འབའ་སྲས།
དེ་རིང་གི་ཉི་མ་འདི་ཇི་འདྲའི་ཁྱད་པར་བ་ཞིག །
ཉི་མ་འདི་ཅི་འདྲའི་འོད་དང་ལྡན་ལ་དྲོད་ཀྱང་འཁྱིལ།
དེ་རིང་གི་ཟླ་བ་འདི་ཇི་འདྲའི་གོར་ཞིང་བསིལ་བར་འཛུམ།
འོ་རེད། འདི་ནི་མཁའ་དབྱིངས་སུ་ཤར་བའི་ཉི་མ་མིན་ལ།
སྤྲིན་བར་ནས་འཛུམ་པའི་ཟླ་བ་འང་མིན།
འོ་ན་སུ་རེད། ཁྱོད་ཀྱིས་ང་ལ་དྲིས་ན་ངས་ཁྱོད་ལ་བཤད། འདི་ནི་གླིང་ལྔའི་ལམ་འཕྲེང་མྱུར་གྱིས་བསྐྱོད་པའི་མདོ་སྨད་ཆོལ་ཁའི་རྟ་ཕོ་ཞིག་རེད།
གསལ་བོར་བཤད་ན། གོམ་འགྲོས་རྟ་ཕོའི་བང་དང་འགྲན་ཞིང་། འཛུམ་མདངས་ཉི་ཟླའི་ཟེར་དང་འགྲོགས་པའི་བུ་མོ་ཆོས་གཡང་སྐྱིད་རེད།
བུ་མོ་ཆོས་གཡང་སྐྱིད། ཀྲུང་གོ་བའི་བུ་མོ་ཞིག་རེད་དམ། མ་རེད། བོད་གངས་ཅན་གྱི་བུ་མོ་ཞིག་རེད། ཁྱོད་ཀྱིས་ཅི་ལྟར་ཤེས། མོའི་གོམ་འགྲོས་ཀྱི་བར་ན་ཞི་བདེ་ཡི་བང་ཁ་མཆིས། མོའི་འགྲན་རྩོད་ཀྱི་གདོང་ན་བཙན་པོ་ཡི་འཛུམ་རིས་མངོན།
ད་དུང་། མོའི་རྒྱབ་ལོག་ན་གངས་ཅན་པའི་རྒྱལ་དར་གཡོ་ཞིང་། ཁ་དག་གིས་བསུ་བ་བྱེད། ལ་རྒྱ་ཡི་འབོད་སྐུལ་ལྡིར། ཆོས་དབྱིངས་སྒྲོལ་མ་ཞེས་མཚན་མོའི་གཉིད་བཅགས་ཤིང་། ཉིན་མོའི་ཟས་ཆད་པ་ཡང་ཧ་ཅང་མང་། ང་ཡང་ཡིན་ནོ།
དེས་ན་མོས་ཅི་ཞིག་བྱས་སོང་། ཁྱོད་ཀྱིས་མ་ལྟོས་སམ། དེ་རིང་མོས་འཛམ་གླིང་སྟེང་མི་རིགས་གཞན་དང་མི་འདྲ་ཞིང་། རྒྱལ་ཁབ་གཞན་དང་མི་འདྲ་བར་འཛུམ་གྱིས་ཁེངས་པའི་ཕུལ་བྱུང་གི་བྱ་དགའ་ཞིག་བླངས་སོང་། བྱ་དགའ་ཨང་གསུམ་པ་རེད།
བྱ་དགའ་དེ་གཞན་ཕམ་བར་འདོད་པའི་ངན་སེམས་མིན་ལ། རང་རྒྱལ་བར་འདོད་པའི་ཧམ་པ་ཡང་མ་རེད། འོ་ན་ཅི་རེད། དེ་ནི། ཀུན་སྙོམ་གྱི་བསམ་བློ་ལས་བྱུང་བའི་རྒྱུགས་རྩལ་ཞིག་རེད།
འོ་རེད། གྲོགས་པོ། མོ་རང་གིས་བླངས་པའི་བྱ་དགའ་དེ་ཀྲུང་གོའི་རེད་དམ། བོད་པའི་རེད།
ངས་བལྟས་ན། དེ་རིང་ཀྲུང་གོས་བཙན་གྱིས་བརྐུས་ཀྱང་སང་ཉིན་བོད་པས་འཕྲོག་སྲིད།
ཡ་ཡ། ཁ་དྲོ། བཀྲ་ཤིས། དོན་འགྲུབ། བུ་མོ་ཆོས་གཡང་སྐྱིད།