ཨོ་གླིང་ནས་ལུང་རྟོགས་ཀྱིས།
གླུ་བ་བསྟན་འཛིན་ཆོས་རྒྱལ་ལགས་ཀྱིས་རྒྱ་གར་རང་བཙན་ཉིན་མོར་སྤྱི་ཚོགས་དྲ་རྒྱ་བརྒྱུད་ཆེད་སྒྲིག་གླུ་གཞས་ནམ་མཁའི་སྔུར་སྒྲ་ཞེས་པ་ཡོངས་བསྒྲགས་བྱས་ཡོད། གླུ་གཞས་དེ་དག་ནི་ཁོང་གིས་སྒྱུ་རྩལ་བ་གཞན་ཁག་ཅིག་དང་མཉམ་ལས་བྱས་པ་དང་། ཁོང་གིས་ལོ་མང་རིང་འབད་རྩོལ་བྱས་པ་ལས་གྲུབ་པ་ཞིག་ཡིན་ཞིང་། བོད་ཀྱི་རྩམ་པར་ནུབ་ཕྱོགས་པའི་སྦྲང་རྩི་བརྒྱབ་པ་ལྟར་རོ་བཅུད་ཕུན་སུམ་ཚོགས་པ་དང་ལྡན་པ་ཞིག་རེད་ཅེས་བརྗོད་ཆོག
མི་ལོ་ཉི་ཤུའི་སྔོན་དུ་ང་རང་ཨོ་སི་ཊོ་ལི་ཡར་གནས་སྤོར་མ་བྱས་པའི་ཉིན་གཅིག་རྡ་རམ་ས་ལའི་སྲང་མདོར་བསྟན་འཛིན་ཆོས་རྒྱལ་ལགས་ལ་ཐེངས་དང་པོ་ཐུག་པ་ཡིན། སྐབས་དེར་ང་རང་ཨོ་སི་ཊོ་ལི་ཡར་གནས་སྤོར་འཆར་ཡོད་པ་ལྟར་ངའི་ལས་གྲོགས་ཕྱི་རྒྱལ་བ་དེས་བསྟན་འཛིན་ཆོས་རྒྱལ་ཨོ་སི་ཊོ་ལི་ཡར་གནས་སྡོད་བྱེད་མཁན་རེད་ཅེས་ངོ་སྤྲོད་གནང་སོང་།
ང་རང་ཨོ་སི་ཊོ་ལི་ཡར་འབྱོར་ནས་ཅུང་མ་འགོར་བར་བསྟན་འཛིན་ཆོས་རྒྱལ་ལགས་ལྡིང་ཆའི་སྟེང་ནས་མཐོང་སོང་། སྤྱི་ནོར་ ༧གོང་ས་༧སྐྱབས་མགོན་ཆེན་པོ་མཆོག་ཨོ་སི་ཊོ་ལི་ཡའི་ཆིབས་བསྒྱུར་གནང་ཐེངས་རེར། འདུ་འཛོམས་ཆེན་མོ་ཁག་གི་སྔོན་འགྲོའི་མཛད་རིམ་ནང་ཁོང་གིས་གླུ་གཞས་གཏོང་གི་འདུག་ལ་མི་དམངས་ཀྱིས་དགའ་བསུ་ཆེན་པོ་ཐོབ་གནང་སོང་། འདས་པའི་མི་ལོ་ཉི་ཤུ་རིང་བསྟན་འཛིན་ཆོས་རྒྱལ་དང་ཁོང་གི་སྒྱུ་རྩལ་སྐོར་ཨོ་སི་ཊོ་ལི་ཡའི་གསར་འགོད་བརྒྱུད་ལམ་ཆེ་ཁག་དང་ཚགས་པར་སྐད་གྲགས་ཆེ་ཤོས་མང་ཆེ་བའི་ནང་ཐོན་པ་དང་དུས་མཚུངས་བོད་དོན་ཁྱབ་བསྒྲགས་ཐད་གྲུབ་འབྲས་ཆེན་པོ་ཞིག་ཐོན་ཡོད།
དེང་སྐབས་ཁོང་ནི་འཛམ་གླིང་ཐོག་མིང་གྲགས་ཡོད་པའི་བོད་ཀྱི་གཞས་པའམ་སྒྱུ་རྩལ་བ་ཞིག་ཡིན་ན་ཡང་། ངའི་མིག་ནང་དུ་ཁོང་ནི་ད་དུང་སྔར་བཞིན་བོད་དོན་འཐབ་རྩོད་པ་ཞིག་དང་། ང་ཚོ་སྐྱབས་བཅོལ་པ་གཅིག་མཚུངས་ལྟར་ཕ་ཡུལ་དང་ཕ་མར་ཁ་བྲལ་ཞིང་། རྒྱལ་ཁབ་ནས་རྒྱལ་ཁབ་ལ་འཁྱམ་ནས་བོད་མིའི་བདེ་སྡུག་གི་ངུ་སྐད་འཛམ་གླིང་མི་མང་གི་སྙན་ལམ་དུ་འབུལ་མཁན་ཞིག་ཡིན། ཁོང་གིས་ཨོ་སི་ཊོ་ལི་ཡ་གཙོའི་རྒྱལ་སྤྱིའི་བོད་དོན་ཚོགས་པ་རྣམས་ཀྱི་དཔལ་འབྱོར་འདུ་འགོད་ཆེད་གླུ་གཞས་གཏོང་བར་ག་དུས་གདན་འདྲེན་ཞུས་ན་ཕེབས་རྐྱང་གནང་གི་ཡོད་ལ། བོད་ཕྲུག་ཁྱིམ་སྡེའི་ཆེད་དཔལ་འབྱོར་འདུ་འགོད་ཤུགས་ཆེན་གནང་བ་སོགས་གཞན་ཕན་ལྷག་བསམ་དཀར་བའི་སྐྱེ་བོ་ཞིག་ཡིན།
བསྟན་འཛིན་ཆོས་རྒྱལ་ལགས་ཀྱིས་བཏང་གནང་བའི་བར་དོ་ཞེས་པའི་གླུ་གཞས་འོད་སྡེར་དེ་ལ་གྷི་ར་མིས་(Grammy Awards) ཟེར་བའི་གཟེངས་རྟགས་འོས་མིའི་ཁོངས་སུ་ཚུད་ཡོད་ལ། དེ་ནི་ཨ་རིའི་སྒྲ་འཇུག་མཐུན་ཚོགས་ཀྱིས་རོལ་དབྱངས་ལས་རིགས་ནང་གི་གྲུབ་འབྲས་ཆེས་ལེགས་གྲས་ལ་ངོས་འཛིན་གྱིས་ཕུལ་བའི་གཟེངས་རྟགས་ཤིག་ཡིན། འདི་ནི་འཛམ་གླིང་ཁྱོན་ཡོངས་ཀྱི་རོལ་དབྱངས་ལས་རིགས་ནང་གི་གཟི་བརྗིད་ཆེ་ཤོས་དང་གལ་ཆེ་ཤོས་ཀྱི་གཟེངས་རྟགས་ཤིག་ཏུ་མི་མང་པོས་ངོས་འཛིན་བྱེད་ཀྱི་ཡོད།