བརྟག་དཔྱད་བྱས་ན་འབྲས་བུ་འདུག

 

གུས་པར་ལོ་འགའ་ཤས་རིང་བོད་ཀྱི་སྤྱི་ཚོགས་ནང་མི་འདང་བའི་ཆ་གང་ཡིན་པ་དེར་བརྟག་དཔྱད་བྱ་རྒྱུར་གོམས་གཤིས་ཤིག་སླེབས། སྤྱི་ཚོགས་ཕུལ་དུ་བྱུང་བ་གཞན་རྣམས་དང་བསྡུར་ན། མི་གཅིག་པ་དང་མི་འདང་བ་མང་པོ་ཡོད་མོད། ཡིན་ནའི་གཙོ་བོ་གཅིག་ནི་ངེད་ཚོའི་སྤྱི་ཚོགས་ནང་བརྟག་དཔྱད་བྱེད་པའི་གོམས་གཤིས་དེ་ཤིན་དུ་ཞན་པ་རེད། དེའི་རྒྱུ་མཚན་གཙོ་བོ་གཅིག་ནི་ལེ་ལོ་ཁོ་ན་རེད།

 

བརྟག་དཔྱད་བྱ་བའི་གོམས་གཤིས་དེ་ཕ་མ་ལ་ཡང་མིན་འདུག ཕྲུ་གུ་ལ་ཡང་མིན་འདུག དེ་བཞིན་སྤྱི་ཚོགས་ཁྱོན་ལ་ཡང་ཤིན་དུ་ཉུང་།

 

དེར་བརྟེན་གཞན་གྱི་རྗེས་བྲངས་འགྲོ་རྒྱུར་དགའ་ལ། རྣམ་རྟོག་དང་དངོས་ཡོད་གཉིས་མཉམ་དུ་སྦྲེལ་ནས་དགོས་མེད་ཀྱི་སྡུག་བསྔལ་སྣོན་མ་མང་པོ་ཞིག་བཟོ་བཞིན་འདུག དཔེར་ན་ཕྲུ་གུ་ཞིག་ནང་ལ་ལོག་ནས། ཕ་མར་རྒན་ཕུན་ཚོགས་ལགས་ཨ་རིར་འགྲོ་མཁན་རེད་ལབ་སོང་ཟེར་། ཨ་མས་ལམ་གསེང་ཁ་པར་བཏང་ནས་ཁྱིམ་མཚེས་ལ། ཤེས་རབ། ཁྱེད་ཤེས་སོང་ངས། སློབ་གྲྭའི་རྒན་ཕུན་ཚོགས་ལགས་ཨ་རིར་འགྲོ་མཁན་རེད་འདུག་ཟེར། སང་ཉིན་ཤེས་རབ་ཀྱི་ཨ་མ་རྒན་མོ་དེས་རོགས་པ་ཚོར། རྒན་ཕུན་ཚོགས་ལགས་ཨ་རིར་མགྱོགས་པོ་འགྲོ་མཁན་རེདའདུག་ཟེར། གང་ལྟར་སྐད་ཆ་འདི་ལྟར་ཁྱབ་ནས་བརྟག་དཔྱད་བྱེད་མཁན་མེད།

དཔེར་ན། ཨ་རིའི་ནང་བོད་མི་སྐྱབས་བཅོལ་ཞུ་མཁན་དང་། སྐྱབས་བཅོལ་ཐོབ་ནས་དེབ་ལྗང་བུ་ལག་ཏུ་མ་སླེབས་མཁན། དེབ་ལྗང་གུ་ལག་ཏུ་རགས་ནས་ཨ་རིའི་མི་སེར་གྱི་ཐོབ་ཐང་སྒུག་མཁན་གྱི་བོད་པ་སྟོང་ཕྲག་འགའ་ཤས་ཡོད། དེ་ཚོའི་ནང་བཤད་སྲོལ་གཅིག་འདུག་སྟེ། ཁྱེད་ལ་ཨ་རིའི་མི་སེར་གྱི་ཐོབ་ཐང་མ་རགས་གོང་དང་། དེབ་ལྗང་ཁུ་ལག་ཏུ་མ་སླེབས་གོང་། ཨ་རིའི་གཞུང་ནས་འཕྲོད་བསྟེན་དང་། སྐྱོབ་གསོའི་དངུལ། དེ་བཞིན་དབུལ་སྐྱོར་གྱི་ཁང་གླ་སོགས་ལེན་ན། དེས་རྗེས་མ་ཁྱེད་ལ་ཨ་རིའི་མི་སེར་གྱི་ཐོབ་ཐང་ཐོབ་རྒྱུར་གནོད་པ་སྐྱེལ་གྱི་རེད་ཟེར། མདོར་ན་མི་སེར་ཐོབ་ཐང་མ་ཐོབ་གོང་གཞུང་གི་སྐྱོབ་གསོ་རྣམས་ལེན་ན་མི་སེར་གྱི་ཐོབ་ཐང་རགས་རྒྱུར་འགོག་རྐྱེན་སྤྲོད་ཟེར་སྐད། ངེད་ལ་མི་མང་པོས་འདི་ལྟར་བཤད་མྱོང་ལ། དེའི་སྐོར་ལ་བརྩོད་པ་ཀྱང་ཤོར་ནས་ཐེངས་གཅིག་མི་ཚོགས་ཀྱི་དཀྱིལ་ལ་ངོ་ཚ་ཡང་ཤུགས་ཆེ་ཞིག་བསྟེར་མྱོང་།

 

ཐེངས་གཅིག་རོགས་པའི་ཁྱིམ་ལ་འདུ་འཛོམས་སར་འགྲོ་སྐབས། མི་ཁ་བདེ་པོ་ཞིག་གིས་སྐྱབས་བཅོལ་སྤ་སེ་ཞུ་སྟངས་སྐོར་ལ་ཁོ་པའི་ཉམས་མྱོང་མང་པོ་ཞིག་བཤད་ནས། གང་ལྟར་མི་ཚང་མ་ཁོ་པར་མཐའ་སྐོར་ནས་འདུག ངས་ཀྱང་གང་བཤད་ཀྱི་ཡོད་དམ་སྙམ་ནས་ཉན་པར་ཕྱིན། ཁོ་པས་བཤད་རྒྱུར། ཁོ་པར་སྐྱབས་བཅོལ་སྤ་སེ་སྤྲོད་མཁན་གྱི་ཨ་རིའི་གཞུང་གི་མི་དེ་ཁོ་ལ་དགའ་པོ་བྱུང་ནས། “ཁྱེད་ལ་དཀའ་ངལ་བྱུང་ན་ང་འཚོལ་བར་ཤོག ཨ་རིའི་གཞུང་ནས་དངུལ་རྩ་བ་ནས་མ་ལེན། དེ་ལེན་ན་ཁྱེད་ལ་གྱོང་རགས་ཀྱི་རེད་ཟེར་བྱུང་།” ཟེར་སོང་། ཁོས་ཀྱང་འོ་དེ་བདེན་པ་རེད། དེ་སྔོན་བོད་པ་བསྟན་འཛིན་ཟེར་མཁན་དེ་ཨ་རིའི་མི་སེར་སྤ་སེ་མ་རགས་པར་ཟླ་བ་མང་པོ་ལུས་ཟེར། ཁོ་པས་གཞུང་གི་སྐྱོབ་གསོ་མང་པོ་ལེན་འདུག་ག་”ཟེར།

 

སྐབས་དེ་དུས་ངས་ཁོ་པར། དེ་བདེན་པ་མ་རེད། ཁོར་སྤ་སེ་མི་རགས་པའི་རྒྱུ་མཚན་ནི་ཁོ་པའི་སྤ་སེའི་ཐོག་མི་ཁོངས་ལ་རྒྱ་མི་ཞེས་བྲིས་ཡོད་སྟབས་ཁོ་པས་དེ་རྒྱབ་ཀྱི་མིན་ཟེར་ནས། ཁྲིམས་ཁང་ལ་ཞུ་གཏུགས་བྱས། དེར་ཟླ་བ་མང་པོ་འགོར་ནས་སྤ་སེ་རགས་མེད། ཡིན་ནའི་ཁྲིམས་ཁང་ནས་དེར་བསྒྱུར་བ་བཏང་ནས་ད་ཆ་རྒྱ་མི་ཟེར་བ་དེ་མེད་པ་བཟོ་ཐུབ་ཡོད་ཟེར།

 

ངས་དེ་ལྟར་དག་སེལ་བྱེད་སྐབས། མི་དེས་ཁྱོད་བརྫུན་མ་ཤོད་ཟེར། ཁྱོད་བསྟན་འཛིན་ཟེར་མཁན་གྱི་མི་དེའི་ཨ་ཕ་ཡིན་ནམ་ཡང་ན། ཁོའི་ཨ་ཕྲུག་ཡིན་ཟེར། མི་ཚང་མ་དགོད་ཤོར། ཁོས་ཡང་། འོ་་་་་་ཡང་ན་ཁོའི་བཟའ་ཟླའི་དགའ་རོགས་ཡིན་ནམ་ཟེར། དེར་མི་གཞན་ཚང་མ་དགོད་ཤོར། ཁོ་པས་ད་དུང་དྲངས་རྒྱུར།

 

དེང་སང་ཨན་ཌེ་(Unties )དེ་ཚོར་དགའ་པོ་མང་པོ་ཡོད་སྟབས། ཁྱོ་ཀའི་རྒྱབ་ལ་དགའ་པོ་དེ་ཚོས་ལངས་ཡོང་གི་འདུག་ག་ལབ་མ་ཐག ཁང་པ་ཆུང་ཆུང་དེ་དགོད་སྒྲའི་སྒྲས་འཁེངས། ང་རང་ཡང་ཁ་བསྐྱེངས་ནས་ཁུ་བསིམ་མེར་གནས། ཨན་ཌེ་ཟེར་ན་སྲུ་མོ་ཟེར་བཞིན། བུད་མེད་ལོ་༣༠བརྒལ་བ་དང་། འཁྲུག་ཆ་འདོད་པོ་རྣམས་ལ་ཨན་ཌེ་ཞེས་ཟུར་ཟ་བྱེད་སྲོལ་འདུག

 

རྗེས་སུ་གུས་པས་མི་དེའི་ཤོད་ལུགས་ལ་ཡིད་མ་འཚིམ་པར་ཨ་རིའི་གཞིས་སྤོས་དང་མི་སེར་ལས་ཁུངས། ༼Immigration and Naturalization Service INS༽ལ་འབྲེལ་བ་བྱས་པ་ཡིན་ལ། ཨ་རིའི་སྤྱི་ཚོགས་བདེ་འཇགས་ཞབས་ཞུ་ལས་ཁུངས། ༼Social Security Service༽ལ་ཡང་འབྲེལ་གཏུགས་བྱས་ནས། སྐྱོབ་གསོ་ལེན་པ་དང་མི་སེར་ཐོབ་ཐང་རགས་པ་གཉིས་ལ་རྩད་གཅོད་བྱས།

 

གོང་གི་ལས་ཁུངས་གཉིས་ཀྱིས་མགྲིན་ཚབ་པས་བཤད་རྒྱུར། ཨ་རིའི་གཞུང་གི་རོགས་སྐྱོར་ལེན་པ་འདི་དང་། དེབ་ལྗང་བུ་དང་མི་སེར་ཐོབ་ཐང་ལེན་རྒྱུ་གཉིས་ལ་འབྲེལ་བ་མེད་པ་གསལ་པོར་གསུངས། དེབ་ལྗང་ཁུ་དང་། མི་སེར་གྱི་ཐོབ་ཐང་གཉིས་ནི་བཅའ་ཁྲལ་དུས་ཐོག་ལ་རྒྱབ་ཡོད་མེད་ཀྱི་ཆ་རྐྱེན་ཞིག་ཡོད། དེའི་རྒྱུ་མཚན་ཡང་། ཨ་རིའི་ཁྲིམས་ནང་། བཅའ་ཁྲལ་དུས་ཐོག་ལ་མ་བརྒྱབ་ན་ཁྲིམས་འགལ་ལ་བརྩིས། དེབ་ལྗང་ཁུ་དང་མི་སེར་གྱི་ཐོབ་ཐང་གཉིས་ཁྲིམས་འགལ་མི་སྣར་སྤྲོད་མི་ཆོག་སྟབས། ཁོང་ཚོས་བཅའ་ཁྲལ་དུས་ཐོག་ལ་བརྒྱབ་ཡོད་མེད་ཞིབ་བཤེར་བྱེད། གལ་ཏེ་བཅའ་ཁྲལ་དུས་ཐོག་ལ་བརྒྱབ་མེད་ན་ཁྲིམས་འགལ་ཡིན་སྟབས། མི་དེ་ཚོར་གོང་གི་ཐོབ་ཐང་དེ་ཚོ་སྤྲོད་རྒྱུར་ཕྱིར་འགྱངས་བྱས་ནས་བཅའ་ཁྲལ་རྣམས་གཙང་མ་བཟོ་བར་བྱེད།

 

དེར་བརྟེན་གལ་ཏེ་ཁྱེད་ལ་ནང་མི་མང་པོ་ཡོད་པ་དང་། མི་གཅིག་གི་གླ་ཕོགས་ཀྱིས་ནང་མི་གསོ་མ་ཐུབ་ན། ཨ་རིའི་གཞུང་ལ་སྐྱོབ་གསོའི་རིགས་མང་པོ་ཡོད་ཅིང་། དེ་དག་ལེན་ཐུབ་ན་ནང་མི་དང་བུ་ཕྲུག་ཚང་མར་ཕན་པ་ཆེ། ཨ་རིའི་ནང་གཞིས་ཆགས་པའི་རྒྱ་རིགས་མང་པོ་ཞིག་གིས། དངུལ་སྨར་སྤྲོད་མཁན་གྱི་བཟོ་གྲྭ་དང་ཚོང་ཁང་ལ་ལས་ཀ་བྱས་ནས་གཞུང་ལ་གླ་ཆ་མེད་ཅེས་རོགས་སྐྱོར་ལེན་མཁན་མང་པོ་ཡོད་ཚོད། དངུལ་སྨར་ཐོབ་ན་གཞུང་ནས་གླ་ཆ་ཡོད་མེད་ཤེས་ཐུབ་ཀྱི་མེད། ཁོང་ཚོ་ལྟ་བུའི་བརྫུན་ཤོད་དགོས་དོན་མེད་ཀྱང་། དངོས་ཡོད་དཀའ་ངལ་འཕྲད་མཁན་གྱི་བོད་མི་རྣམས་ནས་གཞུང་གི་རོགས་སྐྱོར་ལེན་ན་དེས་སྤ་སེ་ཞུ་བར་གནོད་པ་མིན་འདུག་གོ

 

དཔེར་ན། བཟའ་མི་བུ་ཕྲུག་ཡོད་པའི་ཁྱིམ་ཚང་ཞིག་ལ་ཁྱོན་ཡོངས་ཀྱི་བདུན་རེའི་ཕོགས་དེ་སྒོར་800ལས་ཉུང་བ་ཡིན་ན། Section 8ཟེར་བའི་ཁང་པའི་རོགས་དངུལ་ཞིག་ལེན་རྒྱུ་འདུག (http://www.nyc.gov/html/nycha/html/section8/section8.shtml)

 

དེ་ཐོབ་ན། ཟླ་རེའི་ཁང་གླའི་འགྲོ་སོང་བརྒྱ་ཆ་མང་ཆེ་བ་གཞུང་ནས་སྤྲོད་པ་དང། ཁྱིམ་བདག་རང་ཉིད་ནས་ཉུང་ངུ་ཞིག་ལས་སྤྲོད་དགོས་ཀྱི་མིན་འདུག སྐྱབས་བཅོལ་རགས་པ་དང་། ཡང་ན་དེབ་ལྗང་ཁུ་ཡོད་པ། དེ་མིན་མི་སེར་བཅས་ཀྱིས་ཐོབ་ཐང་ཡོད་པའི་བོད་མི་ཚོས་དེ་ཞུ་ཆོག་གི་འདུག ད་དུང་དེའི་སྟེང་ཁ་ལག་ཉོ་ཆེད་སྐྱོབ་གསོའི་པ་སེ་Food Stamp ((http://www.fns.usda.gov/fsp/) ལེན་ཡས་འདུག་ལ། པ་སེ་དེ་བཟའ་ཆས་ཚོང་ཁང་མང་ཆེ་བའི་ནང་ལེན་གྱི་འདུག དེ་ཚོའི་ནང་སྐྱབས་བཅོལ་དང་དེ་མིན་གྱི་ཆ་རྐྱེན་སོགས་བཏོན་མིན་འདུག

 

མདོར་ན་བརྟག་དཔྱད་བྱ་རྒྱུའི་གོམས་གཤིས་ཤིག་རང་ལ་འཇགས་ཐུབ་པ་བྱེད་པ་དེ་སྤྱི་སྒེར་ཚང་མར་གལ་ཆེ་རེད་སྙམ།