འཛུམ་ཆུང་བཀྲ་ཤིས།
གྲོགས་པོའི་ཉིན་མོ་ནི་དང་ཐོག་ཧོལ་མེར་ཀ་ཤིས་ཤོག་ (Hallmark Cards) བཟོ་གྲྭ་གསར་འཛུགས་བྱེད་མཁན་རྗོ་ཡེ་ཧོལ་ (Joy Hall) ལགས་ཀྱིས་ཕྱི་ལོ་ ༡༩༡༩ ལོར་གསར་གཏོད་བྱས་ཤིང་། དེ་ནི་ཕྱི་ཟླ་ ༨ པའི་ཚེས་ ༢ སྟེ་མི་ཚོས་ཕན་ཚུན་ལ་ཤིས་ཤོག་བཏང་ནས་གྲོགས་པོའི་མཛའ་བརྩེ་བརྩི་སྲུང་བྱེད་པའི་ཉིན་མོ་ཞིག་ཡིན། དེ་ཡང་ཟླ་ ༨ པའི་ཚེས་ ༢ འདེམས་དོན་ནི་ཉིན་དེ་བཞིན་གུང་གསེང་ཆེས་མང་བའི་ཞི་འཇམ་དུས་སྐབས་ཀྱི་དཀྱིལ་དུ་ཁེལ་ཡོད་པས་ཡིན། གྲོགས་པོའི་ཉིན་མོ་ནི་ཕྱི་ལོ་ ༡༩༢༠ དུས་སྐབས་སུ་རྒྱལ་ཡོངས་ཤིས་ཤོག་ལྷན་ཚོགས་ (Greeting Cards National Association ) ཀྱིས་དར་སྤེལ་དུ་བཏང་བ་ཞིག་ཡིན་ན་ཡང་རྗེས་སུ་ཤིས་ཤོག་ཉོ་མཁན་ཚོས་དེ་ནི་ཚོང་དོན་ཁེ་ཕན་ཁྱབ་སྤེལ་གྱི་ཆེད་དུ་རེད་ཅེས་ངོ་རྒོལ་ཡང་བྱས་མྱོང། དེ་ཡང་ ༡༩༤༠ དུས་སྐབས་སུ་ཨ་རིའི་ནང་དུ་གྲོགས་པོའི་ཤིས་ཤོག་གི་ཁ་གྲངས་ཇེ་ཉུང་དུ་གྱུར་ནས་གྲོགས་པོའི་ཉིན་མོ་ཡང་མཇུག་རྫོགས་པ་རེད། གྲོགས་པོའི་ཉིན་མོ་དེ་ཡུ་རོབ་ནང་དུ་བརྒྱུད་སྤེལ་བྱེད་པའི་དུས་ཚོད་ཀྱི་བདེན་དཔང་མེད་ན་ཡང། ཨེ་ཤེ་ཡའི་ཡུལ་ལུང་འགའ་ཤས་ནང་ཉིན་གཅིག་གྲོགས་པོའི་ཆེད་དུ་གཏོང་བའི་ལམ་ལུགས་དེ་སླར་གསོ་རྒྱུན་འཛིན་བྱས་ཡོད་པ་རེད། ད་ལྟའི་ཆར་གྲོགས་པོའི་ཉིན་མོ་དེ་བཞིན་རྒྱལ་ཁབ་འདྲ་མིན་གྱིས་མངོན་འདོད་ཆེན་པོས་བརྩི་སྲུང་བྱེད་བཞིན་ཡོད་པའི་དུས་ཆེན་ཞིག་ཡིན། གྲོགས་པོ་ཉིན་མོའི་དུས་ཆེན་འདི་བཞིན་ཡུལ་ལུང་མི་འདྲ་བ་རེ་ལ་གཏོང་སྲོལ་གྱི་ཉིན་མོ་ཡང་མི་འདྲ་བ་རེ་ཡོད་པ་སྟེ། སྟོབས་ཆེན་རྒྱལ་ཁབ་ཁག་གིས་གྲོགས་པོའི་ཉིན་མོ་དེ་བཞིན་ཕྱི་ལོ་ ༡༩༥༨ ལོའི་ཟླ་ ༧ པའི་ཚེས་ ༣༠ ལ་བརྩི་རྒྱུར་གྲོས་བཏོན་པ་དང། ཕྱི་ལོ་ ༢༠༡༡ ཟླ་ ༥ ཚེས་ ༢༧ ཉིན་མཉམ་འབྲེལ་རྒྱལ་ཚོགས་ཀྱིས་ཚེས་ ༣༠ ནི་གཞུང་འབྲེལ་གྱི་རྒྱལ་སྤྱིའི་གྲོགས་པོའི་ཉིན་མོར་བརྩི་སྲུང་བྱ་རྒྱུའི་ཐག་བཅད་པ་རེད། ཡིན་ན་ཡང་རྒྱ་གར་གཏོགས་པའི་ཡུལ་ལུང་མང་ཤོས་ཤིག་གིས་གྲོགས་པོའི་ཉིན་མོ་ནི་ཕྱི་ཟླ་བརྒྱད་པའི་བདུན་ཕྲག་དང་པོའི་རེས་གཟའ་ཉི་མ་ལ་གཏོང་སྲོལ་ཡོད་པའི་དུས་ཆེན་ཞིག་རེད།
—གྲོགས་པོ་ཚོར་ཕུལ་བ།
རིང་རྒྱུ་མེད་ལ་ཐུང་རྒྱུ་མེད་པའི་ཉིན་མཚན་དེ་དག
སྐྱིད་རྒྱུ་མེད་ལ་སྡུག་རྒྱུ་ཡང་མེད་པའི་ལོ་ཟླ་དེ་དག
ཉིན་མཚན་དང་ལོ་ཟླ་དེ་དག་ནི།
དགོད་སྒྲ་དང་མིག་ཆུ་འདྲེས་པའི་ཡིད་འོང་གི་ཕྱིན་དྲན་རྐྱང་རྐྱང་ཡིན།
མེ་ཏོག་དང་ཁ་བ་འཐབས་པའི་མཛེས་སྡུག་གི་འདས་དོན་ཏག་ཏག་ཡིན།
བུ་མོ་ཚོའི་ཡག་སྡུག་བརྩད་ཅིང།
མཛེས་མ་ཚོའི་བརླ་ཤ་གླེང་མྱོང་བའི་ལོ་ཟླ་དག་ཏུ།
བརྩེ་བའི་རླུང་ཁ་ནས་འུ་ཚོ་མཉམ་དུ་བགད་མྱོང་ལ།
དགེ་རྒན་ཚོའི་ལེགས་ཉེས་དཔྱད་ཅིང།
སློབ་གྲོགས་ཚོའི་གསང་བ་བཙལ་བའི་དུས་ཚིགས་དག་ཏུ།
དུངས་བའི་ཆང་ཁ་ནས་འུ་ཚོ་ལྷན་དུ་ངུས་མྱོང་བ།
ང་དང་ཁྱོད་ཚོའི་འདས་ཟིན་པའི་མི་ཚེ་ལ།
བསུབ་དཀའ་བའི་མཛའ་བརྩེའི་རྐང་རྗེས་འཇོག་སྟངས་ཡིན།
མཚམས་རེར་བྲལ་ཞིང་ལན་རེར་འཛོམས་པའི་དུས་ཚོད།
ལན་རེར་འདུས་ཤིང་མཚམས་རེར་གྱེས་པའི་དུས་ཚིགས།
དུས་ཚོད་དང་དུས་ཚིགས་དེ་དག་གི་ཀློང་ནས།
ང་ཚོས་གཞོན་པའི་ལོ་ཟླའི་གསེབ་ལ།
རྗོགས་རྒྱུ་མེད་པའི་བརྩེ་བའི་གཏམ་རྒྱུད་མང་པོ་བྲིས་མྱོང་ལ།
ང་ཚོས་སྨྱོན་པའི་མི་ཚེའི་གཞུང་ལ།
བསུབ་ཐབས་བྲལ་བའི་དགའ་བའི་རི་མོ་ཡང་མང་པོ་ཕབས་མྱོང་།
དགའ་སྐྱོའི་ས་བོན་མཉམ་དུ་བཏབས་ཤིང།
བདེ་སྡུག་གི་མེ་ཏོག་ལྷན་དུ་བཏུས་ནས།
གནམ་ས་འདིའི་བར་ན་འུ་ཅག་ལས་སྐྱིད་ཅིག་མེད་སྙམ་སྟངས་དང་།
འཇིག་རྟེན་འདིའི་སྟེང་ན་ང་ཚོ་ལས་ལྷག་ཅིག་མེད་བསམ་ཚུལ་ནི།
མཛའ་བའི་སེམས་ལ་ང་རྒྱལ་གྱིས་ལྷན་པ་རྒྱག་ཚུལ་དང།
བརྩེ་བའི་སྙིང་ལ་ཁེངས་དྲེགས་ཀྱིས་ཁ་དོག་བྱུགས་སྟངས་ཡིན་ངེས།
འདི་ལྟར་བསམ་ན།
དེ་དུས་ང་དང་ཁྱོད་ཀྱི་འཆར་གཞི་མེད་པའི་མདུན་ལམ་གཅིག་ཡིན་ལ།
ཁྱོད་དང་ང་ཡི་ཁ་ཕྱོགས་བྲལ་བའི་རྨི་ལམ་ཡང་གཅིག་ཡིན།
ད་དུང་། ཁྱོད་ལ་དབང་བ་ང་ལ་བདག་ཅིང་།
ང་ལ་བདག་པ་ཁྱོད་ལ་ཡང་དབང་བའི་ལོ་ཟླ་དེ་དག
ལོ་ཟླ་དེ་དག་ནི་དགོད་སླ་ལ་ངུ་སྐྱེན་པའི་འུ་ཅག་ཁོ་ནའི་འཚོ་བ་ཡིན།
ལོ་ཟླ་དེ་དག་ནི་བརྗེད་དཀའ་ཞིང་དྲན་སླ་བའི་ང་ཚོ་གཅིག་པོའི་དྲན་ཤིང་ཡིན།
ཁ་གྱེས་ནས་ཡུན་རིང་ཞིག་འགོར་རྗེས་ཀྱི་དེ་རིང་།
ཁྱེད་ཚོས་སྔོན་ཆད་ལྟ་བུའི་སླར་འཛོམས་ཤིག་ལ་རེ་བ་རྒྱག་པ་དང།
ང་ཡིས་འདས་བ་འདྲ་བའི་ད་ལྟ་ཞིག་ལ་སྨོན་པ་བྱེད་པ་ནི།
མང་ཙམ་རྒས་པའི་ངོ་གདོང་དེ་དག་དང།
ཅུང་ཙམ་འགྱུར་བའི་སེམས་པ་དེ་ཚོའི་ངོགས་ན།
མངོན་པར་སྣང་བའི་དྭངས་གཙང་གི་ཁ་དོག་དེ་ཡིན་པས།
ས་གནས་གང་རུང་ན་ལས་གནས་གང་རུང་ལ་འཐམས་པའི་འུ་ཅག
འདས་ཟིན་པའི་ལོ་ཟླ་ལ་ཕྱིར་ལོག་ཐེངས་གཅིག་བྱས་ན་ཅི་འདྲ་རེད།
ངའི་སྙིང་ཉེ་བའི་གྲོགས་པོ་ཚོ།
༢༠༡༢།༨།༤ རྒྱལ་སྤྱིའི་གྲོགས་པོ་ཉིན་མོར་ཆེད་དུ་བྲིས་པའོ།།