རྡ་ས། ཤཻས་རབ་སྒྲོལ་མས།
མཐོང་ན་མི་བདེ་ཞིང་མ་རིག་ན་དྲན་འཛིན་གྱི་རྒྱ་རུ་ཚུད་པའི་སྙིང་སྡུག་ཕྱོགས་སུ།
བཟོད་བསྲན་མི་ཐུབ་པའི་འདུ་ཤེས་ཁྱད་མཚར་བ་ཞིག་དྲག་ཏུ་འཕྱུར་དུས།
ཡོད་ཚད་མགོ་མཇུག་མེད་པར།
ཆེས་ཐོག་མར་རང་ཉིད་བོར་སོང༌།
ཆེས་མཐའ་མར་རང་ཉིད་ཕོངས་སོང༌།
དེ་དུས།
བསམ་རྒྱ་བསྐྱེད་ཀྱང༌།
དེ་དུས།
རིག་པ་བསྒྲིམས་ཀྱང༌།
དེ་དུས།
རྣམ་ཤེས་ཕྲ་མོའི་འཁྱུག་རྩལ་མྱུར་བས།
རང་ཉིད་ཀྱི་ཁ་ཕྱོགས་བོར།
རང་ཉིད་ཀྱི་འདུན་པ་བརླགས།
རང་ཉིད་ཀྱི་རང་ཚུགས་ཤོར།
མ་ཟད།
སྙིང་སྡུག་གིས་བརྩེ་དུང་བརྗེད་ཀྱིན།
ངེད་གཉིས་ཀྱི་འགྲོགས་འབྲེལ་བརྗེད་ཀྱིན།
སྙིང་སྡུག་གིས་བརྩེ་བས་མ་གཟིགས།
སྙིང་སྡུག་གིས་བྱམས་པས་མ་བསྐྱངས།
གང་གིས་ཕྱིར་ན།
ང་ལ་ཁ་ལྕེ་བདེ་མོའི་སྒྱུ་རྩལ་མེད།
དྲན་འཕྲུལ་རྒོད་པོའི་འཇོན་ཐང་མེད།
དགའ་ཉམས་སྟོན་པའི་བཅོས་འཛུམ་མེད།
འགུགས་ཤུགས་ཆེ་བའི་བྱད་དབྱིབས་མེད།
དཔུང་ཤུགས་ངོམ་པའི་སྟོབས་འབྱོར་མེད།
བཅོས་སླད་ཞུགས་པའི་བརྩེ་དུང་མེད།
ད་དུང༌།
སྙིང་སྡུག་གིས།
དུང་བས་རྗེས་བཟུང་མེད་ན།
བརྩེ་བའི་དྲོད་ཁོལ་མེད་ན།
འཇིག་རྟེན་འདིར་འཚོ་འདོད་མ་བྱུང༌།
བརྩེ་དུང་ལ་ཡིད་ཆེས་མི་ཡོང༌།
བདེ་སྐྱིད་ཀྱི་བྲོ་བ་མ་མྱོང༌།
དེ་བས་ན༌།
ང་ལ་བསམ་ཤེས་ཀྱི་སྒོ་མོ་འབྱེད་རོགས།
ང་ལ་བརྩེ་དུང་གི་མིག་ཆུ་ཕྱིས་རོགས།
ང་ལ་སིམ་སྣང་གི་བདེ་བ་སྟེར་རོགས།
གང་ལྟར།
རང་འདོད་ཀྱི་ཨུ་ཚུགས་ཆེ་བ།
ཐལ་དྲགས་ཀྱི་སྐད་ཆ་ཤོར་བ།
གུས་མེད་ཀྱི་སུན་སྣང་བཟོས་པ།
ཡོད་ཚད་ནས་ཡོད་ཚད་དེ།
བརྩེ་དུང་གི་བཟི་ཁ་བཙན་པས།
ཡོད་ཚད་ནས་ཡོད་ཚད་དེ།
ཁྱོད་ལ་དུང་དྲགས་པས།
ཡོད་ཚད་ནས་ཡོད་ཚད་དེ།
ཁྱོད་ལ་དགའ་དྲགས་པས་སོ།།