རྔ་བ་ཀུན་བཟང་།
དེ་རིང་ནི་ཕྱི་ཟླ་བཅུ་གཉིས་ཀྱི་ཚེས་བདུན་དང་གྲང་ངར་ཤུར་ཤུར་ཀྱི་དགུན་ཁ་ཡིན། ང་མ་ཡུམ་སློབ་གླིང་ན་ཡོང་ཡོད། མ་ཡུམ་སློབ་གླིང་དང་ས་མཐའ་ཡི་འཁྱོལ་དཀའ་བའི་འཚོ་བ་རེ་མྱོང་དུས། ད་གཟོད་རྒན་དམ་པ་དྲན་པའི་ན་ཟུག་ཇེ་ཆེ་རེད།
རྒྱབ་མདུན་དང་གཡོ་སྒྱུའང་མི་ཤེས་མཁན་གྱི་རྒན་དམ་པའི་བཀའ་སློབ་རེ་དྲན་དུས། མི་ཀུན་ལ་བསམ་པ་རྣམ་དག་གི་རང་གཤིས་ཤིག་ཡོད་པ་དྲན་གསོ་ཡོང་གི། ཡིད་གཞུང་དྲང་ཞིང་བློ་དཀྱེལ་ཆེ་བ་དང་། གཞན་སེམས་དང་འགན་ཁྲི་ཁུར་བའི་ཕ་མ་གཉིས་རྒས་འགྲོ་དུས། ཡིག་ཐོག་ནས་བཤད་དཀའ་བའི་ཚོར་སྣང་སྣ་ཚོགས་ཤིག་རང་སེམས་ན་རང་ཤི་མི་རྒྱག་ཀ་མེད་བྱུང་།
ད་ཆར་བསམས་ན་སྐབས་དེར་ངའི་རྒན་ལགས་ཀྱིས་ཡོད་ཚད་བློས་བཏང་ནས་རང་མི་རིགས་ཀྱི་རིག་གནས་ལ་རང་སྲོག་འབུལ་བཞིན་ཡོད་ཀྱང་། དབུགས་རིང་ནར་ནར་བྱེད་ཀྱི་ཡོད་པའི་སྣང་བ་ཞིག་ཉིན་གཅིག་ཡང་མཐོང་མ་མྱོང་། རེད་དེ་རིམ་བཞིན་ཁོང་གི་ཞལ་མདངས་
ཡག་པོ་མེད་ཁར་ལྟོ་ཆས་ལ་དང་ཁ་མེད་ཅིང་། ཆུ་དང་ཇ་ཐང་རིགས་ལ་དགའ་སྣང་མང་དུ་སོང་དུས། ད་གཟོད། ངས་གནས་ལུགས་དུ་མ་ཞིག་ལ་གོ་བ་ལེན་ཐུབ་ཀྱང་ཕན་མེད་ལ་གྱུར་འདུག
རེད་དེ་སྐབས་དེར་རྒན་དམ་པའི་བསམ་བློའི་ཆུ་ཚད་དང་འབད་པ། རེ་བ་དང་། རྨི་ལམ་སོགས་མཐོ་དྲགས་བས་ལུས་ཀྱི་ན་ཟུག་ལ་ཨ་ལན་བྱེད་ཁོམ་ག་ལ་ཡོད། ལོ་མང་ཕྱིན་པའི་རྗེས། དེ་རིང་རྒན་དམ་པའི་ལས་ཁུངས་དང་། སྡོད་ཁང་། གྲོགས་པོ། སློབ་མ། ལས་རོགས་སོགས་རེ་རེ་བཞིན་མཐོང་ཡོང་དུས། མི་ཚེ་ནི་དྲན་གསོ་དང་། མི་ནི་རྨི་ལམ་ནང་ལྟར་འཚོ་ཞིང་། ཁ་སང་ནི་ནམ་ཡང་ལྟ་འདོད་པའི་གངས་དཀར་མེ་ཏོག་ཅིག་ཡིན་པ་བརྗེད་མི་སྲིད།
དུས་ཀྱི་འཁོར་ལོ་ནི་འགོག་མེད་ངང་མདུན་ནས་མདུན་དུ་འགྲོ་བས། ང་ཡང་བྱིས་པ་འགའ་ཡི་ཨ་མ་་ཆགས་རེ་ཡིན་ལ། རང་གི་གཅེས་ཕྲུག་ཚོ་ལ་ཟས་གང་ཞིམ་དང་གོས་གང་འཇམ་གཡོགས་པའི་དུས་ལ་སླེབས་ཟིན། འོན་ཏེ་ང་ལ་ནི་ད་དུང་ཚར་རྒྱུ་མེད་པའི་དཔེ་དེབ་དང་། རྗོགས་རྒྱུ་མེད་པའི་ཚོར་སྣང་མང་བས། ཛ་དྲག་ཆེ་བའི་འཐབ་རྩོད་ཀྱི་དུས་ངོ་མ་ཞིག་ཡིན།
རྔ་བ་ཀུན་བཟང་། མ་ཡུམ་སློབ་གླིང་གི་སྤང་ཁ་ནས་བྲིས། 07/12/2021