ཀླུ་སྨྱོན།
སེམས་ཀྱི་ནགས་ཀློང་འདི་ཡི་ཕ་མཐའ་ན། །
སངས་རྒྱས་ཞེས་བྱའི་བྱིས་པ་བསམ་མེད་ཅིག །
རེས་འགར་ངུ་ཞིང་རེས་འགར་དགོད་པ་སྟེ། །
རྣམ་རྟོག་ཨ་མས་བཙལ་ཀྱང་མ་རྙེད་མཚར། །
རྣམ་རྟོག་པུར་སྨྱུག་ཅིག་གི་གཡོ་འགུལ་ལས། །
བདེ་སྡུག་རི་མོ་ཅི་ཡང་བྲིས་མོད་ཀྱང་། །
ཞིབ་ཏུ་བསམས་ན་གཞི་མེད་རྩ་བྲལ་ཏེ། །
སྨིག་སྒྱུའི་ཆུ་ལྟར་འཐུང་བཞིན་འཐུང་བཞིན་འཆི། །
བུད་མེད་ཅེས་བྱ་སྒྱུ་མའི་མཛེས་སྡུག་མཁན། །
སྐྱ་སེར་ཀུན་གྱི་སྙིང་ལ་རབ་བཞུགས་པ། །
རང་བྱུང་སངས་རྒྱས་ཞེས་བྱ་འདི་ཡིན་ལ། །
སེམས་ཀྱི་གནས་ལུགས་ཀྱང་ནི་འདི་ཡིན་ནོ། །
འཆི་བ་ཞེས་བྱ་རང་གི་མགྲོན་ཁང་སྟེ། །
སྤུས་གཙང་ཞིག་དང་གོང་ཚད་ཁེ་བོ་ཞིག །
ཡིན་མིན་དྲི་བ་འདི་དག་རང་ལ་དྲིས། །
ཞག་གཅིག་སྡོད་མིན་སེམས་ཐག་རང་གིས་ཆོད། །
ཐད་སོའི་ནམ་མཁའ་དེ་ལ་ཕར་ལྟོས་དང་། །
རང་སེམས་གསལ་བའི་མེ་ལོང་ཆེན་པོ་ཞིག །
སྐྱེས་ཙམ་ཉིད་ནས་ཨ་མའི་མིག་འོད་བཞིན། །
ཁྱོད་ལ་བསྒུགས་ནས་ཡོད་པ་མི་མཐོང་ངམ། །
རི་བོ་སྨུག་པས་གཡོགས་ཤིང་རྫི་མོའི་གླུ་སྒྲ་རྣ་བར་སྙན་པའི་སར། །
མེ་ཏོག་རྐང་གཅིག་བཏུས་ཏེ་དྭངས་གཙང་ཆུ་མོའི་གཞུང་ལ་བསྐུར་པའི་རྗེས། །
ལོ་ཟླའི་ཆར་གྱིས་སྦངས་པའི་སྤྱིལ་བུར་བསྐལ་པ་སྟོང་དུ་གཉིད་པ་ན། །
རྨི་ལམ་དུ་ཡང་མཛེས་མ་ཁྱོད་ཀྱི་ཞལ་རས་ཡང་ཡང་རྨིས་འདི་ཅི། །
དགེ་སློང་ཁྱེད་ཀྱི་སྣང་བ་ལ། །
མཛེས་མའི་འདོད་འགྱིང་ཡང་ཡང་སྣང་། །
དགེ་བསྙེན་ང་ཡི་རྨི་ལམ་ནང་། །
མཛེས་མ་འགས་ཤས་ཡང་ཡང་མཐོང་། །
སྙན་པའི་ངག་གིས་བསུ་འགྱུར་ན། །
མཛེས་མ་མི་ཁུག་མི་འདུག་ཀྱང་། །
སྙན་དངགས་བརྒྱན་ནས་ཤོད་འགྱུར་ན། །
མཛེས་མ་འཇིགས་ཤིང་ཕར་ཕར་བྲོས། །
སོ་སོའི་རང་ལ་གནས་ལུགས་ཡོད་ཁུལ་གྱི
བྱ་དངོས་ཀུན་ལ་འགྲེལ་བ་བཤད་ཁུལ་གྱི
ཆོས་ཉིད་འགྱུར་ལྡོག་རི་མོའི་ངང་ཚུལ་འདི།
སུ་ཡི་འགོག་དཀའ་རང་བྱུང་འབྱུང་བཞི་ཡིན།
སྙན་ངག་མཁན་ཚོས་མཛེས་མའི་མཛུམ་མདངས་གླེང་། །
སྙན་ངག་མ་ཚོས་ཕོ་གསར་གླེང་མཁན་དཀོན། །
མོ་ཡི་རིགས་ལ་འདོད་ཆགས་ཆུང་བ་ལགས། །
ཡང་ན་བུད་མེད་སྙན་ངག་དཀོན་པས་སོ།།
རྣམ་ཤེས་ཟེར་བའི་དངོས་མེད་དར་སྐུད་ཅིག།
སྔར་ནས་ད་དང་ད་ནས་ཕྱི་མར་འགྲོ།།
སྟོང་ཉིད་ཟེར་བའི་སྨྲ་བསམ་བརྗོད་མེད་ཅིག
དངོས་ཁམས་ཐམས་ཅད་དེ་ལ་འབྱུང་འཇུག་འགྲོ།།
མཚན་ཉིད་རིག་སྨྲའི་ངོས་ན་ཟབ་ཁྱད་འདྲ།།
དག་སྣང་དད་པའི་མདུད་ངོར་རྩ་ཆེན་འདྲ།།
དངོས་ཚན་བདེན་དོན་འཚོལ་ངོར་འཆར་སྣང་ཙམ།།
ཨ་ཕོ་རང་གི་སྣང་ངོར་ལྟ་ཚུལ་ཙམ།།
སྙན་ངག་སྙན་མོ་ཡིན་མིན་མི་ཤེས་རེད་ཨ།
ཚིག་སྦྱོར་འབྱོར་མོ་ཁ་ལ་བདེ་མོ་ཞིག།
མ་རེད་ཟེར་ས་མེད་པའི་ཡི་གེ་འདི།
བཞུར་ནི་ཡིན་ནམ་འཕྱོ་ནི་སུ་ཡིས་ཤེས།། ཧ་ཧ་ཧ།
ཨ་ལགས་ཁ་ནས་སྙན་ངག་བཞིར་བ་འདི།
ཨ་ལགས་འདོད་པ་བུ་མོར་སྐྱེས་བས་རེད།
ཨ་ལགས་ལིངྒ་ལག་པས་མ་བརྡར་སྔོན།
ཨ་ལགས་ཕྱག་ལ་སྨྱུག་གི་བཟུང་ན་ཡང་།
ཨ་ལགས་ཁྱེད་ཀྱི་ཁྱད་ཆོས་བཟང་ས་རེད།
གི་གྱི་ ཀྱི་ལ་ བགྱིད་བྲིས། །
གངས་ཀྱི་འཁྱགས་རོམ་བཞུར་བགྱིད། །
ནང་གི་མར་འཁྱགས་བཞུར་བགྱིད། །
ཀླུ་སྨྱོན་སྙན་དངགས་བཞུར་བགྱིད། །
ཀརྡོས་མཆན་འབུལ་བཞུར་བགྱིད། །
བཞུར་བགྱིད་སྤྱན་བསྟར་འབུལ་བགྱིད། །
ཨ་ལགས་ཚང་ལ་དགོས་པ་ཚེ་རིང་སྐྱིད། །
ཚེ་སྐྱིད་བྱུང་ན་གང་ཡང་སྙིང་པོ་མཐོང་། །
ཚེ་སྐྱིད་མེད་ན་འཇིག་རྟེན་སྟོང་པར་ཞིག །
ནམ་ཡང་ཨ་ལགས་སེམས་ནང་འཆར་ནས་ཡོད། །
རང་སེམས་གསང་བ་བསམ་མི་ཁྱབ་པའི་ཀློང་།།
རོལ་བ་འགོག་མེད་སྣ་ཚོགས་འཆར་བའི་རྩལ།།
ཉམས་རྟོག་ཅན་གྱིས་བལྟས་ན་ཉམས་རྟོག་འཕེལ།།
ཉོན་མོངས་ཉན་གྱིས་བལྟས་ན་ཆགས་སྡང་འཕེལ།།
བླ་མའི་ཆེ་བ་མིང་ལ་དཀྲིས་ནས་སུ།།
སྤྲུལ་སྐུ་ཟེར་བའི་ལམ་ཞིག་ང་ཚོས་བཏོད།།
ལམ་འདིར་ཞུགས་མཁན་འདྲེ་དང་བདུད་མང་བས།།
ལྷ་སྡང་བདུད་དུ་བབས་པའི་གནས་ཚལ་མང་།།
ཞབས་འདྲེན་བཞུར་༼ཞུ་༽སྟངས།
གྲགས་པ་རྒྱལ་མཚན་སྤྲུལ་སྐུར་བཀུར་བ་བོད་པའི་ཞབས་འདྲེན་རེད། །
གྲགས་རྒྱལ་བླ་མ་གདོན་འདྲེར་སྐྱེས་པ་ཆོས་པའི་ཞབས་འདྲེན་རེད། །
གྲགས་རྒྱལ་སྤྲུལ་སྐུ་གདོན་འདྲེར་སྐྱེས་པ་སྤྲུལ་སྐུའི་ཞབས་འདྲེན་རེད། །
གྲགས་རྒྱལ་གཟིམ་གོང་གདོན་འདྲེར་སྐྱེས་པ་དགེ་ལུགས་ཞབས་འདྲེན་རེད། །
སྨྱོན་པ་འདིའི་ཁ་ན་བུད་མེད་མ་གཏོགས་མེད་པ་འདི་ཅི་རེད།
སྡིག་པ་གསོག་གི་འདུག