ཨེ་ཝྃ་རིག་པ།
ཐོག་མེད་ནས་འཁྱམ་པའི་རྣམ་ཤེས་ཕྲ་མོ།།
འགྱུར་མེད་ཀྱི་ལས་སྣང་དབང་བཙན་ཁྲོད་ན།།
བག་ཡང་ངང་རྒྱུ་བའི་ཁེར་རྐྱང་འཚོ་བ།།
བརྩོན་སེམས་དང་མི་འབྲལ་རིན་ཐང་ལྡན་ཡོད།།
གྲང་ངར་གྱི་སྡུག་སྣང་སྒྲོ་བཏགས་དངོས་རེད།།
ཕུན་ཚོགས་ཀྱི་བདེ་སྐྱིད་བསླུ་བྲིད་རང་རེད།།
སེམས་པ་ལ་དམ་པའི་ལྷ་ཆོས་མེད་ན།།
འཁོར་བ་ཡི་སྐྱོ་སྣང་སེལ་ཐབས་མི་འདུག།
ཞི་བསིལ་གྱི་ངུར་སྨྲིག་གོས་དང་བྲལ་ཏེ།།
འདོད་ཡོན་ལྔའི་བདུད་ཀྱི་གཞན་དབང་གྱུར་ཚེ།།
མི་རྟག་པའི་ལང་ཚོ་ཉིན་བཞིན་ཇེ་རྒུད།།
སེམས་པ་ལ་སྡུག་གི་གས་ཆག་ཤོར་ངེས།།
དམར་སེར་གྱི་ན་བཟའ་དྲོད་ཁོལ་ལྡན་ཡོད།
ཟས་གཙང་གི་སྲས་པོར་བྱིན་བརླབས་ལྡན་ཡོད།།
འཚེ་མེད་ཀྱི་ནང་ཆོས་གཟི་བརྗིད་ལྡན་ཡོད།།
གྲྭ་ཆུང་ཚོའི་བརྩོན་འགྲུས་རིན་ཐང་ལྡན་ཡོད།།
༢༠༡༥ ༡ ༢༧