ཆབ་མདོ་ངག་ཕུན་གྱིས།
༄༅།། དེ་རིང་ངས་བུ་སྤུན་གསུམ་གྱི་སྒྲུང་ཞིག་བཤད་པར་འདོད། དེ་ཡང་སྔོན་མ་ལུང་པ་མདོ་ལུང་ཟེར་བའི་བཀོད་ལེགས་ཡིད་དུ་འོང་བ་ལུང་པ་ཞིག་ཡོད། དེར་གནས་པའི་སྤུན་མཆེད་གསུམ་ནི་ཆོས་དད་ཆེ་བ་ཙམ་ལས་སྲིད་ཕྱོགས་ལ་དོ་སྣང་དེ་ཙམ་ཞིག་བྱེད་ཀྱི་མེད། ཉིན་གཅིག་མདོ་ལུང་སྡེ་པའི་ས་ཆ་ལ་ནག་ཕྱོགས་སྡེ་པས་ངག་འཇམ་ཐོག་ནས་ང་ཚོ་གནས་འདིར་ཡོང་དགོས་དོན་ནི་རྣམ་པ་ཚོར་རོགས་རམ་བྱེད་དུ་ཡོང་བ་ཞིག་ལས་གཞན་པའི་ང་ཚོར་དམིགས་གཉིས་པ་གང་ཡང་མེད་ཟེར། དེ་དག་ལ་མདོ་ལུང་སྡེ་པའི་སྤུན་མཆེད་གསུམ་གྱི་ཡིད་ཆེས་བྱས་ཏེ་ནག་ཚོགས་སྡེ་པའི་མི་རྣམས་བསྡད་བཅུག་ཅིང་། མདོ་ལུང་སྡེ་པའི་སྤུན་མཆེད་གསུམ་ནི་ཆོས་ཕྱོགས་ལ་དོ་སྣང་ལས་སྲིད་ཕྱོགས་སུ་དེ་ཙམ་དོ་སྣང་བྱེད་ཀྱི་མེད། མཐར་ནག་ཕྱོགས་སྡེ་པ་འདོད་བརྔམས་དང་། ཧམ་བཤད་ཆེ་རུ་ཕྱིན་ནས་མདོ་ལུང་སྡེ་པའི་རི་ལུང་ཐང་གསུམ་ཡོངས་སུ་རྫོགས་པ་དྲག་པོའི་བཙན་གྱིས་འཕྲོག
དེ་ནས་མདོ་ལུང་སྡེ་པའི་སྤུན་མཆེད་གསུམ་གྱི་བྱ་ཐབས་གང་ཡང་མ་རྙེད་ནས་ལ་ལུང་མང་པོ་བརྒལ་ནས་ལུང་པ་གཞན་དུ་བཙན་བྱོལ་དུ་ཡོང་དགོས་བྱུང་། མདོ་ལུང་སྡེ་པའི་སྤུན་མཆེད་གསུམ་མི་ཡུལ་ངོ་ཤེས་པ་སུ་ཞིག་མེད་ཅིང་། དང་ཐོག་ཡུལ་གོམས་གཤིས་ལུགས་ལ་མ་འདྲིས་ནས་དཀའ་ངལ་རིམ་པ་འཕྲད་རུང་བློ་སྟོབས་གཅིག་ཏུ་སྤུངས་ནས་དཀའ་ངལ་ཁག་ལ་གདོང་ལེན་གནང་བས་མཐར་དཀའ་ངལ་ཁག་རིམ་གྱིས་སེལ་ཐུབ་པ་བྱུང་།
མདོ་ལུང་སྡེ་པའི་སྤུན་མཆེད་གསུམ་མི་ཡུལ་གནས་དགོས་བྱུང་རུང་། སྐྱིད་སྡུག་མཉམ་མྱོང་གིས་ལས་དོན་གནང་གི་ཡོད། སྐབས་རེ་སྤུན་མཆེད་གསུམ་གྱི་བར་དུ་ལྟ་བ་དང་ལངས་ཕྱོགས་མི་མཐུན་པའི་སྐབས་རེ་ཕན་ཚུན་རྩོད་གླེང་ཡོང་གི་ཡོད་མོད། དོན་དག་ཆེ་སར་སླེབས་དུས་སྤུན་མཆེད་གསུམ་པོ་རྡོག་རྩ་ཆིག་སྒྲིལ་གྱིས་ནུས་ཤུགས་གཅིག་ཏུ་སྤུངས་ནས་ལས་དོན་གནང་གི་ཡོད་པས་འགྲུབ་འབྲས་རླབས་ཆེན་ཐོན་གྱི་ཡོད།
རིམ་པས་སྤུན་མཆེད་རྒན་པ་རྣམས་ཕྱི་མའི་ལམ་དུ་གཤེགས་པ་དང་། འཚར་ལོངས་ཡོང་བཞིན་པའི་སྤུན་མཆེད་གཞོན་ཚོ་ནི་དེང་རབས་ཀྱི་ལྟ་བ་གསར་པ་དང་། ལངས་ཕྱོགས་གསར་པ་ཡིན་མདོག་གིས་ནང་ཁུལ་གནས་ཚུལ་ཆུང་ཚག་ལ་འུར་སྒྲོག་ལ་དགའ་ཞིང་། སྐབས་རེ་གནས་ཚུལ་དེས་རྐྱེན་གྱིས་སྤུན་མཆེད་གསུམ་གྱི་བར་དུ་མི་མཐུན་གནས་ཚུལ་ཡོང་སྟེ་ཆིལ་སྒྲིལ་ལ་གནོད་སྐྱོན་འཐེབ་ཀྱི་ཡོད། ལྷག་དོན་གནས་ཡུལ་རྒྱལ་ཁབ་ཀྱི་སྲིད་དོན་པས་ལས་དོན་གནང་ཕྱོགས་ལན་ཟློས་གནང་ཁུལ་གྱི་སྤུན་མཆེད་ཕན་ཚུན་བར་བཤད་རེས་ཐུག་སྟེ་ཆབ་སྲིད་ནག་པོ་ཁྲབ་པ་བརྟེན་སྤུན་མཆེད་གསུམ་གྱི་མཐུན་སྒྲིལ་ལ་གནོན་སྐྱོན་སྐབས་གཏོང་གི་ཡོད།
འོན་ཀྱང་སྤུན་མཆེད་བགྲེས་སོང་འགའ་རེས་ང་ཚོ་གཞན་གྱི་ལུང་པར་གནས་ཚང་གཡར་ནས་བསྡད་ཡོད་ཅིང་། ང་ཚོ་བཙན་བྱོལ་ཡིན་བསམ་པ་ལས་རྒྱལ་ཁབ་ཡོད་པ་ནང་བཞིན་སྣང་བ་ཤར་ནས་ནང་ཁུལ་ཆབ་སྲིད་ཁྲབ་པའི་དུས་ཚོད་གཏན་ནས་མིན་ཞིང་། ང་ཚོའི་ནང་ཁུལ་ལྟ་བ་དང་། ལངས་མི་མཐུན་པ་བྱུང་ཚེ་ང་དང་ཁྱོད་ཅེས་རྩོད་པ་རྣོ་ངར་ཆེན་པོ་གནང་དགོས་དོན་དེ་ལས་ཀྱང་མེད། ང་ཚོའི་འཐབ་རྩོད་བྱེད་ས་ནི་ང་ཚོའི་གཅེས་པར་འོས་པའི་ཕ་ཡུལ་འཕྲོག་མཁན་དེར་རྩོད་ལེན་གནང་དགོས་པ་ལས་གོང་ཞུས་ལྟར་ང་ཚོ་ནང་ཁུལ་ཕན་ཚུན་རྩོད་གླེང་གནང་ན་ཕན་ཐོགས་གང་ཡང་མེད། ང་ཚོ་མཐུན་ལམ་མ་བྱུང་ན་སྤུན་མཆེད་གསུམ་ལ་གྱོང་རག་པ་ལས་གཞན་གང་ཡང་མེད། ང་ཚོ་སྤུན་མཆེད་གསུམ་ཁའི་སྤྱི་དོན་བསམ་བློ་གཏང་ནས་ལས་དོན་གནང་དགོས་པ་ཞིག་ལས་རང་ཉིད་ཀྱི་ཁེ་དབང་དོན་དུ་དུས་ནམ་ཡང་བསམ་བློ་གཏང་མི་ཉན་པ་དེ་རེད། རྫ་མ་ཆགས་ན་སྤྱི་གྱོང་དང་། ཕོར་པ་ཆགས་ན་སྒེར་གྱོང་ཞེས་པ་ལྟར་ང་ཚོ་སྤུན་མཆེད་གསུམ་ཁའི་སྤྱི་དོན་ལ་གྱོང་རག་གི་རེེད་ཅེས་བསླབ་བྱ་གནང་གི་ཡོད།
ཡིན་ནའང་ཁོར་ཡུག་གི་འཕོ་འགྱུར་དང་བསྟུན་ནས་མིའི་བསམ་བློ་གཏོང་ཕྱོགས་ལ་འགྱུར་བ་ཆེན་པོ་འགྲོ་བཞིན་ཡོད། འགྱུར་བ་དེ་ནི་ཡག་རྟགས་ཤིག་ཡིན་ན་སྡུག་རྟགས་ཤིག་ཡིན་བཤད་ཚོད་ཐིག་ཁག་པོ་རེད། གང་བསྟར་སྤུན་མཆེད་གསུམ་ནང་བཀྲ་མ་ཤིས་ན། ཕྱི་དོན་མི་འགྲུབ་ཅེས་པ་ལྟར་ང་ཚོ་ཚང་མ་ནང་མ་འགྲིགས་པ་ཡིན་ན་ལས་དོན་ནམ་ཡང་ལམ་ལྷོང་མི་ཡོང་བ་ནི་དངོས་ཡོད་གནས་ཚུལ་ཞིག་ཀྱང་ཡིན།
མཐར་བསམ་ཡོད་སྤུན་མཆེད་མང་པོ་ཞིག་གིས་བསམ་ཚུལ་ལ་བརྟེན་སྤུན་མཆེད་གསུམ་དབུ་མའི་ལམ་གྱི་ཐོག་ནས་ཞི་འགྲིགས་བྱ་རྒྱུ་ཐག་གཅོད་བྱུང་དོན་ལྟར་སྤུན་མཆེད་གསུམ་ལྷན་འཛོམས་ཀྱིས་བཀའ་བསྡུ་རིམ་པ་བྱས་ཤིང་། ཁ་ནང་གི་རྨ་ཁ་ནང་དུ་སོས་ཐབས་བྱས་པས་མཐར་ནང་ཁུལ་གྱི་འགལ་བ་དེ་དག་སེལ་ཐུབ་པ་བྱུང་། དུས་དེ་ནས་བཟུང་སྟེ་སྤུན་མཆེད་གསུམ་གྱིས་ནུས་ཤུགས་གཅིག་ཏུ་སྤུངས་ནས་ལས་དོན་གནང་བས་འགྲུབ་འབྲས་རླབས་ཆེན་ཐོན་པ་དང་། དེ་ནས་བཟུང་སྟེ་ནང་ཁུལ་ལངས་ཕྱོགས་མི་མཐུན་པ་བྱུང་ན་ཕན་ཚུན་བསམ་ཤེས་དང་། བསམ་བློ་གུ་ཡངས་བྱ་རྒྱུ་གལ་ཆེན་ཡིན་པ་ཤེས་རྟོགས་བྱུང་བ་རེད་དོ། ། ཆབ་མདོ་ངག་ཕུན་གྱིས། ཕྱི་ལོ་ ༢༠༢༡ ཟླ་ ༦ ཚེས་ ༡༧ ཉིན་མོར་ཕུལ།