ཨ དོན་ཉིས་བསྒྱུར།
བུ་མོ་ཧེ་སྒྲིན་(Heidi) མོའི་སྤོ་བོ་ལགས་དང་མཉམ་དུ་སིད་སི་(Swiss) རྒྱལ་ཁབ་ཀྱི་(Alps)ཨེལ་ཕོ་ཞེས་པའི་རི་རྩེ་ན་བསྡད་ཡོད།ཁོ་གཉིས་ཀྱི་ཤིང་ཁང་སྐྱ་བོ་དེ་རི་ཚོགས་མང་བོར་རྒྱང་ལྟ་བྱེད་ཐུབ་པའི་སྒང་ཐོག་ཅིག་ན་ཡོད་ལ། ཤིང་ཁང་གི་ལྟག་རྒྱབ་ན་ཧ་ཅང་རྙིང་སོང་ཡིན་པའི་གསོམ་སྡོང་རིང་བོ་གསུམ་ཡོད། བུ་མོ་ཧེ་སྒྲིན་ནི་རླུང་གཡུགས་པའི་སྒྲ་དབྱངས་ལ་ཉན་རྒྱུར་དགའ་ཞིང་གསོམ་སྡོང་གི་ཡལ་གའི་སྒྲ་ལའང་གསན་རྒྱུར་དགའ།
རི་སྒང་དེ་ན་བུ་མོ་ཧེ་སྒྲིན་གྱི་འཚོ་བ་ཧ་ཅང་སྐྱིད་པོ་ཡོད། དབྱར་དུས་ཀྱི་ཉི་མ་རེ་རེར་ཁོ་མོ་ཕེ་ཐིལ་(Peter) དང་མཉམ་དུ་རི་མགོར་ར་མ་འཚོ་རུ་སོང་བ་དང་། མོས་རི་སྐྱེས་མེ་ཏོག་ཡོངས་ཀྱི་མིང་རེ་རེ་བཞིན་གསལ་བོར་ཤེས་ཀྱི་ཡོད་ལ། ཁོ་མོ་ཕེ་ཐིལ་གྱི་སྒོ་ཕྱུགས་ར་མ་ཀུན་ཀྱི་གྲོགས་པོ་བཟང་བོ་ཡང་ཡིན།
དགུན་ཁའི་དུས་སུ་རི་སྒང་དེར་གྲང་ངར་ཤིན་ཏུ་ཆེ་བས་བུ་མོ་ཧེ་སྒྲིན་མོ་རང་གི་སྤོ་བོ་ལགས་དང་ལྷན་དུ་ཁྱིམ་ནས་བསྡད་དེ། སྤོ་བོ་ལགས་ཀྱིས་ཤིང་གི་ཁྱེམ་བུ་བཟོ་སྟངས་དང་སྒྲོག་ཙེ་དང་རྐུབ་བཀྱག་བཟོ་བར་བལྟས་ནས་དགུན་རིང་མོ་རེ་རེ་ཕར་བསྐྱལ་བ་རེད།
མཚམས་ལན་རེར་ཕེ་ཐིལ་གངས་ལམ་བརྒལ་ནས་རི་མགོར་བུ་མོ་ཧེ་སྒྲིན་བསུ་རུ་ཡོང་ཞིང་། ཁོས་བུ་མོ་ཧེ་སྒྲིན་རི་གཤམ་དུ་བསྡད་ཡོད་པའི་རང་གི་ཨ་མ་དང་མིག་ལྡོང་བའི་རྨོ་མོ་གཉིས་ལ་ལྟ་རུ་འཁྲིད་པ་རེད།
ཉིན་ཞིག་ཧེ་སྒྲིན་གྱི་ཨ་ནེ་ཡོང་ནས་ཁོ་མོ་སློབ་གྲྭར་ཁྲིད་སོང་། རྒྱང་ཐག་རིང་བའི་མཁར་གྲོང་ཧྥི་རན་ཁུ་ཕོར་ཐི་(Frankfurt) ལ་སློབ་སྦྱོང་བྱེད་དུ་ཁྲིད་སོང་། བུ་མོ་ཧེ་སྒྲིན་གྱིས་གྲོང་ཁྱེར་ཧྥི་རན་ཁུ་ཕོར་ཐི་ནས་གྲོགས་པོ་མང་བོ་རྙེད་སྟབས། གནས་སྐབས་རིང་ཁེར་རྐྱང་གི་སུན་སྣང་མྱོང་མ་དགོས། ལྷག་པར་དུ་ཧེ་སྒྲིན་གྱི་སྤུན་མཆེད་བུ་མོ་ཁེ་ལི་རའི་(Clara) སྨན་པ་བགྲེས་པོ་ཁོང་སྨན་དཔྱད་དུ་ཡོང་ཐེངས་རེར། ཁོང་གིས་བུ་མོ་ཧེ་སྒྲིན་ལ་ངག་འཇམ་པོས་འཚམས་འདྲི་ཞིག་མ་བྱས་ན་གཏན་ནས་མི་འགྲོ་བ་ཡིན།
ཁེ་ལི་རའི་རྨོ་མོ་ལགས་ནི་བུ་མོ་ཧེ་སྒྲིན་ལ་ཀློག་སློབ་མཁན་གྱི་དགེ་རྒན་ཐོག་མ་དེ་ཡིན། བུ་མོ་ཁེ་ལི་ར་ནི་སྙིང་རྗེ་ཞིང་སྤྱོད་པ་ཡག་པོ་ཅན་ཞིག་ཡིན་ནའང་། ཁོ་མོའི་བཞིན་རས་ལ་སྐྱ་མདངས་དོད་ཅིང་གཟུགས་པོ་ཧ་ཅང་ཞན་པས་ཡར་ལངས་ནས་འགྲོ་མི་ཐུབ་པར་མ་ཟད། གཟུགས་མགོར་ལངས་ནས་འདུག་ཀྱང་མི་ཐུབ།
དེ་ནས་བུ་མོ་ཧེ་སྒྲིན་གྱིས་བུ་མོ་ཁེ་ལི་ར་ལ་རི་རྩེ་ན་བསྡད་ཡོད་པའི་ཁོ་མོའི་སྤོ་བོ་དང་ཕེ་ཐིལ་དང་། དགའ་སྤྲོས་ཕྱུག་པའི་ར་ཁྱུ་དང་། རྩྭ་རྩི་ཤིང་སོགས་ཀྱི་སྐོར་ཁྱད་མཚར་བའི་སྒྲུང་གི་ཚུལ་དུ་ཡང་ཡང་བཤད། མོས་མཚར་ཉམས་དང་སྐྱོ་ཉམས་འདྲེས་མས་གལ་ཏེ་ཁྱོད་རང་ཡུལ་དེར་འགྲོ་ཐུབ་ན་ཡུལ་དེ་ནས་ཁྱོད་འཚར་ལོངས་ཡག་པོ་འབྱུང་བར་མ་ཟད། གོམ་པ་ཇི་ལྟར་སྤོ་དགོས་པ་ཡང་ལས་སླ་བོར་སྦྱོང་ཐུབ་ཅེས་བཤད། ཧེ་སྒྲིན་གྱིས་གློ་བུར་དུ། ཨོ་་་་མ་རེད་མ་རེད། རི་མགོ་དེར་འུ་གཉིས་ཀ་སོང་ན་རྩེད་མོ་མང་བོ་རྩེད་ཐུབ་ཅེས་ཧེ་སྒྲིན་མོ་རང་ཡང་ཕྱིར་རི་མགོར་འགྲོ་འདོད་པའི་རྣམ་འགྱུར་བསྟན།
བུ་མོ་ཧེ་སྒྲིན་སྙིང་མ་རྗེ། མོས་ཕ་ཡུལ་གྱི་གངས་རི་དང་ལྗང་མདོག་གི་ལུང་པ་དག་དྲན་བཞིན་འདུག ཁོ་མོ་ཧྥི་རན་ཁུ་ཕོར་ཐི་ན་ཡོད་པའི་ཆོས་ཁང་ཡང་སྟེང་གི་རྩེད་ཁང་གསེར་འོད་འཁྱུག་པ་དེར་ཉིན་རེར་རྩེ་རུ་སོང་ན་ཡང་། ཁང་ཐོག་དེ་ནས་མོས་རྣོ་ཞིང་མྱུར་བའི་མིག་ལམ་དུ་མངོན་ཡོང་བ་ནི་བྲག་རྡོ་སྐྱ་བོས་ཁེབས་པའི་མཁར་གྲོང་དེའི་ཁང་ཁྱིམ་དང་སྲང་ལམ་དག་ཡིན་པ་ལས་ཡངས་ཤིང་མཛེས་སྡུག་ལྡན་པའི་གངས་རི་དང་ལུང་པ། སྐྱེ་དངོས་དེ་དག་མ་ཡིན་ནོ།། དེ་ལྟར་ཉིན་ཞག་མང་བོ་ཕར་འདས་བཞིན་ཡོད་ལ། བུ་མོ་ཧེ་སྒྲིན་གྱིས་ཕ་ཡུལ་དྲན་ནས་མོའི་ཡིད་འོང་གི་བཞིན་རས་ཀྱང་ཉིན་རེ་བཞིན་སྐྱ་བོར་འགྱུར་བཞིན་ཡོད།
ཉིན་ཞིག་བྱམས་བརྩེ་ཅན་གྱི་བུ་མོ་ཁེ་ལི་རའི་སྨན་པ་བགྲེས་པོ་དེས་གཉེར་མ་ཐོད་ལ་བསྡུས་ཏེ་གཟབ་ནན་ངང་། ཁེ་ལི་རའི་ཨ་ཕ་སཱ་སི་མེན་(Sesmann) ལ། བུ་མོ་ཧེ་སྒྲིན་གྱིས་ཕ་ཡུལ་དྲན་ནས་གཟུགས་པོ་ཉིན་རེ་བཞིན་ཇེ་ཞན་ཡིན་པ་དང་། མོའི་བཞིན་རས་ཀྱང་སྐྱ་བོར་འགྱུར་བཞིན་འདུག ཁྱོད་ཀྱིས་ཁོ་མོ་མྱུར་དུ་ཕ་ཡུལ་ལ་ཐེངས་གཅིག་མ་མངགས་ན་ཁོ་མོར་ན་རྒྱུ་རེད་ཅེས་བཤད།
དེའི་ཕྱི་ཉིན་ཏག་ཏག་ལ་བུ་མོ་ཧེ་སྒྲིན་གྱིས་རང་གི་རྒྱབ་ཁུག་ནང་ལ་བསྡུ་གསོགས་བྱས་ཏེ་རང་ཉིད་བརྩེ་ཞིང་དུང་བའི་རི་ཚོགས་ཀྱི་ཡུལ་དུ་ལོག་པའི་གྲ་སྒྲིག་ཆ་ཚང་བྱས། ཁེ་ལི་ར་དང་ཧེ་སྒྲིན་གཉིས་བྲལ་ཁར་ཕན་ཚུན་གཅིག་གིས་གཅིག་ལ་འཐམ་ནས་མིག་ཆུ་ཤམ་ཤམ་དུ་བཞུར་བཞིན་པའི་སྐབས་དེར། གློ་བུར་དུ་བུ་མོ་ཧེ་སྒྲིན་གྱིས་འཛུམ་མདངས་གང་ཡོད་ཕྱུང་སྟེ། ཁེ་ལི་ར་ཁྱེད་ཀྱང་མགྱོག་པོར་ང་ཚོ་ཡོད་སར་ལྟ་སྐོར་དུ་ཡོང་ནས་གནས་དེའི་མཛེས་སྡུག་གི་བཀོད་པ་ཡོངས་རྫོགས་དངོས་སུ་མཐོང་འོང་། ཁྱོད་གནས་དེར་བདེ་ཞིང་སྐྱིད་པ་དང་། རི་བོའི་ཚོགས་ཀྱིས་ཁྱེད་ལ་སྟོབས་ཤུགས་ཀྱང་སྩོལ་ངེས་ཡིན་ཅེས་རེ་སྤོབས་འདྲེས་མས་བཤད།
དེ་ནས་དུས་ཚོད་རིང་བོ་མ་སོང་བར་བུ་མོ་ཧེ་སྒྲིན་གྱིས་དབུགས་ཧལ་ཧལ་དུ་རང་ལ་ཧ་ཅང་རྒྱུས་མངའ་ཡོད་པའི་རྐང་ལམ་དེད་ནས་ཁེར་རྐྱང་གི་སྤོ་བོའི་ཤིང་ཁང་ཡོད་སའི་རི་ཚོགས་སྙེགས་ནས་བུད་སོང་། སྤོ་བོ་ལགས་ཀྱིས་ཚ་མོ་ཧེ་སྒྲིན་རང་ཁྱིམ་དུ་སླེབས་པར་མ་མཐོང་གོང་ལ། བུ་མོ་ཧེ་སྒྲིན་གྱིས་གློ་བུར་དུ་རང་གི་ལག་པ་ཆུང་ཆུང་སྤོ་བོའི་སྐེ་ལ་སྐོར་ནས་སྤོ་བོ། སྤོ་བོ། ངས་ཁྱེད་རང་དྲན་བྱུང་ཞེས་ཁེར་རྐྱང་ཡིན་པའི་བྱམས་བརྩེ་ཅན་གྱི་སྤོ་བོར་འཐམ་ནས་ངུས། བུ་མོ་ཧེ་སྒྲིན་གྱིས་མུ་མཐུད་དུ་བཀའ་དྲིན་ཆེ་བའི་སྤོ་བོ་ལགས། ད་ནས་བཟུང་ང་གཏན་ནས་ཁྱེད་དང་ཁ་འབྲལ་རྒྱུ་མིན་ཞེས་འཛུམ་ཆུང་དང་མིག་ཆུ་བསྡོངས་ནས་སྨྲས།
ཕྱི་ཉིན་སྐྱ་རེངས་ཤར་ཙམ་ནས་བུ་མོ་ཧེ་སྒྲིན་རི་ངོས་སུ་ཡན་པའི་ར་ཁྱུ་ལ་ལྟ་རུ་འགྲོ་བར་བྲེལ་བ་ལངས་ཤིང་། གསོམ་སྡོང་གི་ཁྲོད་ན་གར་དུ་རྩེན་པའི་བསིལ་འཇམ་གྱི་རླུང་སྒྲར་མཉན་པར་བརྩེ་བས་དེད་དེ། ཕེ་ཐིལ་གྱི་རྨོ་མོ་བསྡད་ཡོད་པའི་གངས་འདབས་དེར་རྐང་ལམ་བརྒལ་ནས་སྙེགས་སོང་། རྨོ་མོ་ལགས་ཀྱིས་ཀྱང་དགའ་སྤྲོའི་མིག་ཆུ་འཁྲིགས་བཞིན་བུ་མོ་ཧེ་སྒྲིན་གྱིས་མོ་ལ་དཔེ་ཆ་ཀློག་པའི་རེ་སྒུག་བྱས་ཡོད། བུ་མོ་ཧེ་སྒྲིན་འཛུམ་དམུལ་དམུལ་ངང་རྨོ་མོའི་མདུན་ནས་ཙོག་སྟེ་དཔེ་ཆ་བཀླགས།
བུ་མོ་ཧེ་སྒྲིན་གྱིས་རང་གི་སྤོ་བོ་ལགས་ལ་ཉིན་རྟག་པར་བུ་མོ་ཁེ་ལི་ར་རི་སྒང་ལ་འཁྲིད་ཡོང་དགོས་པའི་རེ་སྐུལ་ཐེངས་མང་བྱས་པ་དང་། གལ་ཏེ་བུ་མོ་ཁེ་ལི་ར་རི་སྒང་འདིར་འཁྲིད་ཡོང་བ་ཡིན་ན། མོའི་གཟུགས་པོ་ཐང་ཞིང་གོམ་པ་སྤོ་ཐུབ་པའི་སྟོབས་ཤུགས་ཀྱང་རྒྱས་ཐུབ་ཅེས་སྤོ་བོ་ལགས་ལ་རེ་སྐུལ་བསྟུད་མར་བྱས།
ཉིན་ཞིག་བུ་མོ་ཧེ་སྒྲིན་གྱི་འདོད་ཐོག་ལ་རྟ་རྒྱུགས་ཏེ། བུ་མོ་ཁེ་ལི་ར་མལ་གོས་དྲོན་མོའི་ཁུད་ལ་གཅུད་ནས་འགྱོག་ཁྲིར་བཞག་སྟེ། མི་རྣམས་ཀྱིས་ཀྱག་ཀྱོག་གི་རི་ལམ་གཤགས་ནས་རི་སྒང་ལ་ཁྲིད་ཡོང་། ཁེ་ལི་རའི་ཨ་ཕའི་ལག་ཏུ་གྱོན་གོས་དྲོན་པོ་འགའ་བཟུང་ནས་བུ་མོ་ཁེ་ལི་ར་དང་འགྱོག་ཁྲི་འཁུར་བའི་མི་ཚོགས་ཀྱི་རྗེས་སུ་བསྙེགས། བུ་མོ་ཧེ་སྒྲིན་གྱིས་དེ་ལྟར་བུ་མོ་ཁེ་ལི་ར་རི་ཚོགས་ཀྱི་མཛེས་སྡུག་ལོངས་སུ་སྤྱོད་པར་གདན་དྲངས་པ་རེད།
དེ་ནས་བུ་མོ་ཁེ་ལི་ར་དགའ་ཐག་ཆོད་དེ་ང་རང་ཁྱེད་དང་མཉམ་དུ་འདི་ནས་འདུག་ན་འདོད་ཅེས་ཆུང་ལ་འཁྱུག་པའི་མིག་ཟུང་སྔོན་པོ་གཉིས་ནས་འོད་འཇམ་པོར་འཕྲོས་ཤིང་། ང་རང་ཁྱེད་དང་། ཁྱེད་ཀྱི་སྤོ་བོ་ལགས་དང་། གྲོགས་པོ་ཕེ་ཐིལ། ད་དུང་ར་མ་རྣམས་དང་མཉམ་དུ་བདུན་ཕྲག་ཧྲིལ་པོ་བཞི་ལ་རི་སྒང་འདི་ནས་འདུག་ན་འདོད། དེ་ནས་ངའི་ཨ་ཕ་ང་བསུ་རུ་འོང་ཆོག་ཅེས་བུ་མོ་ཁེ་ལི་རས་དགའ་བྲོད་ཆེན་པོས་ཡང་ནས་ཡང་དུ་བཤད། སྐབས་དེར་བུ་མོ་ཧེ་སྒྲིན་གྱིས་མོ་ལ་རོགས་ཆེན་པོ་ཞིག་བྱེད་མི་ནུས་ནའང་། རི་སྒང་འདི་ནས་ཁེ་ལི་ར་དགའ་ཞིང་སྐྱིད་པའི་རེ་བ་ཁོ་ན་བཅངས་ནས་ཁོ་མོས་རི་སྒང་གི་མེ་ཏོག་དང་སྔོ་རྩྭའི་ཁྲོད་ནས་ཁེ་ལི་ར་ལ་ཞབས་བྲོ་འཁྲབ་ཅིང་རྩེད་མོ་བརྩེས་ནས་ཡར་རྒྱུགས་མར་རྒྱུགས་བྱས། དྭངས་ཤིང་བསིལ་བའི་མཁའ་དབུགས་མཉམ་དུ་བརྔུབས།
བུ་མོ་ཁེ་ལི་ར་རི་སྒང་ལ་བསུས་པ་ནས་བཟུང་། ཧེ་སྒྲིན་གྱི་སྤོ་བོ་ལགས་ཀྱིས་ཉིན་རྟག་པར་ཧེ་སྒྲིན་རྗེས་སུ་ཁྲིད་ཅིང་ཁེ་ལི་ར་རྒྱབ་ཏུ་ཁུར་ནས་ཕེ་ཐིལ་གྱི་ར་མ་ཡོད་སའི་རི་ལྡེབས་དེར་སོང་བ་དང་། ཁོང་གིས་བུ་མོ་ཁེ་ལི་ར་དྲི་བསུང་འཐུལ་བའི་སྔོ་རྩྭའི་གདན་ཐོག་ལ་བཞག་རྗེས་བུ་མོ་ཧེ་སྒྲིན་གྱིས་མེ་ཏོག་མང་བོ་བཏུས་ནས་མོ་ལ་བྱིན། མཚམས་ལན་རེར་ཧེ་སྒྲིན་ཁེ་ལི་རའི་རྩིབ་ནས་བསྡད་དེ་ར་མ་དེ་དག་ལ་ཁྱད་པར་ག་རེ་ག་རེ་ཡོད་པ་ཞིབ་ཚགས་པོས་འགྲེལ་བཤད་བྱས།
གཟུགས་གཞི་ཞན་པའི་བུ་མོ་ཁེ་ལི་རས་ཉིན་རྟག་པར་རོ་བཅུད་མངར་བའི་ར་མའི་འོ་མ་དཀར་ཡོལ་གང་རེ་གང་རེ་འཐུང་བ་ན། “ཇི་འདྲའི་ཞིམ་པ་ལ་ཨང་ཞེས་དགའ་སྤྲོའི་འཛུམ་དམུལ་ཡང་ཡང་ཕྱུང་། རི་མགོ་འདི་ནས་ངས་ཟ་མ་མང་བོ་ཟ་ན་འདོད། རང་ཁྱིམ་ནས་ང་ལ་ནམ་ཡང་ཟ་མ་མང་བོ་ཟ་བའི་ཡི་ག་ཡོད་མྱོང་མེད། འདི་ནི་ཅི་འདྲའི་གཟུགས་པོའི་བདེ་ཐང་ལ་ཕན་པའི་རི་སྒང་གི་མཁའ་དབུགས་ཤིག་རེད་ཨང་ཞེས་སྨྲས་པ་ན།” སྤོ་བོ་ལགས་ཀྱིས་མོ་ལ་འཛུམ་མདངས་སྟོན་བཞིན་དེ་རེད་དེ་རེད་ཅེས་ལན་བཏབ།
ཟློག་ཐབས་མེད་པའི་དུས་ཚོད་ནི་དེ་ལྟར་བྲེལ་མྱུར་གྱིས་བཞུད་སོང་ལ་བུ་མོ་ཁེ་ལི་རའི་གཟུགས་པོ་ཡང་ཇེ་བཟང་ཇེ་ལེགས་སུ་གྱུར། ཉིན་ཚུགས་ཤིག་ལ་བུ་མོ་ཁེ་ལི་རའི་ཨ་ཕ་སཱ་སི་མེན་རང་གི་བུ་མོ་བསུ་བར་རི་སྒང་དུ་སླེབས་བྱུང་། དེ་སྔོན་ནད་གཅོང་གིས་བཟུང་བའི་སྙིང་གི་བུ་མོ་ཁེ་ལི་རའི་སྐྱ་སོབ་སོབ་ཀྱི་བཞིན་རས་གར་སོང་ཆ་མེད་དུ་གྱུར་ཏེ། དེའི་ཤུལ་དུ་རྒྱ་སེ་མེ་ཏོག་ལྟར་དམར་བའི་བུ་མོའི་མཁུར་ཚོས་གཉིས་འཛུམ་མདངས་ཀྱིས་ཁེངས་བཞིན་བུ་མོ་ཧེ་སྒྲིན་གྱི་ལག་མགོར་འཇུས་ནས་འོང་བཞིན་པ་དེ་རང་གི་བུ་མོ་ཁེ་ལི་ར་ཡིན་པ་མཐོང་འཕྲལ། ཨ་ཕ་སཱ་སི་མེན་དགའ་དྲགས་ནས་ངོ་གདོང་འཛུམ་གྱིས་ཁེངས་ཤིང་མིག་ཆུས་མགྲིན་པ་བརྣངས་ཞོར་རྒྱུགས་ཡོང་ནས་བུ་མོའི་སྐེ་ལ་འཐམ། བུ་མོ་རང་གི་བྲང་ལ་སྦྱོར་བཞིན་འདི་བདེན་པ་ཡིན་ནམ། འདི་བདེན་པ་ཡིན་ནམ་ཞེས་རང་དབང་མེད་པར་ངུས་སོང་། ཨ་ཕ་སཱ་སི་མེན་དང་བུ་མོ་ཁེ་ལི་ར་གཉིས་ཕན་ཚུན་ལ་འཐམ་ནས་རེ་ཞིག་དེ་གར་ལུས། བུ་མོ་ཧེ་སྒྲིན་ལགས་ཀྱིས་ཁོ་གཉིས་ཀྱི་མཐའ་འཁོར་ནས་དགའ་སྐྱིད་ཀྱི་ཞབས་བྲོ་འཁྲབ་ཅིང་སྤྲོ་སྐྱིད་ཀྱི་གླུ་དབྱངས་གྱེར་བཞིན་ན་རེ། རང་བྱུང་ཁམས་ཀྱི་རི་ཚོགས་ཀྱིས་ཁྱེད་ལ་བདེ་སྐྱིད་བསྐྲུན་ཐུབ་པར་ངས་སྔར་ནས་ཤེས་ཡོད་ཅེས་འཛུམ་མདངས་ཤིག་ཤིག་གིས་སྨྲས་སོ། །
(Swiss Alps) སིད་སི་རྒྱལ་ཁབ་ཀྱི་སྐད་གྲགས་ཆེ་བའི་རི་ཚོགས་ངོ་མཚར་ཅན་ཞིག་ཡིན།
སྙན་མོ་བྱུང་། བྱིས་པ་ཚོར་སྒྲུང་འདི་འདྲ་བོད་སྐད་ཀྱིས་འཆད་ཐུབ་ན་ལེགས།
དང་པོ་སྐུ་ལས་བསྐྱོན་པར་ཐུགས་རྗེ་ཆེ་ཞུ། སྒྲུང་སྙན་པོ་འདུག མིང་དེ་ཚོ་ཀློག་དཀའ་མོ་འདུག ང་ཚོ་གྱོང་ཙམ་དང་བསམ་བློ་གུ་ཡངས་ཙམ་བྱས། ད་དུང་ཧམ་པ་ཆེ་ཙམ་བྱས་ནས། མི་མིང་དང་ས་མིང་དེ་ཚོ་ང་ཚོའི་ཁ་ནས་འདོན་བདེ་བ། ང་ཚོའི་རྣ་བར་གོ་བདེ་བ། ང་ཚོའི་ཡིད་ལ་འཇགས་བདེ་བ་ཞིག་མ་བྱས་ནས། སྒྱུར་རྩོམ་ཚང་མ་རིན་ཐང་ཆུང་ངུར་འགྲོ་ཉེན་འདུག སྒྲུང་དེ་ཚོ་གཞན་ལ་ཀློག་དགོས་སྟབས། མིང་དེ་ཚོ་ཕྲུ་གུ་ཚོའི་རྣ་བར་གོ་བདེ་བ་དགོས། རྒྱ་ནག་ལ་ལྟོས་དང་། ཉི་ཧོང་ལ་ལྟོས་དང་། ཨ་རིར་ལྟོས་དང་། དབྱིན་ཇིར་ལྟོས་དང་། ཕྱི་རྒྱལ་གྱི་མིང་དང་སྒྲ་དེ་ཚོ་བརྗོད་བདེ་ཡོང་བར་འབད་པ་ཆེན་པོ་བྱེད། ང་ཚོའི་གླེན་རྟགས་དང་ལྐུགས་རྟགས་ཀྱིས་སྒྲ་ཚང་མ་རང་གི་འཐོན་མི་ཤེས་གཞན་གྱིས་གོ་ཐུབ་པ་ཤ་སྟག་བཟོས་ནས་ཅི་བྱེད།
Heidi ཧེ་སྒྲིན་ཟེར་བ་འདི་ལ་ན་འདི་ཧེ་གཏེ་ལྟ་བུ་བྲིས་ན་འགྲིགས་འདུག སུད་སི་ཞེས་ང་ཚོ་ཚང་མར་འདོན་བཞིན་དུ་སིད་སི་ལྟ་བུ་མེད་ན་ལེགས། Peterལ་ཕི་ཐིལ་ལྟ་བུ་གང་ནས་བྱུང་བ་རེད་དམ། དཔེ་སྒྲ། ལྟ་བུ་བྲིས་ན་སྐྱོན་ཅི་ཡོད།
རབ་བྱུང་ན། རྩོམ་པ་པོས། མིང་དེ་ཚོ་ཀློག་བདེ་བ་དང་། འཇགས་བདེ་བར་རྩོམ་སྒྲིག་བྱེད་ཐུབ་ན་དཔའ་བོ་རེད། དེ་མིན་ཕན་ནུས་ཅི་ཡོད་ཤོད་དཀའ། ཕྲུ་གུའི་སྒྲུང་རེད། ལྟ་བ་མཁྲེགས་པོ་མ་བྱེད་པར་ག་ཚོད་ཀྱིས་ཕྲུ་གུར་ཕན་ཐུབ་པའི་ཀུན་སློང་ཡོད་ན་བཟང་།
བློ་ཁོག་ཆེ་ཙམ་བྱས་ནས་མིང་དེ་ཚོ་ང་ཚོས་ཀློག་བདེ་བ་བྱས་ན་སྐྱོན་གང་ཡོད། ང་ཡིན་ན།
Peter དཔེ་ཀྲར།
Heidi ཧེད་རྡི།
Clara ཀ་ལར་ར།
Sesmann གསེར་སེརམིག ལྟ་བུ་འགྱུར་བར་བྱེད།་
Peter་་་་ཕེ་ཐར།
Heidi ་་་་ཧ་ཡེ་སྡེ།
Clara ་་་་་ཁི་ལ་ར།
Sesmann་་་ སེ་སི་མན།
འཇར་ཡིག་གི་སྒྲ་གདངས་ངོ་མ་འབྲི་ན་འདི་ལྟར་རེད།
གང་ལྟར་འདི་རྒྱ་ཡིག་ནས་བོད་ཡིག་ལ་བསྒྱུར་བ་ཡིན་ས་རེད་སྒྲ་གདངས་ཚང་མ་རྒྱ་ནག་གི་གདངས་འདྲ་བསྒྱུར་འདུག
བྱིས་སྒྲུང་ཤོད་དུས། ཁ་སྐད་བཀོལ་ན་ལེགས།
བུ་མོ་ཧེ་སྒྲིན་སྙིང་མ་རྗེ།
འདི།
བུ་མོ་ཧེ་སྒྲིན་སྙིང་མ་གཅེས།
མིན་འགྲོ་སྙམ།
སྤོ་ཕོ། རྨོ་མོ།
ཨ་ཕ། ཨ་མ།
ཨ་ཞང་། ཨ་སྲུ།
ཨ་ཁུ། ཨ་ནེ།
བུ། བུ་མོ།
ཚ་བོ། ཚ་མོ།
ཞེས་སོགས་སུ་བྲིས་ན་སྐྱོན་གང་ཡོད་མ། ལགས།