ཨ དོན་ཉི།
ལོ་བཅུ་ཕྲག་མང་བོའི་ཡར་སྔོན་ཞིག་སྟེ་མདོ་སྨད་མཛོད་དགེ་བཞག་ལྡོམ་སློབ་འབྲིང་གི་སྒོ་ཐེམ་དེ་གར། ངའི་ཐོག་མར་བསྟེན་པའི་བོད་ཡིག་ཕྱོགས་ཀྱི་དགེ་རྒན་ཚད་ལྡན་གཅིག་པུ་དེ་བྱམས་མེ་མགོན་བསོ་ལགས་ཡིན། ཉིད་ཀྱིས་བོད་སྐད་ཡིག་ལ་བཅངས་པའི་བརྩེ་བ་ལ་ཉམས་པ་མེད་པར་ད་ལྟ་ད་དུང་ཡང་ཤ་ཞེན་རུས་ཞེན་གྱིས་འབད་ཀྱིན་འདུག་པ་སྐུ་ཉིད་ཀྱིས་ཉེ་ཆར་བྲིས་པའི་རྩོམ་སྣ་མང་བོ་ལས་དམིགས་བསལ་དོད་པོ་རེད། སྐྱོ་ལ་ཉམ་ངར་ལྷུང་བའི་རང་རེའི་སྐད་དང་ཡི་གེའི་དོན་དུ། ཚན་རིག་ཅན་དང་འཕྲུལ་ཆས་ཅན་དང་དཔལ་འབྱོར་ཅན་གྱི་དུས་རབས་ཀྱི་ཚ་རླབས་འཕྱུར་བའི་གཡོ་སྐྱོམ་ཁྲོད་འགྲེང་དགོས་ན་ཁོང་གིས་བོད་སྐད་ཡིག་ལ་བཟུང་བའི་ཨུ་ཚུགས་མཁྲེགས་པོ་དེ་ལྟ་བུ་གསེར་ལས་ཛ་ཐང་ཆེ་ཞིང་ཀུན་ནས་མིག་དཔེར་འཛིན་འོས།
དུས་དེ་རིང་། རྒྱ་ནང་དང་ཕྱི་གླིང་གང་རུང་དུ་གྱེས་ཤིང་འཐོར་ཏེ་འཚོ་བ་རོལ་བཞིན་པའི་རང་རེའི་བོད་པ་མང་ཆེར་གྱི་དངོས་ཡོད་གནས་བབ་ལ་མིག་ཟུང་ཧར་གྱིས་སྐོར་བ་དང་བསམ་བློ་ནན་གྱིས་བཏང་ན། བོད་པ་ནང་ཁུལ་དུ་རྒྱ་སྐད་ལྕེ་ཞ་རྒྱག་པ་ལ་ཨ་གསར་བྱེད་པ་དང་། དབྱིན་སྐད་ཆག་རོ་ལབ་པ་ལ་རྦད་དེ་འཇུག་པ་ནི་གཟི་བརྗིད་དམ་འཇོན་མདོག་ཁ་བོར་རྩི་ཡི་འདུག ལྷག་པར་དུ། མ་འོངས་བོད་ཀྱི་སོན་རྩ་ཡིན་པའི་ཆུང་ཐོགས་གཞོན་སྐྱེས་དག་ལ་ནད་ཡམས་འདིའི་རིགས་ཁྲག་རྩའི་སྦུབས་སུ་དུག་ཆུ་བཞིན་དུ་རྒྱུན་འབྱམས་སུ་ཁྱབ་འདུག་པ་ཆེས་ཆེར་མཐོང་།
བོད་པ་མང་ཆེ་བས་བེད་སྤྱོད་རྒྱ་ཆེན་བྱེད་ཀྱིན་པའི་ངོ་དེབ་དང་སྐད་འཕྲིན་སོགས་གང་ལ་ལྟས་ཀྱང་། རྒྱ་དབྱིན་ཟུང་གི་ཚིག་གྲུབ་འཐེང་བོ་འགའ་རེ་གཅལ་དུ་བཀྲམ་ཡོད་པ་ལས། གཙང་དག་སྤུས་ཡག་གི་བོད་ཡིག་བྲིས་ཡོད་པ་དཀོན་ཚོད་ཡིན་པ་འདྲ། དེ་ལས་ལྡོག་སྟེ་དེང་གི་སྤྱི་ཚོགས་སུ་བོད་སྐད་ཡིག་བཀོལ་ན། མི་གཞན་གྱི་གྲལ་མི་ཆོད་པ་ཞིག་དང་རང་གི་མདུན་ལམ་མི་ཚོལ་བ་ཞིག་ཏུ་བསམ་ཏེ་རྒྱབ་ཏུ་གཡུག་རྐྱང་དང་། རྒྱང་དུ་འདོར་རྐྱང་བྱེད་བཞིན་པའི་རྣམ་པ་འཇིགས་སུ་རུང་བ་ཞིག་མངོན་འོང་གི་འདུག
དོན་ངོ་མ་དེ་ལྟ་བུའི་མི་དག་ནི། རྒྱ་མིར་ཐུག་སྟེ་རྒྱ་སྐད་གསོང་བོར་བརྗོད་ཀྱིན་དོན་ཆེན་འགྲེལ་དགོས་ན་མགོ་བོ་བྲང་ཁར་དུད་མི་འགྲོ་བ་འཕྱང་མོ་ཉུག་ཏུ་གནས། དེ་འདྲ་བའི་མི་དག་ནི། དབྱིན་ཇུ་མགོ་སེར་ཚོའི་སྔུན་ནས་དབྱིན་སྐད་ཐྲག་ཐྲག་འཆད་ཀྱིན་དངོས་དོན་ཞིབ་བུར་བགྲོ་དགོས་ན། ལྕེ་ལེ་ཁ་ནང་ནས་དམ་ལ་ཐོགས་མི་འགྲོ་བའི་གདེང་ཚོད་ལར་ནས་རྙེད་དཀའ། མཁོ་ཞིང་གལ་ལ་ཐུག་པའི་ཡིག་ཆ་ཐོལ་གྱིས་བྲི་དགོས་ན་མཛུབ་གུ་ཁ་ནང་བཙུག་སྟེ་ཧད་མི་འགྲོ་བའི་དན་རྟགས་རྩ་ནས་མི་འདུག་སྙམ་པའི་ཚོར་བ་ཤིན་ཏུ་སྐྱེན་པོ་རེ་ཐོན་ཡོང་།
གནས་བབ་འདི་འདྲའི་འོག་ནས་ཧོབ་སྟེ་ལྟས་ན། མགོན་བསོ་ལགས་ཀྱིས་བརྗོད་པ་ལྟར། འུ་ཚོ་ནི་༼བོད་ཀྱི་བླ་སྲོག་སྐྲུན་པའི་བྱེད་པོ་སྟེ། མིང་མེད་པའི་དགེ་རྒན་རེ་རེ་བྱེད་དགོས༽འདུག བོད་ནང་གི་ཤེས་ཡོན་མི་གཞི་གླེང་ཞིང་སྨྲ་བརྗོད་རང་དབང་ལ་ཕྱོགས་ཡོངས་ནས་སྦར་འཇུ་བྱེད་པར་དུངས་པའི་མི་བུ་རྣམ་དཔྱོད་ཅན་མགོ་བདེ་དེ་ཚོས། བོད་སྐད་ཡིག་འདི་ཆུང་ས་ནས་མི་སྐྱོབ་པར་ཆེ་ས་ཞིག་ལ་ཁེངས་ཉམས་ཀྱིས་གྱོལ་ལྡིང་བྱས་འགྲོ
ཡོད་ཚད་ཆབ་སྲིད་ཀྱི་སྟེགས་བུར་བསྡད་དེ་ཐམས་ཅད་སྟེགས་བུ་དེ་ནས་འགྲེལ་འགྲོ་བའི་བཙན་བྱོལ་གྱི་མྱི་ཆེན་ཀླད་རྒྱ་ཅན་དེ་ཚོས། རིག་གནས་ཀྱི་ངོ་བོ་ཡོད་ཚད་དང་གོམས་སྲོལ་གྱི་འགྲོ་སྟངས་ཡོད་ཚད་དཀྱུས་གཅིག་ཏུ་གཅུན་ནས་ཆབ་སྲིད་ཀྱི་སྟ་རེ་རྣོན་པོས་གསིལ་འགྲོ་བ་ལས་བོད་སྐད་ཡིག་བརྒྱུད་སྤྲོད་བྱེད་དགོས་པའི་ངག་སྒོ་ཚལ་བ་ཞིག་ཀྱང་འཁྲོལ་མི་འགྲོ མི་རིགས་ངེད་ཀྱི་སྲོག་རྩར་ཁེལ་བའི་སྐད་ཡིག་ཟུང་འདི། ཉིན་དཀར་དོར་ཆབ་བཞིན་དུ་སྐེད་པར་མི་དཀྲི་བ་དང་། མཚན་མོར་ཉལ་ཐུལ་བཞིན་དུ་ལུས་སུ་མི་འགེབ་པ་ཅི་ཡིས་ཉེས་སོང་།
བོད་ཁ་བ་ཅན་གྱི་སྐད་ཡིག་ཟུང་འདིས། ངེད་ཚོ་མི་རིགས་གཞན་དང་རྒྱལ་ཁོངས་གཞན་གྱི་མི་གྲལ་དུ་སོང་ན་དངོས་གནས་བརྫད་འཇོག་པ་བདེན་པ་ཡིན་ནམ། ངེད་ཚོ་དུས་རབས་རང་བཞིན་ལྡན་པའི་ཁོར་ཡུག་ཏུ་ཙོག་སྟེ་དེང་རབས་ཀྱི་མི་ཞིག་བཅའ་བར་ཏག་ཏག་ཕན་མི་ཐོགས་པ་དངོས་འབྲེལ་ཡིན་ནམ།
ངེད་ཚོའི་ཉིན་རྒྱུན་གྱི་འཚོ་བའི་ཁྲོད་ནས་བོད་པ་ཕན་ཚུན་བར་ལ་ཁ་བརྡ་གློད་པ་དང་འཕྲིན་ཐུང་བསྐུར་བ་སོགས་ཀྱི་སྐད་ཅིག་དེ་དག་ཏུ་ངེད་ཚོས་བོད་ཡིག་བྲིས་པ་ཡིན་ནམ། བོད་སྐད་བཤད་པ་ཡིན་ནམ། ཁ་ཐུག་སྣ་ཐུག་གི་ནང་ཁུལ་འབྲེལ་འདྲིས་དེ་དག་གི་ཁྲོད་ནས་ངེད་ཚོས་རང་ཅག་གི་ཤ་མདངས་བཞིན་སྨུག་རྩི་ཆགས་པའི་སྐད་ཡིག་གོ་སྟོབས་ཅན་འདི་ལ་སྐལ་ཞིག་བཞག་ཡོད་དམ། མ་འོངས་པ་ན་སྐལ་ཞིག་འཇོག་རྒྱུ་ཡིན་ནམ།
མི་གཤིས་འགྱུར་ལྡོག་གི་ཚོས་ཁ་སྣ་ཚོགས་བྱུགས་པའི་རང་རེའི་ཤེས་ཡོན་པ་ཚོས། མི་བུའི་སྒལ་ཚིགས་ཟེར་བཞིན་སྐད་ཡིག་གི་བླ་སྲོག་གཞོག་གཏུབ་བྱས་འགྲོ་བ་འདི་བློ་ཡིས་མི་དཔོག རིག་གནས་རྣམ་དཔྱོད་མཁོ་ཟེར་བཞིན་སྐད་ཡིག་གི་བཀོལ་རྒྱ་ཆུང་ས་ནས་མི་བསྐྱེད་པར་རྡོག་པས་རྫིས་འགྲོ་བ་འདི་སེམས་ཀྱིས་ཐེག་དཀའ། རང་བཙན་དང་དབུ་མའི་ལམ་ཕྱོགས་ནས་ནང་འཛིང་ཕྲག་དོག་གི་མནོག་ལས་རིམ་པར་བྱེད་པ་ལས་བོད་ཡིག་གི་རིན་ཐང་ས་ལ་སྒོར་འཇོག་པ་འདི་ཡིད་ཀྱིས་མི་བཟོད།
འོ་སྐོལ་གྱི་ཡི་གེ་འདི། རང་རེ་བའི་མི་སྣ་མཐོ་དམའ་སུ་ཞིག་གིས་གཙིགས་ཆེན་དང་བརྩི་མཐོང་མི་བྱེད་པར་རྒྱུན་འཇགས་ཀྱི་འཚོ་བའི་ཁྲོད་ནས་རིང་དུ་དོར་ན། དེ་ནི་དོན་གྱིས་རང་མི་རིགས་ཀྱི་ཚད་ལྡན་འབྱུང་འགྱུར་དང་སྐད་ཡིག་རྒྱ་བསྐྱེད་ཀྱི་ཚེ་སྲོག་དལ་གསོད་གཏོང་མཁན་གྱི་གཏེ་བོ་ངོ་མ་རེད།
འདི་ལྟའི་སྐྱོ་ཞིང་ཉམས་དམའ་བའི་གནས་སུ་གྱར་བའི་བོད་ཀྱི་སྐད་དང་ཡི་གེའི་དར་བོ་ཆེ་ལག་པས་བསྒྲེང་བཞིན་སེམས་ཀྱིས་སྐྱོར་དགོས་ན། མགོན་བསོ་ལྟ་བུའི་མི་བུ་སྒལ་ཚིགས་དྲང་བོ་དང་བརྟན་པོ་ཅན་དག་བོད་ཀྱི་སྐད་ཡིག་མྱུར་སྐྱོབ་དང་སྲུང་འཛིན་བྱེད་པའི་དཀྱིལ་སྙིང་ཀ་བ་ལྟ་བུར་བགྲང་རི་བ་ཁོ་བོས་འདོད་དོ། །
གངས་རི་བ། འཛམ་གླིང་གི་སྐད་ཡིག་གྲགས་ཆེན་གཉིས་ཀྱི་རྩུབ་རྡར་ཁྲོད་འཐག་གིན་པའི་རང་ཅག་གི་སྐད་ཡིག་འདི་ལ་རང་ས་ནས་བདག་པོ་རྒྱག་རོགས།
དཔལ་འབྱོར་དང་འཕྲུལ་རིགས་ཀྱི་ཡོ་ལངས་རབ་ཏུ་འཁྲིགས་པའི་དུས་རབས་ཀྱི་ཚོང་ཁྲོམ་དཀྱིལ་ནས་རང་ཅག་གི་སྐད་ཡིག་འདི་ལ་གཤོག་པ་འདོགས་རོགས།
༡༢ ༢༧ ༡༣
སེམས་ཁུར་དང་འགན་ཁུར་ཅན་གྱི་ཁ་ཚ་དགོས་གཏུགས་ཀྱི་དཔྱད་བརྗོད་ལེགས་པོ་འདི་བེད་སྤྱོད་གནང་ཆོག་པ་ཞུ། བཀའ་དྲིན་ཆེ།
ཆབ་བྲག་ཕོ་ཉ་ལགས། འཁྱེར་རྐྱང་ཡིན།
མགོན་སོ་ཟེར་བ་འདི། དགྲ་མགོ་མཐོ་དུས་རྒྱ་མགོ་རེད། བོད་མགོ་མཐོ་དུས་མགོ་རེད། མྱི་ཡག་པ་ཁ་ཁོག་མཐུན་པ་ཞིག་མ་རེད། ལྟས་ངན་ཙི་གུའི་རྔ་མ་ཅན་ཞིག་རེད།
ཨ་ཉིས་རང་རེའི་སྐད་ཡིག་ལ་དུངས་པ་ཟབ་ཅིང་ལྷག་བསམ་ལྡན་པའི་སེམས་སྟེང་གི་སྐད་ཆ་བཤད་པར་བརྟེན་སེམས་འགུལ་ཐེབས་བཅུག་སོང་ཐུགས་རྗེ་ཆེ། ཚང་མས་རང་སྟེང་ལ་བསམ་བློ་གཏོང་རོགས།
ཐུགས་རྗེ་ཆེ་ཞུས་ཆེན་པ་ལགས། གནམ་ཞེས་པའི་ལྟ་སྟངས་བཙོག་པོ་དེ་ལའང་དགའ་བསུ་ཡོད།
ཨ དོན་ཉི་མཆོག་ལ།
ལེགས་པར་བྲིས་སོ། བོད་སྐད་ལ་རྩིས་མཐོང་ཡོད་པར་མངོན་པར་བསྟོད་ཅིང་། མིང་མཐའ་འདྲེན་ཚུལ་རིག་གཞུང་སྐད་དང་བསྟུན་ན། བོད་སྤྱིའི་སྐད་ལ་ཕན་ནོ།
ཨ་དོན་ཉི་ལགས།
ང་ལ་ལྟ་བ་བཙོག་པ་དང་མ་གཙང་བ་དེ་འདྲ་གང་ཡང་མེད། ཆབ་སྲིད་བཤད་མི་ཤེས། བརྫུན་འདེབས་ཡང་བྱེད་མི་ཤེས། ཆོས་བཤད་ཡང་རྒྱག་མི་ཤེས། ངས་ཤེས་བ་ནི་མགོ་ནག་བོད་མིའི་གཤིས་སྤྱོད་ཡིན། ངས་ནི་དངོས་ཡོད་ཀྱི་མྱི་གཤིས་ཤིག་བཤད་བསྡད་ཡོད་པ་ལས། གཞི་མེད་སྐྱོན་འཛུག་དེ་འདྲ་གང་ཡང་མིན་པས། ཁྱེད་ལ་མྱིག་ཞིག་ཡོད་ན་རིག་ཚད་དང་། རྣ་ཞིག་ཡོད་གོ་ཚད་ཡིན། ངས་བཤད་པའི་སྐད་ཆ་ལ་ཡིད་ཆེ་མེད་ན། ཕྱི་རྒྱལ་གྱི་བོད་མི་ལ་ཁ་བརྡ་བྱེད་དུས་ཤིག་ལ་ཁོང་ཚོར་སྐད་ཆ་དྲིས་དང་། དེ་ནས་མགོན་སོ་རྒྱ་ཁྱིས་ཅི་ཞིག་བྱེད་བཞིན་ཡོད་པ་ཤེས་འོང་། སྔོན་མའི་ཁྱེད་ཀྱི་དགེ་རྒན་དེ། ད་ལྟ་ཁྱེད་ཀྱི་དགྲ་ཕྱོགས་ལ་ལང་ཡོད་པ་ཡང་ཤེས་ཡོང་། ཡང་ན་ཁྱེད་ཀྱང་ཁ་བདེ་བོ་དང་མགོ་གྲུང་པོས་ཁོའི་རྗེས་སུ་འགྲེང་ནས་བསྡད་ཡོད་ཚོད་ཡིན་རྒྱུ་རེད། དེ་ནི་ངས་ད་རུང་མ་ཤེས་ཐལ། ཡིན་ན་ཡང་། སྐད་ཆར་རྐང་ལག་མེད་རུང་རྒྱལ་ཁམས་འགྲིམ་ཟེར་བ་ལྟར་ཉིན་ཞིག་གོ་ཡོང་གི་རེད། ཤེས་སོང་ངམ།