ལུག་རྫི།
—–རྒྱ་གར་གྱི་རོལ་མོ་ཞབས་བྲོ་ཞིག་ལ་ལྟ་ཞོར་དུ་བྲིས།
ཕྱི་ལོག་ཏུ་ཆར་བ་ཤག་ཤག །
ནང་རོལ་དུ་ག་ལེར་འཛུལ་ཏེ།།
ཁང་ཆུང་ནས་ཇ་ཞིག་འཐུང་ཞོར།།
མལ་ཁྲིའི་སྟེང་ལྷོད་སའི་བསྡད་ནས།
མིག་ཟུང་གཉིས་བརྙན་འཕྲིན་གཏད་དེ།།
རྒྱང་འཛིན་གྱིས་ཁོལ་ནས་བདམ་པའི།།
རང་འདོད་ཀྱི་བརྙན་འཕྲིན་ཟོླས་གར།།
ཅི་འཆར་ངང་བརྙན་ཡོལ་ངོས་སུ།།
འཆར་བ་ནི་རོལ་མོའི་ཞབས་བྲོ།།
འགུལ་བཞིན་པའི་ཚོན་རིས་སྣ་ཚོགས།།
དར་སྲབ་ཀྱི་འཇའ་ཚོན་གར་མཁན།།
སྲབ་འཇམ་གྱི་དར་གོས་ཧྲག་ན།།
མཛེས་སྡུག་གི་ལང་ཚོའི་འཇོ་སྒེག།
བརྙན་ནང་གི་མི་རྣམས་འགྲམ་དུ།།
དམར་ཧྲེང་གིས་ཡོད་ཚད་མདུན་ན།།
སྟངས་སྟབས་ཀྱི་གར་མཁན་ལྷ་མོའི།།
ལུས་འཇམ་གྱི་པད་མའི་སྡོང་པོར།།
མཁྲེངས་ཟླུམ་གྱི་མྱོས་བུམ་ཉ་མོ།།
བྲང་གཞུང་གི་ཟློས་གར་གླིང་དུ།།
གོས་འཇམ་ཀྱི་སྲབ་མོའི་ནང་དུ།།
ལྷུག་ལྷུག་ངང་ངོ་མཚར་ལྟད་མོ།།
ཆགས་ལྡན་གྱི་སྤྱན་ཟུང་བུང་བ།།
སྐར་ཚོགས་ཀྱི་དུང་བའི་ཟླ་བ།།
རོལ་མོ་ཡི་གདངས་དང་འགྲོགས་ཏེ།།
ལུས་གཟུགས་ཀྱི་པད་མའི་མེ་ཏོག།
འཆོར་སྒེག་གིས་ཡོངས་སུ་སྡུག་པས།།
བརྙན་རིས་ཀྱི་ཕྱི་སོ་ནང་རོལ།།
རི་དྭགས་ཡིས་སྣ་ལ་སྙན་བཞིན།།
སྟོང་ཚོགས་ཀྱི་མིག་ཟུང་མཉམ་འདུས།།
དུས་གཅིག་ལ་འདུ་ར་མཛེས་སོང་།
བརྙན་ཡོལ་གྱི་ཕྱི་རོལ་ངོས་ན།།
ལུས་ཁམས་ཀྱི་བར་ཐག་རིང་ས།།
མལ་ཁྲི་ཡི་སྟན་གྱི་སྟེང་དུ།།
གཅེས་ཕྲུག་གི་མགོ་ལ་བྱིལ་ཞོར།།
བརྙན་འཕྲིན་གྱི་གར་ལ་བལྟ་མཁན།།
བུ་ཆུང་དང་ངེད་གཉིས་ཡིན་སོང་།།
གར་མཁན་མའི་ལྷན་སྐྱེས་མཛེས་སྡུག།
གློག་ཚོན་གྱི་དར་གོས་འཛོམས་པས།།
གཟིགས་མོ་བའི་ལུས་སེམས་སྤྲོ་བྱུང་།།
ལས་མེད་ངང་དུས་ཚོད་བྱུང་ན།།
ལྟད་མོ་ལ་གཡེང་ནས་ཉིན་སྐྱེལ།།
བོད་རིགས་འབྲི་བ་དག་གིས་ལོགས་དང་ལོག་གི་ཁྱད་པར་ཤེས་དགོས་པ། ལོ་མང་སྔོན་དུ་འདི་ལ་ནོར་འཁྲུལ་མཐོང་ནས་འདི་ལྟར་བྲིས།
་
ཕྱི་ལོགས་ནང་ལོགས་ཡང་འཇུག་དགོས།
ཡང་འཇུག་མེད་པ་གོ་ལོག་ཡིན།
་
ང་ལོག་འགྲོ། དེ་ནས་ལོག་འོང་ངོ་།