གཉན་ཆེན།
ཞལ་རས་དཀར་གསལ་ཟླ་བའི་མདོག་འདྲ་མ། །
སྤྱན་དཀྱུས་རིང་བའི་ཟུར་མིག་གཡོ་ལྡན་མ། །
མཆུ་འདབ་མེ་ཏོག་པདྨ་གད་འདྲ་མ། །
དུང་སོ་སུམ་ཅུ་ལྷ་ཡི་ཚེམས་འདྲ་མ། །
དབུ་སྐྲ་ནག་པོ་འོད་ཀྱི་མདངས་ཆགས་མ། །
ངག་སྒོ་ཡངས་པའི་སྨྲ་བརྗོད་དག་གཙང་མ། །
དབྱིན་སྐད་འབྲུག་སྐད་འདྲེས་མའི་སྦྲགས་སྐད་མ། །
རྒྱལ་བོའི་བཙུན་མོར་བཞེས་པས་ཁེངས་མཐོ་མ། །
གཡབ་རེས་ཅི་ཙམ་རྒྱབ་ཀྱང་ཚིམ་མེད་མ། །
ལྟ་བའི་མི་ངོམས་ཡིད་འཕྲོག་ལྷ་མོ་མ། །
གཟུགས་བྱད་ལྡེམ་མྱུར་སྨྱུག་མ་ཚིགས་དྲུག་མ། །
རྐེད་སྐབས་ཕྲ་ལ་འཕོངས་མཚེ་རྒྱག་རིལ་མ།
རྣམ་པ་བྷཱུ་ཤཱོ་ཀརྨས་བཞེངས་འདྲ་མ། །
ལྟ་བ་ཙམ་གྱིས་དུང་བའི་དཔལ་སྟེར་མ། །
དེང་དུས་ཤེས་ཡོན་སྦྱངས་པས་མཁས་ཅན་མ། །
གཡོ་སྒྱུ་ཁྲམ་གསུམ་མེད་པས་བྱང་སེམས་མ། །
སྡིག་ལས་མེད་པས་དག་པ་མཁའ་སྤྱོད་མ། །
དག་སྣང་ཆེ་བས་དད་པའི་ཡིད་ཕྱུག་མ། །
དགེ་སེམས་ལས་ལ་དགའ་བས་མཁའ་འགྲོ་མ། །
བྱམས་སེམས་དམངས་ལ་སྙོམས་པས་སྲས་མོ་མ། །
མནའ་བཟའ་འབྲུག་བོད་འདྲེས་མའི་ཆས་རྒྱན་མ། །
སྐེ་ལ་ཁ་བཏགས་འཐེན་འདྲའི་གོས་དཔྱངས་མ། །
ཡུལ་སྲོལ་རྒྱན་འཆོར་སྤྲོས་པའི་ཡིད་འོང་མ། །
འབྲུག་གི་ལྷ་མོ་དངོས་སུ་བྱོན་འདྲ་མ། །
༢༠༡༣ ༩ ༡༨ ཉིན། འབྲུག་རྒྱལ་བོའི་གདུང་སྲས་ཀྱིས་ཁབ་ཏུ་བཞེས་པའི་བཙུན་མོ་རྗེ་བཙུན་པདྨར་བྲིས།
གཉན་ཆེན་ལགས་ཀྱིས་རྟག་པར་དྲན་ས་མ།།
གཉན་ཆེན་སྨྱུ་གུའི་བརྗོད་བྱ་ཡིན་ས་མ།།
གཉན་ཆེན་རྒན་པོའི་ཆགས་པ་སྐྱེ་ས་མ།།
གཉན་ཆེན་མཆོག་ལ་གོ་སྐབས་མེད་ས་མ།།