བསྒྲུབ་བྱ་དོན་དམ་རང་སྲིད་རང་སྐྱོང་དང་རང་བཙན་གཙང་མ་གཉིས་གཞི་རིམ་གྱི་ལས་འགུལ་ངོ་བོ་གཅིག་ཡིན།

བསྟན་རྣམ།
___________
རྒྱ་བོད་ཞི་མོལ་ཡོང་ཆེད་སྤྱི་ནོར་༧གོང་ས་སྐྱབས་མགོན་ཆེན་པོའི་དབུ་ཁྲིད་འོག་བཙན་བྱོལ་གཞུང་གི་བསྒྲུབ་བྱའི་དམིགས་ཡུལ་ཁ་གསལ་དང་རྒྱ་ནག་སྤྱི་མཐུན་རྒྱལ་ཁབ་ཀྱི་རྣ་བར་འགྲོ་འོས་པའི་ཆབ་སྲིད་ཀྱི་ལངས་ཕྱོགས་ཤིག་ངེས་པར་དུ་དགོས་པ་ནི་སྨྲོས་མེད་ཡིན་ན་ཡང་། བོད་མི་དཀྱུས་མ་ཞིག་གི་དུས་རྒྱུན་བོད་ཀྱི་རྩ་དོན་ཆེད་ལས་འགུལ་སྤེལ་ཕྱོགས་ནང་ད་ལྟའི་ཆབ་སྲིད་ཀྱི་གནས་སྟངས་འོག་ དེ་མཚུངས་ཀྱི་སྲིད་བྱུས་ཤིག་གང་ཟག་རེ་རེ་ནས་འཛིན་དགོས་པ་ཨེ་ཡིན་སྙམ།
བསམ་ཚུལ་འདིས་གཉིས་སྨན་དབུ་མའི་ལམ་དང་བསྒྲུབ་བྱ་དོན་དམ་རང་སྲིད་རང་སྐྱོང་ལའང་མཐའ་གཅིག་ཏུ་རྒྱབ་སྐྱོར་ཁོ་ན་ལས་འགོག་རྐྱེན་བཟོ་གི་ཡོད་པ་གཏན་ནས་བསམ་གྱི་མེད། དུས་རྒྱུན་དུ་ནས་བོད་མི་དཀྱུས་མ་ཞིག་གི་བོད་ཀྱི་རྩ་དོན་ཆེད་ལས་འགུལ་འདྲ་མིན་ནང་མཉམ་ཞུགས་བྱེད་སྐབས་དགོས་མཁོ་མེད་པའི་རྣམ་རྟོག་གཅིག་ནི། ང་རྩ་དོན་ལས་འགུལ་འདིར་ཞུགས་ན་༧གོང་ས་མཆོག་གམ་བཙན་བྱོལ་བོད་གཞུང་གི་དགོངས་པ་དང་འགལ་གྱི་མེད་དམ་སྙམ་པ་འདི་ཡིན། སེམས་ཚོར་འདི་ནི་ལྷག་པར་ང་ལྟ་བུ་བོད་མི་ཞིག་གི་གནས་སྟངས་འོག་འཆར་ངེས་ཡིན།
ཕྱོགས་གཅིག་ནས་ཤེས་ཡོན་ལྷག་བསམ་ཅན་དང་སེམས་ཐག་ཉེ་པོའི་ཐོག་བོད་མིར་ཤ་ཚའི་ངང་རང་བཙན་གཙང་མ་དང་དེ་འབྲེལ་ལས་འགུལ་སྣ་ཚོགས་སྤེལ་བ་དང་། ཕྱོགས་གཞན་ཞིག་ནས་རང་ཉིད་༧གོང་ས་མཆོག་དང་བཙན་བྱོལ་བོད་གཞུང་གི་ཡང་དག་པའི་དབུ་མའི་ལམ་ལ་ཆེས་ཡིད་ཆེས་དང་ངེས་པ་བརྟན་པོ་རྙེད་པ་ཞིག་ཡིན། ཕྱི་རྒྱལ་ལྷག་བསམ་ཅན་གྱི་རྒྱབ་སྐྱོར་བ་ཚོས་འདས་པའི་བོད་ཀྱི་ལོ་རྒྱུས་ནང་བོད་རྒྱ་ནག་ལས་རྒྱལ་ཁབ་ཐ་དད་ཡིན་པ་གསལ་པོ་ཤེས་པ་ཙམ་དུ་མ་ཟད་ད་ལྟའི་ཆར་རང་བཙན་གཙང་མ་བོད་མིའི་མངོན་འདོད་དང་མཐུན་ཞིང་ཧ་ཅང་རྩོད་འོས་པ་ཞིག་དང་། མ་འོངས་པར་ཡང་བོད་འདི་རང་བཙན་གཙང་མའི་རྒྱལ་ཁབ་ཏུ་འགྱུར་བའི་རེ་བ་དང་འབད་བརྩོན་བྱེད་བཞིན་ཡོད། འདི་འདྲའི་རང་བཙན་གཙང་མའི་རྒྱལ་ཁབ་ནི་བོད་མི་ཁོ་ནའི་ཆེད་དུ་རྩོད་པ་ལས་རྒྱབ་སྐྱོར་བ་ཁོ་པའི་ཆེད་དུ་མིན་པ་ནི་ཚང་མས་ཤེས་གསལ་ཡིན།
སེམས་འཁུར་ཆེན་པོའི་ཐོག་ནས་བོད་དོན་རྒྱབ་སྐྱོར་བ་ཞིག་གི་ཁྱེད་ལ། ང་ཚོས་བོད་རང་བཙན་གཙང་མའི་ཆེད་གོམ་བགྲོད་ལས་འགུལ་སྤེལ་ཀྱི་ཡོད། ཁྱེད་བོད་མི་ཚོ་རྒྱབ་སྐྱོར་དང་འཛུལ་ཞུགས་གནང་རོགས་ཞེས་འབོད་སྐུལ་ཞུས་ན་ཁྱེད་ཀྱི་ལན་འདེབས་གང་འདྲ་ཞུ་རྩིས་ཡོད།
འདམ་ཁ་ཡོད་པའི་ལན་འདེབས་ཁ་ཤས་ནི། ང་༧གོང་ས་མཆོག་དང་བཙན་བྱོལ་གཞུང་གི་ཆབ་སྲིད་ལམ་སྟོན་འོག་ཤར་བསྐྱོད་བྱེད་མཁན་གྱི་བོད་མི་ཞིག་ཡིན་པ་ལས་རང་བཙན་གཙང་མ་རྩོད་མཁན་མིན། དེར་བརྟེན་ངས་རྒྱབ་སྐྱོར་དང་མཉམ་ཞུགས་མི་བྱེད་ཅེས་དང་། ཡང་ན། ཡིན་ད་ཡིན། ཐུགས་རྗེ་ཆེ།ང་ཚོ་བཙན་བྱོལ་གཞུང་ལས་ལྷག་པ་ཁྱེད་རྣམ་པས་མ་སྐུལ་དྭངས་་བླངས་ཀྱིས་བོད་དོན་ཆེད་ལོ་རྒྱུས་དང་མཐུན་ཞིང་དམིགས་ཡུལ་བརྟན་པོ་དང་སྐུ་ལས་ཆེ་བ་རྒྱག་བཞིན་ཡོད་ན། ང་བོད་མི་ཞིག་ཡིན་པའི་ཆ་ནས་ལྟ་ཅི་སྨྲོས། ཞེས་ལན་འདེབས་པ། ཡང་ན་ང་ཨ་རིའི་མི་སེར་ཆགས་ཟིན་པ་རེད། བོད་མིའི་འཐབ་རྩོད་ཀྱི་ལས་འགན་ང་ལ་མེད། ཕྱིན་ཆད་ང་ལ་དྲི་བ་འདི་འདྲ་མ་འདྲི་རོགས། ཞེས་བརྗོད་རྒྱུ། ཡང་ན། སྐབས་བབས་ཀྱི་གོམ་བགྲོད་དམ་སྐད་འབོད་སོགས་ཀྱི་ལས་འགུལ་གྱི་དགོས་པ་གཙོ་བོ་ནི་འབྲེལ་ཡོད་ས་གནས་མི་མང་ལ་བོད་དོན་དྲིལ་སྒྲགས་དང་བོད་མིར་གཞི་རྩའི་འགྲོ་བ་མིའི་ཐོབ་ཐང་དགོས་ལུགས། བོད་ནང་གི་བོད་མིའི་དངོས་ཡོད་སྡུག་བསྔལ་གསལ་བཤད། བོད་དང་བོད་མིར་གང་ཟག་སྒེར་རམ་སྲིད་གཞུང་གི་རྒྱབ་སྐྱོར་མེད་དུ་མི་རུང་བའི་དགོས་མཁོ། ༧གོང་ས་མཆོག་ནི་བོད་རྒྱ་ཞི་མོལ་གྱི་འགོག་རྐྱེན་མིན་པར་དཀའ་རྙོག་བསལ་ཆེད་ཀྱི་ཐབས་བླ་ན་མ་མཆིས་པ་ཡིན་ལུགས་གསལ་བཤད་སོགས་ཡིན་ན། གོང་བརྗོད་ལས་རིམ་གྱི་ཉིན་རེའི་དངོས་ཡོད་གནས་ཚུལ་ལ་ལྟོས་ཚེ། ད་བར་དམིགས་ཡུལ་གཉིས་ཀྱི་གཞི་རིམ་ལས་འགུལ་ནི་ནང་འགལ་དུ་མི་མངོན་ལ། རང་བཙན་གཙང་མ་དགོས་ནའང་འདྲ། དོན་དམ་རང་སྲིད་རང་སྐྱོང་དགོས་ནའང་འདྲ། བརྗོད་ཟིན་དྲང་བདེན་གྱི་ལས་འགུལ་སྤེལ་རྒྱུ་ནི་བསྒྲུབ་བྱ་གཉིས་ཀའི་གཅིག་མཚུངས་ཀྱི་ཐབས་ལམ་ཞིག་ཡིན། གལ་ཏེ་རྒྱ་ནག་གཞུང་གི་བཙན་བྱོལ་བོད་གཞུང་མང་ལ་འདམ་ཁ་གཉིས་པོ་དེ་དྲིས་ན་དེ་སྐབས་ལན་རྒྱག་རྒྱུ་ལས་ད་ལྟ་གཞི་རིམ་ལས་འགུལ་ནང་འདམ་ཀ་གཉིས་པོའི་དྲི་བ་སྔ་དྲགས་པ་མིན་ནམ་སྙམ།
མདོར་ན་གཞི་རིམ་གྱི་བོད་དོན་འཐབ་རྩོད་སྐབས། ཇི་ཙམ་གྱིས་རང་གཙང་མའི་ལས་འགུལ་ཐོག་ཐབས་རྩོད་གཞི་རྒྱ་ཆེ་བ་དང་ཟབ་པ་དེ་ཙམ་གྱིས་དོན་དམ་རང་སྲིད་རང་སྐྱོང་ལའང་ཤུགས་རྐྱེན་རྒྱབ་སྐྱོར་ལས་འགོག་རྐྱེན་དུ་མི་འགྱུར།
རྒྱ་ནག་གི་ཕྱོགས་ནས་ལྟོས་ནའང་ཇི་ཙམ་གྱིས་རང་བཙན་གཙང་མར་འབད་བརྩོན་དང་རྒྱབ་སྐྱོར་ཤུགས་ཆེ་འགྱུར་ཚེ་དེ་ཙམ་གྱི་རང་སྲིད་རང་སྐྱོང་གི་སྲིད་བྱུས་ཕྱོགས་སུ་དབང་མེད་མ་འགྲོ་ཀ་མེད་ཡིན་ནོ།།