རིག་འཛིན་ལྷུན་གྲུབ།
ང་ཚོ་ནི་བསླབ་བྱའི་ཕྱུག་ཅིང། སློབ་གསོའི་དབུལ་བའི་མི་རིགས་ཤིག་རེད། ང་ཚོས་བསམ་མི་ཕོད་པ་དང་། བཤད་མི་ཕོད་པ་དང་། སྒྲུབ་མི་ཕོད་པ་ནི་བསླབ་བྱའི་འཇུག་འབྲས་དང། གཞན་བརྟེན་གཤིས་ངན་དང་། རང་ཚུགས་མི་ཐུབ་པ་དང་། བསྟུན་གང་མཁས་བྱེད་པ་ནི་སློབ་གསོའི་ལན་པ་རེད། བསླབ་བྱ་རྒྱག་དགོས། བསླབ་བྱ་བྱོས། བསླབ་བྱ་ཉན་དགོས་ཞེས་ཀུན་གྱི་ངག་ལ་འཇགས་ཤིང། ཞེ་བསམ་པའི་གཏིང་ནས་ཀྱང་མི་ཚེའི་འགྲོ་ལུགས་སྐྱོང་སྐབས། བསླབ་བྱ་ནི་མེད་ཐབས་མེད་པ་ཞིག་ཏུ་འདོད། ང་ཚོ་ནི་བསླབ་བྱ་བརྒྱབ་རྒྱུར་དགའ་ཞིང་བསླབ་བྱ་ཉན་རྒྱུར་དེ་བས་མོས། སྤྱིར་ན། བསླབ་བྱ་ནི་རྟོག་པ་མ་སད་པའི་མི་རིགས་ཀྱིས་མི་བུའི་བསམ་བློ་བཅུན་སྟངས་ཀྱི་ཐབས་བྱུས་ཐབས་ཆག་ཅིག་སྟེ། དེས་བསམ་བློ་བག་འཁུམ་དུ་དེད་ཅིང་། ཞུམ་བསྡར་གཡང་རོང་དུ་རྫོང་གི་ཡོད།། དེས་མི་གཤིས་ཀྱི་ནུས་སྟོབས་བག་ཉལ་ཏུ་རུལ་བཅུག་ཅིང། ནམ་ཡང་ཤེས་སྟོབས་རྒྱས་པར་འགེག་བྱེད། དེས་ཁོག་གནག་ངོ་དཀར་གྱི་ཚུལ་བཅོས་གཡོག་ཅིང། རང་གཤིས་ངོ་མའི་གཞི་ལས་འདས་པར་བྱེད། དེས་གོ་འཕང་མཐོ་པར་དམད་ཅིང་ཉམ་ཆུང་གཡོ་འགུལ་མེད་པའི་དམའ་སར་བསྐྱེལ། དེས་གཞན་ཟེར་རྗེས་སུ་འབྲང་རྒྱུར་སྐུལ་ཞིང་། དཔྱོད་ཤེས་རྒྱང་ལྟའི་བློ་མིག་བསྒྲིབ་པར་བྱེད།
དེ་ན་བསླབ་བྱ་བརྒྱབས་ཏེ་བསམ་བློ་ནམ་ཡང་གྲོལ་མི་སྲིད། ཆུང་ཁྱིམ་ཚང་ཞིག་ནས་ཆེ་རྒྱལ་ཁབ་ཅིག་གི་འདས་མ་ད་གསུམ་གྱི་གནས་བབ་བཟང་ངན་ནི། ཐད་ཀར་སློབ་གསོ་དང་འབྲེལ་པ་ལས་བསླབ་བྱ་དང་འབྲེལ་མེད། མི་རིགས་རྗེས་ལུས་ནི་སློབ་གསོ་མ་འདང་པས་ཡིན་པ་ལས། བསླབ་བྱ་ཉུང་དྲག་པས་ག་ནས་ཡིན། ད་ལྟའི་ཡ་ང་བའི་གནས་བབ་ཐབས་སྡུག་འདིའང་བྱུང་རྩ་སློབ་གསོ་ཞན་པས་རེད། ང་ཚོའི་སྤྱི་ཚོགས་ནང་བསླབ་བྱ་རྒྱག་མཁན་ཁེངས་ནས་ཡོད་ཀྱང། སློབ་གསོ་སྤྲོད་མཁན་དང་སློབ་གསོ་བ་མེད་རེད་ཅེས་ལབ་ཀྱང་འུར་ག་ནས་ཡིན། བསླབ་བྱ་ཧ་ཅང་གཙིགས་ཆེན་རྩིས་སྲོལ་རྒྱུན་འབྱམས་འདིས། ཐམས་ཅད་བསླབ་བྱ་དང་སྦྲེལ་ཏེ་བླང་དོར་བྱེད་ཀྱི་ཡོད།
གཟུར་གནས་དཔྱོད་ལྡན་ཚོས་སོམས་དང། ཐམས་ཅད་བསླབ་བྱ་ལ་ཐུག་ཡོད་དམ། བྱིས་པ་བསམ་མེད་དྭང་གཙང་བློ་ལྡན་མེ་ཏོག་ལྟར་སྙིང་སྡུག་པ་དག རང་ཅག་གིས་བསླབ་བྱ་ཞེས་པའི་བཙོག་ཆུ་བླུགས་ཨེ་ཐུབ་ཀྱི་གསོ་སྐྱོང་བྱེད་ཀྱི་ཡོད། དེར་བརྟེན། རང་ཆས་ཤེས་སྟོབས་ཚར་ལོངས་ཐུབ་ཀྱི་མེད། ཤོད་སྟངས་གཞན་ཞིག་གི་ཐོག་ནས་བཤད་ན། བསམ་བློའི་གནས་ཚད་ལོངས་མི་འདུག་ཅེས་པ་དེ་རེད། ང་ཚོའི་སྤྱི་ཚོགས་ནང་ “བྱེད་དགོས་རེད།” དང་། “བྱེད་དགོས་འདུག་” ཅེས་ག་དུས་ཡིན་ནའང་བཤད་བཤད་པར་འདུག་དགོས་པའང་བསླབ་བྱ་ཉུང་དྲག་པས་རེད་དམ། ངས་བསམས་ན་དེ་ནི་སློབ་གསོའི་མ་འདང་པས་ལན་པ་རེད་སྙམ། ད་དུང་ཡང། ང་ཚོས་མི་རིགས་གསོ་སྐྱོང་བྱེད་ཐབས་ནང་བསླབ་བྱ་ཁོ་ན་རྩ་ཆེར་བཟུང་པ་དང་། བསླབ་བྱ་ལས་ལྷག་གྲོལ་ལམ་གཞན་མེད་པ་ལྟ་བུར་འདོད། ཕ་མ་དང་དགེ་རྒན། འགན་ཡོད་དང་མགོ་ཁྲིད། བླ་མ་དང་སྤྲུལ་སྐུ། མཁན་པོ་དང་སློབ་དཔོན། དགེ་བཤེས་དང་མཁས་པ་ཚང་མས་བསླབ་བྱ་བརྒྱབས་ནས་ཡིད་འཚིམ་ཐབས་རྐྱང་རྐྱང་གནང་དང་གནང་བཞིན་འདུག
བསླབ་བྱ་རྐྱང་པས་མི་རིགས་འདིས་བདེ་སྡུག་སེལ་ཐུབ་བམ། བསླབ་བྱ་རྐྱང་པས་མི་རིགས་འདི་རྟོག་པ་སད་དམ། བསླབ་བྱ་རྐྱང་པས་མཐོ་སྒང་གི་མ་འོངས་མདུན་ལམ་བསུ་ཐུབ་བམ། བསླབ་བྱ་རྐྱང་པས་འགྲོ་བ་མི་སྤྱི་ལ་དབང་བའི་ཐོབ་ཐང་རག་སྲིད་དམ། བསླབ་བྱ་རྐྱང་པས་མི་རིགས་ལས་དོན་སྒྲུབ་པ་རྩིས་རུང་ངམ། བསླབ་བྱ་རྐྱང་པས་བསྟན་སྲིད་ལ་སྟོབས་ཤུགས་བྱིན་ཐུབ་བམ། བསླབ་བྱ་རྐྱང་པས་རང་ངོ་རང་ཤེས་ཆགས་སམ། བསླབ་བྱ་རྐྱང་པས་རང་འགན་རང་འཁུར་བྱེད་དམ། བསླབ་བྱ་རྐྱང་པས་ཕ་མེས་ཤུལ་བཞག་འཛིན་ཐུབ་བམ། བསླབ་བྱ་རྐྱང་པས་རིག་གསར་ནང་འདྲེན་ཐུབ་བམ། བསླབ་བྱ་རྐྱང་པས་རང་ལ་ཆེ་མཐོང་དང་གཞན་ལ་གུས་བཀུར་གྱི་བློ་སྟོབས་བསྐྲུན་ཐུབ་བམ། བསླབ་བྱ་རྐྱང་པས་མི་རིགས་རང་དབང་ཆེད་བློས་གཏོང་ཚད་མེད་གནང་མཁན་དཔའ་བོ་དཔའ་མོའི་རེ་འདུན་བསྒྲུབ་བམ། བསླབ་བྱ་རྐྱང་པས་སྤུ་ཟླ་ཆིག་སྒྲིལ་ལ་གསོན་ཤུགས་རྒྱས་སམ། མདོར་ན་བསླབ་བྱ་རྐྱང་པས་མཐའ་འཁྱོལ་ལམ།། །།
(གསལ་བཤད། འདི་ནི་སློབ་གྲོགས་ཤིག་གིས་མི་རིགས་སློབ་གསོ་དང་བསླབ་བྱའི་སྐོར་དྲིས་བའི་ལན་དུ་རང་བློར་གང་ཤར་ཤར་ཞིག་ཡི་གེར་ཕབ་པ་ཞིག་ཡིན་པས། མི་རིགས་སློབ་གསོའི་ལས་དོན་ཐད་དོ་ཁུར་གནང་མཁན་ཚོར་བསམ་ཚུལ་གྱི་ཚུལ་དུ་ཕུལ།)
རིག་འཛིན་ལྷུན་གྲུབ་ལགས།
ཁྱེད་རང་གིས་བཤད་པ་འདི་བསླབ་བྱ་ཡིན་ནམ་ཡང་ན་སློབ་གསོ་ཡིན། ངེད་ནས་བསམ་ན་བསླབ་བྱ་རེད། ཁྱེད་གིས་སློབ་གསོ་མི་བཤད་པར་བསླབ་བྱ་བརྒྱག་དགོས་དོན་ཅི་ཡིན་ནམ། ལགས།
ཀླུ་སྒྲུབ་ཀྱིས།
གཞན་གྱི་སྐྱོན་རྣམས་བརྗོད་མི་བྱ།།
གཞན་གྱི་སྐྱོན་རྣམས་བརྗོད་བྱེད་ན།།
རང་ཉིད་ལ་ཡང་དེ་ཡོད་ཕྱིར།།
དཔེར་ན་ཝ་དང་བུ་མོ་བཞིན།།
སྐྱེ་བོ་གསོ་ཐིགས་ལས་སོ།
བསླབ་བྱ་དང་སློབ་གསོ་གཉིས་ལ་ཁྱད་པར་ག་རེ་འདུག་ལགས?
ཤིན་ཏུ་ནས་བདེན་པ་རེད། རྩོམ་ཡིག་འབྲི་བ་པོ་ཁོང་ནས་ཀྱང་ཁ་བརྡ་དྲ་རྒྱ་ནང་ལ་འཁོར་ན་བསླབ་བྱ་གནང་བཞིན་པ་འདི་རེད། བོད་མི་སུ་འདྲ་ཞིག་ཡིན་ན་ཡང་ཕ་རོལ་བོའི་གནས་ཚད་ལ་མ་བལྟས་པར་བསླབ་བྱ་རྒྱག ད་དུང་༧ གོང་ས་མཆོག་གི་གསུངས་སྟངས་བྱས་ནས་བསླབ་བྱ་རྒྱག རང་ཉིད་༧གོང་ས་མཆོག་གི་ས་ལ་བསྡད་ནས་བསླབ་བྱ་བྱེད། བསླབ་བྱ་གཏོང་ཡུལ་བྱིས་པ་ལྟར་བལྟས་ནས་བསླབ་བྱ་བྱེད། མགོ་རྟིང་བསློགས་ནས་བསླབ་བྱ་བྱེད། དཔེར་ན། དགེ་ཕྲུག་གིས་དགེ་རྒན་ལ་བསླབ་བྱ་རྒྱག བུ་མོས་ཨ་མ་ལ་བསླབ་བྱ་རྒྱག བུ་ཡིས་ཕ་ལ་བསླབ་བྱ་རྒྱག ད་དུང་ནུ་བོས་ཕུ་བོ་ལ་བསླབ་བྱ་རྒྱག་པ་སོགས་ནི་བཤད་མ་དགོས། འདི་དག་ནི་འོ་ཙིག་ཡིན།
བསླབ་བྱའི་ངོ་བོའི་ཆ་ནས་ཀྱང་དགོད་བྲོ་བ་མང་པོ་ཡོད། འདིའི་སྐོར་ལ་མང་པོ་མང་པོ་འབྲི་རྒྱུ་ཡོད།
རྟག་པར་སྐད་ཆ་མཐོན་པོ་ཟིག་ནས་བཤད་མ་བསྡད་པར་ལྟད་མི་འདྲ་འདྲ་ལྟོས་དང་ངོ་མ་དགའ་མོ་འདུག། །
http://www.youtube.com/watch?v=ZfpTHOhExGI
རིག་འཛིན་ལྷུན་གྲུབ་ལགས། བསླབ་བྱ་དང་སློབ་གསོའི་ཁྱད་པར་ཁ་གསལ་ཞིག་གསུང་རོགས་གནང་དང་།
གང་ཤར་ཤར་ནི་གང་ཤར་ཤར་རང་རེད་འདུག། གཞན་གྱིས་གོ་ནི་ཟིག། རང་གིས་ཤེས་ནི་ཟིག་བཤད་ན་ཕན་པ་ཡོད་པ་རེད། དེ་མིན། དྲིས་བ་ཆ་ཚང་ལ་ལན་ཞིག་འདེབས་ཁུལ་བྱེད་པ་ནི། བསམ་བློ་ནར་མ་སོན་པའི་ཤན་ཆ་རེད།
བསླབ་བྱ་ལེན་རྒྱུ་མེད་པའི་སློབ་གསོ་ཞིག་དང་། སློབ་གསོ་བསླབ་བྱ་མེད་པའི་རྩ་ཆེན་ཟིག་ཡོད་ན་འདི་འདི་རེད་ཟེར་ནས་ཅིག་བྲིས་དང་། ཉན་ནས་ཁ་གདངས་ནས་བསྡད་ཡོད།
གོང་མ་སྔོན་མ་ཚོ་ནོར་ཡོད་ཚུལ་བཤད་ན་མ་འགྲིག་པ་ཞིག་ག་ལ་ཡིན། ཡིན་ན་ཡང་། འདྲ་ཆགས་པོ་འདྲ། གནད་ཐུགས་པོ་འདྲ་མེད་ན། ཁ་ཕྱིར་ལ་འཁོར་ནས་ཕྱག་རེ་འཚལ་ན་ཡག་ནི་རེད། ཨ་མྱེས་དྲིན་ཅན་ཚོ། རྡོ་ལྕགས་ལ་བསྒྱུར། ལྕགས་རྣོ་ལ་བསྒྱུར་ནས་དུས་འདི་ལ་བསྐྱལ་རེད། དེང་སང་གི་ལབ་རྒན་འདི་ཚོ་ལ་ཁ་ཕོད་ཆེ་ཚད་འདུག་གི་ཨ།