རྡོ་རོང་ཕྲུག
ཉེ་ཆར་ཞིག་ནས་བསྟན་རྡོར་ཟེར་བའི་མི་འདིས་བྱ་བ་གང་ཞིག་མ་བསྒྲུབས་པའི་སྔོན་དུ་ཁེ་དང་གྱོང་གཉིས་ལ་བསམ་བློ་གཏོང་དགོས་པ་འདི་མིའི་རིགས་ཀྱི་བསྒྲུབ་བྱ་རྣམས་ཀྱི་སྤྱི་སྙིང་ཡིན་པའི་བརྙན་ཐུང་ཞིག་སྤྱི་ཚོགས་འབྲེལ་མཐུད་དྲ་རྒྱ་ཁག་ལ་ཁྱབ་ཀྱིན་འདུག བརྙན་ཐུང་དེར་རོལ་བའི་དུས་སུ་ངར་དགའ་སྣང་ཞིག་བྱུང་། རྒྱུ་མཚན་བསྟན་རྡོར་ཟེར་བའི་མི་འདིས་ད་ནི་གཞི་ནས་ཁེ་དང་གྱོང་ཟེར་བའི་གནས་ལུགས་འདི་ལ་གོ་བ་རྙེད་ཡོད་པས་ཡིན། ཁོང་གིས་ཧི་མ་ལ་ཡི་རི་འདབས་སུ་རྒྱལ་དར་བསྒྲེངས་འཛུགས་དང་། བོད་ཀྱི་ཆོས་ལུགས་རིག་གནས་དང་སྤྱི་ཚོགས་འཚོ་ཐབས་སུ་གཉེར་གྱིན་པའི་ལས་འགུལ་རྣམ་གྲངས་མང་པོ་ཞིག་རྒྱལ་སྤྱིའི་སྤྱི་ཚོགས་སུ་ཆབ་སྲིད་ཀྱི་ངོ་བོར་མ་སྒྱུར་སྔོན་དུ་ཁེ་དང་གྱོང་ཞེས་པའི་གནས་ལུགས་འདི་མ་རྟོགས་པ་དེ་ནི་ངའི་སེམས་སུ་ལུས་པའི་འགྱོད་པ་ཆེ་ཤོས་དེ་ཡིན།
ཁེ་དང་གྱོང་ཟེར་བའི་གནས་ལུགས་མ་ཤེས་སྔོན་གྱི་བསྟན་རྡོར་དང་ཁོང་གི་ལས་འགུལ་ལ་བལྟ་བ།
དེ་རིང་འདིར་ངས་བསྟན་རྡོར་གྱི་ད་ལྟའི་བར་དུ་ཁེ་དང་གྱོང་ཟེར་པའི་གནས་ལུགས་འདི་མ་ཤེས་སྔོན་གྱི་ཁོང་གི་བོད་སྤྱི་ཚོགས་སུ་སྤྲད་པའི་ཁེ་གྱོང་གི་དབྱེ་བ་འགའ་དཔེ་མཚོན་དུ་བཀོད་པར་འདོད། ཁོང་ནི་ཕྱི་སྡོད་བོད་མིའི་ཁྲོད་དུ་ཆབ་སྲིད་ལ་དོ་སྣང་ལེན་བཞིན་པའི་མི་ཞིག་དང་བོད་ཀྱི་ཆབ་སྲིད་ལ་ནུས་པ་འདོན་གྱིན་ཡོད་ཟེར་མཁན་ཞིག་རེད། ཁོང་བོད་རང་བཙན་སློབ་ཕྲུག་ཚོགས་པར་ཞུགས་ནས་བོད་ཀྱི་ཆབ་སྲིད་ཀྱི་གནས་བབ་ལ་གཏམ་བཤད་དང་ལས་འགུལ་སྤེལ་མཁན་ཞིག་ཏུ་གྱུར་འདུག་ལ་ནུབ་ཕྱོགས་བོད་ཀྱི་སྤྱི་ཚོགས་སུ་གཞོན་སྐྱེས་ཚོར་ཤུགས་རྐྱེན་ཅུང་ཆེ་བའི་མི་ཞིག་རེད།
འདིར་ང་ཚོས་ཁོང་གི་བོད་ནང་གི་ལྷག་དཀར་ཟེར་བའི་མང་ཚོགས་རང་བཞིན་གྱི་ལས་འགུལ་ལ་སྤྲད་པའི་གྱོང་དང་ཁེ་ལ་མཉམ་དུ་དབྱེ་ཞིབ་ཞིག་བྱེད་འདོད། ལྷག་དཀར་ནི་ཉིས་སྟོང་བརྒྱད་ལོ་ནས་བོད་ནང་གི་བོད་རིགས་མི་རབས་གསར་བ་ཁག་ཅིག་ནས་སྣེ་ཁྲིད་དེ་མཐར་ལོ་ཤས་ནང་བོད་ས་ཡོངས་རྫོགས་སུ་གཅིག་གྱུར་གྱི་མང་ཚོགས་རང་བཞིན་ཅན་གྱི་ལས་འགུལ་ཞིག་རེད་ལ། ལས་འགུལ་འདི་ས་གནས་མི་འདྲ་བའི་རོང་འབྲོག་མང་ཚོགས་ཀྱིས་སོ་སོའི་ས་གནས་སུ་འཚོ་གནས་ཀྱི་རིན་ཐང་དང་དགོས་མཁོ་ལྟར་རྣམ་པ་འདྲ་མིན་སྒོས་བརྩི་སྲུང་བྱེད་ཀྱིན་པ་ཞིག་རེད། ལྷག་པར་དུ་ས་གནས་མང་པོ་ཞིག་ཏུ་ལྷག་དཀར་ལས་འཕྲོས་པའི་སྐད་ཡིག་སྲུང་སྐྱོབ་དང་ཁོར་ཡུག་གཙང་སྦྲ་ཀྱི་ལས་འགུལ་ནི་ད་རུང་ཡང་བོད་དུ་དབུགས་ཀྱི་རྒྱུ་འགག་མེད་པ་འདི་རེད།
ལྷག་དཀར་གྱི་ནུས་པ་བོད་ས་ཡོངས་རྫོགས་སུ་ཁྱབ་པ་དང་ལྷན་དུ་རྒྱ་ནག་སྲིད་གཞུང་ལ་ཞེ་སྣང་ཆེན་པོ་ཞིག་སྐྱེས་ཡོད་པ་ནི་བཤད་མ་དགོས་པ་ཞིག་རེད། ཡིན་ན་ཡང་ཁག་འགེལ་ས་ཞིག་མེད་པར་མང་ཚོགས་རང་བཞིན་གྱི་རིག་གནས་དང་འཚོ་གནས་ལ་ཐད་ཀར་འབྲེལ་བ་ཡོད་པའི་ལས་འགུལ་འདིའི་རིགས་འགོག་ཐུབ་ཀྱིན་མེད་སྟབས་ལོ་ངོ་གཉིས་ལྷག་ལ་ལྷག་དཀར་ལས་འགུལ་ལ་རང་དབང་གི་ཁོར་ཡུག་ཅིག་བོད་ས་ཡོངས་རྫོགས་སུ་ཐོབ་ཡོད། སྟབས་མ་ལེགས་པ་ཞིག་ལ་བསྟན་རྡོར་ཟེར་བའི་མི་འདི་བོད་རང་བཙན་སློབ་ཕྲུག་ཚོགས་པའི་ཚོགས་གཙོར་གྱུར་ལ་བོད་དུ་རྩོམ་བཞིན་པའི་དྲི་མ་མེད་ཅིང་བོད་མི་རིགས་ཀྱིས་སེམས་ཁམས་ནས་འཁྲུངས་པའི་ལྷག་བསམ་དྲོན་མོའི་ལྷག་དཀར་དེ་རི་བོ་ཧི་མ་ལ་ཡ་བརྒྱུད་ནས་བཙན་བྱོལ་དུ་གདན་འདྲེན་བྱེད་པར་ནུས་པ་གང་ཡོད་བཏོན།
ཨག་གསར་གྱི་རྣམ་པས་བཙན་བྱོལ་བོད་མའི་གནས་ཡུལ་རྒྱལ་ཁབ་འདྲ་མིན་གྱི་ནང་དུ་ལྷག་དཀར་བརྩི་བའི་ལྟ་གོན་བྱས། ད་རུང་མི་འདི་དག་གི་ལྷག་དཀར་ལ་ཆབ་སྲིད་དང་འབྲེལ་བའི་འགྲེལ་ལོིག་མང་ཐག་ཆོད་ཅིག་རྒྱབ་པའི་རྗེས་སུ་བོད་ཀྱི་ཆོས་དང་རིག་གཞུང་གཙོས་བོད་ཁམས་ཀྱི་སྤྱི་ཚོགས་ཧྲིལ་བོ་ན་རྦ་རླབས་ལྟར་འཕྱུར་བཞིན་པའི་ལྷག་དཀར་དེ་ཆབ་སྲིད་ཀྱི་དྲི་མས་གཡོགས་པའི་ནག་ཉེས་ཅན་ཞིག་ཏུ་གྱུར་ལ། སྲིད་གཞུང་གིས་ལྷག་དཀར་ནི་ཆབ་སྲིད་ཀྱི་ལས་འགུལ་ཞིག་ལ་བརྩིས་ཏེ་བོད་ཡུལ་ནས་གཏན་དུ་ཁྲིམས་འགལ་ཏུ་གྱུར་ལ་ལས་འགུལ་སྤེལ་མཁན་ཚོར་དམ་དྲག་དང་བཙོན་འཇུག་བྱས་པའི་ལོ་རྒྱུས་ཡོད།
ད་ལྟའི་ཆར་བོད་ཡུལ་དུ་ལྷག་དཀར་ཟེར་བའི་མིང་ཚིག་དང་ལས་འགུལ་གཉིས་ཆ་གླེང་ཐབས་དང་སྤེལ་ཐབས་བྲལ་བའི་ཉེས་ཅན་ཏུ་གྱུར་བ་རེད། བཙན་བྱོལ་དུ་ལྷག་དཀར་བརྩི་བར་དཀའ་ངལ་གང་ཡང་མེད་མོད། རང་རང་གི་ལྟོ་གོས་གདན་གསུམ་གྱི་ནང་དུ་ཐིམས་པའི་བོད་པ་ཚོས་རང་དབང་ལུང་བར་ཆབ་སྲིད་ཀྱི་ངོ་བོར་གནས་ཡོད་པའི་ལྷག་དཀར་དེ་ཆབ་སྲིད་པ་འགས་བརྩི་བ་ལས་མི་མང་རང་བཞིན་དང་ཡོངས་ཁྱབ་རང་བཞིན་གྱིས་བརྩི་ཐུབ་ཀྱིན་མེད། ང་ཚོས་གླེང་དགོས་པ་དེ་ནི་ལྷག་དཀར་ཡོད་མེད་ཀྱི་ཁྱད་པར་མ་ཡིན་པར་ལྷག་དཀར་བརྩི་སྟངས་དང་ནུས་པའི་ཁྱད་པར་ལ་བལྟ་དགོས་རྒྱུ་དེ་རེད། གོང་གི་དཔེ་འདི་སྐུ་ཞབས་ཁོང་གིས་བོད་ཀྱི་ལྷག་དཀར་ལ་སྤྲད་པའི་གྱོང་ཡིན་པར་ཁོ་བོས་ནམ་ཡང་འདོད།
དཔེ་མཚོན་གཉིས་པ། བོད་རང་བཙན་སློབ་ཕྲུག་ཚོགས་པ་ནི་༡༩༩༤་ལོར་གསར་ཏུ་བཙུགས་པའི་བོད་རིགས་ཡིན་མིན་གཉིས་ཀྱི་གྲུབ་པའི་རང་དབང་ཅན་གྱི་བོད་རང་བཙན་ལས་འགུལ་ཚོགས་པ་ཞིག་རེད། ཚོགས་པ་འདིའི་ནང་དུ་མི་གྲངས་མང་ཆེ་ཤོས་ཕྱིའི་རྒྱལ་ཁབ་ཁག་གི་སློབ་ཕྲུག་ཡིན་པ་དང་། བོད་རིགས་སློབ་ཕྲུག་ཚོ་ཡང་ཕལ་ཆེར་བ་གནས་ཡུལ་རྒྱལ་ཁབ་ཀྱི་མི་སེར་ལག་འཁྱེར་ཡོད་མཁན་རྐྱང་ཡིན་པ་རེད། ཚོགས་པ་འདི་ནི་བཙན་བྱོལ་ནང་གི་གཞོན་སྐྱེས་དང་ཆབ་སྲིད་པ་ཡིན་འདོད་མཁན་རྣམས་ཀྱིས་དགའ་མོས་བྱེད་སའི་ཚོགས་པ་ཞིག་རེད་ལ། ཡུལ་གྱར་བའི་བོད་མིའི་ཁྲོད་དུ་ཤུགས་རྐྱེན་ཆེ་བའི་ཚོགས་པ་ཞིག་ངོས་ནས་ཀྱང་འདོད་ཀྱིན་ཡོད།
ཚོགས་པ་འདི་ནི་ཨ་རིའི་གྲོང་ཁྱེར་ནུའུ་ཡོག་གཙོས་ལོན་ཊྲོན་དང་། རྒྱ་གར། ཊོ་རིན་ཊྲོ་བཅས་རྒྱལ་ཁབ་མང་པོ་ཞིག་གི་ནང་དུ་ཡན་ལག་ལས་ཁུངས་ཡོད་པ་རེད་འདུག ད་ལྟའི་ཆར་ཚོགས་པ་འདིར་གོ་ལའི་ཁྱོན་ཡོངས་ཀྱི་རྒྱལ་ཁབ་བརྒྱ་ལྷག་གི་ནང་དུ་སློབ་གྲྭ་ཆེ་འབྲིང་སོགས་སུ་ཚོགས་མི་༦༥༠་ལྷག་ཡོད་པ་ཁོང་ཚོའི་དྲ་ཚུགས་སུ་བཀོད་འདུག
ཚོགས་པ་འདིས་བོད་དོན་གྱི་ཆེད་དུ་ལས་འགུལ་རྣམ་གྲངས་མང་པོ་འདུག་པ་ལས་བོད་གཞི་ལུས་མི་མང་ལ་གྱོང་ཆེ་བའི་ལས་འགུལ་གྱི་ཕྱོགས་ནས་དེ་རིང་འདིར་ཅུང་གླེང་བར་བྱེད་ན། ཚོགས་པ་འདིའི་དམིགས་ཡུལ་ནི་བོད་རང་བཙན་ཡིན་པ་གཞིར་བྱས་ནས་ལས་འགུལ་རིགས་ཚང་མར་བོད་རང་བཙན་གྱི་ལས་འགུལ་རྐྱང་ཡིན་པ་སྨྲོས་མེད་རེད། རྒྱལ་སྤྱིའི་ཨོ་རྩལ་འགྲན་ཚོགས་ཆེན་མོ་མགྲོན་བདག་རྒྱ་ནག་ལ་ཐོབ་པ་ནས་བཟུང་ཚོགས་པ་འདིའི་ཚོགས་མིའི་ཁྱབ་ཁོངས་སུ་ཡོད་པའི་སློབ་ཕྲུག་ཚོ་རྒྱ་ནག་ཏུ་འགྲོ་གང་ཐུབ་བྱས་ཡོད། ཁོང་ཚོ་རྒྱ་ནག་རང་ཏུ་བོད་རང་བཙན་ལས་འགུལ་སྤེལ་མཁན་མང་དག་ཅིག་བྱུང་ཡོད་ལ། སྐབས་དེའི་གསར་འགྱུར་བརྒྱུད་ལམ་ཁག་ཏུ་རྒྱལ་སྤྱིའི་རང་བཞིན་གྱི་ཁྱབ་བསྒྲགས་ཀྱི་ནུས་པ་ཤུགས་ཆེན་ཐོན་ཡོད།
འདིར་ང་ཚོས་གཙོ་བོ་ཁེ་དང་གྱོང་གླེང་གིན་ཡོད་པས། གླེིང་བྱ་གཞིར་བཞག་གིས་བཤད་པར་བྱེད་ན་བོད་རང་བཙན་སློབ་ཕྲུག་ཚོགས་པ་བོད་དུ་མ་འབྱོར་སྔོན་དུ་ལས་རིགས་དུ་མར་རོགས་རམ་གྱི་ཆེད་དུ་བོད་དུ་བསྐྱོད་མཁན་མང་དག་ཅིག་སླེབས་ཡོད་པ་རེད་ལ། ཕྱི་སྡོད་བོད་མིའི་ཁྲོད་ཀྱི་བླ་མ་དང་བོད་ལ་དུངས་ཞེན་ཆེ་བའི་རིགས་ཞེན་ཅན་རྣམས་ཀྱིས་བོད་སྤྱི་ཚོགས་ཡར་རྒྱས་གཏོང་བར་ལས་གཞི་འདྲ་མིན་བརྩམས་དང་རྩོམ་བཞིན་ཡོད་པ་རེད།
སྟབས་མ་ལེགས་པ་ཞིག་ལ་བསྟན་རྡོར་ཞེས་པ་འདི་སྐབས་དེའི་བོད་རང་བཙན་སློབ་ཕྲུག་ཚོགས་པའི་ཚོགས་གཙོའི་འགན་བཞེས་ཀྱིན་ཡོད་པ་རེད་ལ། ཁོང་གི་སྣེ་ཁྲིད་པའི་ཚོགས་པས་རྒྱ་ནག་དང་བོད་ནང་དུ་ལས་འགུལ་བརྩམས་པ་ནས་བཟུང་། དོན་དམ་གྱིས་བོད་སྤྱི་ཚོགས་སུ་ནུས་པ་འདོན་བཞིན་པའི་ཐེབ་རྩ་ཚོགས་པ་ཁག་དང་། ཕྱི་སྡོད་བོད་མི་ལྷག་བསམ་ཅན་རྣམས་ཀྱི་བོད་དུ་རོགས་རམ་ལས་གཞི་རྣམ་གྲངས་ཀྱི་ལམ་ཁ་ཇེ་དོག་དང་ངལ་བ་ཇེ་ཆེར་གྱུར།
གཞན་བོད་རིག་པར་ཞིབ་འཇུག་མཁན་རྣམས་ལ་ཡང་བོད་བསྐྱོད་ཆོག་མཆན་ཐོབ་རྒྱུ་ཧ་ཅང་ཁག་པོའི་གནས་སུ་གྱུར་ཡོད། ད་ལྟའི་ཆར་རྒྱ་ནག་གཞུང་གིས་བོད་ནང་དུ་ཕྱི་རྒྱལ་གྱི་ཐེར་རྩ་ཚོགས་པ་དང་། སྨན་བཅོས་ལས་གཞི། ཤེས་ཡོན་སློབ་གསོའི་ལས་གཞི་རྣམས་ལ་གཞན་དང་མ་འདྲ་བའི་དམ་དྲགས་དང་ལྟ་རྟོག་བྱེད་ཀྱིན་ཡོད་པ་དེ་ཡང་མདོར་དེད་ན་བསྟན་རྡོར་གྱི་གླེང་དགོས་པའི་ཁེ་དང་གྱོང་ཡིན་དགོས་པར་འདོད། གནས་སྟངས་འདི་འོག་ནས་ཞིང་འབྲོག་བོད་རིགས་མང་ཚོགས་ལ་གྱོང་ཆེན་པོ་ཞིག་རག་ཡོད་པ་ར་འཕྲོད་ཡོང་བ་ཞིག་རེད།
གཅིག་ནས་རྒྱ་ནག་གཞུང་ཕྱོགས་ནས་བོད་ལ་མཐུན་རྐྱེན་འདངས་ངེས་ཤིག་མཁོ་སྤྲོད་བྱེད་ཀྱིན་མེད་པའི་ཁར་ཕྱི་རྒྱལ་གྱི་ཐེབ་རྩ་ཚོགས་པ་གསར་འཛུགས་བྱེད་ཐུབ་ཀྱིན་མེད་པ་མ་ཟད་སྔར་ཡོད་པའི་ཚོགས་པ་རྣམས་ཀྱང་རྒྱ་ནག་གི་སྟངས་འཛིན་འོག་ཏུ་རང་དབང་མེད་པར་གནས་དགོས་པ། ཕྱི་སྡོད་བོད་མི་གཙོས་བོད་ལ་དུངས་བ་ཡོད་མཁན་དག་ལ་བོད་དུ་གནས་སྐོར་སོགས་སུ་འགྲོ་རྒྱུར་ཡང་སྔར་ལས་ལྷག་པའི་དམ་པོ་བཟོ་དགོས་པ་སོགས་མདོར་དེད་ན་བསྟན་རྡོར་གྱི་ལས་འགུལ་ལས་བྱུང་བའི་འབྲས་བུ་ཡིན་པ་ཁོ་བོས་ནམ་ཡང་འདོད་དོ།།
ཁྱེད་རང་གིས་ལྟ་སྟངས་དེ་འདྲ་འཛིན་ཆོག་གི་རེད། འོན་ཀྱང་སྤྱི་ཚོགས་ནང་རང་ཉིད་གཙོས་རང་ཉིད་དང་ཉེ་བའི་མིས་གང་བྱས་པ་ཐམས་ཅད་ཡང་དག་དང་རང་ཉིད་དང་རིང་བའི་མིས་གང་བྱས་པ་ཐམས་ཅད་ཀྱི་རྩ་བ་སྔོགས་ནས་སྐྱོན་ཞིག་བཙལ་ཡོང་གི་རེད། ཁྱེད་རང་གིས་བརྟན་རྡོར་གྱིས་ལས་འགུལ་སྤེལ་སྟངས་ལ་ལྟ་སྟངས་ཡང་དེ་འདྲ་རེད།
བཙན་རྒྱལ་རྒྱ་གཞུང་གིས་བོད་ཕྱོགས་ལ་ཆེད་དམིགས་ཀྱི་བཀག་སྡོམ་དང་། དྲག་གནོན། དམ་དྲག་སོགས་ནི་དེ་སྔ་ནས་ཁྲིམས་འགལ་ངང་ཧ་ཅང་ཚད་བརྒལ་ཞིག་ཡོད་ཡོད་པ་ལས། བསྟན་རྡོར་གྱིས་བོད་རང་བཙན་སློབ་ཕྲུག་ཚོགས་པའི་གཙོ་འགན་བླངས་སྐབས་ཚུན་ནས་ཁྲིམས་མེད་རྒྱ་གཞུང་གློ་བུར་དྲག་པོའི་སྐུར་བཞེངས་ཏེ་རིམ་གྱིས་བོད་ལ་བཀག་འགོག་སྔར་ལྷག་བྱས་པའམ། ཡང་ན་དེའི་བྱས་འབྲས་ལས་བྱུང་བ་ཞིག་གཏན་ནས་མ་རེད།
རྒྱ་གཞུང་གི་ཆབ་སྲིད་ཀྱི་དགོས་མཁོ་དང་འཚམས་ན་ད་ལྟ་ཡང་ཁྱེད་ཀྱིས་གྱོང་དུ་གླེང་ཁུལ་བྱེད་ཀྱིན་པའི་བོད་རིག་པར་ཞིབ་འཇུག་དང་། རོགས་རམ་ལས་གཞིའི་རྣམ་གྲངས་སོགས་ཀྱི་ལམ་ཁ་ནི་སྔར་བཞིན་ཡོད་པ་མིག་གིས་མཐོང་གསལ་རེད།
ཁག་མེད་། བོད་རང་བཙན་རྩོད་མཁན་ལ་སོ་རྒྱོབས། རྡོ་རོང་ཕྲུག་ཁྱོད་ཀྱི་རླུང་རྟ་དར་ཁོ་ཐག་ཡིན་པ་རེད་།
བོད་རང་བཙན་འདོད་མཁན་ཡོད་ཚོད་ཀྱི་མི་གཞི་ལ་རྨ་ཁ་རེ་བཟོ་རྒྱུ་ནི་དབུ་མེད་ལམ་པས་སྒྲུབ་བྱ་ཡིན་ནི་རེད། དོན་དངོས་ཐོག་མི་འདི་ཚོས་བོད་པ་ཚང་གི་སྙིང་ཡོད་ཚོད་ལ་རྨར་ཁ་བཟོ་རྒྱུ་ལས་ཅི་ཡང་མེད་པར་གསལ་གསལ་དག་དག་རེད།
རྐང་པ་འཇུས་ཏེ་མར་ཐོན། འདི་ངེད་ཚང་གི་རིག་གཞུང་བདག་པོ་རྒྱག་སྟངས་རེད།
ཡང་ངན་བཤད་ཀྱི་འདུག རྒྱ་ནག་གིས་བོད་མིར་ཐུབ་ཚོད་དང་། དྲགས་གནོན། སུན་བཙུར། དམར་གསོད། མཐོང་ཆུང་བྱས་པ་སོགས་ནི་རྒྱ་དམར་གྱིས་བོད་བཙན་འཕྲོག་བྱས་པ་ནས་བྱུང་དང་འབྱུང་བཞིན་ཡོད་པ་རེད། བསྟན་རྡོར་ལྟ་བུའི་མི་འཇོན་ཐང་ཅན་ཚོས་རྒྱལ་སྤྱིའི་སྤྱི་ཚོགས་ལ་རྒྱ་ནག་གིས་བོད་ལ་ཅི་བྱེད་ཀྱི་ཡོད་མེད་ཤེས་སུ་བཅུགས་ཡོད་པ་རེད། མདོར་ན་བསྟན་རྡོར་ལྟ་བུའི་ན་གཞོན་བོད་ལ་ཉུང་མེད་ན་མང་མེད། མི་འཇོན་ཐང་ཅན་ལ་ངན་མ་བཤད། རང་གི་འཚང་རེད།