ཆང་སྐྱེས།
____ལྷ་སའི་བུ་མོ་ཞིག་ལ
བུ་མོ་ཚེ་རིང་གཡུ་སྒྲོན།།
གསེར་ཆེན་མེ་ཏོག་འདྲ་བྱུང་།།
མཁུར་ཚོས་འཛུམ་མདངས་དམར་པོ།།
ཟུར་གསུམ་སྙིང་ལ་བཞད་སོང་།།
བུ་མོ་ཚེ་རིང་གཡུ་སྒྲོན།།
དཀར་གསལ་ཟླ་བ་འདྲ་སོང་།།
ཞལ་རས་འོད་དཀར་ཅན་པོ།།
ཡིད་ལ་འཁོར་འཁོར་བྱས་བྱུང་།།
བུ་མོ་ཚེ་རིང་གཡུ་སྒྲོན།།
མཁའ་མཐའི་འཇའ་ཚོན་འདྲ་བྱུང་།།
ལང་ཚོའི་ཁ་དོག་སྣུམ་པོ།།
སེམས་ནས་ཡལ་རྒྱུ་མི་འདུག།
བུ་མོ་ཚེ་རིང་གཡུ་སྒྲོན།།
བྱེའུ་ཆུང་འཇོལ་མོ་འདྲ་བྱུང་།།
གསུང་སྐད་གྲེ་འགྱུར་སྙན་མོ།།
རྣ་བའི་དཔྱིད་དུ་སྨིན་སོང་།།
བུ་མོ་ཚེ་རིང་གཡུ་སྒྲོན།།
འབྲི་མོའི་འོ་ཞོ་འདྲ་བྱུང་།།
དྲི་མེད་བརྩེ་སེམས་དྭངས་མོ།།
བདག་ལ་གནང་དང་ཨེ་ཆོག།