དགེ་བསྟན།
གཅིག སྤྲང་པོ།
རེ་བའི་མིག་གི་འགུལ་སྐྱོད་ཤིན་ཏུ་མྱུར་བའི་སྤྲང་པོ་ཞིག་ལམ་འགྲམ་དུ་བསྡད་ནས་གཏོང་ཕོད་ཅན་གྱི་སྦྱིན་བདག་ལ་སྒུག་བཞིན་འདུག །ཐེམ་སྤང་བཀའ་རྒྱ་བཏང་ནས་ཟླ་བ་གཉིས་ལྷག་ཕྱིན་ཟིན་པས། ཁོའི་ཉེ་འཁོར་གྱི་ཁྱི་འཁྱམ་དེ་དག་གི་ལྟོ་བ་ཡང་དབུགས་ཤོར་བའི་ལྒང་ཕུག་དང་མཚུངས།
མདུན་གྱི་ཤེལ་ཀོའི་སྟེང་དུ་”སངས་རྒྱས་བལ་ཡུལ་དུ་འཁྲུངས་”ཞེས་བྲིས་པའི་རླངས་འཁོར་ཞིག་སྔོག་བཤེར་ས་ཚིགས་རེ་རེ་བདེ་བླག་ཏུ་བརྒལ་ནས་སྤྲང་པོ་དང་ཇེ་ཉེ་ཇེ་ཉེར་གྱུར། རླངས་འཁོར་དེའི་གཞོགས་གཡས་གཡོན་དུ། ད་དུང་”སངས་རྒྱས་ལ་སྐྱབས་སུ་མཆིའོ།། དབུལ་པོར་ཟས་སྦྱིན་་་་་་”སོགས་བལ་དབྱིན་གཉིས་ཀའི་ནང་བྲིས་པའི་རས་དམར་པོ་རེ་བཏགས་འདུག །སྤྲང་པོའི་མིག་ལས་རེ་བའི་འོད་མདངས་རྣམ་པར་བཀྲ་ཞིང་། “ཨོྃ་མ་ཎི་པདྨེ་ཧཱུྃ། ཨོྃ་མ་ཎི་པདྨེ་ཧཱུྃ། ཨོྃ་མ་ཎི་པདྨེ་ཧཱུྃ།” ཞེས་གོམས་ལོབས་སུ་སོང་བའི་སློང་དབྱངས་སྙན་པོ་སྐྱོར་མ་དགོས་པར་ཁ་ནས་རང་དབང་མེད་པར་ཤོར་ཞིང་། སྐྱ་ཧྲལ་ཧྲལ་དུ་གྱུར་པའི་མཆུ་ཏོ་ལས་ཀྱང་འཛུམ་པའི་ཉམས་ཡིད་དུ་འོང་བ་ཞིག་མངོན་བྱུང་།
རླངས་འཁོར་དེ་སྤྲང་པོ་དང་ཇེ་རིང་ནས་ཇེ་རིང་དུ་གྱུར་པ་དང་། མཐར་མི་མངོན་པར་གྱུར། ཁོའི་ཡོང་འབབ་ནི་རླངས་འཁོར་ནང་ནས་མི་ཞིག་གིས་ཁོ་ལ་བལྟས་ནས་སྣ་སྙེར་ཞིག་བྱས་པ་དེ་ཁོ་ནའོ།།
གཉིས། རོགས་རམ།
ཐེམ་སྤང་བཀའ་རྒྱས་ནད་ཡམས་སྔོན་འགོག་ལ་ཕན་ནུས་ངེས་ཅན་བཏོན་པའི་ཞོར་ལ། མཁའ་དབུགས་འབག་བཙོག་ཉུང་འཕྲི་བྱས་པ་ནི་དོན་བཟང་ཞིག་ཡིན་པ་སྨོས་མ་དགོས། འོན་ཀྱང་། དབུལ་བོ་རྣམས་ལ་མཚོན་ན། བཀའ་རྒྱ་འདིས་མནར་གཅོད་བཏང་བཏང་ཞིག་སུས་ཀྱང་བཏང་མ་མྱོང་། འདིས་སྤྲང་པོ་ཚོ་ཨ་ཅང་ཅང་། ཁྱི་ལྡོམ་རྣམས་ལའང་མནར་གཅོད་བཏང་དང་གཏོང་མུས་རེད་པས། གལ་ཏེ། བཀའ་རྒྱ་འདི་སྲོག་ཆགས་ཤིག་ཡིན་ན། ཁྱི་ལྡོམ་དང་སྤྲང་པོ་ཚོས་སྔ་ས་ནས་ཐལ་བའི་རྡུལ་དུ་བརླགས་ཟིན་པར་ཐེ་ཚོམ་མེད།
མོ་ནི་ཀ་ནི་བལ་ཡུལ་མཆོད་རྟེན་དང་དེའི་ཉེ་འཁོར་གྱི་མི་རྣམས་ཀྱི་ཕྱི་ཚུལ་མཛེས་པོ་དེས་ཡིད་དབང་འཕྲོགས་པའི་ཨ་རི་བ་ཞིག་ཡིན་ལ། མཆོད་རྟེན་དུ་གཏན་སྡོད་བྱས་ཡོད། ཐེམ་སྤང་བཀའ་རྒྱ་བཏང་རྗེས། མོའི་མ་བསྐུལ་དང་བླངས་ཀྱི་ལས་འགན་ནི་སྲང་ཁྱི་ལ་འཚོ་སྐྱོང་བྱེད་རྒྱུ་དེ་རེད། མོས་ཅི་ནུས་གང་ཐུབ་ཀྱིས་སྲང་ཁྱི་ལ་ལྟོ་སྟེར་ཞིང་། ད་དུང་ཁྱི་རྨས་མ་མཐོང་དུས་སྨན་ཁང་དུ་སྐྱེལ་བར་བྱེད། རྟག་ཏུ་སེམས་ཅན་ཐམས་ཅད་བདེ་བ་དང་ལྡན་པར་གྱུར་ཅིག་ཅེས་མ་ཎི་བགྲང་བགྲང་བྱེད་པའི་ནང་པ་ཚོས། མོ་ནི་ཀ་ལ་བལྟས་ནས་”མགོ་སེར་འདི་ཚོ་དངོས་གནས་ཅོལ་ཆུང་རེད”ཟེར།
གསུམ། སྐྱོ་བོ།
གཟའ་ཉི་མ། དགོང་མོའི་ཆུ་ཚོད་༩ ཡས་མས།
“རྒྱ་ནད་ཏོག་དབྱིབས་ནད་དུག་གིས་དཀའ་ངལ་སྤྲད་པའི་བོད་མི་རྣམས་ལ། དབུས་བོད་མི་སྒྲིག་འཛུགས་ནས་རོགས་རམ་གནང་གཏན་འཁེལ་འདུག །རོགས་རམ་དགོས་ན་སང་ཞོགས་ས་གནས་ལས་ཁུངས་ལ་ཐོ་འགོད་བྱེད་པར་ཤོག” ཆོལ་ཁ་དང་ལུང་ཚན་སོ་སོའི་སྐད་འཕྲིན་ཚོགས་པའི་ནང་དུ་བརྡ་ཁྱབ་བཏང་བྱུང་།
གཟའ་ཟླ་བ། སྔ་དྲོའི་ཆུ་ཚོད་༩ ཡས་མས།
ལག་དེབ་ལྗང་ཁུ་འཁྱེར་བའི་རྒད་པོ་ཞིག་གིས་ལས་ཁུངས་སྒོ་ཕྱེ་བར་སྒུག་འདུག །ལས་བྱེད་པས་སྒོ་ཕྱེས་མ་ཐག་རྒད་པོ་ནང་དུ་འཛུལ། “པ་ལགས། ཁྱེད་རང་ཨང་༡༠༠༩ རེད། རོགས་རམ་རག་གི་ཡོད་མེད་བཤད་ཚོད་མི་ཐིག་་་་་་” ལས་བྱེད་པས་ཐོ་འགོད་བྱེད་ཞོར་དུ་སྨྲས། “སྔ་ཤོས་ང་ཡིན་པ། དེ་འདྲ་མང་པོའི་རྗེས་ལ་ག་འདྲ་སེ་ལུས་པ་རེད།” རྒད་པོ་ཧ་ལས་སོང་།
“……….”
བཞི། སྦྱིན་པ།
ཐེམ་སྤང་བཀའ་རྒྱའི་རིང་། དགོན་པ་རྣམས་ཟས་སྦྱིན་དངུལ་སྦྱིན་སོགས་ཟང་ཟིང་གི་སྦྱིན་པ་ལ་གཅིག་ཏུ་གཞོལ་བའི་གསར་འགྱུར་གྱིས་དྲ་ལམ་དོག་པོར་བྱས་པས། བལ་ཡུལ་མཆོད་རྟེན་ན་ནང་པའི་ཁ་གྲངས་མངོན་གསལ་དོད་པོའི་སྒོ་ནས་ཇེ་མང་ལ་སོང་འདུག་སྐད།