བོད་ཀྱི་གླུ་གཞས་ལ་དགའ་ཞེན་ཡོད་མཁན་ཚོས་ངེས་པར་དུ་བལྟ་དགོས་པའི་གསར་འགྱུར་གལ་ཆེན་ཞིག

བཀྲ་ཤིས་དོན་འགྲུབ།

མདང་ནུབ་ངས་(You tube)བརྒྱུད་ནས་《གཡུ་འབྲུག་ཚན་སྡེབ།》ཀྱི་གཞས་གསར་གློག་བརྙན་དག་ལ་བལྟ་ཐུབ་པ་བྱུང་སོང་། ངོ་མ་གློག་བརྙན་དེ་ཚོ་ནི་བལྟ་རིན་ཡོད་པ་རྐྱང་རྐྱང་རེད། བརྐུས་གཞས་ཀྱིས་ཚོང་ར་གང་ཞིང་། དེང་རབས་རང་བཞིན་གྱི་རྣམ་པ་ཞིག་མཚོན་ཁུལ་གྱིས་རི་བྲག་པ་གྲོང་ཁྱེར་དུ་འབྱོར་བ་ལྟ་བུའི་བཟོ་ལྟ་སྟོན་བཞིན་པའི་དེང་སང་གི་བོད་ཀྱི་གཞས་པ་དེ་ཚོའི་ཁྲོད། གཡུ་འབྲུག་ཚན་སྡེབ་ནི་ངོ་མ་བལྟ་རིན་ཉན་རིན་ཆ་ཚང་ཡོད་པས་མི་ཚད་རྐུན་མའི་ཁྱུ་ཚོགས་དེ་དག་གི་སེམས་སྐྱིད་དུ་མི་འཇུག་པའི་གཞས་པ་སྟག་ཤར་ཁྱུ་ཞིག་རེད། ལྷག་པར་དུ་《ཟླ་འོད།》ལྟ་བུའི་གཞས་ལ་ཆ་བཞག་ན། བརྙན་པར་ལེན་སྟངས་དང་རྒྱབ་ལྗོངས་ཀྱི་རོལ་དབྱངས་གཞས་པ་རེ་རེའི་རྣམ་འགྱུར་སྟོན་སྟངས་གང་ཡང་གཅིག་གྲོགས་སུ་གཅིག་འགྲོ་བ་ཆུ་ལ་ཆུ་བཞག་པ་ལྟ་བུར་འདུག་ལ། དམིགས་བསལ་གཞས་དེའི་ཚིག་ནི་མྱངས་བས་ངོམས་རྒྱུ་མེད་པ་ཞིག་སྟེ། མཚན་ཉིད་རིག་པའི་ནང་དོན་གྱིས་གང་བའི་སྙན་ཚིག་(དེབ་ཅིག་གི་ནང་དུ་སྙན་ཚིག་འདིའི་རིགས་ལ་མཚན་ཉིད་སྙན་ངག་ཅེས་བརྗོད་པ་མཐོང་བྱུང་།)དག་དག་རེད། མ་གཞི་བྱས་ན་གཞས་ཚིག་མཁྲེགས་དྲགས་ན་མི་མང་གིས་གོ་རྒྱུར་འགོག་རྐྱེན་བྱེད་སྲིད་ཀྱང་། དེང་སང་བོད་ཀྱི་གླུ་བརྒྱ་ངག་གཅིག་ལྟ་བུའི་གཞས་ཚིག་(དྲང་པོར་ཞུས་ན་འདི་ནི་གཞས་ཚིག་གཅིག་པུའི་གནད་དོན་ག་ལ་ཡིན་ཏེ་དབྱངས་རྟ་ནས་བཟུང་སྟེ་ལག་འཕྱར་སྟངས་བར་གྱི་བོད་གཞས་གཏོང་སྟངས་དང་འཁྲབ་སྟངས་ཀྱི་གནད་དོན་ཡོད་ཚད་གང་པོ་རེད།)དེ་དག་དང་བསྡུར་ན། གཞས་ཚིག་འདི་འདྲ་ནི་གསེར་ནག་གི་ཕུང་པོ་རྐྱང་རྐྱང་ཡིན་པ་མ་ཟད། འདི་འདྲའི་གཞས་ཚིག་དག་ལ་ནི་གོ་ཐོབ་དམིགས་བསལ་བ་ཞིག་ཅིས་ཀྱང་ཡོད་ངེས་པས། མཐོང་སྣེ་གཞན་ཞིག་ནས་གདེང་འཇོག་བྱེད་དགོས་སྙམ་ཡོད།

གང་ལྟར་གཡུ་འབྲུག་ཚན་སྡེབ་ཅེས་པའི་གཞས་པ་ཤ་དར་ཁྲག་དར་འདི་ཚོས། ཡབ་མེས་ཀྱི་དུས་ནས་མཐུད་དེ་ཡོང་བའི་བོད་ཀྱི་གཞས་རིག་སྒྱུ་རྩལ་ལ་གསོན་ཤུགས་གསར་པ་ཞིག་བསྣན་འདུག་ལ། འདིས་ནི། གཞན་གྱི་གཞས་བརྐུ་བཤུ་རྒྱག་པར་འགྲན་ཟླ་བྲལ་བའི་གཞས་པ་ཀུན་དགའ་ཟེར་བ་ཞིག་འདུག་པ་དེ་དགོས་མེད་དུ་བཏང་འདུག་ལ། ཤེར་བསྟན་ཟེར་བ་ཨ་མདོའི་སྲོལ་རྒྱུན་གྱི་གདུང་ལེན་གཏོང་རྒྱུར་མཁས་ཙམ་ཡོད་པ་དེ་ཡང་ད་ནི་འདར་སྐད་ལུང་པ་གང་བརྒྱབས་ནས་ཨ་མདོ་བའི་འདར་གླུ་དེ་བཏང་ནས་བསྡད་ན་ཡག་ཤོས་ཡིན་པའི་གསལ་བཤད་བྱས་ཡོད།

གཡུ་འབྲུག་ཚན་སྡེབ་དང་ལྟོ་སྦྱར་ནས་བཙན་བྱོལ་སྤྱི་ཚོགས་ཀྱི་གཞས་པ་ཞིག་གི་མིང་འདོན་དགོས་ཐུག་ན། དེ་ནི་ཅི་མི་སྙམ་པར། ན་ནིང་དོ་ཚིགས་དྷ་སའི་རི་བརྒྱུད་ནས་ཐོན་ཡོང་བའི་གཞས་པ་རྟ་མགྲིན་ཞུ་བ་དྲག་གཞས་གཏོང་དགོས་ན་གྱོང་མེད་ཡིན་པ་ཟད། ཚགས་རིས་འབྲི་རྒྱུ་སོགས་སྒྱུ་རྩལ་དང་འབྲེལ་བའི་ལས་རིགས་མང་པོར་ནང་བྱན་ཚུད་པའི་ཕོ་གསར་སྟག་འདྲ་ཞིག་ཡོད་པ་ཁོང་ཡིན། ཁོང་ནི་རྣམ་པའི་ཆ་ནས་ཀྱང་ངོ་མ་ཕོ་རྒོད་སྟག་ཟེར་ན་འདི་འདྲ་ཞིག་ལོས་ཡིན་བསམས་བསམས་ཤིག་འདུག་ཅིང་། དུས་རྒྱུན་ཁོང་གི་ངོ་རིས་དེ་མཐོང་ཐེངས་རེར་ང་ཚོའི་མེས་པོ་དཔའ་རྒོད་ཚོའི་ངོ་རིས་ནི་འདི་འདྲ་ཞིག་ལོས་ཀྱང་ཡིན་ངེས་སྙམ་ནས་ང་རང་ལ་འཆར་ཡན་རུམ་འཇུག་པར་བྱེད། མི་རིགས་གཞན་ཚོས་བོད་རིགས་དང་(Red Indian)པ་ཚོའི་ངོ་རིས་འདྲ་པོ་འདུག་ཟེར་བ་ཡང་ཕོ་གསར་ཁོང་འདྲ་བ་དག་མཐོང་ནས་ལབ་ཡིན་གྱི་རེ་མ་གཏོགས། ཕོ་མོ་དབྱེ་འབྱེད་ཀྱང་དཀའ་ཞིང་མཆུ་ཏོ་ལ་སྐེགས་ཚོས་བྱུགས་ཤིང་སྐྲ་ལོས་ངོ་གདོང་བཀབ་ནས་འགྲོ་མཁན་གྱི་བོད་པའི་ཕོ་གསར་མ་ནིང་འདྲ་བོ་དེ་ཚོ་ལ་ལབ་ཡིན་གྱི་མ་རེད་སྙམ། གཞས་པ་ཁོང་གིས་ནི། ཕུར་བུ་བཀྲ་ཤིས་རྣམ་རྒྱལ་ཟེར་བ་ཟ་ཉལ་འགྲོ་གསུམ་ཆ་ཚང་དབྱངས་སུ་གྱེར་མཁན་ཉན་པ་ཙམ་གྱིས་མི་ལ་ཁོང་ཁྲོ་བསླངས་ཡོང་བའི་གཞས་ཚིག་གི་བདག་པོ། འདོན་ཆོ་གའི་འབུད་རྡུང་དཀྲོལ་གསུམ་གྱི་རོལ་དབྱངས་ལྟར་བསྐྱར་ཟློས་དང་ཡང་ཟློས་ཀྱི་རོལ་མོའི་འཁོར་ལོ་སྐོར་མཁན་ཁོང་ལ་ངལ་གསོ་བྱས་ནས་འདུག་རྒྱུའི་གོ་སྐབས་ཕུལ་འདུག