སྤྱི་ཚེས་༡༤ ཉིན་བལ་ཡུལ་དུ་གནས་སྡོད་བྱེད་མཁན་བོད་མི་ཉི་ཤུ་ལྷག་གིས་རྒྱལ་ས་ཀཱ་ཐ་མན་ཀྲོའུ་ལ་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་གྱི་ལས་ཁུངས་མདུན་ཞི་བའི་རྔམ་སྟོན་སྐད་འབོད་གྱི་ལས་འགུལ་ཟིག་སྤེལ་ཡོད་པ་དང་། ཁོང་ཚོས་བོད་ནང་རྒྱ་ནག་གིས་དྲག་གནོན་གཏིང་འཛིན་བྱས་བ་ནས་འཛིན་བཟུང་བྱས་པའི་བོད་མི་ཚོ་གློད་དཀྲོལ་གཏོང་དགོས་པ་དང་། བོད་མི་དམར་གསོད་གཏོང་རྒྱུ་མཚམས་འཇོག་དང་དྲག་སྤྱོད་དེ་འཛམ་གླིང་མཉམ་འབྲེལ་རྒྱལ་ཚོགས་ནས་ཁྲིམས་ལྟར་རྒྱབ་སྐྱོར་དང་ཐག་གཅོད་ཡོང་རྒྱུ། ད་དུང་ཞིན་ཅང་ལ་ཡང་གཅིག་མཚུངས་དང་ཞིན་ཅང་ཡུ་གུར་མི་རིགས་ལ་གདུང་སེམས་མཉམ་བསྐྱེད་ཡོད་པ་སོགས་གྱི་དགོས་འདུན་རྒྱུ་མཚན་དུ་འཁོད་འདུག། དེ་འབྲེལ་གྱི་ཡིག་ཆ་ཡང་རྒྱལ་ཚོགས་ལས་ཁུངས་དང་འབྲེལ་ཡོད་ལ་སྤྲད་ཡོད་ཟེར། བོད་མི་ཚོས་དུས་ཡུན་སྐར་གྲངས་༡༥ ཙམ་ལ་ལས་འགུལ་སྤེལ་རྗེས་ཉེན་རྟོག་པས་བུ་༡༢ དང་བུ་མོ་གསུམ་བཅས་བསྡོམས་པས་མི་གྲངས་ ༡༥་བཙན་གྱིས་རླངས་འཁོར་ལ་བཅུག་ནས་འཛིན་བཟུང་བྱས་སོང་།
ཉེ་ཆར་འདི་གར་ཡོང་བའི་བལ་ཡུལ་གྱི་གྲོས་ཚོགས་འཐུས་མི་དེ་ཚོས་འདིར་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་སྔ་ཚུན་ཆད་ལ་བོད་མི་ཞི་རྒོལ་བ་རྣམས་ལ་བལ་གཞུང་ཉེན་རྟོག་པ་དང་དམག་མིས་རྡུང་རྡེག་བཏང་དང་གཏོང་བཞིན་པ་དེ་ཚོ་མཚམས་འཇོག་ཡོང་བའི་ལས་འགུལ་སྤེལ་རྒྱུ་ཡིན་གསུངས་སོང་ཡང་ད་ལྟ་གོ་རིག་ཅི་ཡང་མི་འདུག
ཁོང་ཚོ་ལྷག་བསམ་རྣམ་དག་ཡིན་སྲིད་ཀྱང་། བལ་ཡུལ་དེ་ཡང་རྒྱ་ནག་སྲིད་གཞུང་ལྟར་དཔོན་ངན་ཁ་ཤས་ཀྱིས་ལག་འོག་ན་འཁོར་གྱི་ཡོད་རབས་འདུག ད་ནི་ཉེས་པ་མེད་བཞིན་ཏུ་མང་གཙོའི་རྒྱལ་ཁབ་དུ་གྲགས་པའི་བལ་ཡུལ་བ་འདི་ཚང་གིས་ཀྱང་རྒྱ་ནག་གི་སྲུ་ཞུ་ཡག་པོ་སྒྲུབ་བཞིན་འདུག ལོ་རེ་ནས་ལོ་རེ་ཇེ་སྡུག་ནས་ཇེ་སྡུག་རེད། བོད་པ་སོང་ཟེར་ནས་རྐུབ་ལ་དབྱུགས་པས་མ་བརྡུང་བ་དེ་ནི་ཡག་ཙམ་རེད། ད་འདི་ལྟར་བལྟས་དེ་འོང་དུས་ཐག་རིང་བོ་འགོར་ས་མ་རེད།
དངོས་གནས་བལ་ཡུལ་ནང་གནས་སྡོད་བྱ་མཁན་ཚོའི་ང་ཚོའི་ཤ་ཁྲག་གཅིག་པའི་འཐབ་རྩོད་ནང་ཞུགས་མཁན་དེ་དག་ལ་སྐྱབས་སུ་མཆི་ཞུ་རྒྱུ་ཡིན། བལ་ཡུལ་ནི་བོད་དང་ས་འབྲེལ་ཡིན་པར་་བརྟེན་འགྲམ་འགག་སྒོ་བརྒྱུད་ནས་རྒྱ་མིའི་གསང་ལས་པ་དང་མྱུལ་མ་མང་པོས་ཉིན་ལྟར་བསྐོར་གཡེང་བྱ་གི་ཡོད་ལ། ཁོང་ཚོས་བོད་མི་ལས་འགུལ་དོན་གཉེར་བྱ་མཁན་རྣམས་ལ་རྒྱུན་གཏན་ནས་བསྐོར་གཡེང་བྱ་གི་ཡོད་པའི་གནས་ཚུལ་གོ་རྒྱུ་འདུག ལས་འགུལ་སྤེལ་སྐབས་ཁ་ཤས་ཀྱིས་མཉམ་དུ་འཛུལ་ཞུགས་བྱ་གི་ཡོད་ཁུལ་བྱས་ཏེ་དོན་དུ་བརྡ་ལན་སྤྲད་དེ་མཚམས་སུ་འཛིན་བཟུང་དང་ཉེན་ཁ་འཕྲད་སྲིད་པས་ང་ཚོའི་འཐབ་རྩོད་པ་ཚོས་གཟབ་གཟབ་གནང་རྒྱུ་དེ་ཧ་ཅང་གི་གལ་ཆེན་པོ་རེད། གཙོ་བོ་དགྲ་བོའི་ཁ་གཏད་དུ་མདུན་དུ་ལངས་ཏེ་མི་ཚེ་སྐྱེལ་མཁན་ཞིག་ཡིན་ན་དེ་ཚོའི་རིགས་ལ་སྐྲག་དགོས་དོན་ཡོད་པ་མ་རེད། སྐྲག་སྣང་བྱ་གི་མེད་པར་བརྟེན་ལས་འགུལ་དེ་འདྲ་སྤེལ་་ཐུབ་ཀྱི་ཡོད་རེད། དེ་ལས་ཉིན་གཅིག་ངས་འཐབ་རྩོད་པ་ཚོས་འགྲམ་འགག་སྒོའི་མཛའ་གྲོགས་ཟམ་ཆེན་ཟེར་བའི་སྟེང་སྐད་འབོད་བྱ་གི་འདུག་ཅེས་གཏམ་བཟང་ཞིག་སྒུག་ནས་བསྡད་ཡོད། བོད་རྒྱལ་ལོ།།