇིག་རྟེན་ཁམས་སུ་སློང་མོ་མཛད།།

གངས་ཅན་པ་ཡི་རང་དབང་འཚོལ་ཕྱིར་གོ་ལའི་ཁྱོན་ལ་གུས་ཕྱག་གནང༌། །

ཡང་དག་གསུང་གི་སྦྲང་རྩིའི་བཅུད་ཀྱིས་གྲངས་མེད་འགྲོ་བའི་རྒྱབ་རྟེན་རྙེད།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

ཡ་གླིང་བཙན་རྒྱལ་རླུང་དམར་དབུས་ན་མར་མེ་ལྟ་བུའི་ནང་བའི་བསྟན། །

བཅུ་གཉིས་བདག་པོའི་འཛུམ་མདངས་ཀློང་ནས་འཛམ་བུ་གླིང་གི་རྒྱན་དུ་སྤྲོས།།

ཉི་འོད་ནུབ་པ་འཕགས་པའི་ཡུལ་དུ་ཤཱཀྱ་སེང་གེ་སླར་ཡང་འཁྲུངས།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

གཟེངས་རྟཊ་བརྒྱད་ཅུའི་གཟི་བྱིན་རེ་ཡིས་གངས་སེང་དཀར་མོའི་གཡུ་རལ་བཏེཊ།

གསུང་འབུམ་བདུན་ཅུའི་པར་ངོས་རེ་ཡིས་བྱམས་དང་བརྩེ་བའི་རིན་ཐང་བསྐྲུན།།

དུས་རབས་གསར་བའི་ཁ་བའི་ལྗོངས་ལ་གཟི་བྱིན་སྟོང་གི་ལ་རྒྱ་སྦྱིན།།

 

སེམས་ཀྱི་ནོར་བུ་ཕྱི་ལ་ཕེབས་ནས་མི་ལོ་ལྔ་བཅུའི་དུས་ཚིགས་ལ།།

རབ་དཀར་གངས་རིའི་ཕྱི་ནང་ཀུན་ཏུ་དམངས་གཙོའི་གསེར་གྱི་ས་བོན་བཏབ།།

སྐྱེས་མ་ཡོངས་ཀྱི་ཁྱད་ནུས་གསལ་བའི་ཡང་དག་གསུང་གི་ཟླ་བ་བཞད།།

བྱམས་བརྩེ་འོ་མས་འཇིག་རྟེན་གསོ་བ་དུས་རབས་གསར་བའི་དྲང་སོང་ཞིག།

 

གོ་ལའི་ངོས་ཀྱི་ཞི་བདེའི་དེད་དཔོན་འཇིག་རྟེན་ཁམས་ཀྱི་བརྩེ་ལྡན་མ།།

གངས་ཅན་བོད་པའི་ཕྱག་ན་པདྨོ་བས་མཐའི་གྲོང་གི་སློང་མོ་བས།།

འཐབ་རྩོད་དུག་གི་མཚོན་ཆའི་མེ་དཔུང་ཡིད་འོང་མེ་ཏོག་ཆར་གྱིས་ཀླན།།

རྐང་གཉིས་འགྲོ་བའི་གསེར་གྱི་ནོར་བུ་རྣམ་དག་སེམས་ཀྱི་ཕུགས་ལ་བསྒོམ། །

༄༅།  ། གླེང་གཞི་དང་འབྲེལ་བའི་མདོར་བསྟན།

ཉེ་བའི་ལོ་འགའི་ནང་དུ་བོད་ཁམས་སུ་སྔ་ཕྱིར་བོད་མི་དགུ་བཅུ་ལྷག་གིས་རང་ལུས་མེ་རུ་སྒྲོན་ནས་ཞི་རྒོལ་བྱ་དགོས་པའི་རྒྱུ་མཚན་ཅི་ཡིན་ནམ་ཞེས་པའི་དྲི་བ་འདི་དུས་རྒྱུན་ང་ལ་འདྲི་མཁན་ཧ་ཅང་མང་ལ།

གཞན་ཡང༌། ངས་ས་བྱི་ལོའི་ལོ་མཇུག་ཏུ་བཙན་པོའི་སྙིང་སྟོབས་དེབ་དང་བོ་རྩོམ་སྒྲིག་བྱས་ཏེ་པར་སྐྲུན་བྱས་རྗེས་ས་གནས་ཉེན་རྟོག་པས་ང་ལ་ཁྱེད་ཀྱིས་དེབ་འདི་རྩོམ་སྒྲིག་བྱེད་དགོས་པའི་རྒྱུ་མཚན་ཅི་ཡིན་ཞེས་དྲི་བ་ཞིག་ཡང་དང་བསྐྱར་དུ་དྲིས་མྱོང༌། ད་ཐེངས་བཙན་པོའི་སྙིང་སྟོབས་དེབ་གཉིས་པ་བྲིས་ཏེ་པར་དུ་བསྐྲུན་རྗེས་ཁོ་ཚོས་ཡང་བསྐྱར་དྲི་བ་དེ་ང་ལ་འདྲི་བ་གདོན་མི་ཟ་བས་ངས་ཁོ་ཚོའི་དྲི་བ་དེར་དྲིས་ལན་ཞིག་སྔ་ས་ནས་གྲ་སྒྲིག་བྱེད་དགོས་པས་ངས་དྲི་བ་འདི་གཉིས་ཀྱི་དྲིས་ལན་དཀྱིལ་གཅིག་ཏུ་བཏབ་སྟེ། དེབ་འདིའི་གླེང་གཞིར་འཇོག་རྒྱུ་ཡིན། འདི་ནི་བདག་གིས་དཔེ་དེབ་འདི་འབྲི་དགོས་པའི་དམིགས་ཡུལ་དང་ཕུགས་བསམ་ཡང་ཡིན་པས་དྲིས་ལན་ནི།

གཅིག  ༢༠༠༩ལོར་རྒྱལ་གཅེས་དཔའ་བོ་བློ་བཟང་བཀྲ་ཤིས་ལགས་ཀྱིས་རང་ལུས་སྦྱིན་སྲེག་གནང་སྟེ་པེ་ཅིན་སྲིད་གཞུང་ལ་ཞི་རྒོལ་བྱས་པ་དང༌། ལྷག་པར་དུ་ལྕགས་ཡོས་ལོར་རྒྱལ་གཅེས་དཔའ་བོ་ཕུན་ཚོགས་ལགས་ཀྱིས་རང་ལུས་སྦྱིན་སྲེག་གིས་པེ་ཅིན་སྲིད་གཞུང་ལ་ཞི་རྒོལ་བྱས་པ་ནས་ད་ལྟའི་བར་དུ་བོད་ཁམས་སུ་སྐྱ་སེར་དབྱེར་མེད་དང༌། ཕོ་མོ་དབྱེར་མེད། ཆོལ་ཁ་དབྱེར་མེད་ཀྱིས་བོད་མི་བརྒྱད་ཅུ་ལྷག་གིས་རང་ལུས་མེ་རུ་སྦར་ནས་པེ་ཅིན་སྲིད་གཞུང་ལ་གོང་ས་མཆོག་ཕ་ཡུལ་དུ་ཕེབས་སུ་འཇུག་དགོས། བོད་མི་རིགས་ལ་ཐོབ་འོས་པའི་རང་དབང་ཐོབ་ཏུ་འཇུག་དགོས་པའི་ཞི་རྒོལ་སྐད་འབོད་མཛད་དེ་ཕལ་ཆེར་སྐུ་གྲོངས་པ་དང་སྐུ་མ་གྲོངས་པ་རྣམ་པས་ཀྱང་སྡུག་བསྔལ་ཚད་ལས་བརྒལ་བ་མྱོང་བཞིན་པའི་སྐབས་འདིར་སྲིད་དབང་སྒེར་འཛིན་གྱི་པེ་ཅིན་སྲིད་གཞུང་གིས་འདིའི་ཐད་ནས་སྐད་ཆ་དྲང་བདེན་ཞིག་གཏན་ནས་མི་བཤད་པར་ལོག་བཤད་དང་རྫུན་བཤད་ཁོ་ན་བྱས། ང་རང་བོད་པ་ཞིག་དང་ལྷག་པར་དུ་བོད་པའི་སྨྱུག་ཐོགས་པ་ཞིག་གི་མིང་བཟུང་ཡོད་ཕྱིར་འདིའི་ཐད་ནས་སྐད་ཆ་ཚིག་གཅིག་ཀྱང་བཤད་མ་ཐུབ་པར་དད་ལྡན་མི་མང་གི་དཀོར་ཟས་ལོངས་སུ་སྤྱད་དེ། སྐྱིད་འདུག་སྐྱིད་ཉལ་བྱས་ནས་བསྡད་ན་ང་གསོན་དུས་འདུག་ས་ཡོད་ཀྱང་ཤི་དུས་འགྲོ་ས་ཡོད་ཀྱི་མ་རེད། དེའི་ཕྱིར་ངས་གནས་ཚུལ་ཚབས་ཆེན་འདི་ལ་གནས་ལུགས་དང་དྲང་བདེན། རྒྱུ་འབྲས་ཀྱི་སྒོ་ནས་ཞིབ་འཇུག་ཅིག་མི་བྱེད་ཐབས་མེད་ཡིན་ཕྱིར། ཞིབ་འཇུག་བརྟག་དཔྱད་བྱས་པ་ལྟར་ན། པེ་ཅིན་སྲིད་གཞུང་གིས་ཁོང་རྣམ་པའི་རང་ལུས་མེ་རུ་སྒྲོན་དགོས་པའི་རྒྱུ་མཚན་ནི། མི་སྐྱ་ཕོ་མོ་ཞིག་ཡིན་ན་བཟའ་འཁོན་བྱུང་བས་ཡིན་ཚུལ་དང༌། ཡང་ན་བུ་ལོན་མང་བས་ཡིན་ཚུལ། བླ་སྤྲུལ་དང་གྲྭ་བ་ཞིག་ཡིན་ན་གོང་ས་མཆོག་གི་གཙོས་བཙན་བྱོལ་བོད་གཞུང་གིས་སྐུལ་མ་བཏང་ཚུལ་སོགས་འཁྱོག་བཤད་དང་སྐུར་འདེབས་ཀྱི་ལོག་བཤད་མང་དག་ཅིག་བཤད་ཀྱི་ཡོད་ཀྱང་དེ་དག་ནི་སྐྱག་རྫུན་ཁོ་ན་ཡིན་པས་བདེན་དཔང་གསལ་ཐག་ཆོད་པ་གཅིག་ཀྱང་མེད་དེ། ཁོ་ཚོའི་སྐད་ཆ་འདི་དག་ལ་བདེན་དཔང་གི་མཛུབ་ཐེལ་གནོན་མཁན་བྱུང་ན་དམངས་སྒོར་ཁྲི་བརྒྱ་ཡི་བྱ་དགའ་ཡོད་པར་བཤད་པ་འདིས་རང་གི་རྫུན་རྐུབ་རང་གིས་ཕྱིར་ཕུད་པ་རེད།

གཉིས། གང་ལྟར་བོད་མི་བརྒྱད་ཅུ་ལྷག་གིས་རང་ལུས་མེ་རུ་སྒྲོན་ནས་པེ་ཅིན་སྲིད་གཞུང་ལ་ཞི་རྒོལ་མཛད་དགོས་པའི་རྒྱུ་རྐྱེན་ངོ་མ་དེ་གང་རེད་ཅེ་ན།

༡འདས་པའི་ལོ་རྒྱུས་ཁྲོད་དུ་པེ་ཅིན་སྲིད་གཞུང་གིས་ལྔ་བཅུ་ང་བརྒྱད་ནས་རིག་གནས་གསར་བརྗེ་མཇུག་རྫོགས་པའི་བར་དུ་བོད་མི་ས་ཡ་གཅིག་ལྷག་དམར་གསོད་བཏང་བར་ད་དུང་ངོས་ལེན་དང་སྐྱིན་ཚབ་གང་ཡང་སྤྲད་མེད་པ།

༢པེ་ཅིན་སྲིད་གཞུང་གིས་དཀའ་སྡུག་གི་ལོ་ཟླ་འདི་དག་གི་ནང་དུ་བོད་མི་རིགས་ལ་མི་གཅིན་འཐུང་དུ་བཅུག། མི་ཤ་ཟ་རུ་བཅུག་ནས་མནར་གཅོད་བཏང་བ་དེར་ཡང་མཐའ་ན་དགོངས་དག་ཙམ་ཡང་ཞུས་མེད་པ་མ་ཟད་ངོས་ལེན་ཙམ་ཡང་མེད་ཚོད་རེད།

༣པེ་ཅིན་སྲིད་གཞུང་གིས་གོང་ས་མཆོག་གཙོ་བྱས་བོད་ཀྱི་ཆོས་བརྒྱུད་བླ་ཆེན་མང་བོ་ཕ་ཡུལ་ནས་མཐར་བསྐྲད་བཏང་བ་མ་ཟད། ཀུན་གཟིགས་བཅུ་བ་གཙོ་བྱས་བླ་ཆེན་རྣམས་བཙོན་འཇུག་ཁྲིམས་ཆད་ཀྱིས་དམྱལ་བ་མི་ཡུལ་དུ་ཐོན་པ་ལྟ་བུའི་མནར་གཅོད་བཏང་བའི་ཁྲོད་དུ་བླ་ཆེན་མང་བོ་ཞིག་སྐུ་བཀྲོངས་པ་སོགས་ལ་ཁོ་ཚོས་བོད་མི་རིགས་ལ་དགོངས་དག་སྐྱིན་ཚབ་མེད་པ་མ་ཟད་ད་དུང་ངོས་ལེན་ཙམ་ཡང་བྱས་མེད།

༤པེ་ཅིན་སྲིད་གཞུང་གིས་བོད་ཀྱི་དགོན་སྡེ་ལྔ་སྟོང་ལྷག་ལ་གཏོར་བཅོམ་ཚད་ལས་བརྒལ་བ་བྱས་པ་མ་ཟད། བོད་ཁམས་ཀྱི་དགོན་སྡེ་དྲུག་སྟོང་ལྷག་གི་སྐུ་གསུང་ཐུགས་རྟེན་དང༌། རྒྱུ་ནོར་རྩ་ཆེན་ཕལ་ཆེར་པེ་ཅིན་སྲིད་གཞུང་གིས་སྒེར་འཛིན་བྱས་ཀྱང་ད་དུང་སྐྱིན་ཚབ་ཅིག་ཕར་ཟད། ངོས་ལེན་དགོངས་དག་ཙམ་ཡང་ཞུས་མེད།

༥རིག་གསར་མཇུག་རྫོགས་རྗེས་བོད་རིགས་དད་ལྡན་མི་དམངས་ཀྱིས་པེ་ཅིན་སྲིད་གཞུང་གིས་གཏོར་བཅོམ་བྱས་པའི་དགོན་སྡེའི་ལྷ་ཁང་དང༌། སྐུ་གསུང་ཐུགས་རྟེན་བསྐྱར་བཞེངས་བྱེད་སྐབས་པེ་ཅིན་སྲིད་གཞུང་གིས་སྐྱིན་ཚབ་ཕར་ཟད་མཐའ་ན་རོགས་སྐྱོར་འོས་འཚམ་ཞིག་ཀྱང་མ་བྱས་པས་དད་ལྡན་མི་དམངས་ཀྱིས་ཉིས་སྟོང་ལྷག་བསྐྱར་བཞེངས་བྱེད་ཐུབ་ཡོད་ཀྱང་དཔལ་འབྱོར་ཆ་རྐྱེན་གྱི་དབང་གིས་བཞི་སྟོང་ལྷག་བསྐྱར་བཞེངས་བྱེད་མ་ཐུབ་པར་གྱང་ཤུལ་གནམ་ལ་འཁོར་ནས་ཡོད།

༦པེ་ཅིན་སྲིད་གཞུང་གིས་བོད་ཀྱི་ཆོས་དང་རིག་གནས་ལ་གཏོར་བཅོམ་ཚད་ལས་བརྒལ་བ་བཏང་བས་འཆི་ལ་ཉེ་བའི་ཆོས་དང་རིག་གནས་དེ། ལོ་རབས་བརྒྱད་ཅུ་བ་ནས་བཟུང་ཀུན་གཟིགས་བཅུ་བས་སྣེ་ཁྲིད་འོག་བོད་ཀྱི་ཆོས་བརྒྱུད་བླ་ཆེན་མང་བོ་དང༌། བླ་མ་དགེ་བའི་བཤེས་གཉེན། སློབ་གཉེར་བ་མང་བོ། དད་ལྡན་མི་དམངས་བཅས་ཀྱིས་སྲུང་སྐྱོབ་གང་ལེགས་གནང་ཡང༌། པེ་ཅིན་སྲིད་གཞུང་གིས་ཁ་ནས་རོགས་སྐྱོར་བྱ་ཟེར་ཞོར་དོན་གྱིས་བར་ཆད་བཀག་འགོག་རབ་དང་རིམ་པ་བཏང་བས་ད་དུང་ཤི་མ་གསོན་གྱི་ངང་དུ་གནས་ཡོད།

༧ང་བརྒྱད་དང་རིག་གསར་སྐབས་སུ་བོད་ཀྱི་མཁས་དབང་ཕལ་ཆེར་པེ་ཅིན་སྲིད་གཞུང་གིས་མུན་ནག་གི་བཙོན་དུ་བཅུག་ནས་སྐུ་བགྲོངས་པ་དང༌། ཡང་ན་ངལ་རྩོལ་བསྒྱུར་བཀོད་ལ་ཁ་གཡར་ནས་འཐབ་རྩོད་བྱས་ཏེ་སྐུ་བཀྲོངས་པས་བོད་ཀྱི་རིག་གནས་སློབ་རྒྱུན་མང་བོ་ཞིག་གི་རྒྱུན་ཆད་དེ་ད་དུང་ཡང༌། བསྐྱར་གསོ་གནང་ཐུབ་མེད།

༨དམར་དམག་རྒྱང་སྐྱོད་དང་སྲིད་གཞུང་ཉམ་ཆུང་གི་སྐབས་སུ་ཏང་ཚོགས་མགོ་ཡི་ཞྭ་བཞིན་གཙུག་ཏུ་བཀུར་ཞིང༌། སྒོ་ཡི་ཁྱི་བཞིན་གཡོག་ཏུ་རྒྱུག་པའི་བོད་མི་དག་ལ་པེ་ཅིན་སྲིད་གཞུང་གིས་ང་བརྒྱད་དང་རིག་གསར་སྐབས་སུ་བཙོན་འཇུག་དང་འཐབ་རྩོད་ཀྱི་མནར་གཅོད་གང་མང་བཏང་སྟེ། མང་བོ་ཞིག་བསད་པ་མ་ཟད། རིག་གསར་མཇུག་རྫོགས་རྗེས་ཤུལ་ལུས་ཚོ་ཡང་པེ་ཅིན་སྲིད་གཞུང་གིས་ཁྱེད་ཚོར་མ་ཉེས་ཁ་གཡོགས་ཐེབས་སོང་ཞེས་ཁ་བཟང་ཙམ་བཤད་ཀྱང་དོན་གྱིས་རང་གི་མི་རིགས་ལ་བྱས་རྗེས་འཇོག་པའི་གོ་སྐབས་ཕྲན་ཙམ་ཡང་སྤྲད་མེད།

༩ད་ལྟའི་གནས་བབ། བོད་མི་དམངས་ལ་དད་འདུན་རྣམ་དག་གིས་གོང་ས་མཆོག་རང་གི་ཕ་ཡུལ་ལ་གདན་ཞུ་བྱས་ཏེ། ཕྱག་དབང་ཆོས་འབྲེལ་ཞུ་འདོད་ཡོད་ཀྱང༌། པེ་ཅིན་སྲིད་གཞུང་གིས་མཐའ་གཅིག་ཏུ་ཁོ་ཚོའི་དད་འདུན་དང་རེ་བར་ངོ་རྒོལ་བྱེད་པ་མ་ཟད། གོང་ས་མཆོག་ལ། ཆོས་གོས་གོན་པའི་སྤྱང་ཀི་དང་འཇིགས་སྐུལ་རང་ལུགས་པའི་སྣེ་ཁྲིད་སོགས་མཚན་དམོད་ཚད་ལས་བརྒལ་བ་སྣ་ཚོགས་གཞུང་འབྲེལ་གསར་ལམ་ཁག་ནས་དྲིལ་བསྒྲགས་བྱས་ཏེ་བོད་མི་རིགས་ཀྱི་སེམས་ལ་རྨ་ཁ་བཟོད་ཐབས་བྲལ་བ་བཞག་དང་འཇོག་བཞིན་པ།

༡༠པཎ་ཆེན་རིན་པོ་ཆེ་ཀུན་གཟིགས་བཅུ་བའི་ཡང་སྲིད་ལ་དད་འདུན་རྣམ་དག་གིས་མཇལ་འདོད་ཡོད་ཀྱང༌།པེ་ཅིན་སྲིད་གཞུང་གིས་ཁོང་གི་ཡང་སྲིད་དགུང་གྲངས་ལྔའི་སྟེང་ནས་བཟུང་བཙོན་ཏུ་བཅུག་སྟེ་གཏན་ནས་གློད་གྲོལ་མི་གཏོང་བ་མ་ཟད།ཁོང་གི་ཡང་སྲིད་ཀྱི་ཚབ་ཏུ་རྒྱལ་མཚན་ནོར་བུ་ཞེས་པ་ཞིག་བཞག་ནས་མི་དམངས་ལ་བཙན་གྱིས་མཇལ་དུ་བཅུག  གལ་ཏེ་མི་མཇལ་ན་མཉམ་ལས་སྨན་བཅོས་མི་སྟེར་བ་དང་དབུལ་སྐྱོར་རོགས་དངུལ་མི་སྟེར་ཞེས་ཉམ་ཆུང་མི་དམངས་ལ་བཙན་སྐུལ་དང་འཇིགས་སྐུལ་བྱས་པ།

༡༡པེ་ཅིན་སྲིད་གཞུང་གིས་ཁ་ནས་རང་སྐྱོང་ས་ཁུལ་ནས་རང་གི་སྐད་ཡིག་གཙོ་བོར་བཀོལ་སྤྱོད་བྱ་དགོས་ཞེས་བཤད་ཀྱང་དོན་གྱིས་བོད་ཀྱི་སྐད་ཡིག་རིག་གནས་ལ་བཙན་འཛུལ་བྱས་ཏེ་ཉམས་ཉེས་སུ་བཏང་བ་དང༌། རྒྱ་ཆེའི་དགེ་སློབ་རྣམ་པས་དེ་ལ་མི་འདོད་པའི་ཞི་བས་ཁྲོམ་སྐོར་བྱས་ནའང་དགེ་སློབ་རྣམས་ལ་ཁྲིམས་ཆད་གཅོད་པ་དང༌། ཡང་ན་སློབ་གྲྭ་དང་ལས་གནས་ནས་མཐར་བསྐྲོད་གཏོང་བ་དང༌། བཙན་སྐུལ་གྱིས་ཏང་སྲིད་ལས་ཁུངས་ལ་དགོངས་དག་ཞུ་རུ་འཇུག་པ། རྗེས་ཕྱོགས་ཁྲོམ་སྐོར་མི་བྱེད་པའི་ཁས་ལེན་ཡི་གེ་འབྲི་རུ་འཇུག་པ་སོགས་མནར་གཅོད་ཚད་ལས་བརྒལ་བ་རབ་དང་རིམ་པ་གཏོང་བཞིན་པ།

༡༢ས་བྱི་ལོའི་བོད་མི་རིགས་ཀྱི་དཀའ་སྡུག་གི་འབོད་སྒྲའི་ཞི་རྒོལ་ལ་ཕྱོགས་གཅིག་ནས་གཡོ་ཇུས་ལྡན་པའི་གསང་ཉུལ་བ་མངགས་ནས་དྲག་སྤྱོད་དུ་བསྒྱུར་གང་ཐུབ་བྱས་པ་དང༌། ཕྱོགས་གཞན་ཞིག་ནས་དེ་གཞུང་འབྲེལ་གསར་ལམ་ཁག་ནས་དྲིལ་བསྒྲགས་སྣ་ཚོགས་བྱས་ཏེ་བོད་མི་རིགས་ཀྱི་མཚན་སྙན་དང་ཐོབ་ཐང་ལ་གནོད་འཚེ་ཚད་ལས་བརྒལ་བ་བཟོས་པ་དང༌། ཉེས་འདོགས་ཀྱིས་བོད་མི་གང་མང་ལ་སྲོག་ཁྲིམས་བཅད་པ།

༡༣བོད་རིགས་རང་སྐྱོང་ས་ཁུལ་ཁག་གི་སྲིད་དབང་བོད་རིགས་ལས་བྱེད་པ་ཚོར་མི་དབང་བར་རྒྱ་རིགས་ཆེན་པོའི་དབང་འཛིན་པ་ཚོས་སྒེར་སྤྱོད་སྒེར་འཛིན་བྱས་ཏེ། བོད་རིགས་ལས་བྱེད་རྣམས་རྒྱ་རིགས་མགོ་ཁྲིད་ཚོའི་བཀས་བཀོད་བྱེད་སའམ་རྒྱུག་ཁྱི་ལྟ་བུར་གྱུར་ཡོད་པ་མ་ཟད། གསར་སྐྱེས་སློབ་ཕྲུག་ཚོའི་ལས་ཞུགས་ཀྱི་སྒོ་མོ་བཙན་གནོན་བྱས་ཡོད་པ།

༡༤པེ་ཅིན་སྲིད་གཞུང་གིས་རྒྱ་རིགས་ཚོང་བ་ཚོར་མ་དངུལ་གྱིས་རྒྱབ་སྐྱོར་ཤུགས་ཆེན་བྱས་ཏེ། བོད་ཀྱི་ཚོང་ལས་ཁྲོམ་ར་བཟང་ཤོས་ཚང་མ་བདག་འཛིན་བྱེད་དུ་བཅུག་སྟེ། བོད་ཀྱི་ཚོང་ལས་ཁྲོམ་ར་ཚང་མར་བཙན་འཛུལ་བྱས་ཏེ། བོད་རིགས་མི་དམངས་ཀྱི་ཚོང་ལས་མདུན་ལམ་ལ་གནོད་འཚེ་ཚད་ལས་བརྒལ་བ་བཟོ་བཞིན་པ།

༡༥འབྲེལ་ཡོད་ལས་ཁུངས་ཁག་གི་དཔོན་རིགས་ཆེ་ཆུང་ཚང་མའི་བུ་ཕྲུག་ཆུང་མ་དང་བཅས་པའི་རྒྱས་ཟ་རྒྱས་འདུག་རྒྱས་འགྲོ་བྱེད་པ་དང༌། ལྐོག་དངུལ་སྣ་ཚོགས་བླངས་པ་དཔེར་ན། སྤྱི་ལོ་ཉིས་སྟོང་བརྒྱད་ལོའི་ལྐོག་ཟ་རུལ་སུང་གི་སྙན་ཐོ་ཞིག་ཏུ་འཁོད་པ་ལྟར་ན། ཨ་སྒོར་དུང་ཕྱུར་སྟོང་གཅིག་དང་ལྔ་བརྒྱ་དཔོན་རིགས་ཁྲི་གཉིས་དང་ཉིས་སྟོང་གིས་ལྐོག་ཟ་བྱས་ཚུལ་བཀོད་འདུག་པ་ལྟ་བུ་དང༌། སྤྱི་ལོ་ཉིས་སྟོང་དྲུག་གི་སྙན་ཐོ་ཞིག་ཏུ་འཁོད་པ་ལྟར་ན། རྒྱལ་ནང་དུ་དམངས་སྒོར་དུང་ཕྱུར་ཡན་གྱི་འབྱོར་ལྡན་པ་ཁྲི་གཅིག་དང་སྟོང་གཉིས་ཡོད་པའི་ཁྲོད་དུ་སྟོང་ཕྲག་བརྒྱད་ལྷག་དཔོན་རིགས་ཚོ་དང་ཡང་ན་ཁོ་ཚོའི་ཉེ་འབྲེལ་རེད། མདོར་ན་འདི་ལྟར་པེ་ཅིན་སྲིད་གཞུང་གིས་སྲིད་དབང་སྒེར་འཛིན་བྱས་པ་མ་ཟད། དཔལ་འབྱོར་ཡང་སྒེར་འཛིན་བྱས་ཡོད་པས་རེད།

༡༦པེ་ཅིན་སྲིད་གཞུང་གིས་བོད་ཀྱི་གཏེར་ཁ་ཚང་མ་སྔོག་འདོན་བྱས་ནས་ཁོར་ཡུག་ལ་གཏོར་བརླག་ཚབས་ཆེན་བཟོས་ཏེ། མི་དམངས་ཀྱི་འཚོ་བར་དཀའ་ངལ་སྤྲད་པ་མ་ཟད། བོད་ཀྱི་འབྲོག་པ་རྣམས་གྲོང་ཁྱེར་དུ་བསྡུས་ནས་བོད་ཀྱི་རྔམ་བརྗིད་དང་མཛེས་སྡུག་ལྡན་ལ། ་གཏེར་ཁ་དང་སྐྱེ་དངོས་རྩ་ཆེན་དཔག་ཏུ་མེད་པའི་མཐའ་ཡས་པའི་རི་ཆུ་ཐང་གསུམ་སྒེར་འཛིན་བྱེད་འདོད་ཀྱི་འཆར་གཞི་རྒྱ་ཆེན་འཐེན་བཞིན་པ།

༡༧པེ་ཅིན་སྲིད་གཞུང་གིས་ཁ་ནས་དད་མོས་རང་དབང་ཟེར་ཞོར་ལ་དོན་གྱིས་བོད་རིགས་མི་དམངས་ལ་རང་གི་རྩ་བའི་བླ་མའི་སྐུ་པར་ཡང་བཤམས་མི་ཆོག་པའི་བཙན་བཀའ་རབ་དང་རིམ་པས་མནར་གཅོད་གཏོང་བ་དང༌། ས་གནས་འགའ་ཞིག་ཏུ་ཁྲིམས་ཆད་ཀྱང་བཅད། མཐའ་ན་ད་སྐབས་ཨ་མདོ་དང་ཁམས་པའི་མི་དམངས་རྣམས་ལྷ་སར་མཆོད་མཇལ་ཏུ་འགྲོ་རྒྱུ་ནི་ཕྱི་རྒྱལ་ལ་འགྲོ་བ་ལས་ཀྱང་དཀའ་ཁག་ཆེ་བའི་ཚོད་དུ་བཏང་འདུག་པ་དང༌། གྲྭ་བ་སློབ་གཉེར་བ་རྣམས་ལྷ་སའི་སེ་འབྲས་དགེ་གསུམ་སོགས་དགོན་སྡེ་ཆེ་ཁག་ལ་སློབ་གཉེར་ཏུ་འགྲོ་རྒྱུ་ནི་ཨ་རིའི་ཧྭ་ཧྥུའི་སློབ་ཆེན་དུ་འགྲོ་རྒྱུ་ལས་ཀྱང་དཀའ་ཁག་ཆེ་བའི་གནས་སུ་བཏང་སྟེ་གཏན་འགོག་བྱས་ཡོད་པ།

༡༨མདོར་ན་བོད་མི་དམངས་ཀྱི་སྐྱིད་སྡུག་ངག་ཐོག་དང་ཡིག་ཐོག་ནས་སྙན་ཞུ་འབུལ་མཁན། སེམས་ཀྱི་དཀའ་སྡུག་བརྗོད་དེ་ཁྲོམ་སྐོར་གནང་མཁན་ཚང་མར་ཁྲིམས་ཆད་འདྲ་མིན་གྱི་མནར་གཅོད་ཚད་ལས་བརྒལ་བ་བཏང་སྟེ། བོད་ཀྱི་སྨྲ་བརྗོད་རང་དབང་དང༌། འགྲོ་བ་མིའི་ཐོབ་ཐང་ལ་རྡོག་བརྫུས་བཏང་ནས་ཁྲིམས་ལུགས་ལས་རྐུབ་སྟེགས་ལ་དབང་ཆེ། རྐུབ་སྟེགས་ལས་སྒོར་མོ་དབང་ཆེ། སྒོར་མོ་ལས་ལྕགས་སྒྲོག་དང་མེ་མདའ་དབང་ཆེ་བས་ཡོད་ཚད་ལ་བཙན་གནོན་དྲག་གནོན་བྱས་ཏེ་ནང་སྲུང་འགྲོ་གྲོན་རྒྱལ་སྲུང་འགྲོ་གྲོན་ལས་ཀྱང་ཆེ་རུ་བཏང་སྟེ།སྤྱི་བདེ་ཉེན་རྟོག་ནས་མི་དམངས་ཁྲིམས་ཁང༌། མི་དམངས་ཁྲིམས་ཁང་ནས་མཐོ་རིམ་ཏང་སྲིད་བར་དུ་ལྐོག་ཟ་རུལ་སུང་དུ་གྱུར་འདུག་པ་འདིའི་དབང་གིས་ད་གཟོད་ཆེས་དམའ་རིམ་སྤྱི་ཚོགས་ཀྱིས་དཀའ་སྡུག་འདི་དག་མ་བཟོད་པར།པེ་ཅིན་སྲིད་གཞུང་ལ་ཞུ་ཡིག་དང་ཞུ་གཏམ། ཞི་རྒོལ་བྱས་ན་སྲོག་ཁྲིམས་གཅོད་པ་སོགས་ཁྲིམས་ཆད་འདྲ་མིན་གཅོད་པ་མ་ཟད། དེ་བས་ཀྱང་བཟོད་དཀའ་བ་ནི་གཤིན་རྗེ་ལས་མཁན་བཞིན་གཅར་རྡུང་བཟོད་ཐབས་བྲལ་བའི་མནར་གཅོད་སྣ་ཚོགས་གཏོང་སྲིད་པ། མཐའ་ན་གོང་ས་མཆོག་ལ་བསྟོད་གླུ་ཞིག་བླངས་ནའང་ཁྲིམས་ཆད་གཅོད་པས་ད་གཟོད་བོད་རིགས་མི་དམངས་རྣམས་འུ་ཐུག་ཐབས་ཟད་དུ་གྱུར་ནས་རང་ལུས་ཞུགས་འབུལ་གྱི་ཞི་རྒོལ་གྱི་ལམ་ཁ་ཚབས་ཆེན་འདི་བདམས་ཏེ། རུལ་སུང་དུ་གྱུར་བའི་པེ་ཅིན་སྲིད་གཞུང་ལ་ཞི་རྒོལ་མི་བྱེད་ཐབས་མེད་དུ་གྱུར་བ་ནི་དོན་དངོས་ཀྱི་སྐད་ཆ་ངོ་མ་དེ་ཡིན་པས། པེ་ཅིན་སྲིད་གཞུང་དང༌། ཡང་ན་པེ་ཅིན་སྲིད་གཞུང་དང་འབྲེལ་བའི་ལས་རིགས་ཁག་གིས་ཉམ་ཆུང་བའི་གྲྭ་རྐྱང་ཞིག་གི་གནས་ལུགས་དང་རྒྱུ་འབྲས་ཀྱི་སྐད་ཆ་འདིར་བསམ་གཞིག་དང་རྟོག་ཞིབ་ཅིག་བྱས་ཏེ། མ་འོངས་པར་བོད་མི་རིགས་ཀྱི་ཁྲོད་དུ་རང་ལུས་ཞུགས་འབུལ་གྱི་དོན་རྐྱེན་ཚབས་ཆེན་མི་འབྱུང་བའི་ཀུ་ཡངས་དཀྱིལ་ཡངས་ཀྱི་སྲིད་ཇུས་ཤིག་གིས་འགན་འཁྲི་དང་ལེན་བྱས་ཏེ། བོད་སྤྱི་དམངས་ཀྱི་རེ་འདོད་བཞིན་གོང་ས་མཆོག་ཕ་ཡུལ་ལ་གདན་ཞུ་བྱས་ནས་བོད་ལ་ཐོབ་འོས་པའི་རང་སྐྱོང་གཙང་མའི་ཁེ་དབང་ཞིག་གནང་རོགས་ཞེས་ང་རང་བོད་པ་ཞིག་ཡིན་པའི་ཆ་ནས་འབོད་སྐུལ་སྙིང་ནས་ཞུས་པ་དང་ལྷན་དུ་ངས་གཤམ་དུ་གནད་དོན་འདི་དག་ཅུང་རྒྱས་བཤད་བྱ་རྒྱུ་ཡིན་པས་གཟིགས་འདོད་ཡོད་པའི་ཀློག་མཁན་གྲོགས་པོ་རྣམས་ཀྱིས་གཟིགས་པར་ཞུ།

༄༅། ། རང་ལུས་ཞུགས་འབུལ་དང་པེ་ཅིན་སྲིད་གཞུང༌།

སྤྱི་ལོ་༡༩༩༨ལོར་ཕྱི་སྡོད་བོད་མི་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་ཀྱིས་རང་ལུས་ཞུགས་འབུལ་གྱིས་པེ་ཅིན་སྲིད་གཞུང་ལ་ཞི་རྒོལ་བྱས་ནས་ལོ་བརྒྱད་ཀྱི་རྗེས་སུ་སྤྱི་ལོ་༢༠༠༦ལོར་ལྷག་པ་ཚེ་རིང་གིས་རང་ལུས་ཞུགས་འབུལ་བྱས་ཏེ་པེ་ཅིན་སྲིད་གཞུང་ལ་ཞི་རྒོལ་བྱས་ཏེ་ལོ་གསུམ་འགོར་རྗེས།སྤྱི་ལོ༢༠༡༠ཡི་སྤྱི་ཟླ་༢པའི་ཚེས་༢༧ཉིན་གཞིས་སྡོད་བོད་མི་རྒྱལ་གཅེས་དཔའ་བོ་བཀྲ་བྷེའམ་བློ་བཟང་བཀྲ་ཤིས་ལགས་ཀྱིས་རང་ལུས་ཞུགས་འབུལ་གནང་སྟེ་པེ་ཅིན་སྲིད་གཞུང་ལ་ཞི་རྒོལ་བྱས་པ་ནས་བཟུང་བོད་ཕྱི་ནང་གཉིས་ནས་ད་ལྟའི་བར་དུ་བོད་མི་དགུ་བཅུ་ལྷག་གིས་རང་ལུས་ཞུགས་འབུལ་བྱས་ཏེ་པེ་ཅིན་སྲིད་གཞུང་ལ་ཞི་རྒོལ་བྱས་མོད། ཧོའུ་ཅན་ཐོ་གཙོ་བྱས་པའི་པེ་ཅིན་སྲིད་གཞུང་གི་མཐོ་རིམ་མི་སྣ་ཚོས་ཡ་ང་ཞིང་ཡིད་སྐྱོ་བའི་གནས་ཚུལ་འདི་ལ་སེམས་ཁུར་ཞིག་ཕར་ཟད་མཐའ་ན་དོ་སྣང་ཕྲན་བུ་ཞིག་ཀྱང་མི་བྱེད་པར་ལན་རེར་གོང་ས་མཆོག་ལ་མཚན་དམོད་རེ་ཞུས། ལན་རེར་བསམ་བློ་ཡིས་དབེན་པའི་བླ་སྤྲུལ་འགའ་བཙན་ཤུགས་ཀྱིས་བེད་སྤྱོད་བྱས་ཏེ་ཁོང་རྣམ་པ་དང་ཡང་ན་གོང་ས་མཆོག་ལ་མཚན་དམོད་རེ་ཞུ་རུ་འཇུག་པ་དང༌། ས་གནས་དམག་དཔུང་གི་སྟོབས་ཤུགས་ལ་བརྟེན་ནས་མེ་མདའ་དང་ལྕགས་སྒྲོག་སྒོར་མོ་གསུམ་བཀོལ་ཏེ་བཙན་གནོན་རྐྱང་རྐྱང་བྱེད་པ་ལས། པེ་ཅིན་སྲིད་གཞུང་གི་མཐོ་རིམ་དཔོན་རིགས་ཚོ་སེམས་འཚབ་དང་ཀུ་ཡངས་ཀྱི་རྣམ་པ་ཅི་ཡང་མེད་པར་ལྷོད་འདུག་དང་སྐྱིད་འདུག་ཁོ་ན་བྱས་ཡོད།

གནས་ཚུལ་འདིར་བསམ་བློ་ཞིབ་མོ་རེ་བཏང་ན་འདི་ནི་ཆེས་ཡིད་སྐྱོ་ཞིང་ཆེས་ན་ཟུག་སྐྱེ་བའི་གནས་ཚུལ་ཞིག་ཡིན་ཏེ། པེ་ཅིན་སྲིད་གཞུང་གིས་དུས་རྒྱུན་དམངས་གཙོ་ཞེས་པ་ཁ་ནས་མ་ཎི་འདོན་འདོན་བྱེད་ཀྱང་བོད་མི་བརྒྱད་ཅུ་ལྷག་གིས་ཚེ་སྲོག་སྒྲོན་མེ་རུ་བཞག་པའི་ཞུ་འབོད་ལ་དོ་སྣང་ཕྲན་བུ་ཞིག་ཀྱང་མི་བྱེད་པར་ཁོ་ཚོའི་རྐུབ་སྟེགས་འགེབས་ཅི་ཐུབ་བྱེད་པའི་གནས་སྟངས་ནི་སྲིད་དབང་སྒེར་འཛིན་རང་ལུགས་པའི་ལྟ་སྤྱོད་ཕྱི་རུ་མངོན་པའི་རྟགས་མཚན་ཁོ་ན་རེད། འདི་ནི་ཚེ་སྲོག་གི་ཞུ་འབུལ་ཞིག་ཡིན་པ་ལས་ས་སྨྱུག་གི་འབོད་པ་ཞིག་གཏན་ནས་མ་རེད།

ཉེ་བའི་ལོ་འགའི་ནང་དུ་རང་ལུས་ཞུགས་འབུལ་གནང་མཁན་དག་ངོ་སྤྲོད་ཕྲན་བུ་ཞིག་བྱས་ན། རྒྱལ་གཅེས་དཔའ་བོ༡ཐུབ་བསྟན་དངོས་གྲུབ། དབུས་གཙང་གཞིས་རྩེའི་མི་སྐྱ། ཕྱི་སྡོད་བོད་མི། ༢ལྷག་པ་ཚེ་རིང༌། ལྷོ་ཁ་མཚོ་སྣ། ཕྱི་སྡོད་བོད་མི། མི་སྐྱ། ༣བཀྲ་བྷེའམ་བློ་བཟང་བཀྲ་ཤིས། ཨ་མདོ་རྔ་བའི་གྲྭ་བ། ༤བློ་བཟང་ཕུན་ཚོགས། ཨ་མདོ་རྔ་བའི་གྲྭ་བ། ༥ཚེ་དབང་ནོར་བུ།ཁམས་རྟའུ། གྲྭ་བ། ༦བློ་བཟང་སྐལ་བཟང༌། ཨ་མདོ་རྔ་བའི་གྲྭ་བ། ༧བློ་བཟང་དཀོན་མཆོག ཨ་མདོའི་རྔ་བ།གྲྭ་བ། ༨སྐལ་བཟང་དབང་ཕྱུག ཨ་མདོ་རྔ་བ། གྲྭ་བ། ༩ཆོས་འཕེལ། ཨ་མདོ་རྔ་བ། གྲྭ་བ།  ༡༠མཁའ་དབྱིངས། ཨ་མདོ་རྔ་བའི་མི་སྐྱ། ༡༡ནོར་བུ་དགྲ་འདུལ། ཨ་མདོ་རྔ་བ།  མི་སྐྱ།  ༡༢བསྟན་འཛིན་དབང་མོ། ཨ་མདོ་རྔ་བ། བཙུན་མ། ༡༣ཟླ་བ་ཚེ་རིང༌། ཁམས་དཀར་མཛེས་ཀྱི་གྲྭ་བ། ༡༤དཔལ་ལྡན་ཆོས་མཚོ།  ཁམས་རྟའུ། བཙུན་མ།༡༥ཤེས་རབ་ཚེ་རྡོར། ཕྱི་སྡོད་བོད་མི། མི་སྐྱ། ༡༦བོད་ཕྲུག ཁམས་དཀར་མཛེས། ཕྱི་སྡོད། གྲྭ་བ། ༡༧རོང་ཚ་བསྟན་འཛིན་ཕུན་ཚོགས། ཁམས་ཆབ་མདོ། མི་སྐྱ། ༡༨བློ་བཟང་ཚུལ་ཁྲིམས། ཨ་མདོ་རྔ་བ། མི་སྐྱ༡༩བསྟན་ཉི། ཨ་མདོ་རྔ་བ། མི་སྐྱ།༢༠སྤྲུལ་སྐུ་བསོད་བྷ་རིན་པོ་ཆེ། ཨ་མདོའི་མགོ་ལོག  སྤྲུལ་སྐུ༢༡བློ་བཟང་འཇམ་དབྱངས། ཨ་མདོའི་རྔ་བ། མི་སྐྱ༢༢རིག་འཛིན་རྡོ་རྗེ། ཨ་མདོའི་རྔ་བ། མི་སྐྱ། ༢༣བསོད་ནམས་རབ་ཡངས། ཁམས་ཁྲིན་འདུ། མི་སྐྱ། ༢༤བསྟན་འཛིན་ཆོས་སྒྲོན། ཨ་མདོའི་རྔ་བ། བཙུན་མ། ༢༥བློ་བཟང་རྒྱ་མཚོ། ཨ་མདོའི་རྔ་བ། གྲྭ་བ། ༢༦དམ་ཆོས། ཨ་མདོའི་བོང་སྟག། གྲྭ་བ། ༢༧སྣང་གྲོལ།ཁམས་འཛམ་ཐང༌། མི་སྐྱ།༢༨ཚེ་རིང་སྐྱིད། ཨ་མདོའི་རྨ་ཆུ། སློབ་མ་བུད་མེད། ༢༩རིན་ཆེན། ཨ་མདོའི་རྔ་བ། བུད་མེད། ༣༠རྡོ་རྗེ། ཨ་མདོའི་རྔ་བ། མི་སྐྱ། གྴཀྴུ༣༡དགེ་བྷེ། ཨ་མདོའི་རྔ་བ།  མི་སྐྱ། ༣༢འཇམ་དབྱངས་དཔལ་ལྡན། ཨ་མདོའི་རེབ་གོང༌། གྲྭ་བ། ༣༣བློ་བཟང་ཚུལ་ཁྲིམས། ཨ་མདོའི་རྔ་བ། གྲྭ་བ། ༣༤བསོད་ནམས་  དར་རྒྱས་སམ་བསོད་ལོ། ཨ་མདོའི་རེབ་གོང༌། མི་སྐྱ། ༣༥འཇམ་  དཔལ་ཡེ་ཤེས། ཕྱི་སྡོད། མི་སྐྱ། ༣༦ཤེས་རབ་བམ་བློ་བཟང་ཤེས་ རབ། ཨ་མདོའི་རྔ་བའི་གྲྭ་བ། ༣༧བསྟན་པ་དར་རྒྱས། ཨ་མདོ་རྔ་བའི་རྒྱལ་རོང་ཚོ་བདུན། ། གྲྭ་བ། ༣༨འཆི་མེད་དཔལ་ལྡན། ཨ་  མདོའི་རྔ་བའི་རྒྱལ་རོང་ཚོ་བདུན། གྲྭ་བ། ༣༩ཆོས་འཕགས་སྐྱབས། ཁམས་འཛམ་ཐང༌། མི་སྐྱ།༤༠བསོད་ནམས། ཁམས་འཛམ་ཐང། མི་སྐྱ། ༤༡རྡོ་རྗེ་ཚེ་བརྟན། ཨ་མདོའི་འབོ་ར། མི་སྐྱ། ༤༢དར་རྒྱས། ཨ་མདོའི་རྔ་བ། མི་སྐྱ། ༤༣རི་ཀྱོ། ཁམས་འཛམ་ཐང༌།བུད་མེད།༤༤རྟ་མགྲིན་ཐར། ཨ་མདོའི་གཅན་ཚ། མི་སྐྱ། ༤༥ངག་དབང་ནོར་འཕེལ། ཨ་མདོའི་རྔ་བ། མི་སྐྱ། ༤༦བསྟན་འཛིན་མཁས་གྲུབ། ཁམས་ཁྲིན་འདུ། མི་སྐྱ། ༤༧ཚེ་དབང་རྡོ་རྗེ། བོད་ལྗོངས་འདམ་གཞུང༌། མི་སྐྱ། ༤༨བློ་བཟང་བློ་འཛིན། ཨ་མདོའི་རྒྱལ་རོང་ཚོ་བདུན་དགོན་པ། གྲྭ་བ། ༤༩བློ་བཟང་བསྟན་འཛིན། ཨ་མདོ་རྔ་བ། གྲྭ་བ། ༥༠བློ་བཟང་ཚུལ་ཁྲིམས། ཨ་མདོ་རྔ་བ། གྲྭ་བ།༥༡སྒྲོལ་དཀར་མཚོ། ཨ་མདོའི་གཙོད། བུད་མེད། ༥༢གཅོད་པ། ཨ་མདོའི་རྔ་བ། མི་སྐྱ། ༥༣ལུང་རྟོགས། ཨ་མདོའི་རྔ་བ། གྲྭ་བ།༥༤བཀྲ་ཤིས། ཨ་མདོའི་རྔ་བ། མི་སྐྱ། ཁོང་གིས་རང་ལུས་ཞུགས་འབུལ་གྱི་རྗེས་ནས་ཟླ་བ་གཅིག་ལྷག་ལ་རང་ལུས་ཞུགས་འབུལ་གྱི་དོན་རྐྱེན་བྱུང་བར་གོ་ཐོས་མ་བྱུང་མོད༌། སྤྱི་ཟླ་བཅུ་བའི་ཚེས་གཅིག་ཉིན། ༥༥ཁམས་རྫ་སྟོད་ཀྱི་མི་སྐྱ་གཡུང་དྲུང་གིས་རང་ལུས་ཞུགས་འབུལ་གནང་སྟེ། གོང་ས་མཆོག་དང་རྒྱལ་བ་ཀརྨ་བ་གཉིས་རང་ཡུལ་དུ་ཕེབས་དགོས་པ་དང༌། མཁས་དབང་བློ་བཟང་སེང་གེ་བོད་ཀྱི་རྒྱལ་བོ་ཡིན་པའི་སྐད་འབོད་སྒྲོག་སྟེ། རང་ལུས་ཞུགས་འབུལ་གནང་སྟེ་སྐུ་གྲོངས། དེའི་རྗེས་༥༦ཁམས་ནག་ཆུ་ཡི་འབྲི་རུ་རྫོང་གི་མི་སྐྱ་རྩོམ་པ་པོ་དགུ་འགྲུབ་ཀྱིས་རང་ལུས་ཞུགས་འབུལ་བྱས་ཏེ་ཞི་རྒོལ་བྱས་ནས་སྐུ་གྲོངས། ༥༧ཨ་མདོ་གཙོད་ཀྱི་མི་སྐྱ་སངས་རྒྱས་རྒྱ་མཚོ་དང༌། ༥༨ཨ་མདོ་གཙོད་ཀྱི་མི་སྐྱ་རྟ་མགྲིན་རྡོ་རྗེ། ༥༩ཨ་མདོ་འབོ་རའི་མི་སྐྱ་ལྷ་མོ་སྐྱབས། ༦༠ཨ་མདོ་ཧོར་ཁ་རྒྱའི་དོན་འགྲུབ། ༦༡ཨ་མདོ་བླ་བྲང་གི་རྡོ་རྗེ་རིན་ཆེན། ༦༢ཨ་མདོ་ཨ་མཆོག་གི་ལྷ་མོ་ཚེ་བརྟན། ༦༣ཨ་མདོ་བསང་ཁོག་གི་ཐུབ་དབང་སྐྱབས།༦༤ཁམས་ནག་ཆུ་འབྲི་རུ་རྫོང་གི་ཚེ་འཕགས་སོགས་ཀྱིས་སྔ་ཕྱིར་རང་ལུས་ཞུགས་འབུལ་གནང་སྟེ་གོང་ས་མཆོག་གདན་འདྲེན་ཞུ་དགོས་པ་དང་བོད་ལ་རང་དབང་དགོས་པའི་སྐད་འབོད་གནང་སྟེ་སྐུ་གཤེགས། ༦༥ཁམས་ནག་ཆུ་འབྲི་རུ་ཡི་རྒྱལ་གཅེས་དཔའ་བོ་ཚེ་འཕགས་ཀྱི་སྤུན་བསྟན་འཛིན་གྱིས་སྤུན་དང་ལྷན་དུ་རང་ལུས་ཞུགས་འབུལ་གནང་སྟེ་གོང་ས་མཆོག་བོད་དུ་གདན་འདྲེན་ཞུ་དགོས་པ་དང་བོད་ལ་རང་དབང་དགོས་པའི་འབོད་སྐུལ་གནང་སྐབས་རྒྱ་ནག་ཉེན་རྟོག་པས་ཁོང་གི་སྐུ་ཕུང་ཁྱེར་ཟིན་པས་ད་ལྟ་གསོན་གྲོངས་ཀྱི་གནས་ཚུལ་གསལ་བོ་མི་ཤེས། ༦༦རྡོ་རྗེ་ལྷུན་འགྲུབ། ཨ་མདོ་རེབ་གོང༌། ༦༧རྟ་མགྲིན་མཚོ། ཨ་མདོ་རེབ་གོང་སྒྲོ་རོང་བོ། བུད་མེད། ༦༨རྡོ་རྗེ། ཨ་མདོ་རྔ་བ། གྲྭ་བ། ༦༩བསམ་འགྲུབ། ཨ་མདོ་རྔ་བ། གྲྭ་བ། ༧༠རྡོ་རྗེ་སྐྱབས། ཨ་མདོ་རྔ་བ། གྲྭ་བ། རྒྱལ་གཅེས་དཔའ་བོ་འདི་གསུམ་ཀ་ཨ་མདོ་རྔ་བའི་སྔོ་རྒྱ་དགོན་གྱི་གྲྭ་བ། ༧༡ཚེ་རྒྱལ། ཁམས་ནག་ཆུ་འབྲི་རུ། མི་སྐྱ། ༧༢སྐལ་བཟང་སྦྱིན་པ་རེབ་གོང་མདོ་བའི་མི་སྐྱ།༧༣མགོན་པོ་ཚེ་རིང་ཨ་མདོ་གཙོད་ཀྱི་ཀླུ་ཤོད། མི་སྐྱ། ༧༤སྙིང་དཀར་བཀྲ་ཤིས། ཨ་མདོ་རེབ་གོང་སྒྲོ་རོང་བོ། མི་སྐྱ། ༧༥སྙིང་ལྕགས་འབུམ་ཨ་མདོ་རེབ་གོང་མདོ་བའི་མི་སྐྱ། ༧༦མཁར་འབུམ་རྒྱལ། ཨ་མདོ་རེབ་གོང་གི་རྒྱལ་བོ་ཀླུ་ཆུ། མི་སྐྱ། ༧༧ ཏིང་འཛིན་སྒྲོན་མ། ཨ་མདོ་རེབ་གོང་གི་བཙན་མོ། བུད་མེད། ༧༨ལྕགས་མོ་སྐྱིད། ཨ་མདོ་རེབ་གོང་གི་སྨད་པ། བུད་མེད། ༧༩གསང་བདག་ཚེ་རིང༌། ཨ་མདོ་རེབ་གོང་གི་མགོན་ཤུལ། མི་སྐྱ། ༨༠དབང་ཆེན་ནོར་བུ། ཨ་མདོ་ཡ་རྫིའི་རྐང་ཚ།མི་སྐྱ། ༨༡ཚེ་རིང་དོན་འགྲུབ།ཨ་མདོ་བླ་བྲང་གི་ཨ་མཆོག མི་སྐྱ། ༨༢ཀླུ་འབུམ། ཨ་མདོ་རེབ་གོང་སྒྲོ་རོང་བོ། མི་སྐྱ། ༨༣རྟ་མགྲིན་སྐྱབས། ཨ་མདོ་མདོ་ལྷོའི་ཀླུ་ཆུ། མི་སྐྱ། ༨༤རྟ་མགྲིན་རྡོ་རྗེ། ཨ་མདོ་རེབ་གོང་མགོན་ཤུལ། མི་སྐྱ། ༨༥སངས་རྒྱས་སྒྲོལ་མ། ཨ་མདོ་རེབ་གོང་མགོན་ཤུལ། བཙུན་མ། བུད་མེད། ༨༦དཀོན་མཆོག་ཚེ་རིང༌། ཨ་མདོ་བླ་བྲང་ཨ་མཆོག་མི་སྐྱ། ༨༧དབང་རྒྱལ། ཁམས་གསེར་རྟ་རྫོང་གི་སློབ་མ། མི་སྐྱ། ༨༨སངས་རྒྱས་བཀྲ་ཤིས། ཨ་མདོ་བླ་བྲང་བསང་ཁོག མི་སྐྱ།༨༩སྐལ་བཟང་སྐྱབས། ཨ་མདོ་མཛོད་དགེ་རྫོང༌། མི་སྐྱ། ༩༠ཚེ་རིང་རྣམ་རྒྱལ། ཨ་མདོ་ཀླུ་ཆུ་རྫོང༌། ༩༡བན་ཏེ་མཁར། ཨ་མདོ་གཙོད་མཛོད་དགེ་མི་སྐྱ། ༩༢དཀོན་མཆོག་སྐྱབས། ཨ་མདོ་མཛོད་དགེ་རྫོང༌།  མི་སྐྱ།

རྒྱལ་གཅེས་དཔའ་བོ་འདི་དག་གིས་རང་ལུས་མཆོད་མེ་རུ་བཞག་ནས་རེ་བ་གང་ཞིག་འདོན་གྱི་ཡོད་དམ་ཞེ་ན། མི་སྣ་དགུ་བཅུ་ལྷག་གིས་གོང་ས་མཆོག་བོད་ལ་གདན་འདྲེན་ཞུ་དགོས་པ་དང༌། བོད་ལ་རང་དབང་དགོས་པའི་འབོད་སྐུལ་ཞུས་པ་དེ་རེད། མི་གཅིག་གིས་བོད་རང་བཙན་གྱི་འབོད་སྐུལ་གནང་འདུག སྐད་ཆ་རྒྱུ་འབྲས་ཤིག་བཤད་ན། ད་ལྟའི་པེ་ཅིན་སྲིད་གཞུང་གིས་བོད་རང་བཙན་ནི་དང་ལེན་བྱེད་མི་ཐུབ་པའམ་དང་ལེན་བྱེད་ཐུབ་པའི་དབང་ཆའང་མེད་ཀྱང༌། གོང་ས་མཆོག་བོད་ལ་གདན་འདྲེན་ཞུ་བ་དང་བོད་མི་རིགས་ལ་ཐོབ་འོས་པའི་རང་དབང་ཞིག་སྟེར་རྒྱུའི་དབང་ནུས་ཁོ་ཚོ་ཡོད་ལ། དབང་ནུས་དེ་བཀོལ་འོས་པ་ཞིག་ཡིན་མོད། ཁོ་ཚོས་སྲིད་དབང་སྒེར་གཅོད་བྱས་ཏེ། ལག་ནས་ས་གནས་དམག་དཔུང་ལ་བརྟེན་ནས་མེ་མདའ་དང་ལྕགས་སྒྲོག་བཀོལ་ནས་མི་དམངས་ལ་བཙན་གནོན་རྐྱང་རྐྱང་བྱེད་པ་དང༌།ཁ་ནས་ཁ་བྲལ་ལ་ངོ་རྒོལ་བྱེད་དགོས་ཞེས་གོང་ས་མཆོག་དགྲ་རུ་བཟུང་བ་དང་དཔའ་བོ་འདི་དག་གི་འབོད་སྐུལ་སྣང་མེད་དུ་བཞག་ནས་སྲིད་དབང་སྒེར་གཅོད་བྱས་ཏེ་མི་དམངས་དུང་ཕྱུར་མང་བོའི་མ་འོངས་པའི་སྐྱིད་སྡུག་ལ་བསམ་གཞིག་རྣལ་མ་ཞིག་མི་གཏོང་བར་སྐྱིད་འདུག་ལྷོད་འདུག་འདྲ་བོ་བྱེད་ཀྱི་ཡོད་མོད། དོན་དངོས་ཀྱིས་རང་ལུས་མཆོད་མེ་རུ་འབུལ་མཁན་གྱི་མི་སྣ་འདི་དག་ནི་ཚོགས་པ་གང་རུང་ཞིག་དང་ཡང་ན་བླ་སྤྲུལ་གང་རུང་ཞིག་གིས་སྐུལ་སློང་བྱས་ཏེ་རང་ལུས་ཞུགས་འབུལ་བྱས་པ་མ་ཡིན་པར་བོད་མི་ས་ཡ་དྲུག་གི་བརྒྱ་ཆའི་གོ་བརྒྱད་ཀྱི་དཀའ་སྡུག་གི་ལོ་ཟླ་དང་རེ་བའི་ཕུགས་བསམ་དང་དུ་བླངས་པའི་རླབས་ཆེན་གྱི་རྒྱལ་གཅེས་དཔའ་བོ་བརྒྱད་ཅུ་ལྷག་རེད།

རྒྱུ་མཚན་འདིའི་དབང་གིས་པེ་ཅིན་སྲིད་གཞུང་གི་མཐོ་རིམ་མི་སྣ་ཚོས་གོང་ས་མཆོག་དགྲ་རུ་འཛིན་པ་དང་རང་ལུས་ཞུགས་འབུལ་གནང་མཁན་རྣམ་པའི་རེ་བ་སྣང་མེད་དུ་བཞག་པ་ནི་བོད་མི་ས་ཡ་དྲུག་གི་བརྒྱ་ཆའི་དགུ་བཅུ་ལྷག་དགྲ་རུ་བཟུང་བ་དང་ཁོང་རྣམ་པའི་རེ་བ་དང་དཀའ་སྡུག་སྣང་མེད་དུ་བཞག་པ་ཞིག་དང༌། བོད་མི་ས་ཡ་མང་བོའི་བསམ་བློ་དང་དད་འདུན་ལ་དབྱེ་ཞིབ་ཕྲན་བུ་ཙམ་ཡང་བྱས་མེད་པའི་མངོན་རྟགས་ཕྱི་རུ་བུད་པ་ཞིག་རེད།

༡པེ་ཅིན་སྲིད་གཞུང་དང་ལྷག་པར་དུ་བུན་ཅ་པོ་ཡིས་རང་ལུས་ཞུགས་འབུལ་ལམ་མེར་བསྲེགས་གནང་མཁན་རྣམ་པ་ནི་འཇིགས་སྐུལ་དྲག་སྤྱོད་པའི་བྱ་སྤྱོད་ཡིན་པར་བརྗོད་པ་ནི་ངོ་མ་ཆེས་མུན་ནག་གི་སྲིད་གཞུང་དང་མཐོ་རིམ་མགོ་ཁྲིད་ངོ་ཚ་མེད་པ་ཞིག་གི་སྐད་ཆ་ཡིན་ཏེ། འཛམ་གླིང་མཉམ་འབྲེལ་རྒྱལ་ཚོགས་ཀྱི་མཐོ་རིམ་དབུ་ཁྲིདམང་བོ་ཞིག་གིས་གཙོ་བྱས་ཏེ། ཧྥ་རན་སུ།འཇར་མན། ཡེ་ཀྲ་ལས། དབྱིན་ཇུ། སི་པན། སོགས་ཡོ་རོབ་གནའ་འབྲེལ་རྒྱལ་ཚོགས་ཀྱི་མཐོ་རིམ་དབུ་ཁྲིད་ཧ་ཅང་མང་བོ། དེ་བཞིན་ཨ་རི་དང༌། ལྷོ་ཨ་ཧྥེ་རི་ཀ། རྒྱ་གར། འཇར་པན། ཨོ་སི་ཁྲུ་ལེ་ཡ། ཧིན་རྡུ་ཉི་ཞི་ཡ་སོགས་འཛམ་གླིང་གི་རྒྱལ་ཁབ་ཧ་ཅང་མང་བོའི་དབུ་ཁྲིད་དང་དམངས་གཙོའི་རྒྱབ་སྐྱོར་བ་རྣམས་ཀྱིས་འདི་ནི་ཧ་ཅང་ཐབས་ཟད་འུ་ཐུག་གི་ཆེས་ཞི་བའི་རྒོལ་ལན་ཞིག་ལ་ངོས་འཛིན་གནང་གི་ཡོད་ཀྱང༌། པེ་ཅིན་སྲིད་གཞུང་གི་མཐོ་རིམ་མགོ་ཁྲིད་ཚོའི་སྣང་ངོར་འཇིགས་སྐུལ་དྲག་སྤྱོད་པར་སོང་བའི་རྒྱུ་མཚན་ཅི།

རྒྱུ་མཚན་འདིར་བོད་ཀྱི་དཔྱོད་ལྡན་པ་རྣམས་ཀྱིས་དབྱེ་ཞིབ་འདི་ལྟར་གཏོང་གི་ཡོད་དེ། པེ་ཅིན་སྲིད་གཞུང་གིས་ལོ་རབས་བརྒྱད་ཅུ་བའི་ནང་དུ་དྲུག་བཞིའི་སློབ་མའི་ཞི་རྒོལ་ལ་དྲག་གནོན་བྱས་པ་བཞིན་ད་ལྟ་ང་ཚོའི་བོད་པའི་སྟེང་དུའང་དྲག་གནོན་བྱེད་འདོད་པའི་མངོན་བརྡའམ་མངོན་རྟགས་རེད་ཅེས་བཤད་ཀྱིན་ཡོད། ད་དུང་གསལ་བཤད་བྱ་རྒྱུ་ཞིག་ནི། བུན་ཅ་པོ་ཡི་སྐད་ཆ་འདི་ནི་བུན་ཅ་པོ་ཡི་ཡིད་ལ་ཤར་བ་ཁོ་ན་མ་ཡིན་པར་པེ་ཅིན་སྲིད་གཞུང་གི་གྲོས་མོལ་ཞིག་ཡིན་པའི་ཚོར་བ་བདག་ལ་དུས་རྒྱུན་ཡོད་པས་ང་ཁོ་ཚོར་རྒྱུ་འབྲས་ཀྱི་གནས་ལུགས་ཤིག་བཤད་ཀྱི་ཡོད་པ་ནི། རྒྱ་ནག་མི་དམངས་ཀྱིས་རང་གི་རྒྱལ་ཁབ་ཀྱི་ཁེ་དབང་མི་དམངས་ཀྱི་ཁེ་དབང༌། འབྱོར་མེད་གྲལ་རིམ་གྱི་ཁེ་དབང་གི་ཆེད་དུ་མི་གྲངས་ས་ཡ་མང་བོའི་ཚེ་སྲོག་ཕུལ་བ་ནི་པེ་ཅིན་སྲིད་གཞུང་གིས་འཇིགས་སྐུལ་དྲག་སྤྱོད་པར་ངོས་འཛིན་ཞུ་ཐུབ་བམ། ད་དུང་གསལ་བཤད་བྱ་རྒྱུ་ནི་རྒྱ་ནག་གི་གསར་བརྗེ་བ་འདི་དག་གིས་འཇར་དམག་དང་ཚོགས་པ་གཞན་པའི་མི་ས་ཡ་མང་བོ་བསད་ཡོད་ཀྱང༌། རང་ལུས་ཞུགས་འབུལ་གྱིས་བོད་མི་དམངས་ཀྱི་ཁེ་དབང་རྩོད་མཁན་གྱི་བོད་ཀྱི་རྒྱལ་གཅེས་དཔའ་བོ་རྣམ་པས་ཚོགས་པ་གཞན་དང་ཡང་ན་མི་རིགས་གཞན་ལ་གནོད་འཚེ་ཁབ་གཙག་ཙམ་ཡང་བྱས་མེད་པར་རང་གི་ཚེ་སྲོག་མེ་རུ་སྒྲོན་ནས་རང་མི་རིགས་ཀྱི་ཆོས་དད་རང་དབང་དང་རིག་གནས་ཁེ་དབང་གི་ཞུ་འབོད་ནི་འཇིགས་སྐུལ་བ་དང་དྲག་སྤྱོད་དུ་སྨྲ་མཁན་ནི་མིག་གཉིས་ལོང་བར་གྱུར་བའི་མུན་ནག་གི་སྲིད་གཞུང་དང་ཡང་ན་མིག་ལོང་བར་གྱུར་བའི་མུན་ནག་མགོ་ཁྲིད་ཅིག་གི་སྐད་ཆ་ཡིན་པ་ལས། མིག་དང་ལྡན་ལ་སེམས་དང་ལྡན་པའི་མི་ཞིག་གིས་འདི་ལྟར་སྨྲ་སྲིད་དམ།

༢་པེ་ཅིན་སྲིད་གཞུང་གིས་རང་ལུས་ཞུགས་འབུལ་ལམ་མེར་བསྲེགས་གནང་མཁན་རྣམ་པའི་བྱ་སྤྱོད་ནི་ནང་བའི་ཆོས་ཀྱི་གཞུང་ལུགས་དང་འགལ་ཡོད་པར་བཤད་པ་ནི་མུན་ནག་གི་གཏམ་བཤད་ཅིག་ཡིན་ཏེ།  ནང་བའི་ཆོས་ལུགས་སུ་གཞན་དོན་དུ་རང་སྲོག་བློས་གཏོང་བ་ནི་རྒྱལ་སྲས་བྱང་ཆུབ་སེམས་དཔའི་སྤྱོད་པ་ཞིག་ཡིན་པ་ནི། སྟོན་པ་ཐུགས་རྗེ་ཅན་གྱི་རྣམ་ཐར་ལ་བལྟས་ན་ཤེས་ཐུབ་སྟེ། ཁོང་གིས་སློབ་པ་ལམ་གྱི་གནས་སྐབས་སུ་སྟག་མོ་མ་བུ་འགའ་མུ་གེར་འཆི་ལ་ཉེ་བ་ཐུགས་ཀྱིས་མ་བཟོད་པར་རང་གི་སྐུ་ལུས་སྦྱིན་ཏེ། སྐུ་སྲོག་བློས་བཏང་ནས་སྟག་མོ་མ་བུ་གསུམ་གྱི་སྲོག་སྐྱབས་པ་དེ་ནི་དེང་སྐབས་བརྩམས་ཆོས་མང་བོའི་ཁྲོད་སྟག་མོ་ལུས་སྦྱིན་གྱི་མཛད་པ་ཞེས་ས་ཁྱབ་རྡོ་ཁྱབ་ཏུ་གྱུར་ཡོད་པ་རེད། ཐེག་པ་ཆེན་པོའི་ཆོས་ཉམས་སུ་ལེན་མཁན་གྱི་སྐྱེས་བུ་ཆེན་པོ་ཞིག་ཡིན་ན་འགྲོ་བ་སེམས་ཅན་གྱི་དོན་དུ་རང་གི་ཡོད་ཚད་བློས་གཏོང་ཐུབ་པ་ནི། དཔེར་ན། སེམས་ཅན་གཅིག་གི་དོན་དུ་དམྱལ་བའི་མེ་ནང་དུ་ལོ་དུང་ཕྱུར་མང་བོ་འདུག་དགོས་ཀྱང་འདུག་ཐུབ་པ་ཞིག་ཡིན་དགོས་པར། པཎ་ཆེན་བློ་བཟང་ཆོས་རྒྱན་གྱི་ཞལ་ནས། སེམས་ཅན་རེ་རེའི་ཕྱིར་ཡང་མནར་མེད་པའི་མེ་ནང་བསྐལ་བ་རྒྱ་མཚོར་གནས་དགོས་ཀྱང་སྙིང་རྗེ་མི་སྐྱོ་བྱང་ཆུབ་མཆོག་བརྩོན་པསབརྩོན་འགྲུས་ཕར་ཕྱིན་རྫོགས་པར་བྱིན་གྱིས་རློབསཞེས་གསུངས་ཡོད་པ་རེད། རྒྱུ་མཚན་འདིའི་དབང་གིས་འགྲོ་བ་སེམས་ཅན་ནམ་རང་གི་མི་རིགས་ཀྱི་བདེ་སྐྱིད་ཀྱི་ཆེད་དུ་རང་སྲོག་བློས་བཏང་བ་ནི་ཆོས་དང་མཐུན་པ་མ་ཟད། ཆོས་ཕུལ་དུ་བྱུང་བ་ཐེག་པ་ཆེན་པོའི་ཆོས་སུ་འགྲོ་བས་འདི་ལ་མུན་ནག་གི་སྲིད་གཞུང་གི་མུན་ནག་གི་མགོ་ཁྲིད་ཅིག་དང་ཡང་ན་དེའི་རྒྱུག་ཁྱི་ཞིག་གིས་མ་གཏོགས་འདི་ལྟར་བཤད་མི་སྲིད།

༣པེ་ཅིན་སྲིད་གཞུང་གིས་རང་ལུས་ཞུགས་འབུལ་གྱི་ཞི་རྒོལ་ནི་གོང་ས་མཆོག་གིས་སྐུལ་སློང་འོག་དགེ་འདུན་པ་ཉུང་ཤས་ཤིག་གི་བྱ་སྤྱོད་དང་ལྟ་ཚུལ་ཡིན་པར་བཤད་པ་ནི་ངོ་མ་ཆེས་མུན་ནག་གི་ལྟ་ཚུལ་ཞིག་ཡིན་ཏེ།ད་ལྟའི་བར་དུ་རང་ལུས་ཞུགས་འབུལ་ལམ་མེར་བསྲེགས་བཏང་སྟེ།  ཞི་རྒོལ་གནང་མཁན་གྱི་གཞིས་སྡོད་བོད་མི་བརྒྱད་ཅུ་ལྷག་དང༌།  ཕྱི་སྡོད་བོད་མི་ལྔ་ཡིས་རང་ལུས་ཞུགས་འབུལ་གནང་བ་ལས་བརྒྱད་ཅུ་ལྷག་སྐུ་གྲོངས་པ་དང་བཅུ་གསོན་ཙམ་བྱུང་ཡོད་མོད་ཕྱི་སྡོད་བོད་མི་གསུམ་མ་གཏོགས་གཞན་རྣམས་རྨས་སྐྱོན་ཧ་ཅང་ཚབས་ཆེན་འོག་གསོན་ཙམ་བྱུང་ཡོད་ཀྱང་ད་དུང་ཁྲིམས་འོག་ཏུ་མནར་གཅོད་འཁུར་བཞིན་ཡོད། ས་གནས་གང་ཞིག་ཏུ་དཔའ་བོ་གཅིག་གིས་རང་ལུས་ཞུགས་འབུལ་བྱས་ཚེ། ས་གནས་དེའི་བོད་མི་སྟོང་ཕྲག་ནས་ཁྲི་ཕྲག་བརྒལ་བས་གདུང་སེམས་མཉམ་སྐྱེད་དང་སྐྱིད་སྡུག་མཉམ་རོལ་གྱི་སེམས་པ་མཚོན་ཕྱིར་དཔལ་འབྱོར་གྱི་རོགས་སྐྱོར་གནང་བ་དང་བསྔོ་སྨོན་གཤིན་ཆོས་སྒྲུབ་བཞིན་ཡོད། དཔེར་ན། ང་ཚོའི་རེབ་གོང་ས་གནས་ནས་རྒྱལ་གཅེས་དཔའ་བོ་འཇམ་དབྱངས་དཔལ་ལྡན་དང་བསོད་ནམས་དར་རྒྱས། རྟ་མགྲིན་ཐར། རྡོ་རྗེ་ལྷུན་འགྲུབ། རྟ་མགྲིན་མཚོ། སྐལ་བཟང་སྦྱིན་པ། སྙིང་དཀར་བཀྲ་ཤིས། སྙིང་ལྕགས་འབུམ། མཁར་འབུམ་རྒྱལ། ཏིང་འཛིན་སྒྲོལ་མ། ལྕགས་མོ་སྐྱིད། གསང་བདག་ཚེ་རིང༌། ཀླུ་འབུམ་ཚེ་རིང༌། རྟ་མགྲིན་རྡོ་རྗེ། སངས་རྒྱས་སྒྲོལ་མ། སོགས་ཀྱིས་རང་ལུས་ཞུགས་འབུལ་གནང་སྐབས། ས་གནས་བོད་མི་རྣམས་གཙོ་བྱས་ཏེ། ལ་ལས་མྱ་ངན་སྨོན་ལམ་འཚོགས་པ། ལ་ལས་ཞུགས་འབུལ་སྨོན་ལམ་གསུངས་པ། སྦྱིན་སྲེག་རོགས་རམ་བྱེད་པ། ལ་ལས་གཤིན་ཆོས་རོགས་དངུལ་འབུལ་བ། ལ་ལས་མྱ་ངན་སྙན་ཚིག་འབྲི་བ་སོགས་ཁྱོན་བསྡོམས་ས་གནས་བོད་མི་སེར་སྐྱ་འབུམ་ཕྲག་ལྷག་གིས་ཐབས་ལམ་སྣ་ཚོགས་ཀྱི་སྒོ་ནས་གདུང་སེམས་མཉམ་སྐྱེད་དང་སྐྱིད་སྡུག་མཉམ་རོལ་གྱི་བྱེད་སྒོ་སྣ་ཚོགས་སྤེལ་འདུག་པ་བདག་ལ་མིག་མཐོང་ལག་ཟིན་བྱུང་བཞིན་ཀུན་གྱིས་གླེང་བཞིན་འདུག  གནས་ཚུལ་འདིའི་སྟེང་ནས་དོན་དངོས་ཀྱི་གནས་ཚུལ་ཞིག་ཤེས་ཐུབ་པ་ནི། རེབ་གོང་ས་ཆར་མཚོན་ན་ད་ལྟའི་བར་དུ་རང་ལུས་ཞུགས་འབུལ་གནང་མཁན་ཁོང་རྣམ་པ་ལས་མེད་ཀྱང་ཁོང་རྣམ་པ་དང་བསམ་བློ་དང་འདུ་ཤེས་གཅིག་པ། ཕུགས་བསམ་གཅིག་པའི་བོད་མི་འབུམ་ལྷག་ཡོད་པ་མངོན་སུམ་གྱིས་ཤེས་ཐུབ། དེ་བཞིན་བོད་ཁམས་ཀྱི་རང་ལུས་ཞུགས་འབུལ་གནང་མཁན་རྣམ་པའི་དུར་ཕུང་ཞུགས་འབུལ་སྐབས་སུ་བོད་ཀྱི་བླ་ཆེན་ཞིག་སྐུ་གྲོངས་པ་ལས་ཀྱང་མྱ་ངན་ཕེབས་སྐྱེལ་ཞུ་མཁན་མང་བ་བརྙན་འཕྲིན་དང་ཁ་པར་དྲ་ངོས་སོགས་སུ་མཐོང་རྒྱུ་ཤིན་ཏུ་མང་བར་དཔག་ནའང་རང་ལུས་ཞུགས་འབུལ་གནང་མཁན་རྣམ་པའི་རྒྱབ་ཏུ་ཁོང་རྣམ་པ་དང་ཕུགས་བསམ་དང་དཀའ་སྡུག་གཅིག་པའི་བོད་མི་ས་ཡ་དྲུག་གི་བརྒྱ་ཆའི་བརྒྱད་ཅུ་ལྷག་ཡོད་པ་གསལ་བོར་ཤེས་ཐུབ་པས་པེ་ཅིན་སྲིད་གཞུང་གིས་དགེ་འདུན་པ་རེ་གཉིས་ཀྱི་ལྟ་ཚུལ་ཡིན་པར་བརྗོད་པ་ནི་ཆེས་མུན་ནག་གི་སྐད་ཆ་ཞིག་ཡིན་པ་བདེན་དཔང་གསལ་ཐག་ཆོད་པ་ཡིན།

༤ཡང་པེ་ཅིན་སྲིད་གཞུང་གིས་རྒྱལ་གཅེས་དཔའ་བོ་འདི་དག་ལ་གོང་ས་མཆོག་གིས་སྐུལ་སློང་བྱས་ནས་རང་ལུས་ཞུགས་འབུལ་གནང་བ་རེད་ཅེས་བཤད་པ་དེ་ཡང་མུན་ནག་གི་སྐད་ཆ་ཞིག་ཡིན་ཏེ། གོང་ས་མཆོག་གིས་དུས་རྒྱུན་བོད་མི་རྣམས་མ་ཟད། མཐའ་ན་ཕྱིའི་རྒྱལ་ཁབ་ཁག་གི་དད་ལྡན་མི་སྣ་ཡོད་དོ་ཅོག་ལ་འཚེ་མེད་ཞི་བདེའི་གྲོས་མོལ་གྱི་ལམ་སྟོན་ཁོ་ན་གནང་གི་ཡོད་པས་བོད་མི་རིགས་ལ་རང་ལུས་ཞུགས་འབུལ་གྱིས་ཞི་རྒོལ་སྤྲོད་ཅེས་གཏན་ནས་གསུངས་མི་སྲིད།ཡང་ཅིག་བཤད་ན་དུས་རྒྱུན་ཁོང་གིས་རྒྱ་བོད་གཉིས་ཕན་གྱི་དབུ་མའི་ལམ་གྱི་ཐབས་ཇུས་ནམ་ཡང་འགྱུར་མེད་སྒོས་གསུངས་བཞིན་ཡོད་ནའང་མུན་ནག་གི་སྲིད་གཞུང་གིས་ཁོང་ལ་མཚན་དམོད་སྣ་ཚོགས་ཞུ་རྒྱུ་ལས་པེ་ཅིན་སྲིད་གཞུང་གིས་གསེར་ལ་གསེར་གྱི་འདུ་ཤེས་ཅི་ཡང་ཚོར་གྱི་མེད་པ་ནི། བོད་ཀྱི་རྒྱལ་གཅེས་དཔའ་བོ་དཔའ་མོ་རྣམ་པས་རང་ལུས་ཞུགས་འབུལ་གནང་དགོས་པའི་རྒྱུ་རྐྱེན་ངོ་མ་གཅིག་རེད།

ད་དུང་གོང་ས་མཆོག་གིས་ཁྱེད་ཀྱིས་རང་ལུས་ཞུགས་འབུལ་བྱས་ཏེ་བོད་དོན་རྩོད་ཅེས་གསུངས་ཡོད་པའི་བདེན་དཔང་ཞིག་ཡོད་ན་པེ་ཅིན་སྲིད་གཞུང་གིས་བོད་མི་དམངས་ལ་ངེས་པར་དུ་སྟོན་སྲིད་ཀྱང་སྟོན་རྒྱུ་མེད་པ་འདིས་པེ་ཅིན་སྲིད་གཞུང་གིས་རང་ལུས་ཞུགས་འབུལ་ནི་ཁོ་ཚོའི་སྲིད་ཇུས་ཀྱི་ནོར་འཁྲུལ་ལས་བྱུང་བ་ཁོ་ཚོས་ཀྱང་ཤེས་ཡོད་མོད། ཤེས་ཀྱང་མ་ཤེས་ཁུལ་གྱིས་གོང་ས་མཆོག་ལ་སྐུར་འདེབས་ཀྱི་ལམ་ནས་མཚན་དམོད་ཞུ་བཞིན་པ་ནི་མུན་ནག་གི་སྲིད་གཞུང་ཞིག་གི་སྤྱོད་ངན་ཕྱི་རུ་བུད་པའི་བདེན་དཔང་དུ་འགྱུར་སྲིད།

༥པེ་ཅིན་སྲིད་གཞུང་གིས་རང་ལུས་ཞུགས་འབུལ་གནང་མཁན་རྣམ་པས་རྒྱལ་ཁབ་རྩ་མེད་དུ་གཏོང་འདོད་པ་རེད་ཅེས་དུས་རྒྱུན་མི་དམངས་ལ་གསར་འགྱུར་བརྒྱུད་ལམ་ན་སྒྲོག་བཞིན་ཡོད་པ་དེ་ཡང་མུན་ནག་གི་སྐད་ཆ་ཞིག་ཡིན་ཏེ། བོད་མི་དགུ་བཅུ་ལྷག་གིས་རང་སྲོག་བློས་བཏང་ནས་ཐོབ་འདོད་པའི་རེ་བ་ནི་གོང་ས་མཆོག་རང་གི་ཕ་ཡུལ་ལ་ཕེབས་ཐུབ་པ་དང༌། བོད་ལ་ཐོབ་འོས་པའི་སྐད་ཡིག་དང་ཆོས་ལུགས་བཀོལ་སྤྱོད་རང་དབང་ངོ་མ་ཞིག་རྩོད་ཀྱི་ཡོད་པ་དེ་རེད།ཡིན་ནའང་པེ་ཅིན་སྲིད་གཞུང་གིས་རང་ལྟ་མཁྲེགས་འཛིན་གྱིས་ཁོང་རྣམ་པའི་ཚེ་སྲོག་གི་སྐད་འབོད་དང་སྐད་འབོད་དེའི་རིན་ཐང་ལ་དོ་སྣང་ཕྲན་བུ་ཙམ་ཡང་མི་བྱེད་པར་མེ་མདའ་དང་དབང་ཤུགས། ཁྲིམས་གཅོད་དང་གཅར་རྡུང་སོགས་དབང་ཤུགས་ཁོ་ནས་ཁོ་ཚོའི་སྐད་འབོད་ལ་མནར་གཅོད་གཏོང་བཞིན་པ་ནི་ཆེས་གདུག་རྩུབ་ཆེ་བའི་མུན་ནག་གི་སྲིད་གཞུང་ཞིག་གི་དཔང་རྟགས་མ་ཡིན་ནམ།

༦པེ་ཅིན་སྲིད་གཞུང་གིས་དུས་རྒྱུན་གསར་ལམ་སྣ་ཚོགས་སུ་བོད་ཀྱི་རང་ལུས་ཞུགས་འབུལ་ལམ་མེར་བསྲེགས་གནང་མཁན་རྣམས་ནི་བོད་ཀྱི་ན་གཞོན་བསམ་མེད་འགར་ཕྱི་ཕྱོགས་ནས་སློབ་གསོའི་མགོ་སྐོར་ཐེབས་ཚུལ་གླེང་བ་ནི་མུན་ནག་གི་སྐད་ཆ་ཞིག་ཡིན་ཏེ། ད་ལྟའི་བར་དུ་རང་ལུས་ཞུགས་འབུལ་གནང་མཁན་དགུ་བཅུ་ལྷག་ཡོད་པའི་ཁྲོད་དུ་བྱིས་པའི་ཨ་མ་དང་ཨ་ཕ་མང་བོ་ཡོད་པ་མ་ཟད། སྤྲུལ་སྐུ་དང་བཙུན་མ། མི་སྐྱ་དང་སློབ་མ། གྲྭ་བ་སོགས་མི་ཧ་ཅང་མང་བོ་ཞིག་ཡོད། དེའི་ཁྲོད་ཀྱི་ལོ་ན་ཆེས་ཆེ་བ་རང་ལོ་དྲུག་ཅུ་རེ་བཞི་ཡིན་ལ་ཆེས་ཆུང་བའང་རང་ལོ་བཅུ་དྲུག་ཡིན་པས་ཆེས་ཆུང་བའི་ན་གཞོན་དེ་ཡང་བསམ་བློ་དང་བློ་ཁོག་ཚད་ལྡན་གྱི་དུས་སུ་སླེབས་འདུག་པས་གཞན་གྱི་སློབ་གསོས་མགོ་སྐོར་གཏོང་སླ་བའི་བྱིས་པའི་ལོ་ཚད་ལས་ཡོངས་སུ་བརྒལ་འདུག་པས་པེ་ཅིན་སྲིད་གཞུང་གི་སྐད་ཆ་དེ་ནི་ཆེས་ཡིད་ཆེས་བྱེད་མི་ཐུབ་པའི་བརྟག་དཔྱད་མེད་པའི་མུན་ནག་གི་སྐད་ཆ་ཞིག་རེད།

མདོར་ན། ཨ་མདོ་རྔ་བ་གཙོ་བྱས་མདོ་དབུས་ཁམས་གསུམ་གྱི་བོད་མི་དགུ་བཅུ་ལྷག་གིས་རང་ལུས་ཞུགས་འབུལ་བྱས་ཏེ། པེ་ཅིན་སྲིད་གཞུང་གི་སྲིད་ཇུས་ལ་ངོ་རྒོལ་གྱིས་གོང་ས་མཆོག་རང་ཡུལ་དུ་ཕེབས་སུ་འཇུག་དགོས། བོད་མི་དམངས་ལ་རང་དབང་དགོས་ཞེས་སྐད་འབོད་གནང་བ་ནི་འཛམ་བུ་གླིང་དུ་ལོ་ངོ་ཁྲི་ཕྲག་ལ་བྱུང་མ་མྱོང་བའི་ཞི་རྒོལ་ཆེན་མོ་ཞིག་རེད། ཡིན་ནའང་པེ་ཅིན་སྲིད་གཞུང་གིས་མིའི་ཚེ་སྲོག་ལས་སྒོར་མོ་དང་རྐུབ་སྟེགས་གལ་ཆེ་བར་བརྩིས་ནས་མཐའ་ན་ཏང་གི་ཚོགས་ཆེན་བཅོ་བརྒྱད་པའི་སྐབས་སུའང་སྒོར་མོ་ཁོ་ན་གླེང་བ་ལས་རྙེད་དཀའ་བའི་མི་ལུས་དགུ་བཅུའི་རིན་ཐང་གི་སྐད་འབོད་ལ་དོ་སྣང་ཕྲན་བུ་ཙམ་ཡང་མི་བྱེད་པར་རྩིས་མེད་དུ་བཏང་བ་ནི་པེ་ཅིན་སྲིད་གཞུང་གིས་བོད་མི་རིགས་ཀྱི་དཀའ་སྡུག་དང་ཐོབ་ཐང་རྩིས་མེད་གཏོང་གི་ཡོད་པའི་དཔང་རྟགས་གལ་ཆེན་ཞིག་ཡིན་པ་མ་ཟད། ཁོ་ཚོས་འགྲོ་བ་མིའི་ཐོབ་ཐང་རྩིས་མེད་དུ་གཏོང་གི་ཡོད་པའི་དཔང་རྟགས་གལ་ཆེན་ཞིག་ཀྱང་རེད།

མཇུག་མཐར་ངས་ཆེས་ཚབས་ཆེ་བའི་གནས་ཚུལ་འདི་དང་འབྲེལ་ནས་པེ་ཅིན་སྲིད་གཞུང་ལ་རེ་བ་ཞིག་ཞུ་འདོད་པ་ནི། པེ་ཅིན་སྲིད་གཞུང་གི་མགོ་ཁྲིད་ཚོས་བོད་མི་ཧ་ཅང་མང་བོ་ཞིག་གིས་རང་ལུས་མཆོད་མེ་རུ་བཞག་སྟེ། ཞུ་འབོད་ཀྱི་ལས་དོན་དག་ལ།ཆེས་བརྟག་དཔྱད་མེད་པའི་སྐད་ཆ་དང༌། རྒྱུ་འབྲས་མེད་པའི་སྐད་ཆ། སྐུར་འདེབས་ཀྱི་སྐད་ཆ། མདོར་ན་སྲིད་དབང་སྒེར་འཛིན་གྱི་རྫུན་གཏམ་མང་བོ་བཤད་ནས་འདུག་པ་ལས། འཛམ་གླིང་ལོ་རྒྱུས་ཁྲོད་དུ་བྱུང་མ་མྱོང་བའི་ཞི་རྒོལ་ཚབས་ཆེན་འདི་ལ་བརྟག་དཔྱད་རྒྱུ་འབྲས་ཤིག་བྱས་ཏེ། ཕྱིན་ཆད་དོན་རྐྱེན་འདི་འདྲ་མི་འབྱུང་བའི་ཐབས་ལམ་ཡང་དག་ཅིག་གི་དབུ་ཁྱུད་བརྩམས་ན་ལེགས་ཞེས་བཤད་འདོད་པ་དེ་ཡིན། ད་དུང་གསལ་བཤད་ཅིག་བྱས་ན། ཁོང་རྣམ་པས་རང་ལུས་མཆོད་མེ་རུ་བཞག་ནས་གོང་ས་མཆོག་ཕ་ཡུལ་ལ་གདན་འདྲེན་ཞུས་ཏེ་མཇལ་ཁ་ཞིག་ཞུ་འདོད་པ་དེ་དང༌། བོད་མི་རིགས་ལ་ཐོབ་འོས་པའི་རང་དབང་ཆུང་ཆུང་ཞིག་རྩོད་ཀྱི་ཡོད་པས་པེ་ཅིན་སྲིད་གཞུང་གིས་གནས་ཚུལ་འདི་ཚབས་ཆེ་ནས་ཚབས་ཆེན་དུ་འགྲོ་རུ་འཇུག་པ་ལས་སྔ་ས་ནས་ཆུང་དུ་གཏོང་རྒྱུའི་རེ་འབོད་ཞུས་པ་ཡིན།

______________________________________

མུ་འགོད།