” ང་རང་ཉིད་ཀྱི་ལོ་རྒྱུས་ཀྱང་ཁ་འཐོར་དགུ་འཐོར་ཞིག་ཡིན། དཔེར་ན། ངའི་ཕ་མ་གཉིས་བོད་ནས་བཙན་བྱོལ་ལ་ཡོང་བ་དང་། ང་སྐྱེ་ས་རྒྱ་གར་དང་། འཚར་ས་ཁེ་ན་ཌ། སློབ་གྲྭ་འགྲིམས་ས་ཨིན་ལན་ཌི་ཡིན། མི་འདྲ་བ་མང་དག་ཅིག་འདྲེས་ནས་ཡོད་པ་འདིས་ང་ལ་བག་ཆགས་ཅི་ཞིག་བཞག་ཡོད་དམ། བོད་མི་ག་ཚོད་ཅིག་གིས་ཁོར་ཡུག་གཞན་ཞིག་གི་ནང་འཐིམ་སྟེ་འགྲོ་ལུགས་མང་པོ་ཞིག་ལ་གོམས་འདྲིས་བྱེད་དགོས་ཀྱི་ཡོད་པ་དང་། དུས་ཡུན་ཐུང་ཐུང་ཞིག་གི་ནང་ཁོར་ཡུག་དང་གོམས་གཤིས་སོགས་ལ་བསྟུན་ཐུབ་པ་བྱུང་བར་བསམ་གྱིན་བསམ་གྱིན་ང་ཡ་མཚན་སྐྱེ་ཡི་འདུག རྒྱ་ནག་གིས་དབང་བསྒྱུར་མ་བྱས་གོང་གི་བོད་ཀྱི་ངོ་བོ་དེ་འགྱུར་ཚར་བ་རེད། ང་ཚོའི་མགོ་ཐོག་ཏུ་འཆར་བའི་ཉི་མ་དེ་སྔར་བཞིན་བོད་ཀྱི་ཉི་མ་མིན་པར། ཉིན་མོ་སྣང་བར་བྱེད་པའི་ཉི་མ་གསར་པ་ཞིག་ཏུ་གྱུར་བ་རེད། འོན་ཀྱང་ཉི་མ་གསར་པ་དེས་དེང་སང་ང་ཚོས་རང་ཁྱིམ་དུ་འབོད་པའི་རྒྱ་གར་དང་། བལ་ཡུལ། འབར་མ། བརཱ་ཛིལ། ལྷོ་ཨ་ཧྥེ་རི་ཁ། པ་རཱ་གྷོ། ཧོ་ལན་ཌ། ཉི་ཧོང་། ཨ་རི། ཁེ་ན་ཌ། ཐེ་ཝན། ཨསྟྲེ་ལི་ཡ། སུད་སུ། པེ་ཅིན་དང་ཁྲིན་ཏུའུ་སོགས་ཡུལ་ཕྱོགས་གང་སར་སྣང་བའི་འོད་ཀྱིས་ཁྱབ་ཀྱིན་ཡོད། ལྷད་མེད་ཀྱི་བརྩེ་བ་ཟབ་པའི་སྤུན་ཟླ་ཚོ་འཛམ་གླིང་ཡུལ་གྲུ་གང་སར་ཁ་འཐོར་དུ་གནས་ཡོད་པ་དེས། རང་རེའི་བོད་མི་ཚོ་གོ་ལ་ཧྲིལ་པོའི་ཁྱོན་དུ་ཁྱབ་པའི་གྲོང་བརྡལ་ཞིག་གི་ངོ་བོར་བསྒྱུར་ཡོད།”