དགེ་མང་ཟླ་བ།
འགོག་ཐབས་ཁག་པའི་དུས་ཀྱི་རྣམ་འགྱུར་འདིས་འཇིག་རྟེན་ཧྲིལ་བོ་ཕན་ཚུན་བར་འཁྲུག་ཆ་དོད་པོ་དང་ཤེས་རྟོགས་གསར་བའི་ཤུགས་སྟོབས་ཚད་རིམ་མཐོན་པོར་སླེབས་བཅུག་པས་ཉིན་རེའི་སྐར་ཆའི་མཆོངས་ལྡིང་གི་འགུལ་སྐྱོད་ལའང་། མིའི་རིགས་ཀྱི་འཚོ་གནས་དང་དེའི་ཉེ་བའི་ཡུལ་ལུགས་གཤིས་གོམས་རྣམས་མི་འབོར་མང་ཉུང་དང་། ཁྲོམ་ར་ཆེ་ཆུང་། ཁེ་བཟང་ཡག་སྡུག ཟླ་ཕོག་མཐོ་དམན་སོགས་ལྟོས་དབང་གིས་གཅུན་པ་ན། ལྟར་སྣང་གི་མང་གཙོ་དང་རིག་གཞུང་སྲུང་སྐྱོབ། འཛམ་གླིང་ཞི་བདེ། སྨྲ་བརྗོད་རང་དབང་། འགྲོ་བ་ཐུན་མོང་གི་རང་དབང་ཐོབ་ཐང་ཞེས་པ་ནི་ཚིག་ཇ་དང་ཨ་རག་འཐུང་སྐབས་ལྟ་བུའི་སྣང་བ་སྐྱིད་བྱེད་ཀྱི་ཆིག་ལབ་ཙམ་ལས། དོན་དུ་སྐད་ཡིག་དང་ཆོས་ལུགས་ལྟ་གྲུབ། དེའི་རྗེས་འབྲང་དང་བཅས་པ་ཤུགས་དྲག་གི་འགལ་འདུའི་བར་འདི་ནས་ཁྱོད་ཤི་ང་གསོན་སྟེ། དམག་ཆེན་གཉིས་པ་ལྟ་བུའི་རིག་གནས་ཀྱི་བཙན་རྒོལ་བྱེད་བཞིན་ཡོད་པ་དང་སྒོར་ཤུགས་ཀྱིས་གཉའ་གནོན་སྤྲོད་ཀྱིན་ཡོད་པས། དེའི་ཁྲོད་ཀྱི་བོད་ཀྱི་སྐད་ཡིག་ནི་ཉེན་ལྡན་སྐད་ཡིག་གི་གྲས་སུ་ཚུད་ཚར་བ་སྟེ། གནམ་བསྐོས་མཉམ་འབྲེལ་རྒྱལ་ཚོགས་ཀྱིས་བོད་ཀྱི་སྐད་ཡིག་གི་གདོང་ལ་འཛུབ་མོ་ཀེར་ནས་“ཁྱོད་ནི་འཆི་ལ་ཉེའོ་ཞེས་”ཉེན་བརྡ་དང་བཅས། ནད་པ་ཚབ་ཆེན་དང་སྨན་པ་མཁས་པ་འཕྲད་པ་ལྟ་བུའི་ཁོ་ཐག་བཅད་ཚར་བ་མ་ཟད།
བོད་ཕྱི་ནང་གཉིས་ཀས་ཨ་མ་ཞེས་འབོད་པའི་མ་ཡུམ་རྗེ་བཙུན་པདྨ་གང་གིས་ཀྱང་། “བོད་ཡིག་གིས་ལྟོ་མི་སྤྲད། “ ཅེས་གསུངས་བས་བོད་ཀྱི་ཕ་སྐད་མ་ཡིག་ལ་རེ་ལྟོས་བྱེད་མཁན་གྱི་བརྒྱ་ཆ་ལྡབམང་པོར་མར་བཅག་པ་དང་དུས་མཚུངས། དེའི་ཚེ་སྲོག་གི་ཉེན་ཁ་ལ་ཐབས་ཇུས་འཐེན་མཁན་ལྷག་བསམ་ཅན་གྱི་ཉུར་སྐྱོབ་རུ་ཁག་གི་བརྒྱ་ཆ་ཡར་འཕར་བཞིན་པའི་ཛ་དྲག་པའི་གནས་བབས་ཞིག་ཀྱང་རེད།
དེ་ཡང་སྐད་བརྡའི་དཔྱད་ཞིབ་ཚན་རིག་སྨྲ་བ་རྣམས་ཀྱིས་གསུངས་པ་ལྟར་ན། འཛམ་གླིང་ནང་སོ་སྐྱེས་སྐད་དང་བསྟན་བཅོས་ཀྱི་སྐད་བརྡའི་བར་ཆེས་ཐག་རིང་ཤོས་ཀྱི་སྐད་ཡིག་གཉིས་ནི་རང་རེ་བོད་ཀྱི་སོ་སྐྱེས་སྐད་དང་བསྟན་བཅོས། དེ་བཞིན་ཨ་རབ་ཀྱི་ཡུལ་སྐད་དང་ཁོ་པ་ཚོའི་དཀོན་ཅོག་གི་གསུངས་རབ་བར་ཀྱི་རྒྱང་ཐག་དང་ཧེ་བག་དེ་རེད་ཟེར།
སྤྱིའི་ཆ་ནས་བོད་ཀྱི་ཡིག་རྨོངས་སེལ་ཐུབ་མིན་ནི་དམའ་རིམ་རྩོམ་རིག་ཀྱི་ཁྱབ་ཁོངས་རྒྱ་སྐྱེད་དང་འཆར་ཅན་རིམ་ལྡན་གྱི་སློབ་དེབ་གཏན་འབེབས་ཐུབ་མིན་གྱིས་ཚད་འཛིན་བྱས་ཡོད། སོ་སྐྱེས་སྐད་དཀྱུས་མ་དང་བསྟན་བཅོས་ཀྱི་སྐད་བརྡ་རིག་པའི་ཕུང་བོའི་བར་ལ་ཧེ་བག་ཆེན་པོ་ཡོད་རྐྱེན་བོད་ལ་དེབ་ཀློག་པ་པོའི་གྲངས་འབོར་གྱི་བརྒྱ་ཆའི་རིམ་པ་དམའ་བ་དང་དེ་ལ་ལྟོས་པའི་རང་བཞིན་གྱི་གོམས་ཤུགས་ཧ་ཅང་གཞན།
མཁས་དབང་དང་རྩོམ་པ་པོ་སྐད་བརྡ་རིག་པའི་ཞིབ་འཇུག་ཆེད་ལས་པ་སུ་གང་གིས་བོད་ཀྱི་མ་སྐད་ཉེན་ལྡན་སྐད་ཡིག་གི་གནས་སྟངས་འདི་ལས་དགྲོལ་དགོས་ན་དང་པོ་སོ་སྐྱེ་དང་འཚམ་པའི་དམའ་རིམ་རྩོམ་རིག་གི་གསལ་ཆའི་ལམ་རིམ་གུད་ཡངས་དུ་འགྲོ་བར་འབད་དགོས་པ་ལས། སོ་སྐྱེ་ཡིག་རྨོངས་བའི་ངོར་ལ་སྒྱུ་རྩལ་སོགས་མཐོ་རིམ་རྩོམ་རིག་དང་བསྟན་བཅོས་ཀྱི་སྐད་བརྡ་རིག་པའི་ཕུང་པོའི་ཚིག་ཤུགས་གང་ཆེ་རྣམས་སྤྱད་ནས། བཀའ་སློབ་དང་། སློབ་གསོ། བརྩམས་ཆོས། ཁོག་སྟོང་ཁ་རྒྱག་གི་ཤོག་ཉོབ་ཅི་ལྟར་སྤེལ་ཀྱང་གཞི་རིམ་ཡིག་རྨོངས་ཀྱི་སྟོང་ཆ་ལ་ཕན་པ་ཆེར་མེད་པར་མ་ཟད་རྒྱ་ཆེའི་བོད་ཡིག་ཀློག་པ་པོའི་སེམས་ཤུགས་དང་སྤྲོ་སྣང་འཕེལ་བའི་ཟློག་ཟླར་གྱུར་བཞིན་གདའ།
བོད་ཀྱི་སྐད་ཡིག་སློབ་གསོ་བ་དང་སུ་དག་སྤྱི་ཚོགས་སྣེ་ཁྲིད་ཀྱི་གོ་གནས་འགན་འཛིན་པ་རྣམས་ཀྱི་བརྩམས་ཆོས་དང་དེའི་སྟོང་ཆ་ཆེས་ཤོས་ནི་ཡིག་རྨོངས་པ་དག་ལ་ག་རེ་དགོས་མིན་དང་གང་དག་འཚམ་མིན་གལ་ཆེན་དུ་མི་རྩི་བར་བརྒྱ་ཆ་མང་ཆེ་བས་བསྟན་བཅོས་སྐད་ཐོག་ནས་ཡིག་རྨོངས་བའི་ཁྲོད་དུ་འུར་རྒྱག་པ་དང་་སྦོམ་བཤད་བྱེད་རྒྱུ་དེ་ཡིན།
དེ་བས་བོད་ཡིག་ནི་ཤེས་མཁན་གྱིས་ཚད་མཐོན་པོར་ཤེས་དགོས་པ། མི་ཤེས་མཁན་གྱིས་ཚིག་གྲུབ་གཅིག་གི་ནང་དོན་ཙམ་ལ་རྦད་དེ་མགོ་ཐོམ་འགྲོ་བ་ནི་བསྟན་བཅོས་ཀྱི་སྐད་བརྡ་ཤུགས་ཆེ་བའི་ལམ་ནས་བྲིས་པ་ཡིན་སྟབས་ཡིག་རྨོངས་པ་ལ་རང་བཞིན་གྱིས་དེབ་ཀློག་སྤྲོ་མེད་པའི་དཀའ་ཁག་ཅིག་འཕྲད་གྱིན་འདུག
དུས་རབས་ཉེ་ཤུའི་ལོ་རབས་བཅུ་བཞིའི་ནང་<ཨ་མེ་རི་ཀས་རྩོམ་རིག་གི་གསལ་ཆ་འཇལ་བ>འི་གོ་རིམ་ཁྲོད་ཆེད་ལས་པས་ཨ་རིའི་དཔེ་ཚགས་ཡོངས་རྫོགས་”འཛིན་རིམ་བཅུ་ཅིག་ནས་བརྒྱད་པའི་བར་དུ་མར་ཕབས”དགོས་པའི་གནད་དོན་དེ་ཡང་སྐབས་དེའི་ཨ་རིའི་དཔེ་ཚོགས་རྣམས་ཀློག་པ་པོ་”སྤྱི་ཡོངས་ཀྱི་ཤེས་ཚད་ལས་འཛིན་རིམ་ལྔ་ཙམ་གྱིས་མཐོ་དྲག་ཡོད་པ་ར་སྤྲོད་བྱུང་”བས་ཡིན།
འོ་ན། ཐབས་ལམ་ཅི་ལྟ་བུ་ལ་རྟེན་ནས་”དམའ་རིམ་རྩོམ་རིག་གི་གསལ་ཆ”འཇལ་དགོས་ཤེ་ན། ཐ་སྙད་རྒྱུག་ཆེ་ཆུང་གི་དབང་ཚན་དུ་བྱས་པའི་དམའ་རིམ་རྩོམ་རིག་སྤེལ་དགོས་ལ་དེ་ནི་ད་ལྟའི་བོད་ཀྱི་ཡིག་རྨོངས་བ་ལ་མེད་དུ་མི་རུང་བ་ཐབས་ལམ་ཁོ་ན་ཡིན། དེ་སྤེལ་བ་ལ་དང་པོ། ཉིན་རེའི་འཚོ་བ་དང་འབྲེལ་བ་ཡོད་པ་སྟེ་རྒྱུན་ལྡན་གྱི་མི་རྣམས་ཀྱིས་གོ་བ་ལོན་ཐུབ་པའི་སོ་སྐྱེས་ཀྱི་སྐད་དང་བསྟན་བཅོས་ཀྱི་སྐད་གཉིས་ཀས་གྲུབ་པ་དང་དེའི་ཁར་ཚིག་མཛོད་གསར་བ་རྣམས་ལས་དྲངས་བའི་དེང་དུས་ཀྱི་བྱ་དངོས་གསར་བའི་མིང་རྣམས་འཁོད་པའི་སྣ་འཛོམས་རང་བཞིན་ཅན་གྱི་དམའ་རིམ་རྩོམ་རིག་གི་ཁྱབས་ཁོངས་རྒྱ་ཆེ་རུ་གཏོང་རྒྱུ་དེ་ཡིན།
དེ་ཡང་། ཐ་སྙད་རྒྱུག་ཆེ་ཆུང་གི་གསལ་ཆ་རྟགས་པའི་མཉེན་ཆས་དང་རྩིས་འཁྲུལ་ལ་ཁུངས་གཏུག་པ་ལས་རྩོམ་པ་པོ་སྒེར་གྱི་ཤེས་ཚད་དབང་ཚན་དུ་བྱས་ནས་བྲིས་པ་ཡིན་ན་གསལ་ཆ་རྟགས་པའི་མཉེན་ཆས་དང་དཔྱད་ཞིབ་ཀྱིས་བསྡུས་པའི་རྒྱུག་ཆེ་བའི་མིང་ཚིག་དང་ཐ་སྙད་ཀྱི་ར་བ་ལས་བརྒལ་སྲིད་པས་རྩིས་འཁྲུལ་གྱིས་ཐག་གཅོད་ལམ་ནས་དམའ་རིམ་རྩོམ་རིག་ཡིན་མིན་རྟགས་ཐུབ་པ་ལས་རྩོམ་པ་པོ་གང་ཟག་གིས་རྒྱུག་ཆེ་བ་གང་ཡིན་དང་མི་ཆེ་བའི་ཐ་སྙད་གང་མིན་དཔྱོད་མི་དགོས།
དེང་སང་བོད་ཀྱི་ཡིག་རྨོངས་སེལ་ཆེད་དུ་སྤེལ་གྱིན་པའི་རྩོམ་རིག་དང་སློབ་གསོ་མཐའ་དག་ནི་དམངས་གཞིའི་ཡི་གེ་འབྲི་ཀློག་གི་དཀའ་ཁག་གི་གནས་སྟངས་འོག་དུ་ཡོད་པའི་་ཀློག་པ་པོའི་ཤེས་ཚད་དང་ཁྱོན་ནས་སྟུན་མེད་པར་མཁས་དབང་སོགས་མཐོ་རིམ་ཀློག་པ་པོའི་ཤེས་ཚད་ངོམ་སའི་ཁྲོམ་ར་ཞིག་ལས་མ་འདས་པས་ན། ཆེ་གེ་མོ་སྒེར་གྱི་གནས་ཚད་དང་འཚམ་པའི་མཐོ་རིམ་ཀློག་དེབ་ཀྱིས་གཞི་རྩའི་ཡིག་རྨོངས་བའི་རྩོམ་རིག་གི་གསལ་ཆའི་གནད་དོན་ད་དུང་ཐག་གཅོད་མི་འཐུབ། ཡིག་རྨོངས་བའི་མོས་བློ་དང་རན་པའི་དམའ་རིམ་རྩོམ་རིག་གི་གསལ་ཆ་འཇལ་བྱེད་ནི། རྩོམ་པ་པོ་མི་སྒེར་གྱི་བསམ་བློའི་གོ་གནས་དང་ཚོར་བའི་དབང་དུ་གཏང་བའི་བསྟན་བཅོས་སྐད་ཀྱི་མཐོ་རིམ་བརྩམས་ཆོས་མང་ཉུང་མིན་པར་མང་ཚོགས་ཐུན་མོང་གིས་གོ་ཐུབ་པ་དང་རྒྱུག་ཆེ་བའི་ཆེས་སྤྱིར་གཏང་གི་ཐ་སྙད་ལམ་ནས་བྲིས་པའི་དམའ་རིམ་རྩོམ་རིག་གི་གསལ་ཆ་རྒྱ་ཆེ་རུ་གཏོང་ཐུབ་མིན་ལ་རག་ལས་པ་དེ་ཡིན།
ལོ་ཙ་བ་ཐོན་མི་སམ་བྷོ་ཊས་སྲོང་ཙན་སྒམ་པོར་ཕུལ་བའི་ཡིག་ཕུད་ཤིས་ཚིག་སྟེ། “ཞལ་རིས་གསལ་ལ་རང་མདངས་གང་བ་བཟང་།” ཞེས་པའི་གྲགས་ཅན་བརྩམས་ཆོས་དེར་མཚོན་ན་གང་ཉིད་ཀྱིས་ཆེས་སྤྱིར་བཏང་གི་མི་རྣམས་ཀྱིས་གོ་བའི་དམའ་རིམ་རྩོམ་རིག་གི་ཁྱབ་ཁོངས་ནས་བྲིས་གནང་མཛད་པ་འདིའི་དགོངས་དོན་གཙོ་བོ་ཡང་སོ་སྐྱེས་སྐད་བརྡ་རིག་པ་སྟེ་དམའ་རིམ་རྩོམ་རིག་གི་གསལ་ཆ་ནི་ཀློག་པ་པོ་སྤྱི་ཡོངས་ལ་གལ་འགངས་ཆེ་བ་ཡིན་པ་ཤུགས་ཆེན་བསྟན་ཡོད། སྐབས་དེ་དུས་བོད་དུ་རྩོམ་རིག་དར་མེད་ཀྱང་ལོ་ཙ་བ་ཐོན་མི་གང་ཉིད་ཀྱིས་རྒྱ་གར་གྱི་མཁས་པའི་དབང་པོ་མང་པོར་བསྟེན་པས་ཚད་མཐོའི་རྩོམ་རིག་འབྲི་མ་ཐུབ་པ་དང་ཤུགས་རྐྱེན་མ་ཐེབས་པས་ག་ལ་ཡིན།
གསར་དུ་བསྣན་པའི་ཡི་གེ་དྲུག་ཀྱང་ཁ་རོག་ལམ་འགྲོ་བ་དང་སྐད་ཆ་བཤད་སྐབས་སོགས་དང་སྟུན་ནས་བསྡུས་པའི་ཡི་གེ་ཡིན་པ་ནི་སྐད་ཡིག་གི་རྨངས་གཞི་ངོ་ཏི་མ་དེ་དམའ་རིམ་ནས་ཡར་དར་དགོས་པ་ཞིག་ཡིན་པ་ལས་མཐོ་རིམ་ནས་མར་རྒྱུད་སྤྲོད་བྱེད་དགོས་པ་ཁོ་ན་རང་མིན་པའི་ཚོད་དུ་གདའ་སྙམ་མོ།།
བགྲོད་དཀའི་ལམ་འཕྲང་རལ་གྲིའི་ཚལ་དུ་ངལ་བའི་རྔུལ་ཆུའི་མུ་ཏིག་གཏོར་ཅིང་གཞན་ཕན་བརྩེ་བས་འདྲེན་པའི་སྤོབས།།
བྱེ་ཀླུང་རེག་བྱའི་ཚ་གདུང་བརྒལ་ཀྱང་མགྲིན་པའི་པདྨོ་གཞོམ་ཞིག་ཡོངས་བྲལ་མི་དབང་སྲོང་བཙན་ཟླ་བསིལ་བཞད།།
དུག་སྦྲུལ་གཙུག་གི་ནོར་བུའི་འོད་སྣང་འཛིན་པར་མི་འཇིགས་གཞན་དྲིང་མི་འཇོག་དཔྱོད་སྟོབས་གོ་ཆ་བགོས་པ་ཡི།།
ས་ཡ་དྲུག་གི་སྨྲ་བའི་སྒྲ་དབྱངས་དར་དཀར་ཡུག་གཅིག་མདངས་སུ་སྐྲུན་མཁས་ཡབ་རྗེ་ཐོན་མི་རྒྱལ་གྱུར་ཅིག །
ཅེས་<འབྲོག་བདག>གི་བུ་རབས་ཚ་རྒྱུད་འཛིན་པ་དགེ་མང་ཟླ་བས་ལས་བྲེལ་གྱི་བར་གསེང་ནས་ཟིན་བྲིས་ཀྱི་ཚུལ་དུ་སྤེལ། 8/7/2016
ང་།
ང་ མདང་ ཕྱིན་པ་ ཡིན།
ང་ དེ་རིང་ འགྲོ་བགྱིད་ ཡོད།
ང་ སང་ཉིན་ འགྲོ་བགྱི་ ཡིན།
ཁྱོད་རང་།
ཁྱོད་རང་ མདང་ ཕྱིན་པ་ རེད།
ཁྱོད་རང་ དེ་རིང་ འགྲོ་བགྱིད་ ཡོད་རེད།
ཁྱོད་རང་ སང་ཉིན་ འགྲོ་བགྱི་ རེད།
ཁོ།
ཁོ་ མདང་ ཕྱིན་པ་ རེད།
ཁོ་ དེ་རིང་ འགྲོ་བགྱིད་ ཡོད་རེད།
ཁོ་ སང་ཉིད་ འགྲོ་བགྱི་ རེད།
་
ང་ལ་ ཡོད།
ཁྱོད་ལ་ འདུག
ཁོ་ལ་ འདུག
འདི་ལ་ འདུག
དེ་ལ་ འདུག
་
ང་ཡིན།
ཁྱོད་རེད།
ཁོ་རེད།
འདི་རེད།
དེ་རེད།
་
འདི་ ངའི་ རེད།
འདི་ ཁྱོད་རང་གི་ རེད།
འདི་ ཁོའི་ རེད།
འདི་ འདིའི་ རེད།
འདི་ དེའི་ རེད།
་
བོད་རིགས་ཁ་སྐད་དུ།
ང་ནི། ལ་དོན་ལ། ལ་གཅིག་པུ་དང་། བྱེད་སྒྲ་ལ། ཀྱིས་གཅིག་པུ་དང་། འབྲེལ་སྒྲ་ལ་གི གཅིག་པུར་བརྡ་སྤྲོད་གསར་པའི་ཁྲིམས་སུ་བཅས་པ་ཡིན་ན་ཡང་། བོད་ཀྱི་བརྡ་སྤྲོད་ཉམས་པ་བཏང་བར་མི་བརྩི་བར། དེ་མདོར་བསྡུས་སུ་བཏང་བ་དང་། ལས་སླ་རུ་བཏང་བར་བརྩི་བཞིན་ཡོད།
ཁ་བྱང་རྫིག་མདོག་ཁ་པོ།།
མ་རྩོམ་ཐུག་པ་སྐོལ་སྐོལ།།