བཙན་བྱོལ་བོད་མིའི་མང་གཙོའི་འཕེལ་རིམ་སྐོར།

ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས།

 
ཕྱི་ལོ་གཅིག་སྟོང་དགུ་བརྒྱ་ལྔ་བཅུ་ང་དགུ་ལོར་བོད་ཀྱི་ཤར་ཕྱོགས་སུ་གནས་པའི་ཁྱིམ་ཚེས་རྒྱལ་ཁབ་རྒྱ་ནག་གུང་ཁྲན་སྲིད་གཞུང་ནས་བོད་དུ་བཙན་འཛུལ་གྱིས་བོད་ས་ཤོར་ནས་༧གོང་ས་མཆོག་གི་དབུ་འཁྲིད་འོག་བཀའ་ཤག་ལྷན་རྒྱས་དང་། བོད་མི་ཁྲི་ཚོ་བརྒྱད་ལྷག་ཙམ་བཅས་བོད་ཀྱི་ལྷོ་ཕྱོགས་སུ་གནས་པའི་ཁྱིམ་མཚེས་རྒྱལ་ཁབ་རྒྱ་གར་འཕགས་ཡུལ་་དང་། བལ་ཡུལ། འབྲུག་ཡུལ་བཅས་ནང་སྐྱབས་བཅོལ་དུ་འཁོད་ནས་༧གོང་ས་མཆོག་ནས་མ་འོངས་བོད་ཀྱི་ཆབ་སྲིད་ལམ་ལུགས་དེ་མི་མང་མང་གཙོའི་ལམ་ལུགས་ལ་ཁ་ཕྱོགས་ནས་ཆོལ་གསུམ་ཆོས་ལུགས་དང་བཅས་པའི་མི་མང་གི་སྐུ་ཚབ་སྤྱི་འཐུས་བསྐོ་བཞག་གིས། སྤྱི་འཐུས་ནས་འཛིན་སྐྱོང་གི་ལས་དོན་ཐོག་ཐུགས་སྣང་དང་རྒྱུན་ལས་ཚོགས་འདུར་མཉམ་ཞུགས་གནང་རྒྱུའི་མཚོན་པའི་འཛིན་སྐྱོང་གི་གལ་ཆེའི་ལས་དོན་ཁག་ལ། སྤྱི་འཐུས་ནས་ཡར་འགེབས་མར་འཐེན་གྱི་བྱ་ར་ནན་པོ་བྱ་རྒྱུའི་ལམ་ལུགས་ནས་དུས་ཀྱི་འཕོ་འགྱུར་དང་སྤྱི་ཚོགས་ཀྱི་འཕེལ་རིམ་སོགས་ལ་འགན་འཁུར་ནས་ཕྱི་ལོ་གཅིག་སྟོང་དགུ་བརྒྱ་དགུ་བཅུ་དགུ་གཅིག་ལོར། སྤྱི་འཐུས་ཀྱི་གྲངས་ཚད་མང་དུ་བཏང་ནས་བཙན་བྱོལ་བོད་མིའི་བཅའ་ཁྲིམས་ཀྱི་ནུས་པ་འཐོན་ནས་བཙན་བྱོལ་སྤྱི་ཚོགས་འདི་གང་ཟག་གི་དབང་བསྒྱུར་ནས་ཁྲིམས་ཡིག་གི་དབང་བསྒྱུར་ནང་ཁ་ཕྱོགས་པའི་ཉིན་མོ་ཡིན་པའི་ངོ་སྤྲོད་སྐབས་དེའི་ཚོགས་གཙོ་མཁས་དབང་ཟམ་གདོང་རིན་པོ་ཆེ་མཆོག་ནས་བཀའ་སློབ་ཕེབས་ཡོད་ལ།

བཅའ་ཁྲིམས་སུ་གསལ་བ་ལྟར་སྤྱི་འཐུས་གྲོས་ཚོགས་ཀྱི་ལས་རིམ་དབྱར་ཚོགས་དང་དགུན་ཚོགས་བཅས་ལོ་རེར་ཚོགས་འདུ་ཐེངས་གཉིས་རེ་ཚོགས་ནས་དངུལ་རྩིས་གཏན་འབེབས་ཀྱི་མཚོན་པའི་ཁྲིམས་སྒྲིག་བསྐྱར་བཅོས་སོགས་འཛིན་སྐྱོང་དང་། ཁྲིམས་བཟོའི་ལས་དོན་ཡོངས་རྫོགས་བཅའ་ཁྲིམས་ཀྱི་འོག་ཏུ་བསྒྲུབ་དགོས་པའི་མང་གཙོ་ཡང་དག་པ་ཁྲིམས་ཀྱི་དབང་བསྒྱུར་འོག། ང་ཚོ་འཚོ་བཞིན་པ་ནས་ཡར་རྒྱས་དང་ཤེས་བྱ་ལ་མཐའ་མེད་པ་ནས་ང་ཚོའི་སྲིད་སྤྱིའི་འོས་བསྡུའི་སྒྲིག་གཞི་ལ་བསྐྱར་བཅོས་འགྲོ་དགོས་པ་དེ་མང་གཙོའི་རྒྱལ་ཁབ་སྤྱིའི་སྲིད་འཛིན་དང་སྲིད་བློན་གྱིས་འོས་བསྡུའི་ལས་རིམ་ནས་ལེགས་ཆ་བླངས་ནས་ད་ལྟའི་ང་ཚོའི་འོས་བསྡུའི་སྒྲིག་གཞི་ལ་སྙིགས་དོར་བཅུད་ལེན་བྱ་རྒྱུ་དེ། ལོ་རྒྱུས་ཀྱིས་ངོ་སྤྲད་པའི་ཆབ་སྲིད་ཀྱི་སྐྱོག་མཚམས་གལ་ཆེན་ཞིག་ཡིན་པའི་ངོས་འཛིན་དང་བཅས། གལ་པོ་ཆེ་ལ་ནན་ཏན་དང་དམ་པའི་ཆོས་ལ་བརྒྱ་ཚར་ཟེར་བའི་དཔེ་ལྟར་རིང་མིན་ཚོགས་ལ་ཉེ་བའི་སྤྱི་འཐུས་གྲོས་ཚོགས་ཀྱི་དབྱར་ཚོགས་ཐོག་སྲིད་སྤྱིའི་འོས་བསྡུའི་སྒྲིག་གཞི་ལ་བསྐྱར་བཅོས་དགོས་པའི་བསམ་ཤོག་འདི་བཞིན། བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་བསྒྲུབས་ནས་གང་ཟག་སྒེར་གྱི་བསམ་ཚུལ་གླེང་གི་ཡོད་ལ། དེ་སྔོན་ཡང་གསར་ཤོག་བརྒྱུད་ལམ་ཁག་ལ་རང་གི་བསམ་ཚུལ་གླེང་རྒྱུའི་གོ་སྐབས་བྱུང་བ་བཅས།

ད་ལྟའི་སྲིད་སྤྱིའི་འོས་བསྡུའི་སྒྲིག་གཞིའི་ནང་སྔོན་འགྲོ་དང་དངོས་གཞི་གཉིས་ཡོད་པ་དེ་དག་འོས་བསྡུ་གཅིག་གིས་འཐུས་པ་བྱས་ན། གཞུང་གྲོན་ཆུང་བ་དང་། མི་མང་ལ་བརྡབས་གསིག་མེད་པ། ཕྱོགས་གཏོགས་དང་ལུང་ཚན་ཤོག་སྒྲིལ་ལ་འགན་འཁུར་ནས་སྐབས་འཚོལ་བ་ཚོར་གོ་སྐབས་ཉུང་བ་བཅས་སྤྱི་སྒེར་གཉིས་ལ་ཉེས་པའི་ཆ་ལས་ལེགས་པའི་ཆ་མང་བ་ཡོད་ན། མང་གཙོ་དང་ཁྲིམས་ཀྱི་དབང་བསྒྱུར་ལ་དགའ་ཞེན་དང་ཡིད་ཆེས་བརྩི་བཀུར་བློ་གཏད་ཞུ་མཁན་གྱི་བོད་མི་མང་ནས་ཐུགས་སྣང་དང་རྒྱབ་སྐྱོར་ཐོབ་པའི་ཡིད་ཆེས་དང་བཅས་སྲིད་སྤྱིའི་འོས་དམིགས་འདེམས་སྒྲུག་ཚོགས་ཆུང་ཟུར་འཛུགས་དགོས་པ་དང་། འདེམས་སྒྲུག་ཚོགས་ཆུང་ནང་བཀའ་ཤག་གི་སྐུ་ཚབ་དང་སྤྱི་འཐུས་ཀྱི་སྐུ་ཚབ། ཆོལ་ཁ་དང་ཆོས་ལུགས་ཀྱི་སྐུ་ཚབ་བཅས་ལས་སྒྲུབ་པའི་ཚོགས་ཆུང་ནས་སྲིད་སྐྱོང་ལ་འོས་དམིགས་མི་གསུམ་དང་། ཆོས་ལུགས་དང་ཆོལ་ཁ་ཕྱི་རྒྱལ་ཁག་བཅས་སྤྱི་འཐུས་རེར་འོས་དམིགས་མི་གསུམ་རེ་བཅས་མིང་འདོན་གནང་ནས་དེ་དག་འོས་གཞི་ལ་བཞག་ནས་རང་ལོ་བཅོ་བརྒྱད་ཡན་གྱི་འོས་འཕེན་རྒྱ་ཆེ་མི་མང་ནས་འོས་འཕེན་གནང་བའི་སྒྲུབ་འབྲས་དབུས་འོས་བསྡུ་ལྷན་ཁང་ནས་ཡོངས་ཁྱབ་གསལ་བསྒྲགས་གནང་ནས་སྲིད་སྤྱིའི་འོས་བསྡུའི་ལས་རིམ་ཚར་བའི་ཡོངས་ཁྱབ་གསལ་བསྒྲགས་གནང་དགོས་པ་བཅས། མང་གཙོ་དང་ཁྲིམས་ཀྱི་དབང་བསྒྱུར་འོག་བོད་མི་མང་འཚོ་ཐུབ་པའི་འགན་འཁུར་ད་ལྟའི་ང་ཚོའི་མི་ཐོག་འདིའི་བཞེས་མ་ཐུབ་ཚེ་མ་འོངས་ལོ་རྒྱུས་ཀྱིས་ང་ཚོར་རྗེས་འདེད་ནན་པོ་བྱེད་སྲིད་པ་མ་རེད་དམ།