དགེ་མཐར།
———
བོད་མི་མང་གི་ཐབ་རྩོད་ནི་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ལྟར་འགྲོ་བ་མིའི་ཐོབ་ཐང་གི་ཆེད་དུ་མ་ཡིན་ལ། ཡང་ན་རྒྱ་རིགས་དམངས་གཙོ་དོན་གཉེར་བ་རྣམས་ལྟར་དམངས་གཙོའི་སྲིག་གཞུང་སྤེལ་པའི་ཆེད་དུ་ཡང་མ་ཡིན། ཡང་ཡི་ཤུའི་རྣམ་དག་ཆོས་ལུགས་ཀྱི་གཞུང་ལྟར་ཆོས་ལུགས་སྤེལ་བའི་ཆེད་དུ་ཡང་མ་ཡིན། ང་ཚོ་བོད་མི་རྣམས་ཀྱི་ཐབ་རྩོད་ནི་བོད་མིར་རང་ཐག་རང་གཅོད་དང་རང་ཡུལ་རང་ལག་ཏུ་ཡོང་བའི་ཆེད་དུ་ཡིན། གལ་ཏེ་བོད་ཡུལ་དེ་བོད་མིར་བདག་དབང་ཐོབ་རྗེས་བོད་ཡུལ་དེ་དམངས་གཙོའམ་དམར་ཤོག་གམ་སེར་ཤོག་གང་དུ་འགྱུར་ཡང་ཁྱད་པར་མེད། བོད་རང་བཙན་ནི་བོད་མིའི་འདོད་འདུན་དང་དམིགས་ཡུལ་ཡིན། དམིགས་ཡུལ་བོད་རང་བཙན་དོར་ན་ཆོས་དད་རང་དབང་དང་དམངས་གཙོ་དང་འགྲོ་མ་མིའི་ཐོབ་ཐང་སོགས་ལ་ཇི་ཙམ་འབད་ཀྱང་ང་ཚོའི་རྩ་དོན་ངོ་མར་མཐུ་ཤོར་འགྲོ་བ་ལས་ནུས་པ་གང་ཡང་ཐོན་མི་ཐུབ། བོད་ཕྱི་ནང་དུ་གནས་པའི་བོད་མི་སུ་ཡིན་ཡང་སྙིང་གི་ནང་དུ་བོད་རང་བཙན་མི་བསམ་མཁན་སུ་ཡང་མེད་ལ་དེ་ལ་དུས་རབས་ནས་དུས་རབས་དང་མི་རབས་ནས་མི་རབས་འབད་བརྩོན་བརྟེན་རྒྱུར་ཡང་ཐེ་ཚོམ་མེད།
འོན་ཀྱང་རྡ་སའི་བཙན་བྱོལ་བོད་གཞུང་གི་དམིགས་ཡུལ་ངོ་མ་དེ་སྔར་གྱི་དགའ་ལྡན་ཕོ་བྲང་བོད་ནང་སྐྱར་གསོ་ཡོང་ཐབ་ཡིན་ནམ། ཡང་ན་སྔར་མེས་དབོན་རྣམ་གསུམ་གྱི་བོད་དེ་སྐྱར་གསོ་ཆེད་ཡིན་ནམ། ཡང་ན་བོད་ནང་གི་བོད་མི་ཚོར་འགྲོ་བ་མིའི་ཐོག་ཐང་དང་ཆོས་དད་རང་མོས་ལ་རྒྱབ་སྐྱོར་ཡིན་ནམ། ཡང་ན་རྒྱ་གར་དང་བལ་ཡུལ་ནང་གི་སྐྱབས་བཅོལ་བོད་མི་རྣམས་བོད་ནང་པྱིར་ལོག་ཐུབ་པ་བཅས་གང་ཡིན་ཁ་གསལ་པོ་ཞིག་མེད་པའི་གནས་སྟངས་འདི་ལྟ་བུའི་འོག་མི་ལོ་ལྔ་བཅུའི་རིང་སྐྱབས་བཅོལ་གནས་སྟངས་འོག་བསྡད་པའི་བོད་མི་རྣམས་ཀྱི་མ་འོངས་འདུན་ལམ་སྐོར་ལ་ཇི་ལྟར་བསམ་དགོས་སམ།
ཕྱི་ལོ་ ༡༩༥༩ ལོ་ནས་རིམ་པས་བཙན་བྱོལ་བོད་མི་རྣམས་རྒྱ་གར་དང་བལ་ཡུལ་འབྲུག་ཡུལ་བཅས་སུ་གཞིས་ཆགས་ཏེ་གནས་གོ་ཚུགས་པ་ནས་རིམ་པས་རང་རང་གི་འཇོན་ཐང་གི་ནུས་པས་སྐྱིད་སྡུག་འདྲ་མིན་སྣ་ཚོགས་སུ་འགྱུར། ད་བར་མི་ལོ་ལྔ་བཅུའི་རིང་རྡ་སའི་བོད་གཞུང་གིས་ཅི་གསུངས་བཀའ་འགྲུབ་འོག་རྒྱ་གར་དང་བལ་ཡུལ་གྱི་ལུང་ཁུགས་ཁག་ནང་གནས་པའི་ཉམས་ཆུང་སྐྱབས་བཅོལ་གཞིས་ཆགས་རྣམས་ཀྱི་མི་དམངས་ཀྱི་གནས་སྟངས་ནི་འཚོ་བའི་ཆ་ནས་ས་གནས་ཀྱི་ཡུལ་མི་ཉམ་ཐག་ཁག་གཅིག་ལས་ཏོག་ཙམ་ལེགས་པ་ཡོད་སྲིད།
འོན་ཀྱང་བོད་མི་དེ་དག་རང་ཉིད་དེ་སྔ་ལོ་མང་གནས་སའི་ཁང་པ་དང་གཞིས་ཆགས་ཀྱི་ཐོབ་སྐལ་ས་ཞིང་ཡང་རང་ཉིད་ལ་ཁྲིམས་མཐུན་བདག་དབང་མེད་ཐོག་ཡུལ་དེར་མི་ལོ་ལྔ་བཅུ་བསྡད་ཀྱང་ད་དུང་གནས་སྐབས་་ལག་འཁྱེར་ལོ་རེ་རེ་ལ་གསར་བཅོས་རེ་བྱས་ནས་བསྡོད་ཆོག་ཙམ་དང་དངུལ་ཁང་ཨང་སྒོ་ཕྱེ་ཆོག་ཙམ་ལས་ལུང་པ་དེའི་ནང་ཁྲིམས་མཐུན་གྱི་ཕུགས་རྒྱང་རིང་པོའི་ཚོང་ལས་དང་ལས་འཆར་གང་ཡང་སྤེལ་མི་ཆོག་པ་ཞིག་འཛིན་ནས་བོད་རང་བཙན་གནམ་ཆུ་ལྟར་གུགས་ཏེ་ད་བར་གནས་བཞིན་པ་དེ་རྣམས་ད་དུང་ཡང་མི་རབས་ནས་མི་རབས་མུ་མཐུད་འདི་མུར་བསྡོད་ཐབ་མེད་སྟབས་དེ་དག་གི་མ་འོངས་པའི་གནས་སྟངས་ཇི་འགྱུར་སྐོར་ལ་འབྲེལ་ཡོད་ལས་ཀྱི་སྣེ་མོར་གཏོགས་པ་རྣམས་ནས་ཧ་ལས་པའི་འགན་ཆེན་པོ་ཞིག་འཁྱེར་ནས་ཛ་དྲག་པོས་བོད་མི་དེ་རྣམས་ཀྱི་ཕུགས་རྒྱང་རིང་པོའི་བདེ་དོན་ལ་དམིགས་བསལ་གྱི་དོ་སྣང་དང་བཟང་བཅོས་ཞིབ་ཚགས་ཀྱིས་དེང་དུས་རྒྱ་གར་དང་བལ་ཡུལ་མི་དམངས་ཀྱི་རང་དབང་དང་ཤེས་ཡོན། ཆབ་སྲིད་དང་དཔལ་འབྱོར་བཅས་ཀྱི་ཡར་རྒྱས་དང་མཉམ་བསྲེས་མཉམ་འགྲོད་ཐུབ་པ་ཞིག་ཏུ་འགྱུར་བར་འབད་དགོས་པའི་དུས་ལ་བབས་ཡོད།
གནད་དོན་དེ་ནི་དབུས་བཙན་བྱོལ་བོད་མིའི་འཛིན་སྐྱོང་གི་སྒྲིགས་གཞི་གསར་འཛུགས་སྐབས་ཀྱི་ཐོག་མའི་དམིགས་ཡུལ་གཙོ་བོ་ཞིག་ཡིན་པས་ད་ཆ་མི་ལོ་ལྔ་བཅུ་ཐམ་པ་རང་དབང་གི་ལུང་པར་གནས་པའི་རྗེས་སུ་ཡང་དམིགས་ཡུལ་དེའི་རྣམ་པ་གསལ་པོ་བཟོ་མ་ཐུབ་པ་གང་ཡིན་ནམ།