ལྷ་ལུང་རྒྱལ།
རིགས་ཚུལ་གློག་གི་འདྲིས་མཐུན་སློབ་གྲོགས་ཚོ་བསྐྱུར་ཅིང༌།།
ཤེས་བྱའི་འོ་མ་འཐུང་མཚམས་ཕོར་ཁ་རུ་བཞག་ལ།།
རབ་མཛེས་སློབ་གྲྭའི་མཛའ་གཅུགས་ཡིད་མཐུན་མར་བྲལ་ནས།།
མི་གཅིག་གླིང་ལ་རི་ཆུས་བསྐལ་བ་འདི་ཅིས་ལན།།
འདུ་འབྲལ་སྒྱུ་མའི་རོལ་སྒེག་འཇའ་འོད་ཀྱི་ཕྱོགས་ལ།།
སྐྱོ་དགས་འཐམ་འཁྱུད་རེ་བའི་འབྲས་བུ་དེ་དབེན་ཡང༌།།
མི་སྐྱིད་དངན་པའི་རླུང་བུ་བྱང་ཁོག་ཏུ་ལྡིང་བ།།
ཕྱི་དབུགས་ལ་འདྲེས་གོ་ལར་འཁོར་བསྐྱོད་ཅིག་བྱས་སོང༌།།
འབྲོག་ཁྱུ་སེང་གེར་བཀུར་བའི་ཡིན་མདོག་གི་ལོ་ཟླར།།
ལྗང་མདོག་གཡུ་རལ་མེད་ཀྱང་གདོང་ལྔ་ཡི་ཉམས་ཀྱི།།
ཟོལ་བཅོས་ང་རོས་སློབ་ཚོགས་ཐོས་འཛིན་གྱི་བུ་ཆུང༌།།
ཡང་ཡང་གཉིད་ལས་དཀྲོགས་པར་དགོངས་དག་ཅིག་ལོས་ཞུ།།
ལྷག་པར་མ་དག་རྙོག་བཤད་ཐལ་རྡུལ་གྱི་འཚུབ་མས།།
ཤེས་རབ་མིག་ཟུང་སྒྲིབ་པའི་ན་ཡམས་ཀྱི་རྗེས་ཤུལ།།
ཡང་དག་བློ་ཡི་ཁ་བས་ཤུལ་མེད་དུ་བཟོས་པ།།
ཚུལ་གནས་མཁས་པའི་ངག་གི་ཡོལ་གོ་རུ་ཕུལ་ན།།
ལས་ཀྱི་རླུང་གིས་གནམ་སའི་ཕར་མཐའ་རུ་འཁུར་ཡང༌།།
ཞེ་དམ་དུངས་བརྩེའི་མིག་ཞགས་བྱང་ངོས་ཀྱི་ཕ་ཡུལ།།
གངས་རིའི་སྐྱིད་སྡུག་གྲོགས་སུ་ཡང་ཡང་དུ་བསྒྱུར་རྒྱུ།།
མ་བསྙེལ་ཞེ་ལ་ཆོངས་ཞེས་སྙིང་དབུས་ནས་སྐུལ་ལོ།།
འདི་ལྟར་བྲལ་ཁའི་སེམས་ཚོར་སྡེབ་ལེགས་ཀྱི་སྦྱོར་བ།།
ཚིག་གི་དར་ལ་ལྕིབས་པ་ལག་ཟུང་གིས་བཏེགས་ཏེ།།
དྲན་པའི་རྟེན་དུ་ཕུལ་བའི་སེམས་གཏམ་གྱི་མཛེས་པ།།
གང་ཞིག་སྙེགས་པའི་དཔལ་གྱི་མཐུན་ཆོས་སུ་འགྱུར་ཤོག།།
བརྗོད་དོན་སྲོག་གི་སྙིང་པོར་གསོན་ཉམས་ཅང་མེད་པར།།
བརྗོད་ཚིག་སྐྱུར་མོས་བཙེམས་པའི་རྩོམ་ཆད་ཀྱི་རིགས་འདི།།
ཞིམ་པོའི་བྲོ་བ་མེད་པའི་ཟས་རུལ་དང་འདྲ་བས།།
མཐོང་བའི་སྐད་ཅིག་དང་པོར་ཞེན་པ་དེ་ལོག་འགྲོ།།
ཁ་བོ་སྔ་མོ་ཞིག་ནས་སྙན་རྩོམ་གྱི་རིགས་ལ།།
མ་བཅོས་སེམས་ཀྱི་གཏིང་ནས་ཡི་ག་དེ་འགག་པས།།
འདིར་ཡང་མཐོང་མ་ཐག་ཏུ་སུན་སྣང་གིས་གཟེར་ཏེ།།
ཚུལ་མིན་ཚིག་རྩུབ་ཤོར་བར་བཟོད་སྒོམ་ཞིག་གནང་རོགས།།
སྟག་སྨྱོན། ཁྱེད་ཀྱི་སྐད་ཆེ་ཤོད་སྟངས་འདི་ཁ་རི་ཁ་ཐུག་ཚ་དྲགས་འདུག