འབྲོང་མགོ་སྐམ་པོ། (ཧྥ་རན་སི།)
ཉེ་བའི་ལོ་ཤས་སྔོན་ནས་བོད་ནང་གི་གཞོན་སྐྱེས་ཚོའི་རིགས་ཞེན་གྱི་ལྟ་བ་ལ་བླ་ན་མེད་པའི་གོང་འཕེལ་ཆེན་པོ་ཞིག་བྱུང་སྟབས། བོད་ཡུལ་གང་ས་ནས་རྒྱ་གཞུང་ལ་རྒོལ་བའི་ལས་འགུལ་ཆེ་ཕྲ་སྣ་ཚོགས་འབྱུང་བཞིན་པ་ལྟར། གཞོན་སྐྱེས་འགའ་ཞིག་གིས་དཔའ་བོ་དག་གིས་རང་ལུས་མེར་བསྲེག་གཏོང་ཐུབ་སོང་ན་ངས་གསར་འགྱུར་ཙམ་ཡང་ཕྱི་ལོག་ཏུ་མཁོ་སྤྲོད་བྱེད་མི་ཐུབ་པ་འདི་སྐྱོ་བ་ལའང་སྙམ་ནས་ལས་འགུལ་སྐོར་གྱི་གསར་འགྱུར་དག་ཕྱི་ལོག་ཏུ་གཏོང་ཨེ་ཐུབ་ལ་འབད་པ་ནི་འཐབ་རྩོད་ཀྱི་ངོ་བོ་གཞན་ཞིག་ཡིན་ཡང་། ད་ལྟའི་བར་དེ་ཉིད་ཕྱིར་བསྒྲགས་ཐབས་དང་བསྒྲགས་སྟངས་ཤིག་རྩད་ནས་འབེན་པས་དེ་ལ་རེ་སྒུག་བྱེད་མཁན་ཡང་མེད་ལ་རྩད་གཅོད་བྱེད་མཁན་ཡང་ག་ལ་ཡོད་ཆོག འོན་ཀྱང་བཙན་བྱོལ་ནང་གི་གསར་འགོད་པ་མང་པོ་ཞིག་དང་། འབྲེལ་བ་ལས་ཁུངས་ཟེར་བ་སོགས་ཀྱིས་སྐབས་ཐོག་གི་གནས་ཚུལ་ཙམ་རག་ཐབས་དང་། ལྷག་ཏུ་གསར་འགོད་པ་དག་གིས་དུས་ཚོད་ཚད་བཀག་གི་གསར་འགྱུར་གང་ཞིག་རླུང་འཕྲིན་ལས་གཏོང་སྐབས་སུ། མི་གང་ཞིག་རྒྱ་ནག་གི་བཙོན་དུ་བཟུང་མ་ཐག་དེའི་རྒྱབས་ལྗོངས་ལ་ཞིབ་བརྩད་ཀྱིས་གསར་འགྱུར་དུ་འགོད་པར་ཧབ་ཐོབ་བྱེད།
དེ་ལྟར་ཧབ་ཐོབ་མ་བྱས་ཚེ་རླུང་བརྙན་འཕྲིན་གང་ཞིག་གིས་ཀྱང་གསར་འགོད་པ་དེའི་གསར་འགྱུར་མི་འགོད་ལ། གསར་འགྱུར་མ་བཀོད་ན་ཁོང་ལ་སྒོར་མོ་རེག་ཐུབ་ཀྱི་མེད་པའི་གནས་བབ་འདི་བོད་ནང་ཤེས་མཁན་ཕལ་ཆེར་མེད། དེ་བས་ཁོང་ཚོས་ད་ལྟའི་བར་དུ་རྒྱ་ནག་གཞུང་གིས་བཙོན་ཁང་ནང་མནར་གཅོད་གཏོང་བཞིན་པའི་བཙོན་པའི་ཁ་ནས་མི་ལོན་པའི་གནས་ཚུལ་ཁག་ཅིག་གསལ་གསལ་དག་དག་གིས་བཤད་དེ་རྒྱུ་ཆ་མཁོ་སྤྲོད་བྱེད་ཀྱི་ཡོད་ལ། བཙོན་པ་གང་ཞིག་ལ་མནར་གཅོད་དང་ཁྲིམས་ཐག་ཀྱང་གཅོད་བཞིན་ཡོད།
བདག་གི་གྲོགས་པོ་ཞིག་གིས་རྒྱ་གར་ནས་ཡུན་རིང་སློབ་སྦྱོང་བྱས་ཏེ་ཕྱིར་ལོག་སྐབས་བལ་བོད་ས་མཚམས་འགྲམ་ནས་འཛིན་བཟུང་བྱས་ཤིང་། འཛིན་བཟུང་བྱས་པའི་སྐབས་དེར་ཁོས་བལ་བོ་ནས་བསྡད་ཚུལ་གྱི་རྫུན་མང་པོ་ཞིག་བསྒྲིགས་ནས་རང་གི་སྟེང་ལ་ནག་ཉེས་མི་འབྱུང་བར་འབད་པ་བྱས་ཏེ་ཉིན་གྲངས་བཅུ་ཙམ་འགོར་རྗེས། ཨེ་ཤ་ཡ་རླུང་འཕྲིན་ཁང་གིས་ཁོང་བཙོན་དུ་བཟུང་ཡོད་ཚུལ་དང་། མི་དེས་གང་ནས་སློབ་སྦྱོང་བྱས་པ་དང་ཅི་ཞིག་ལས་མིན་སོགས་གསལ་བཤད་བྱས་པས། ཁོང་ལ་གཅར་རྡུང་དང་མནར་གཅོད་བློ་ཡུལ་ལས་འདུས་པ་བཏང་སོང་ཟེར། དེའི་མུར་གྲོགས་པོ་དེའི་མཁལ་མ་ནད་པར་གྱུར་ནས་ད་ལྟ་ཡང་སྨན་བཅོས་བྱེད་བཞིན་པའི་སྐབས་ཡིན།
གཞན་ཡང་འབྲེལ་བ་ལས་ཁུངས་ཀྱིས་ལས་བྱེད་རེ་ཟུང་གིས་བོད་ནང་འབྲེལ་བ་བྱས་ཏེ་གནས་ཚུལ་གང་ཞིག་ལེན་ཐབས་ཀྱི་འབད་པ་བྱས་པའི་རྒྱུད་རིམ་ཁྲོད་ཀྱང་། བོད་ནང་གི་མི་མང་པོ་ཞིག་བཙོན་དུ་བཅུག་ཡོད་ལ།ང་རང་གིས་གསལ་བོར་ཤེས་པའི་མི་གཉིས་ཡོད་པའི་གཅིག་ལ་ལོ་དྲུག་གི་ཁྲིམས་ཐག་དང་༼ཁོང་དགུང་ལོ་ལྔ་བཅུ་གཡས་གཡོན་ཞིག་ཡིན༽ཅིག་ཤོས་ལ་ལོ་བདུན་གྱི་༼དགུང་ལོ་ཉེར་ལྔ་ཙམ་ཡིན༽ཁྲིམས་ཐག་བཅད་སོང་། དེ་བཞིན་ཁོང་གཉིས་ཀྱི་ནག་ཉེས་ཕྱིར་བསྒྲགས་བྱེད་སྐབས་འབྲེལ་བ་ལས་ཁུངས་ཀྱིས་༧གོང་ས་མཆོག་ལ་མཇལ་བཅར་སྐབས་སྒྲོན་པའི་འདྲ་དཔར་ཞིག་འཁྱེར་ཡོང་ནས་ཁོང་གཉིས་ལ་ཐད་ཀར་འབྲེལ་བ་བྱེད་མཁན་ནི་༧གོང་ས་མཆོག་དང་འབྲེལ་ཐག་ཆེས་ཉེ་བའི་མི་དག་རེད་འདུག་པས། འདི་དག་ལ་འབྲེལ་ལམ་བྱེད་མཁན་དག་ནི་འདི་གར་གསང་བའི་སྒྲིག་འཛུགས་ཤིག་ཏུ་ཡོད་པར་བསྙད་ནས་མི་དེ་དག་ལ་ཁྲིམས་ཐག་ནན་མོ་བཅད་ཡོད།
འདི་ལྟར་ཁྲིམས་ཐག་བཅད་དུས་གསར་འགོད་པ་སོགས་བོད་ནང་ལ་འབྲེལ་བ་བྱེད་ཅི་ཐུབ་བྱེད་ཀྱིན་པ་དག་གིས་འབྲེལ་བ་བྱེད་ཡུལ་གྱི་མི་དེའི་བདེ་འཇགས་ལ་འགན་ག་ཚོད་འཁུར་ཐུབ་ཀྱི་ཡོད་དམ།
དོན་དངོས་བཤད་ན། བཙལ་བྱོལ་ནང་གི་གསར་འགོད་པ་ཚོས་གནས་ཚུལ་གང་ཞིག་གསར་ལམ་དུ་བཀོད་རྗེས་ཅི་ཞིག་འགྲུབ་སོང་སྙམ་གྱིན་ཡོད་མོད། དེ་འདྲ་ཞིག་ནི་གཏན་ནས་མིན་སྟེ། ཁྱོད་ཀྱིས་གསར་འགྱུར་ལེན་ཡུལ་གྱི་མི་དེའི་བདེ་འཇགས་ཀྱི་འགན་ལེན་ཅི་ཐུབ་བྱེད་རྒྱུ་འདི་ཤིན་ཏུ་ཆེ་བས་གནས་ཚུལ་མདོར་བསྡུས་འདི་ཆེད་དུ་བཏང་བའོ།།
འབྲོང་མགོ་ལགས་ཀྱི་བཤད་པ་རྣམས་ཁུངས་ལྡན་ཡིན་ན་དངོས་གནས་བོད་པའི་གསར་འགོད་པ་ཚོ་གསར་འགོད་པའི་བཟང་སྤྱོད་དང་འགལ་འཛོལ་བྱུང་མིན་ད་ཚོད་དཔྱད་ཞིབ་བྱེད་རན་འདུག
གསར་ཁང་མང་དག་ཞིག་གི་དངོས་གནས་གཞི་བཞུགས་བོད་མི་ཚོའི་གནས་ཚུལ་བཀོད་ཐུབ་པ་ཙམ་ལས་གསར་འགྱུར་བཏང་ཟིན་པའི་རྗེས་སུ་གསར་འགྱུར་ཁོ་སྤྲོད་བྱེད་མཁན་དང་གསར་འགྱུར་ནང་གི་གང་ཟག་དེ་དག་ལ་རྗེས་འབྲས་ཅི་འདྲ་བྱུན་མིན་འགན་འཁུར་བཅང་འཁུར་གྱི་ཨེ་ཡོད་བསམ་བསམ་ཞིག་འདུག
གསར་ཁང་དང་གསར་འགོད་པ་རྣམ་པ་ངེས་པར་དུ་ཐུགས་ཞིབ་གནང་རོགས།།
ཁ་བརྡའི་འགན་འཛིན་ལྷན་རྒྱས་ལ། ཐུགས་རྗེ་ཆེ་ཞེས་ཞུའོ།། །།
གནས་ཚུལ་དང་མཇུག་འབྲས་གཉིས་ཀྱི་ནང་ནས་གང་གལ་ཆེ་ན་དེ་རང་བདེན་པར་མངོན།
ངས་འདིའི་དོན་ཏག་ཏག་ཅིག་གོ་མ་སོང་བས་གསལ་བཤད་རེ་གནང་རོགས་ཞུ།
༼དེ་བཞིན་ཁོང་གཉིས་ཀྱི་ནག་ཉེས་ཕྱིར་བསྒྲགས་བྱེད་སྐབས་འབྲེལ་བ་ལས་ཁུངས་ཀྱིས་༧གོང་ས་མཆོག་ལ་མཇལ་བཅར་སྐབས་སྒྲོན་པའི་འདྲ་དཔར་ཞིག་འཁྱེར་ཡོང་ནས་ཁོང་གཉིས་ལ་ཐད་ཀར་འབྲེལ་བ་བྱེད་མཁན་ནི་༧གོང་ས་མཆོག་དང་འབྲེལ་ཐག་ཆེས་ཉེ་བའི་མི་དག་རེད་འདུག་པས། ༽
རེད་ཡ། གསར་འགོད་པ་ཚོས་གཟབ་དགོས་པ་ཞིག་གི་ཁྱོད་ཀྱིས་བཤད་པ་དེ་རང་རེད། སྔར་བོད་ནང་གི་རྩོམ་པ་པོ་ཚོའི་རྩོམ་ཡིག་གི་བརྗོད་སྙིང་ལ་འགྲེལ་བཤད་བྱེད་གང་ཏུབ་ཀྱི་ཚ་རླབས་ཤིག་ཀྱང་འཕྱུར་ནས་རྩོམ་པ་པོ་གང་ཞིག་གི་རྩོམ་རིག་བྱ་དགའ་ཕྱིར་འཐེན་བྱས་སྐོར་སྐབས་དེར་སྤྱི་འཐུས་ཤིག་གིས་ཨེ་ཤ་ཡ་རང་དབང་རླུང་འཕྲིན་ཁང་གི་བཅར་འདྲིར་ལན་འདེབས་གནང་མམ་སོང་ངམ།
ངོ་མ་མི་སུ་ཞིག་འཛིན་བཟུང་བཙོན་འཇུག་བྱས་མ་ཐག་སྐབས་དེའི་ཁོའི་གནས་ཚུལ་འགོད་པ་ལས་དེ་ལས་གཞན་པའི་རྒྱབ་ལྗོངས་དང་སྔར་བྱས་ལས་ཀ་རྣམས་གསལ་འགོད་བྱས་ན་ཕན་ལས་གནོད་ཆེ་བར་འགྱུར་སྙམ།
གནས་ཚུལ་འདི་དུས་ཐོག་ཆར་བ་འདྲ་ཞིག་ཏུ་མཐོང་སོང་། འབྲོང་མགོ་སྐམ་པོར་བཀའ་དྲིན་ཆེ་ཞུ།
གཅན་བཟོད་རྒྱམ་ལགས་སུ།
གོང་བཀོད་གནས་ཚུལ་འདི་ཉིད་ནི་བྲེལ་སྟབས་ཀྱིས་བྲིས་པ་དང་། ཟླ་ཤས་སྔོན་ནས་ཡོ་རོབ་ཏུ་འབྱོར་ན་ཡང་ད་དུང་ཡང་སེམས་པའི་ཟུར་ན་རྒྱ་ནག་ན་ཡོད་པའི་ཚོར་སྣང་གིས་གཅུན་ཡོད་པས་གསལ་ཐང་དུ་འབྲི་མ་ཐུབ་པར་དགོངས་འགལ་མེད་པར་ཞུ། བདག་གི་ངོ་ཤེས་དེར་ཁྲིམས་ཐག་གཅོད་སྐབས་ཁོང་ལ་འབྲེལ་བ་བྱེད་མཁན་གྱི་རྡ་སའི་འབྲེལ་བ་ལས་ཁུངས་ཀྱི་བུ་མོ་ཞིག་གཟིམ་ཆུང་མཇལ་ཁར་བཅར་བའི་འདྲ་དཔར་ཞིག་འཁྱེར་ཡོང་སྟེ། ཁྱོད་ཀྱིས་འབྲེལ་བ་བྱེད་ཡུལ་ལམ་གནས་ཚུལ་གཏོང་ཡུལ་ནི་ཏ་ལེ་དང་ཐག་ཉེ་བའི་མི་ཞིག་རེད་ཅེས་ཁྲིམས་ཐག་ལྗིད་མོ་བཅད་ཡོད་པ་རེད། ངའི་བསམ་པར་བོད་ནང་འབྲེལ་བ་བྱེད་དུས་སོ་སོའི་ཁེའུ་ཁེའུ་སོགས་ཀྱི་ནང་དུ་ཡོད་པའི་འདྲ་དཔར་འདྲ་མིན་བསྐུར་ན་གཞིས་ལུས་བོད་མིར་གནོད་པ་ཆེན་པོ་ཐེབས་ཀྱིན་པ་འདི་གསལ་བོར་ཤེས་དགོས་ཀྱི་འདུག་ཞུས་པ་ཡིན།
འབྲོང་མགོ་སྐམ་པོས།
འབྲོང་མགོ་ཟེར་བ་འདིས་སྐད་ཆ་ཆོ་མེད་པ་མང་པོ་ཞིག་བཤད་འདུག སོ་སོས་སྒེར་དོན་དང་གྲོད་ཁོག་ཁོ་ནའི་ཆེད་ཕྱི་ལོགས་ན་གསང་སྤྱོད་ཕོར་བ་བཀྲུ་བཞིན་དུ། ད་དུང་ཁ་སྤོབས་ཆེན་པོས་གཞན་ལ་སྐད་ཆ་མགོ་རྔ་མེད་པ། གནས་ལུགས་མེད་པ། གནས་ཚུལ་རྒྱབ་ལྗོངས་ལ་ཞིབ་འཇུག་བློ་མིག་མེེད་ཁར། བོད་སྤྱི་དོན་ཆེད་ལྷག་བསམ་རྣམ་དག་གི་སྲི་ཞུ་སྒྲུབ་མཁན་དག་ལ་ཁ་གཏོང་བ་འདི་ལྷག་བསམ་གྱིས་བཅངས་པའི་བསམ་འཆར་ཞུ་སྟངས་ཤིག་རྩ་བ་ནས་མ་རེད། དོན་དངོས་ཐོག་ཞུ་རྒྱུ་ཡིན་ན། རི་བོང་ཅལ་འདྲོགས་དང་གཡག་ཞར་གྱིས་རྩ་ཟས་པ་ལྟར་མ་གནང་རོགས། བསམ་འཆར་བཤད་འདོད་ན་གནས་ལུགས་དང་ལས་འབྲས་དང་མཐུན་པ་ཞིག་ཤོད། དེ་མིན་སོ་སོའི་ངོ་ཚའི་རྒྱུ་རུ་འགྱུར་སྲིད།
འབྲོང་མགོའི་སྐད་ཆ་ལ་བདེན་པའི་ཆ་གཅིག་འདུག ཁོ་ལ་མཚོན་ན་ཁག་མི་འདུག་སྙམ།
ཡིན་ན་ཡང་གསལ་འགོད་པའི་ལས་ཀ་ཅི་ཞིག་ཡིན་པ་དང་གསར་འགོད་པའི་རེ་བ་དང་དམིགས་ཡུལ་ཡང་ང་ཚོས་ཤེས་དགོས།
འབྲོག་མགོ་ལགས།
འཛམ་གླིང་འདིའི་སྟེང་གསར་འགོད་པའི་ཚེ་སྲོག་ཤོར་བ་ཡང་ཉུང་ཉུང་མིན། གཞུང་དང་ཚོགས་པ། ཐ་ན་མི་སྒེར་བའི་ཁྲོད་ན་ཡང་གསར་འགོད་པ་ལ་མི་དགའ་བའི་མི་མང་བོ་ཡོད་སྲིད། གསར་འགོད་པ་ལ་ཁ་རྡུང་གཏོང་བ་དང་འཕྱ་སྨོད་བྱེད་པ། འཇིགས་བསྐུལ་དང་དྲག་ཤུལ་བཀོད་པ་དག་ནི་ངོ་མ་མ་རུང་བ་ཞིག་རེད། འདིས་གསར་འགོད་པའི་དམིགས་ཡུལ་དང་རྒྱབ་ལྗོངས་རྟོགས་གི་མེད་ལ། འགའ་ཤས་ཀྱིས་རྟོག་ཀྱང་ཆེད་དུ་རང་དོན་གཙིགས་ཆེར་འཛིན་བཞིན་ཡོད་པས་གསར་འགོད་པར་མཐོང་ཆུང་གནང་གི་ཡོད། གསར་འགོད་པའི་ལས་དོན་ནི་ངོ་མ་རླབས་ཆེན་ཞིག་རེད།
དོན་དག་ཆེ་ས་ཞིག་སྒྲུབ་དུས་ཆུང་ས་ནས་འཐུས་ཤོར་དང་བློས་གཏོང་བྱེད་དགོས་པ་མང་བོ་ཡོང་གིན་ཡོད་རེད།
གསར་འགོད་པ་ལ་ནོར་འཁྲུལ་མེད་ཀྱང་གསར་འགོད་པས་ཁྱོད་ལ་བལྟས་ཏེ་དགོངས་པ་མ་ཚོམས་ཞུ་དགོངས་ངེས་རེད།
ད་མང་བོ་མི་བཤད་ཁྱོད་ཀྱིས་ངའི་སྐད་ཆ་འདི་ནང་དོན་ཧ་གོ་རྒྱུ་མིན་པ་འདྲ།