བོད་ཀྱི་ཆབ་སྲིད་བསྐྱར་ཞིབ་རྩོམ་སྒྲིག་ནས་སྤེལ།
དོན་གྲུབ་ཀྱིས་བསྒྱུར།
མ་རྩོམ་ལ་གཟིགས་ན།
ཕྱི་ལོ་༢༠༡༡ཟླ་བ་༡༡ཚེས་༢༦ཉི་ཕ་རན་སི་རྒྱལ་ས་པལ་རེ་སི་(Paris)ནང་བཀའ་ཁྲི་བློ་བཟང་སེང་གེ་ལགས་ཀྱིས་གསུང་བཤད་གནང་བ་ཞིག་ནང་”ཁོང་གིས་དབུ་འཁྲིད་གནང་བའི་བོད་མིའི་སྒྲིག་འཛུགས་ཀྱི་བཀའ་ཤག་གསར་པའི་ཉིན་ཞག་བརྒྱ་ཐམ་པ་ནི་ཉེ་བའི་ལོ་རྒྱུས་ནང་གི་བཀའ་ཤག་ལས་བྲེལ་ཆེ་ཤོས་ཀྱི་གྲས་ཡིན་པའི་འགྲེལ་བརྗོད་གནང་འདུག” ཡིན་ནའང་བོད་མིའི་སྒྲིག་འཛུགས་གསར་པས་སྲུང་རྩི་ཞུ་བཞིན་པའི་ཟླ་བ་༡༡ཚེས་༢༦ཉིན་མོའི་ཉིན་ཞག་བརྒྱའི་དུས་དྲན་ལ་བོད་ཀྱི་ཆབ་སྲིད་བསྐྱར་ཞིབ་རྩོམ་སྒྲིག་པས་དེ་ཙམ་གྱིས་གདེང་འཇོག་བྱེད་ཀྱི་མེད། གང་ཡིན་ཟེར་ན་ཨ་རིའི་ལུགས་སྲོལ་ལྟར་བཙན་བྱོལ་བོད་མིའི་སྒྲིག་འཛུགས་གསར་པའི་གྲུབ་འབྲས་ལ་ལམ་སེང་ཚོད་གམ་བྱེད་རྒྱུ་ནི་ཧ་ཅང་སྔ་དྲག་པའི་རང་གཤིས་དང་དྲང་བདེན་ཞིག་མིན། ཡིན་ནའང་བཀའ་བློན་ཁྲི་པས་དང་ལེན་ཧ་ཅང་བྱེད་བཞིན་པའི་བཀའ་ཤག་གསར་པའི་ཉིན་ཞག་བརྒྱའི་གྲུབ་འབྲས་ལ་ང་ཚོས་བསམ་ཚུལ་འགའ་གླེང་རྒྱུ་ཡོད།
འཛིན་སྐྱོང་གང་འདྲ་ཞིག་ཡིན་རུང་གནད་དོན་གཉིས་ཀྱི་གྲུབ་འབྲས་ལ་དོ་སྣང་ངམ་རྟོག་ཞིབ་བྱེད་ཀྱི་ཡོད་པ་ནི་ཕྱི་ནང་གི་ཆབ་སྲིད་གྲུབ་འབྲས་ཐད་ཀྱི་ལེགས་ཉེས་ལ་ཚོད་གམ་བྱེད་རྒྱུ་དེ་ཡིན་པ་ལས་ལས་བྲེལ་ཅན་ཡིན་པ་ཙམ་གྱི་དེང་སང་གྲུབ་འབྲས་ལྡན་པ་ཞིག་ལ་ངོས་འཛིན་ནམ་ཡང་བྱེད་ཐབས་མེད། བློ་བཟང་སེང་གེ་ལགས་ཀྱི་ཉི་མ་བརྒྱ་ཐམ་པའི་ལས་དོན་བྱེད་ཕྱོགས་ལ་བསམ་བློ་བཏང་པ་ཡིན་ན། ཁོང་ཉི་མ་ག་ཚོད་བཞུགས་སྒར་དྷ་རམ་ས་ལར་བསྡད་ནས་ཕྱག་ལས་གནང་བ་དང། ཉི་མ་ག་ཚོད་ཨ་རི་དང་ཡུ་རོབ་སོགས་ལ་འགྲོ་བསྐྱོད་བྱས་ནས་ལས་དོན་བྱེད་བཞིན་པ་འདི་གཉིས་ཡིན།
ཁོང་ཕྱིའི་རྒྱལ་ཁབ་ཀྱི་འགྲུལ་བཞུད་མང་ཆེ་བ་ཕྱི་འབྲེལ་ཐོག་གནང་གི་ཡོད་པ་དང་། དུས་མཚུངས་ཕྱི་ཕྱོགས་ཀྱི་ཁྲོམ་རྭ་ཆེན་པོའི་ནང་རང་ཉིད་ངོ་སྤྲོད་དང་བོད་པའི་མང་གཙོའི་འཕེལ་རིམ་དེ་བཞིན་རང་ལུས་དམར་པོ་ཞུགས་མེར་སྒྲོན་བཞིན་པའི་གནད་དོན་ཁག་ལ་ཕྱི་ཕྱོགས་ཀྱི་རོགས་རམ་འཚོལ་རྒྱུ་ཡིན། བློ་བཟང་སེང་གེའི་འཛིན་སྐྱོང་བཀའ་ཤག་གི་ནང་སྲིད་སྲིད་བྱུས་ལ་གཞིགས་ན་ད་དུང་རྐང་པ་བརྟན་པོ་བཙུགས་ཐུབ་མེད་པ་འདི་ཡིན། བློ་བཟང་སེང་གེ་ལགས་ཀྱིས་དམིགས་ཡུལ་དང་པོ་ཤེས་ཡོན་ཐོག་འཇོག་རྒྱུ་ཡིན་གསུངས་པ་ལྟར་ཤེས་རིག་ལས་ཁུངས་ཀྱི་བཀའ་བློན་གྱི་ཐུགས་འགན་བཞེས་བཞིན་ཡོད། དེར་བརྟེན་མི་མང་གིས་བསམ་ཚུལ་སྤེལ་བར་གཞིགས་ན་ཁོང་གི་སློབ་གྲྭ་ཁག་གི་སློབ་སྤྱི་དང་ཐུག་སྟེ་ཁོང་ཚོའི་གནས་ཚུལ་དང་བསམ་འཆར་བརྒྱུད་ལེན་གནང་ཡོད་འདུག
ཕྱི་ལོ་༢༠༡༡ལོིའི་ཟླ་བ་༡༡ཚེས་༣ཉིན་ཨ་རིའི་འགྲོ་བ་མིའི་ཐོབ་ཐང་ལྷན་ཚོགས་སུ་བསྩལ་བའི་བདེན་དཔང་ཚིག་ཐོར་གསལ་བའི་བློ་བཟང་སེང་གེའི་ནང་སྲིད་ལག་བསྟར་ལས་གཞི་གཉིས་ནི་བོད་ཀྱི་ཆེད་ལས་རུ་ཁག་དང་བོད་ཀྱི་སྲིད་བྱུས་ཉམས་ཞིབ་ཁང་འཛུགས་རྒྱུ་ཡིན་པའི་གནད་དོན་འདི་གཉིས་ཡིན། ཡིན་ནའང་ལས་གཞི་འདི་གཉིས་ཁོང་གི་མི་མང་ནང་ཁྱབ་བསྒྲགས་གནང་ན་འགོ་འཛུགས་ད་དུང་ཡང་བྱས་མེད། བོད་ཀྱི་སྲིད་བྱུས་ཉམས་ཞིབ་ནང་ཁ་ཁུ་སིམ་པོའི་ཐོག་འགོ་འཛུགས་བྱས་ཡོད་ཀྱང།དེའི་ངོ་བོ་ནི་སྔོན་མའི་དབུས་བོད་མིའི་སྒྲིག་འཛུགས་ཀྱི་ལས་དོན་རང་འཇགས་ཐོག་འགོ་འཛུགས་ཀྱིས་ལས་དོན་གཉེར་བཞིན་ཡོད་པ་ལས་དམིགས་བསལ་གང་ཡང་མཐོང་རྒྱུ་མེད།
བཀའ་བློན་ཁྲི་པའི་འགྲུལ་བཞུད།
བློ་བཟང་སེང་གེའི་ཐོག་མའི་ཉིན་བརྒྱ་ཡི་ལས་དོན་ཐོག་གཞིགས་ན་ཁོང་གིས་དུས་ཡུན་དེའི་རིང་ཨ་རིའི་རྒྱལ་ས་ཝ་ཤིན་ཀྲོན་དང་ཛོའོ་རེག(Zurich)པལ་རི་སི་(Paris)ཝར་ལན་(Berlin)ཨོའོ་སོ་ལོའོ་(Oslo)ཀོ་པན་ཨལ་ཀན་(Copenhagen)ཝེར་སལ་(Brussel)དེ་བཞིན་ལོན་ཀྲོན(London)སོགས་ལ་ཕྱིན་ཡོད། གནས་ཚུལ་དེའི་སྐོར་ཞིབ་ཅིང་ཕྲ་བ་དབུས་བོད་མིའི་སྒྲིག་འཛུགས་ཀྱི་དྲ་རྒྱ་དང་། ཕ་ཡུལ་སོགས་ནང་བཀོད་ཡོད་པས་ནན་ཏན་ངང་གསལ་བཤད་བྱེད་དགོས་དོན་མེད། ཡིིན་ནའང་ང་ཚོས་དགའ་སྤྲོའི་སྤུ་ལོང་གྲངས་མེད་གཡོ་བ་དང་དུས་མཚུངས་ཞུ་རྒྱུ་ཞིག་ལ་བཀའ་ཁྲི་བློ་བཟང་སེང་གེ་ལགས་ཀྱི་དེ་སྔོན་གྱི་བཀའ་བློན་གཞན་པ་དང་བསྡུར་ན་ཕྱི་སྲིད་ཐོག་དོ་སྣང་གི་མདུན་བསྐྱོད་མང་བ་གནང་གི་ཡོད་པ་མཐོང་གི་འདུག ཕྱིའི་རྒྱལ་ཁབ་ཀྱི་རྒྱལ་ས་འདི་དག་ནང་བློ་བཟང་སེང་གེས་ཁོ་རང་སྨྲ་ལྩེ་བདེ་བའི་གསུང་བཤད་གནང་མཁས་པོ་ཞིག་དང་བློ་སྟོབས་ཆེ་བའི་བོད་མིའི་སྐུ་ཚབ་ཞིག་ཡིན་པ་རྒྱ་ཆེའི་མི་མང་ལ་གསལ་བཏོན་གནང་ཡོད། ཡིན་ནའང་བློ་བཟང་སེང་གེ་ལགས་ཀྱི་གསུང་བཤད་གནད་དོན་ལ་གཞིགས་ན་མང་ཆེ་བ་དོན་གནད་གཉིས་ཐོག་འབབ་ཀྱི་འདུག དེ་ཡང་དང་པོ་ནི་འཛམ་གླིང་གི་ས་ཕྱོགས་གང་སར་ཡོད་པའི་བོད་དོན་རྒྱབ་སྐྱོར་ཚོགས་པ་ཚོས་དགོས་འདུན་བཏོན་པ་ལྟར་ཕྱིའི་རྒྱལ་ཁབ་ཁག་ལ་བོད་ནང་གི་ཛ་དྲག་གནས་ཚུལ་ཏེ།
ཆར་རྗེས་ཀྱི་མྱུ་གུ་འབུས་པ་བཞིན་རང་ལུས་མེར་སྲེག་གཏོང་གི་ཡོད་པ་དག་ལ་ཐེ་བྱུས་ཀྱིས་རྒྱ་ནག་ལ་སྐྱོན་བརྗོད་བྱེད་དགོས་པའི་འབོད་སྐུལ་ཞུ་རྒྱུ་དང་། གཞན་ཞིག་ནི་ཁོ་རང་གི་བརྗོད་བཞིན་པའི་མ་འོངས་ཕུགས་བསམ་ཏེ་བོད་ནང་རང་དབང་སླར་གསོ་དང་༸གོང་ས་༸སྐྱབས་མགོན་རིན་པོ་ཆེ་མཆོག་བོད་ལ་གདན་འདྲེན་ཞུ་ཐུབ་པ་བྱེད་ཀྱི་ཡིན་ཞེས་པ་འདི་གཉིས་རེད། ཡིན་ནའང་གལ་འགངས་ཆེ་བའི་གནད་དོན་འགའ་ཞིག་ཐོག་བསམ་བློ་གཏོང་དགོས་པ་ནི།
༡༽བློ་བཟང་སེང་གེས་བོད་ནང་རང་ལུས་མེར་སྲེག་གཏོང་མཁན་ཚོའི་དགོས་འདུན་ནི་”རང་དབང་དགོས་ཟེར་བ་དང་རང་དབང་ནི་ཆོས་དད་རང་དབང་འགྲོ་བ་མིའི་ཐོབ་ཐང་དེ་བཞིན་སྨྲ་བརྗོད་རང་དབང་སོགས་ཡིན་པའི་ཆ་མ་ཚང་བའི་གསལ་
བསྒྲགས་གནང་ཡོད”རང་ལུས་མེར་སྲེག་གཏོང་མཁན་ནང་ནས། གཉིས་ཀྱི་བོད་ལ་རང་བཙན་དགོས་ཟེར་བའི་འབོད་སྒྲའི་འོད་མདངས་འདི་ང་ཚོས་གོ་མེད་ཚོར་མེད་དུ་དུས་ནམ་ཡང་འཇོག་མི་རུང་། རང་ལུས་དམར་པོ་ཞུགས་མེར་སྒྲོན་མཁན་གྱི་བོད་མི་ཚོའི་དགོས་འདུན་བོད་རང་དབང་དགོས་ཟེར་བ་འདིར་ཆ་གཞག་པ་ཡིན་ནའང་ཁོང་ཚོར་རང་དབང་དགོས་ཟེར་བ་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མངའ་འོག་ཏུ་ཆབ་སྲིད་རང་དབང་དགོས་ཟེར་བ་ལས་དེ་མིན་རང་དབང་གཞན་རྩོད་ཀྱི་མེད་པའི་ཉེན་ཁ་ཆེན་པོ་ཡོད། ཁ་ཚོན་བཅད་ནས་ཞུ་རྒྱུ་ཞིག་ལ་རང་ལུས་མེར་སྲེག་གཏོང་མཁན་ཚོས་བོད་རང་སྲིད་རང་སྐྱོང་དགོས་ཟེར་བའི་འབོད་སྒྲ་བསྒྲགས་ཏེ་རྒྱ་ནག་གཞུང་གིས་བསད་པ་ཧ་ལམ་བྱུང་མེད།དེ་དང་འབྲེལ་ནས་ཞུ་རྒྱུ་ཞིག་ལ་བློ་བཟང་སེང་གེས་ཡང་སེ་གསུངས་ཡས་ཤིག་ལ་ཁོང་གིས་འོས་བསྡུའི་སྐབས་ནས་བཟུང་དབུ་མའི་ལམ་ལ་རྒྱབ་སྐྱོར་གྱིས་བོད་ལ་རང་སྲིད་རང་སྐྱོང་གི་གནས་བབ་ཡོང་རྒྱུའི་སྲིད་བྱུས་འཛིན་རྒྱུ་ཡིན་པ་དེ་ཉེ་ཆར་དབུས་བོད་མིའི་སྒྲིག་འཛུགས་ཀྱི་དྲ་རྒྱར་བཀོད་ཡོད། ང་ཚོས་བརྟག་དཔྱད་བྱས་པར་གཞིགས་ན་དབུ་མའི་ལམ་གྱི་སྲིད་བྱུས་ནི་ཉེ་ཆར་འདས་ཟིན་པའི་བཀའ་བློན་ཁྲི་པའི་འོས་བསྡུའི་གནད་དོན་ཞིག་མིན། དེ་ཡང་ང་ཚོས་ཧང་སངས་དགོས་པ་ཞིག་ལ་དམིགས་བསལ་བློ་བཟང་སེང་གེར་འོས་བླུག་མཁན་གྱི་གཞོན་སྐྱེས་ཚོས་ཟམ་གདོང་རིན་པོ་ཆེས་དབུ་འཁྲིད་པའི་དབུས་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་ལ་རྒྱབ་སྐྱོར་གྱིས་བློ་བཟང་སེང་གེ་འོས་འདེམས་བྱས་པ་འདི་ཆབ་སྲིད་ཀྱི་འཕོ་འགྱུར་ཡིན་པ་འདོད་ཀྱི་ཡོད།
༢༽བློ་བཟང་སེང་གེས་མི་གཞན་གྱིས་རང་ལུ་མེར་སྲེག་གཏོང་མཁན་གྱི་ཁ་གྲངས་ནོར་བ་ནང་བཞིན་ཁོ་རང་གིས་ཀྱང་ཡང་སེ་ནོར་ནས་མི་མང་ལ་བརྗོད་ཀྱི་ཡོད། ཁོང་གིས་ཉེ་ཆར་འབར་ལན་”Berlin”ནང་གསུང་བའི་གསུང་བཤད་ཞིག་གི་ནང་”ང་ལ་གང་ཡང་མེད་ཡིན་ནའང་སེམས་སྐྱོ་དགོས་པའི་སྙན་ཐོ་ཞིག་ཡོད།ང་ཚོའི་མི་༡༡རང་ལུས་མེར་སྲེག་བཏང་བའི་གནས་ཚུལ་ཞིག་ཡོད་”ཟེར་བ་འདི་ཡིན། འོན་ཀྱང་མི་རིགས་ཀྱི་ལར་ཞེན་ཆེ་བའི་དྲྭ་ཐོག་རྩོམ་པ་པོ་གྲགས་ཅན་འོད་ཟེར་ལགས་ཀྱིས་ཚོར་བ་རྣོ་པོའི་ཐོག་བསམ་ཚུལ་སྤེལ་བ་ལྟར་ན་སྤྱི་༡༢ཚེས་༡བར་རྒྱལ་གཅེས་དཔའ་བོ་༡༡གིས་རང་ལུས་མེར་སྲེག་བཏང་ཡོད་གསལ་བཤད་གནང་པ་དང་སྦྲགས་ཕྱི་ལོ་༢༠༠༩ལོར་བོད་ནང་ཐོག་མའི་རང་ལུས་མེར་སྲེག་གཏོང་མཁན་བཀྲ་བྷེ་ལགས་ཀྱི་མིང་བརྗེད་རྒྱུ་མེད་པའི་དྲན་སྐུལ་ཡང་གནང་འདུག གལ་སྲིད་བློ་བཟང་སེང་གེ་ལགས་ཀྱིས་འདས་པའི་ལོ་གཅིག་ནང་བྱུང་བའི་རང་ལུས་མེར་སྲེག་གཏོང་མཁན་ཚོའི་གནས་ཚུལ་གསལ་བཤད་གནང་ཡོད་ཀྱང་།རྒྱལ་གཅེས་དཔའ་བོ་སྐུ་ཞབས་བཀྲ་བྷེ་ལགས་ཀྱི་ཚེ་སྲེག་དམར་པོ་ཞུགས་མེར་བསྒྲོན་པའི་བློས་གཏོང་གི་བྱ་གཞག་དྲན་མེད་དུ་བཞག་ན་ག་ལ་འགྲིག
༣༽བོད་མི་ཚོས་བསམ་པ་ནང་བཞིན་བཀའ་ཁྲི་བློ་བཟང་སེང་གེ་དང་བོད་མིའི་སྤྱི་ཚོགས་ཕན་ཚུན་དབར་མང་གཅོའི་ལྟ་སྤྱོད་དང་མཐུན་པའི་བསམ་ཚུལ་སྤེལ་རེས་ལྷུག་པོ་ཡོང་ཐབས་བྱེད་རྒྱུ་དེ་ཡིན།དབུས་མིའི་སྒྲིག་འཛུགས་ཀྱི་གཞུང་བྲེལ་དྲྭ་རྒྱའི་ནང་འཁོད་པར་གཞིགས་ན་པལ་རེ་སི་”Paris”དང་ལོན་ཀྲོན་”London”ནང་བོད་པའི་བོད་མི་ཚོས་བཀའ་བློན་ཁྲི་པ་”མཇལ་ཁ་”ཞུ་བཞིན་འདུག་ཅེས་པ་འདི་ཡིན། རྩོམ་ཡིག་དེ་ཚོའི་ནང་བཀའ་ཁྲིས་བོད་མི་ཐུག་འཕྲད་བྱས་པ་དེ་བོད་པ་ཚོས་ཁོང་མཇལ་ཁ་ཞུ་བར་བཅར་བ་ནང་བཞིན་གནས་ཚུལ་འགྲེམ་སྤེལ་བྱས་འདུག གནས་ཙུལ་འདི་ཆུང་ཙག་ཞིག་ཡིན་པར་ཆ་བཞག་ནའང་མང་གཙོའི་སྤྱི་ཚོགས་ཤིག་གི་ལྟ་སྟངས་ཐོག་ནས་བཤད་ན་མི་མང་གིས་འོས་འདེམས་བྱས་པའི་བཀའ་ཁྲིའི་གཞུང་འབྲེལ་ཐུག་འཕྲད་འདིར་མི་མང་མཇལ་ཁ་ཞུ་བར་བཅར་པ་རེད་ཅེས་བརྗོད་ན་ཤིན་ཏུ་མི་འོས་པ་ཞིག་ཡིན། སྤྱིར་བཏང་གི་མི་གཅིག་གིས་༸གོང་ས་༸སྐྱབས་མགོན་རིན་པོ་ཆེ་མཆོག་གམ་ཡང་ན་ཨིན་ལན་གྱི་རྒྱལ་མོ་ཨེ་ལེ་ཛི་བྷ་ཊ་༼Elizabeth༽མཆོག་མཇལ་ཞུ་བར་སླེབས་པ་རེད་ཅེས་བརྗོད་ཆོག་ཀྱང་།ཨ་རིའི་སྲིད་འཛིན་སྐུ་ཞབས་ལྦོ་རགས་ཨོ་བྷ་མ་”Barack Obama”མཇལ་ཁར་བཅར་བ་རེད་ཅེས་དུས་ནམ་ཡང་ལབ་མི་སྲིད་པ་ཞིག་ཡིན། གང་ཡིན་ཞེ་ན་མི་སེར་རིང་ལུགས་ཀྱི་རྒྱལ་ཁབ་ནང་ཆབ་འབངས་ཚང་མ་ཁྲིམས་འོག་ཏུ་གཅིག་འགྱུར་ཡིན། ཆབ་སྲིད་ཀྱི་འགོ་འཁྲིད་ཚོ་འོས་ཤོག་ཐོབ་པའི་རྒྱུ་སྐྱེན་ལ་བརྟེན་ནས་ཧོབ་ཏེ་རྒྱལ་པོའི་གོ་སའམ་སྐུ་དྲག་གི་གོ་གནས་ཐོབ་ཐང་རེག་གི་མེད། ཁོང་ཚོ་ནི་རྒྱལ་ཁབ་ཀྱི་མི་སེར་ཞིག་ཡིན་པ་མ་ཟད་མི་མང་ལ་ཞབས་འདེགས་ཞུ་མཁན་ཞིག་ཀྱང་ཡིན།ང་ཚོའི་བསམ་ཚུལ་བྱས་པ་ཡིན་ན་”མཇལ་ཁ་”ཞེས་པའི་ཚིག་དུམ་འདི་ཆོས་ཀྱི་དབུ་འཁྲིད་མཁན་༸གོང་ས་༸སྐྱབས་མགོན་རིན་པོ་ཆེ་མཆོག་དང་ཟམ་གདོང་རིན་པོ་ཆེ་ལ་སོགས་བླ་སྤྲུལ་རྣམས་ལ་ལྟོས་ནས་འགྲེལ་བཤད་དགོས་པའི་གནད་དོན་ཞིག་ཡིན་པར་ངོས་འཛིན་བྱེད་ཀྱི་ཡོད།བློ་བཟང་སེང་གེ་ལགས་ཀྱིས་འོས་བསྡུའི་ཁྱབ་བསྒྲགས་བྱེད་སྐབས་ཁོང་གིས་ཁོང་ནི་མི་ཚང་དཀྱུས་མ་ཞིག་ནས་འཚར་ལོངས་བྱུང་བའི་བུ་ཕྲུག་ཅིག་ཡིན་ཟེར་བ་འདི་ཡིན་པས།
ང་ཚོས་བྱས་ན་གནད་དོན་འདིས་བོད་མིའི་མཐུན་སྒྲིལ་གྱི་གོང་བུ་གཅིག་སྒྲིལ་ལ་ཕན་ཐོག་བྱུང་ཡོད་མེད་ལ་མ་ལྟོས་པར་ད་ལྟ་འཚར་ལོངས་བྱེད་བཞིན་པའི་བོད་མིའི་མང་གཙོ་འདི་རིགས་མངོན་འདོད་དང་མཐུན་པའི་བསྒྱུར་བཅོས་གཏོང་རྒྱུའི་གོ་སྐབས་ཆ་ཚང་ཁོང་ལ་ཡོད། ཁོང་གི་གཞུང་འབྲེལ་བོད་མི་ཐུག་འཕྲད་དེ་”མཇལ་ཁ་”ཞེས་འབོད་དགོས་པའི་སྐུལ་མ་གནང་མེད་པ་ཡིན་ཀྱང་ད་ལྟ་ཁོང་གིས་བོད་མིའི་མང་གཙོའི་འཕེལ་རིམ་གོང་འཕེལ་བཏང་གནང་སྟེ་སྐུ་དྲག་གི་རྒྱུད་པ་རེད་ཟེར་བའི་མིང་ཚིག་དཀྲུག་ཤིང་སློང་མཁན་འདི་བོད་པའི་སྤྱི་ཚོགས་ནང་ལབ་གླེང་རྩ་ནས་མེད་པ་བཟོ་གནང་རྒྱུ་ནི་ཤིན་ཏུ་གལ་ཆེན་པོ་ཡིན་པས་དེ་ལྟར་ཕྱག་ལས་གནང་ཐུབ་ན་མ་འོངས་པར་བོད་མིའི་མཐུན་སྒྲིལ་ལ་ཁེ་ཕན་ཆེན་པོ་ཡོད།
སྤྱི་འཐུས་ཚོགས་གཙོ་མཆོག་དང་ཕྱི་དྲིལ་བཀའ་བློན་རྣམ་གཉིས་ཀྱི་བསྐོར་བསྐྱོད།
བཀའ་ཁྲིའི་ལས་ཡུན་ཉིན་གྲངས་བརྒྱ་ཐམ་པའི་རིང་མངོན་གསལ་དོད་པོས་ཡར་རྒྱས་འགྲོ་བཞིན་པ་ནི།ཁོང་ཡུ་རོབ་རྒྱལ་ཁབ་ཁག་ནང་བསྐོར་བསྐྱོད་ཕེབས་པ་དང་དུས་མཚུངས་གྲོས་ཚོས་ཀྱི་ཚོགས་གཙོ་སྤེན་པ་ཚེ་རིང་ལགས་དང་ཕྱི་དྲིལ་གྱི་བཀའ་བློན་བདེ་སྐྱིད་ཆོས་དབྱངས་ལགས་ཀྱང་ཕེབས་ཡོད།ཡིན་ནའནང་ས་གནས་ས་ཐོག་ཏུ་ཡོད་པའི་སྐུ་ཚབ་དོན་གཅོད་ཁག་གིས་ཁོང་ཚོའི་བསྐོར་བསྐྱོད་ཀྱི་གནད་དོན་ཐོག་བསམ་ཚུལ་གང་ཡང་སྤེལ་གནང་མེད། ཚོགས་གཙོ་སྤེན་པ་ཚེ་རིང་ལགས་ཀྱིས་གཞི་རྒྱ་ཆེ་བའི་ཡུ་རོབ་ཀྱི་བསྐོར་བསྐྱོད་ནི་སྤྱི་ཟླ་༡༡ཚེས་༢༢ནས་ཟླ་བ་༡༢ཚེས་༡༥བར་ཡིན་པ་དང་། དུས་ཡུན་དེའི་རིང་ཁོང་གིས་ཝུནའ་”Vienna”དང་སྦར་ཟལ་”Brsssels”དེ་བཞིན་ཨི་ཀྲ་ལི་”Italy”སོགས་ཀྱི་གྲོས་ཚོགས་འཐུས་མི་ཁག་དང་ས་གནས་ས་ཐོག་གི་བོད་མི་ཚོ་ཐུག་རྒྱུ་ཡིན་པ་རེད།༼འདི་ལོའི་ཟླ་༧པའི་ནང་ཚོགས་གཅོ་སྤེན་པ་ཚེ་རིང་དང་བཀའ་ཁྲི་བློ་བཟང་སེང་གེ་ལགས་ཨ་རིའི་རྒྱལ་ས་ཝ་ཤིན་ཀྲོན་ནང་བསྐོར་བསྐྱོད་ལ་ཕེབས་འཆར་ཡོད།༽
༸གོང་ས་༸སྐྱབས་མགོན་རིན་པོ་ཆེ་མཆོག་གིས་ཆབ་སྲིད་ཀྱི་ཐུགས་འགན་བོད་མི་མང་ལ་གསོལ་བསྩལ་གནང་བ་ནས་བཟུང་འཛམ་གླིང་སྡིངས་ཆའི་སྟེང་གྲོས་ཚོགས་ཀྱི་ཚོགས་གཙོ་སྤེན་པ་ཚེ་རིང་ལགས་ཀྱི་གནས་བབ་མཐོ་རུ་བཏང་བ་གསལ་བཏོན་གནང་ཡོད། ཕྱོགས་གཞན་ཞིག་ནས་བལྟས་ན་གྲོས་ཚོགས་ཀྱི་ཚོགས་གཙོ་བཀའ་བློན་ཁྲི་པ་ལས་དབང་ཆ་ཆེ་བ་དང་བཏང་འཛིན་དོ་དམ་ཉུང་བ་ཡོད། དེ་ནི་བོད་མི་མང་སྤྱིའཐུས་ལྷན་ཚོགས་ཀྱིས་གྲོས་ཚོགས་ཀྱི་ཚོགས་གཙོའི་འགན་དབང་གནད་དོན་ཐད་ལ་བསམ་ཞིབ་བྱེད་རྒྱུ་ལས་བོད་མི་འོས་ཤོག་བླུག་མཁན་ཚོས་དོ་སྣང་གཟབ་ནན་བྱེད་དགོས་པའི་གནད་དོན་ཞིག་མིན། བདེ་སྐྱིད་ཆོས་དབྱངས་ལགས་ཕྱི་དྲིལ་ལས་ཁུངས་ཀྱི་བཀའ་བློན་ཞིག་ཡིན་པའི་ཆ་ནས་ཕྱི་ཕྱོགས་སུ་བསྐྱོད་དེ་འབྲེལ་བ་མང་ཙམ་བྱེད་དགོས་ཀྱང་ཁོང་ཕྱི་རྒྱལ་ཁག་ཏུ་བསྐྱོད་ནས་བོད་དོན་གནས་ཚུལ་ཁྱབ་སྤེལ་བྱེད་རྒྱུའི་ལས་འཆར་དེ་ཙམ་སྒྲིག་བཀོད་བྱས་མེད།
དབུས་བོད་མིའི་སྒྲིག་འཛུགས་ཀྱི་གཞུང་འབྲེལ་དྲྭ་རྒྱར་བཀོད་པར་གཞིགས་ན་ཕྱི་དྲིལ་བཀའ་བློན་མཆོག་ཟླ་༡༡པའི་ཚེས་༢༧ཉིན་སྦར་ཟལ་”Brussels”ནང་བསྐྱོད་རྒྱུ་ཡིན་པའི་གནས་ཚུལ་མ་གཏོགས་གསལ་བཏོན་གནང་མེད།འདི་ནི་ཡ་མཚན་སྐྱེ་དགོས་པའི་གནད་དོན་ཞིག་ཡིན།གང་ཡིན་ཞེ་ན་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་ལགས་གཏམ་བཤད་ཤོད་རྒྱུའི་ཐད་བྱང་ཆུབ་པ་ཞིག་ཡིན་ཀྱང་གོ་སྐབས་དེ་འདྲ་མ་གནང་བ་ཡིན། ཕྱི་དྲིལ་བཀའ་བློན་མཆོག་གིས་གཏམ་བཤད་ཇི་ལྟར་གནང་གི་ཡོད་མེད་ནི་ཉེ་ཆར་ཟླ་༡༠པའི་ཚེས་༢༠ཉིན་ཁན་ན་ཀྲའི་གཟུགས་མཐོང་བརྙན་འཕྲིན་(CTV)ལེ་ཚན་བཅར་འདྲི་ལས་ཤེས་ཐུབ། ང་ཚོའི་རེ་བ་ལ་མ་འོངས་པར་དབུས་བོད་མིའི་སྒྲིག་འཛུགས་ཕྱི་དྲིལ་བཀའ་བློན་མཆོག་ལ་སོ་སོའི་ཕྱག་ལས་ཐོག་གོ་སྐབས་མང་ཙང་གནང་རྒྱུའི་རེ་བ་བྱེད་བཞིན་ཡོད།
དབུས་བོད་མིའི་སྒྲིག་འཛུགས་ཕྱི་དྲིེལ་བཀའ་བློན་གྱི་འགན་དབང་མང་དུ་བཏང་བ་ནང་བཞིན་ཁོང་ལ་བོད་མིའི་ངོ་ཚབ་མཚོན་མཁན་གྱི་བོད་ཀྱི་དོན་གཅོད་ཁང་བཏང་འཛིན་གནང་རྒྱུའི་དབང་ཆ་མང་ཆེ་བ་ཕུལ་དགོས། ང་ཚོའི་བསམ་པར་གཞིགས་ན་སྐུ་ཚབ་དོན་གཅོད་ཁག་ནི་ཕྱི་དྲིལ་བཀའ་བློན་གྱི་མངའ་འོག་ཏུ་ཡོད། ཁོང་ཚོ་ཕྱི་རྒྱལ་གྱི་རྒྱལ་ས་ཁག་ཏུ་དབུས་བོད་མིའི་སྒྲིག་འཛུགས་ཀྱི་གཞི་རྩའི་སྐུ་ཚབ་ཆེད་ལས་ཕྱི་འབྲེལ་མི་སྣ་ཞིག་ཡིན་པའི་ཆ་ནས་ཕྱི་ཕྱོགས་སུ་ངེས་པར་དུ་ལས་དོན་གཉེར་རྒྱུ་གལ་འགངས་ཆེན་པོ་ཡིན། བཀའ་བློན་ཁྲི་པ་མཆོག་དང་ཕྱི་དྲིལ་བཀའ་བློན་རྣམ་གཉིས་སྐབས་སྐབས་སུ་ཕྱི་རྒྱལ་དུ་ལྟ་སྐོར་ལ་ཕེབས་དགོས་ཐུག་ཀྱང་། ཕྱིའི་རྒྱལ་ཁབ་ཁག་གི་འབྲེལ་བ་ཉར་རྒྱུའི་ལས་འགན་ཆ་ཚང་སྐུ་ཚབ་དོན་གཅོད་ཁག་གིས་ཕྲག་སྟེང་དུ་འཁུར་ཐུབ་པ་དགོས། ལས་འགན་དེ་གལ་ཆེན་པོ་ཡིན་པ་སེམས་ལ་བཞག་པ་ནང་བཞིན་མ་འོངས་བའི་སྐུ་ཚབ་དོན་གཅོད་འདམ་ག་བྱེད་ཕྱོགས་ཐད་ཐུགས་བསམ་བཞེད་དགོས།
མཐའ་དོན་འདས་ཟིནཔའི་ཉིན་བརྒྱ་དང་འབྱུང་འགྱུར།
གོང་དུ་བཤད་པའི་གནད་དོན་ནི་ང་ཚོས་བཀའ་བློན་ཁྲི་པའི་གསར་གཏོད་ཀྱི་བྱ་གཞག་སྟེ་ཉིན་བརྒྱ་ཐམ་པའི་གྲུབ་འབྲས་དག་ལ་རྟོགས་ཞིབ་བྱས་ནས་སྡོམ་ཚིག་བཀོད་པ་དག་ཡིན། ཀློག་པ་པོ་ཚོར་ང་ཚོས་སྐུལ་ལྕག་ཞུ་རྒྱུ་ཞིག་ལ་བཀའ་ཁྲིའི་ཉིན་བརྒྱའི་ལས་ཀའི་གྲུབ་འབྲས་དང་མ་འོངས་པར་ཁྱོད་ཚོས་ཁོང་གི་ཕྱག་ལས་ཐད་ཐུགས་བསམ་ཇི་ལྟར་བཅངས་ཀྱི་ཡོད་པའི་སྐོར་སོ་སོའི་བསལ་ཚུལ་རྩོམ་རིགས་དང་ཡི་གེ་གང་མང་བཀུར་གནང་ཡོང་བའི་རེ་སྐུལ་ཞུ་བཞིན་ཡོད།