དུར་བྱང་།
ཏག་ཏག་མི་ལོ་དུ་མའི་ཡར་སྔོན་ལ། ངས་རྨི་ལམ་གྱི་རྩེད་ར་ཤ་ཚ་མོ་ཞིག་བསྒྲིགས་པ་ཡིན། སྤྲིན་དཀར་གྱི་ཚོམ་བུ་དཔེ་གཟུགས་སུ་བཀོད་ནས་ཡིད་དུ་འོང་བའི་དག་ཞིང་ལ་སྨོན་པ་ཡང་ཡང་བྱས་མྱོང་།
ཆིག་ལབ་ཀྱིས་ཆིག་ལབ་ལ་ཚིག་ལན་བཏབ་ནས་མི་ལོ་དུ་མའི་ཡར་སྔོན་ལ། མེ་ཏོག་གི་འདབ་མ་དལ་གྱིས་གཡོ་བའི་རྩྭ་ཐང་གི་པང་ཁ་ནས། ལན་རེར་གན་རྐྱལ་དང་སྐབས་འགར་ཁ་སྦུབས་ནས་ཉལ་བ་ཡིན།
ཚོད་ཚོད་ལ་ཀི་རིང་ཞིག་འདེབས་ན་འདོད་པའི་མི་ལོ་དུ་མའི་ཡར་སྔོན་ལ། ང་ནི་ང་ག་ལ་ཡིན་ཏེ། སྦྲིད་པ། འདར་བ། སྐྲག་པ། ཐ་སྙད་འདི་དག་གིས་སུན་བཙུར་བྱས་པ་གྲངས་ཀྱིས་ཟིན་པར་དཀའ་ཨང་།
མིག་ཆུ་བཙུར་ན་མི་བཞུར་ལ་མ་བཙུར་ན་ཤར་ཤར་བཞུར་བའི་མི་ལོ་དུ་མའི་ཡར་སྔོན་ལ། ང་ནི་སྒྲུང་བ་སུས་ཀྱང་བྲིས་མ་མྱོང་བའི་བསྡུས་གཟུགས་ཀྱི་མི་སྣ་ཞིག་ཏུ་གྲུབ་ཡོད་པ་འདྲ། བརྗོད་བྱ་གང་ཞིག་གི་ཚབ་མཚོན་གྱི་མི་སྣ་གལ་ཆེན་ཞིག་ཡིན་པ་འདྲ།
བསྟུད་མར་སྙིང་ལོང་སྟོད་ལ་འཚང་བའི་མི་ལོ་དུ་མའི་ཡར་སྔོན་ལ། ཝུ་ཆང་གིས་སྦྲིད་པར་མ་ནུས་ལ། རྩེད་དགོད་ཀྱིས་ཁམས་གཡེང་བྱ་མ་མྱོང་བ་སུས་ཀྱང་མ་ཚོར་བ་ཕྲན་ཁོ་ནས་མྱངས་ལ་མྱོང་གིན་ཡོད།
དུང་མདོག་གི་ཟླ་བ་སྤྲིན་གྱིས་བཀབ་པའི་མི་ལོ་དུ་མའི་ཡར་སྔོན་ལ། སྒྱུ་འཕྲུལ་ཁོ་ནས་གྲུབ་པའི་མཚན་མོའི་རྨི་ལམ་རབ་རིབ་དེ་ཁོ་བོ་ཆེས་སྐྱིད་པའི་དུས་ཚོད་སྲིད་ལ་དཀོན་པ་དེ་ཡིན་ཨང་།
མིག་ཟུང་རི་ལ་ཡན་པའི་མི་ལོ་དུ་མའི་ཡར་སྔོན་ལ།
གསང་ལམ་ནས་ལྐོག་མིག་གིས་འཚོས་པའི་ཁྱོད། ཁྱོད་ནི་སྲིད་པ་གསུམ་གྱི་མཛེས་པ་བདག་གིར་བཞེས་ནས་མི་ཡུལ་དུ་བྱོན་པ་ཡིན་ནམ། ཨ། མི་ཡུལ་དུ་དངོས་སུ་བྱོན་པའི་དབྱངས་ཅན་ལྷ་མོ།
དུར་བྱང་གིས་ཕྱི་ལོ 2017.10.10 ཉིན།