བཙུན་ཐར་ཚེ་རིང༌།
སྤྱིར་གཞུང་དང་གཞུང་འབྲེལ་མ་ཡིན་པའི་ཚོགས་པ་གང་ཞིག་ཡིན་ནའང༌། གསོལ་སྟོན་ཆེ་ཕྲ་ཆུང་གསུམ་འདྲ་མིན་ཐོག་རྒྱན་འཛུགས་པ་ནི་བཙན་བྱོལ་བོད་མིའི་གོམས་གཤིས་ལྟ་བུར་ཆགས་འདུག གཟའ་སྤེན་པའི་ཕྱི་དྲོར་འབྲེལ་འདྲིས་ཆེ་བའི་གྲོགས་པོ་ཞིག་གི་གཉེན་སྟོན་དུ་སོང་བ་ཡིན། གཉེན་སྟོན་ཐོག་བོད་གཞུང་གི་གཞུང་ཞབས་ཁ་ཤས་དང་ཚོགས་པ་ག་གེ་མོའི་ཚོགས་གཙོ། ཚགས་པར་ག་གེ་མོ་ཞིག་གི་རྩོམ་སྒྲིག་ལས་རོགས། མེ་ལོག་ཁྲོམ་ལམ་གྱི་གཡས་ཟུར་གཡོན་ཟུར་གྱི་ཚོང་པ་ཆེ་ཆུང་ཁ་ཤས། ད་དུང་བོད་ཁྱིམ་སློབ་གྲྭའི་དགེ་རྒན་དང་མ་མ་སོགས་ལས་རིགས་མི་གཅིག་པ་མང་པོ་ཞིག་འཛོམས་འདུག ནམ་རྒྱུན་གཉེན་སྟོན་དང་སྐྱེས་སྐར་ལ་སོགས་ལ་འགྲོ་དུས་ཤོག་ཕེ་དང་མ་ཅང་སོགས་མི་ཆོས་ཀུན་སྤྱོད་དང་འགལ་བའི་རྒྱན་འཛུགས་རྩེད་མོའི་རིགས་ལ་རོལ་བཞིན་པ་མཐོང་དུས། རྒྱུ་མཚན་ཅི་ཞིག་གིས་ཡིན་མིན་མི་ཤེས་ཀྱང༌། ང་རང་གཏན་ནས་བདེ་བོ་མེད་པ་ཞིག་ཆགས་ཀྱིན་འདུག ལྔ་བཅུ་ང་དགུ་ལོའི་ཛ་དྲག་ཉེན་འཕྲང་སྐབས་སུའང་བོད་རྒྱལ་ཁབ་ཆེན་མོའི་བཀའ་བློན་རྣམ་པས་ཅི་ལ་ཡང་མི་སྙམ་པར་མ་ཅང་དང་ཤོག་ཕེ་སོགས་ལ་བག་མེད་རྣམ་གཡེང་གི་དབང་གིས་བོད་རྒྱལ་ཁབ་ཆེན་མོ་ཤོར་བཅུག་པ་སོགས་ལོ་རྒྱུས་ལ་ཞིབ་འདང་རེ་རྒྱག་དགོས་ཀྱི་འདུག ཡིན་ནའང༌། ད་ལྟའང་ད་དུང་མགོ་བཀའ་བློན་ཁྲི་ཟུར་ནས་སྨད་མང་ཚོགས་དཀྱུས་མ་ཡན་གྱིས་ཚུལ་དེར་ཉམས་མྱོང་བླང་དོར་ཅི་ཡང་མེད་པར་སྔར་གྱི་ཕམ་ཁའི་ལམ་ལ་མུ་མཐུད་དུ་སྐྱོད་བཞིན་པ་འདི་ཅི་ཞིག་གིས་ཉེས་སོང༌།
ཉིན་དེར་ཡང་འདུ་ཚོགས་གསོལ་སྟོན་བཤམས་སའི་ཅོག་ཙེ་རེ་རེའི་སྒང་ལ་མ་ཅང་དང་ཤོག་ཕེ་བཞག་ཡོད་ལ། མགྲོན་པོ་རྣམས་ཀྱིས་ཀྱང་དུས་ཚོད་ཆུད་ཟོས་སུ་མ་བཏང་བར་དམ་འཛིན་བྱས་ཏེ་མ་ཅང་དང་ཤོག་ཕེ་རྩེད་པ་དང༌། ཐོབ་ཤོར་གྱི་དངུལ་ཕར་སྟེར་ཚུར་ལེན་བྱེད་བཞིན་འདུག ང་ཚོའི་ཅོག་ཙེའི་མཐའ་འཁོར་གྱི་མི་རྣམས་རྒྱན་འཛུགས་རྩེད་མཁན་འདྲ་མེད་ལ། ང་ཚོས་གཞིས་སྡོད་བོད་ཆོལ་ཁ་གསུམ་གྱིས་རྒྱལ་ནག་ལ་ཞི་རྒོལ་བྱས་པ་དང་བྱེས་སྡོད་བོད་རིགས་ཚོས་ཕྱི་རྒྱལ་གང་སར་ཨོ་ལམ་ཕིག་དཔལ་འབར་བརྒྱུད་སྤྲོད་ལ་ངོ་རྒོལ་བྱས་པ་སོགས་འཛམ་གླིང་གང་སར་རླུང་ལྟར་གྲགས་པའི་རྒྱལ་སྤྱིའི་བོད་དོན་གླེང་པའི་སྐོར་གླེང་བཞིན་བསྡད།
སྤྱིར་བོད་གངས་ཅན་གྱི་གཉེན་སྟོན་གྱི་གོམས་གཤིས་ལ་ལུང་པ་རེ་ལ་ཆུ་རེ་དང་སྡེ་བ་རེ་ལ་སྲོལ་རེ་བཤད་སྲོལ་ཡོད་མོད། གཉེན་སྟོན་གོམས་གཤིས་ཅུང་ཙམ་མ་འདྲ་ནའང༌། མ་ཅང་དང་ཤོག་ཕེ་སོགས་རྒྱན་འཛུགས་རྩེད་མོའི་རིགས་གཏན་ནས་མེད་ལ། སྤྱོད་དགའ་ཆེ་ཤོས་ནི་དམངས་གླུ་དང་གཞས། གླུ་ཤགས། ཁ་མཚར་སོགས་ཀྱིས་མི་དམངས་དགོད་སྒྲ་ཆེར་ག་འདྲ་ཞིག་ནས་གཏོང་ཐུབ་མིན་དང༌། མི་མང་གི་སེམས་ངོར་དགོད་སྒྲའི་གང་བ་ན་དེའི་ཉིན་གྱི་གཉེན་སྟོན་བྲོ་བ་ཆེ་བར་གླེང་ཚུལ་ཡོད་པས། ཤ་མར་ཇ་ཆང་དང་སིལ་ཏོག་སོགས་ཀྱིས་སྣེ་ལེན་གཟབ་རྒྱས་བྱེད་པ་སྨོས་ཅི། ད་དུང་གཉེན་སྟོན་ཐོག་མི་མང་གི་དགོད་སྒྲའི་ཤུགས་ཆེ་ཆུང་ལ་བལྟ་བཞིན་རྟེན་འབྲེལ་རང་འགྲིག་གིས་བརྟག་དཔྱད་བྱས་པ་སོགས་ཀྱང་ཡོད།
བཙན་བྱོལ་གཞུང་གི་ཆེ་ས་ནས་མགོ་བཀའ་བློན་དང་ཆུང་ས་ནས་སྨད་མི་སེར་དཀྱུས་མ་ཚུན་གྱིས་རྒྱལ་བའི་བཀའ་ཟེར་བཞིན་ཁ་ནས་རླུང་ལྟར་སྒྲོག་བཞིན་ཡོད་ནའང༌། སྐྱབས་མགོན་རིན་པོ་ཆེས་རྒྱན་འཛུགས་སྤོང་བབ་ཐད་བཀའ་སློབ་རིམ་བཞིན་སྩལ་ཡོད་པ་གཞུང་ཞབས་རྣམས་པ་དང་ཚོགས་ག་གེ་མོའི་ཚོགས་གཙོ། ཚགས་པར་རྩོམ་སྒྲིག་ལས་རོགས་སོགས་ཀྱིས་གཏན་ནས་མ་ཐོས་དང་མ་མཐོང་བ་ག་ལ་ཡིན། དོན་དངོས་སུ་ང་ཚོས་མ་ཅང་དང་ཤོག་ཕེ་སོགས་ཀྱི་རྒྱན་འཛུགས་རྩེད་མོ་རིགས་ལ་སྤང་བླང་དོ་སྣང་མི་བྱེད་པར་ད་དུང་རང་དབང་ངམ་རང་བཙན་ག་འདྲ་ཞིག་རྩོད་དགོས་པ་དང༌། རྩོམ་པ་པོས་མི་མང་ལ་སྐུལ་སློང་དང་སྣེ་ཁྲིད་ག་འདྲ་ཞིག་བྱེད་དགོས་མིན་སོགས་ཡིད་ལ་ངང་ངམ་ཤུགས་ཀྱིས་ཤར་སོང༌།།