རྨེའུ་དཀོན་རྒྱམ།
ཨ་ཕའི་རིགས་ཞེན་དང་ལ་རྒྱ་གཙང་མས།
ཨ་མའི་རང་ཚུགས་དང་སྤོབས་པ་ཆེན་པོས།
ང་འདི་ལྟར། བོད་མི་རིགས་ཀྱི་འཇིག་རྟེན་ལ་བསྐྱེད་སོང་།
ཨ་ཕ་ལགས། བཀའ་དྲིན་ཆེ།
ཁྱེད་ཀྱི་ལར་ཞེན་དཀར་བོས་སྙིང་ཁམས་ཤིག་བསྐྲུན་སོང་།
ཨ་མ་ལགས། ཐུགས་རྗེ་ཆེ།
ཁྱེད་ཀྱི་རང་ཚུགས་བརྟན་པོས་རང་འགུལ་ཞིག་ཤེས་སོང་།
དེའི་ཕྱིར་ན།
བརྩེ་བའི་ཕ་མ་ལགས།
ད་ལྟ་ངའི་འཇིག་རྟེན་ན་དཀའ་སྡུག་གི་བརྒྱུད་རིམ་མང་རུང་།
ད་ལྟ་ངའི་ཁ་སྟབས་འདི་ད་དུང་སྐྱ་ཐང་ཐང་ཞིག་ཡིན་རུང་།
ཨ་ཕའི་བློས་གཏོང་གིས་དབུགས་རྒྱུན་བསྲིངས།
ཨ་མའི་སེམས་སྟོབས་ཀྱིས་རང་སྟོབས་བསྐྱེད།
ད་ནི། ངའི་མདུན་བསྐྱོད་ཀྱི་སྒོ་འཕར་ཇེ་ཡངས་སུ་འགྲོ་དགོས།
ད་ནི། དམིགས་འདུན་གྱི་ལག་ལེན་ཇེ་གསལ་དུ་འགྲོ་དགོས།
བརྩེ་བའི་ཕ་མ་ལགས།
ངས་ཀྱང་ཉམས་མྱོང་ནི་སྟོབས་ཤུགས་སུ་སྒོམ་ཡོད།
ངས་ཀྱང་ལག་ལེན་ནི་གྲུབ་འབྲས་ལ་རྩིས་ཡོད།
ང་ལ་མུ་མཐུད་ནས་གསོན་ཤུགས་རྒྱས་དགོས།
ངས་རྒྱུན་མཐུད་ནས་འབད་ཤུགས་འདོན་དགོས།
ངའི་མི་རིགས་དང་། ངའི་རིག་གཞུང་།
དེ་བས་ཀྱང་། ངའི་རང་དབང་དང་། ཐོབ་ཐང་གི་ཆེད་དུ།
ངེས་པར་དུ་གསོན་དགོས་ལ། གསོན་ཤུགས་ཀྱང་རྒྱས་དགོས།
ཨ་ཕའི་སེམས་དཔའ།
ཨ་མའི་བུ་རྒོད།
པཱ་ལགས་ཚབ་ལ། ཨ་ཕ་ལགས། བཀའ་དྲིན་ཆེ། ཞེས་ཨ་ཕ་ལགས་ཞེས་སྨྲོས་པ་ནི། ཤིན་ཏུ་འོས་ཤིང་འཚམས་པའོ།
ཨ་ཕའི་ཐུགས་སྟོབས་ནམ་མཁའ་མཐའ་ལས་ཡངས།།
ཨ་མའི་བྱམས་བརྩེ་རྒྱ་མཚོའི་གཏིང་ལས་ཟབ།།
དྲིན་ལྡན་གཉེན་གྱུར་ཡབ་ཡུམ་རིན་ཆེན་ནོར།།
གཏན་དུ་རང་གི་མགོན་དང་དཔུང་གཉེན་ཡིན།།