བོད་ཀྱི་བློ་འབྱེད་བ་ཆེན་མོ་ཞོགས་དུང་གླེང་བ།

རྩོམ་པ་པོ: ཁ་བ་སྙིང་ལྕགས།
གྲོགས་པོ་ཞིག་གིས་ཁ་པར་ལས་ཞོགས་དུང་བཙོན་ནས་བཏང་འདུག་ཅེས་པའི་ཡི་གེ་དྲུག་པོ་འདི་བསྐུར་བ་ནས།ངའི་སེམས་པ་གཏན་ནས་ལྷོད་འཇགས་ཤིག་བྱུང་མ་ཐུབ།ཞོགས་དུང་བཙོན་དུ་སོང་ནས་ཉིན་འགའ་མ་གཏོགས་ཟླ་བ་དྲུག་ལྷག་འགོར།དེའི་རིང་དུ་ཁོང་ཉིད་ལ་ཅི་ཞིག་འབྲི་དགོས་བསམ་ཡང་མ་ཕྲིས་པར་ལུས།སྤྱིར་ན་ང་ཚོར་འདི་ལྟར་བཙོན་དུ་བཟུང་སོང་བའི་མི་བུ་ཤིན་ཏུ་མང་པས།ངས་ཞོགས་དུང་གཅིག་པུར་སེམས་སྡུག་གི་མཉམ་འགྱུར་སྟོན་མི་དགོས་པ་འདྲ་ཡང་།བཙོན་དུ་སོང་བའི་མི་དག་ལས་ངའི་མི་ཚེ་ལ་གཡོ་སྐྱོམས་ཆེས་ཆེར་ཐེབས་མཁན་ནི་ཁོང་ཉིད་གཅིག་པུ་ཡིན།དེ་ནི་ཁོང་གིས་མི་རིགས་ཤིག་གི་ཁེ་དབང་གི་ཆེད་དུ་སྐད་ཆ་ཚིག་དགའ་བཤད་མྱོང་བ་དེ་ཙམ་གྱིས་མིན་ཏེ།ཁོང་གིས་རང་ལུས་གཏའ་མར་བཞག་ནས་ཤེས་ཡོན་ཅན་གྱི་རྒྱུ་འབྲས་བློ་མིག་རང་གི་བླ་སྲོག་གིས་སྲུང་བས་ཡིན།
ང་ཚོས་ནམ་རྒྱུན་ཤེས་ཡོན་ཅན་དང་ཤེས་ཡོན་པ་ཞེས་པའི་མིང་བརྡ་འདི་བཀོལ་སྤྱོད་བྱེད་རྒྱུར་དགའ།ཀ་ངོ་ཡིག་ངོ་ཙམ་ཆོད་པའི་མི་ཐམས་ཅད་ལ་ཡོན་ཏན་པ་དང་རིག་གནས་པའི་མིང་གིས་འབོད།ང་ཚོར་མཚོན་ན་དཔེ་ཆ་བ་དང་རིག་གནས་པ།ཡོན་ཏན་པ་དང་ཤེས་ཡོན་ཅན་སོགས་ཀྱི་མིང་བརྡ་འདི་དག་ལ་བར་ཁྱད་ཆེན་པོ་ཞིག་མི་འདུག།ཡིན་ནའང་སྐུ་ཞབས་ཁོང་གི་བླ་མེད་ཀུན་སྤྱོད་དང་རང་གི་སྨྲ་བརྗོད་ལ་རང་གིས་འགན་ཁུར་སྟངས་འདིས་ང་ཚོས་མིང་བརྡ་དེ་དག་ལ་བཟུང་བའི་གོ་ནོར་ལ་དག་བཅོས་ཐེངས་ཤིག་གནང་བ་རེད།
སྐུ་ཞབས་ཞོགས་དུང་བཙོན་དུ་སོང་བ་ནས་ང་ཚོས་རྣམ་འགྱུར་ཞིག་བསྟན་ན་འོས་མོད།དེ་རིང་གི་བར་དུ་བོད་ཡུལ་ཆོད་ཁ་གསུམ་པོར་གྲགས་འགུལ་ཅི་ཡང་མི་འདུག།ཐ་ན་དེ་རིང་ཡང་བོད་ཡུལ་ཆོད་ཁ་གསུམ་པོ་སྔར་བཞིན་ལོ་ངོ་སྟོང་ཕྲག་ཡར་སྔོན་གྱི་སྒམ་ཞིང་བརླིང་བའི་གངས་རི་བཞིན་གྲགས་མེད་འགུལ་མེད་དུ་གནས།ངས་ཕ་ཡུལ་ཡོན་ནན་བདེ་ཆེན་ནས་ཡིན་པའི་སློབ་གྲོགས་བུ་མོ་ཞིག་ལ་ཞོགས་དུང་བཙོན་གྲོལ་བཏང་འདུག་ཅེས་བཤད་པ་ན།མོས་ཞོགས་དུང་ཟེར་བ་དེ་སུ་རེད།ཅིའི་ཕྱིར་བཙོན་དུ་བཟུང་བ་རེད་ཅེས་ང་ལ་ལྡོག་འབྲི་བྱས་བྱུང་།ང་ལ་བཤད་འདོད་ཀྱི་སེམས་ཡོད་ཀྱང་བརྗོད་བྱེད་ཀྱི་ཚིག་འབྲུས་དབེན་པས་ཁོ་མོར་བལྟས་ཏེ་དགོད་ཙམ་བྱེད་པ་ལས་ཐབས་གཞན་མ་བྱུང་།ཡང་ན་སྐུ་ཞབས་ཞོགས་དུང་བཙོན་དུ་སོང་ནས་ཕྱིར་ཐོན་ཉིན་དུ། སྐུ་ཞབས་ཁོང་གི་མིང་བཤད་ཀྱང་དེ་སུ་ཡིན་པ་མི་ཤེས་པའི་བོད་མི་ཡང་མང་པོ་ཞིག་ཡོད་ཚོད་གདའ།སྔོན་ཆད་ཁོ་བོས་རྒྱུན་དུ་ཞོགས་དུང་གི་དཔྱོད་ཤེས་རྒྱང་འབོད་ཀྱིས་བོད་ཡུལ་གོང་འོག་བར་གསུམ་ཡོམ་ཡོམ་དུ་སྒུལ་བྱུང་ཟེར་བའི་གཏམ་ཡན་རེ་གོ་མྱོང་ལ་དེ་ཡང་བདེན་ངེས་སྙམ།རྗེས་སུ་ཞོགས་དུང་གི་གནམ་ས་གོ་འབྱེད་ཀྱིས་བོད་ཕྱི་ནང་གཉིས་ཀ་འུར་འུར་དུ་བཏང་སོང་ཞེས་པའི་གཏམ་ཡན་རེ་ཡང་གོ་མྱོང་ལ་དེ་ཡང་བདེན་ངེས་བསམ།དོན་དུ་དཔྱོད་ཤེས་རྒྱང་འབོད་ཀྱིས་འགུལ་དུ་འཇུག་མ་ཐུབ་པ་ཡང་མང་པོ་འདུག་ལ།གནམ་ས་གོ་འབྱེད་ཀྱིས་འུར་དུ་འཇུག་མ་ཐུབ་པ་ཡང་མང་པོ་འདུག་ཚོད་རེད།
སྐུ་ཞབས་ཁོང་གིས་གནམ་ས་གོ་འབྱེད་དུ་བཤད་པ་ནང་བཞིན།ལོ་ངོ་འདི་དག་གི་རིང་ལ་ཁོང་ཉིད་བོད་པའི་སྤྱི་ཚོགས་ཀྱི་བས་མཐའ་རུ་དེད་དེ་འཚོ་རུ་བཅུག་པ་རེད།མི་ནི་སྤྱིའི་ཚོགས་པ་ཞིག་ལ་བརྟེན་ནས་འཚོ་དགོས་པ་ཞིག་ཡིན་པའི་དབང་དུ་བཏང་ན།ང་ཚོས་ཁོང་ཉིད་ཀྱི་ཆེས་མ་མཐའི་འཚོ་གནས་ཀྱི་དབང་ཆ་འཕྲོག་ནས་ལོ་ངོ་ཁ་ཤོས་སོང་བ་རེད།ཁོང་ཉིད་དངོས་སུ་བཙོན་དུ་མ་སོང་བའི་བར་དུ་ང་ཚོས་ཁོང་ལ་མིག་གིས་དྲང་ལྟ་ཞིག་ཀྱང་བྱེད་མ་མྱོང་།ལོ་རྒྱུས་ལ་ཕྱིར་ལྟ་རེ་བྱས་ན་ང་ཚོས་ད་བར་དུ་སྐུ་ཞབས་ཁོང་བཙོན་དུ་ཨེ་འགྲོ་ལ་སྒུག་ནས་སྡོད་པ་དང་འདྲ་སྟེ།ཁོང་ཉིད་མུན་ནག་གི་བཙོན་དུ་སོང་བ་ན་ང་ཚོས་ད་གཟོད་ཅི་ཞིག་བོར་སོང་བའི་བདག་འཛིན་གྱི་བློ་ཡིས་ཀུ་ཅོ་འདེབས།གོ་ཐོས་ལྟར་ན་བོད་མི་རེ་འགས་གནམ་ས་གོ་འབྱེད་ཚར་གཅིག་བཀླགས་རྗེས།ང་ཚོས་ཞོགས་དུང་ཨེ་འཛིན་བལྟ།བཟུང་བ་ཡིན་ན་དངོས་མ་རེད།མ་བཟུང་ན་ཉུལ་མ་ཡིན་ངེས་རེད་ཟེར།དེ་ཡིས་དོན་ཅི་ཞིག་མཚོན་ནམ།དེ་ཡིས་མ་མཐར་ཡང་དོན་གསུམ་མཚོན་པ་རེད།
གཅིག་ན་སྲིད་གཞུང་འདིས་ང་ཚོར་འགོ་སྐོར་དང་བསླུ་བྲིད་བཏང་བ་ཐེངས་མང་པའི་བག་ཆགས་ཀྱིས་ང་ཚོས་འཇིག་རྟེན་གྱི་དོན་དག་གང་ལའང་བརློམ་ཐབས་མེད་པ་དེ་རེད།གཉིས་ན་སྐུ་ཞབས་ཁོང་གིས་ལོ་ངོ་འདི་དག་གི་རང་ལ་ཤུགས་ཆེན་པོས་འབོད་སྐུལ་བཏང་བ་སྟེ་དོགས་སློང་གི་སྙིང་སྟོབས་རང་མི་རིགས་ཀྱི་སྤུན་ཟླ་དག་གི་རྒྱུད་ལ་གོམས་ཀྱིན་ཡོད་པ་ཡིན་པས་དགའ་འོས་པ་ཞིག་ཀྱང་ཡིན།ཡིན་ཀྱང་དེ་དག་ནི་གནད་ཀྱི་གཙོ་བོ་མ་རེད།དོན་གྱི་གཙོ་བོ་ནི་ང་ཚོས་ནམ་ཡང་རང་མི་རང་གིས་མི་བརྩི་བ་དང་རང་མི་རང་གིས་མི་བཀུར་བ་དེ་རེད།ཐ་ན་རང་མིས་རང་ལ་སྐད་ཆ་ཞིག་བཤད་ཀྱང་ང་ཚོས་ཡིད་ཆེས་མི་བྱེད་པ་དེ་རེད།
རྒྱ་གར་གྱི་སྙན་ངག་མཁན་པོ་ར་པིན་ཏུ་ར་ན་ཟི་ཐེ་གོར་ལགས་ཀྱིས་ནོའོ་པེལ་རྩོམ་རིག་བྱ་དགའ་བཞེས་ནས་ཕྱིར་རྒྱ་གར་དུ་ལོག་ཕེབས་གནང་དུས།རྒྱ་གར་གྱི་མི་ཚོས་ཅི་ཞིག་གི་ཧ་གོ་སོང་བ་ཇི་བཞིན་འཛུམ་དམུལ་དམུལ་གྱིས་དགའ་བསུ་བྱས་པ་ལ་ཐེ་གོར་གྱིས་འདི་ལྟར་གསུང་འདུག།ང་སྔོན་ཆད་ཁྱོད་ཚོ་དང་མཉམ་དུ་ཡོད་དུས།ཁྱོད་ཚོས་ང་ལ་འདི་ལྟར་དགའ་བསུ་བྱེད་པ་ཕར་ཞོག།ཐ་ན་ང་རང་འཚོ་བའི་བས་མཐའ་རུ་བསྐྱུར་ནས་ཁེར་རྐྱང་གི་འཚོ་བ་རོལ་དུ་བཅུག།ད་ལྟ་ནུབ་ཕྱོགས་པས་ང་ལ་མཚན་བྱང་ཞིག་བྱིན་པ་དེས་ཁྱོད་ཚོའི་རིན་ཐང་ལྟ་ཚུལ་ཡོངས་སུ་འགྱུར་ཏེ།དོན་མེད་པར་ང་ལ་དགའ་བསུ་ཆེན་པོ་བྱེད་ཀྱིན་འདུག་ཟེར།ང་ཚོའང་རྒྱུན་དུ་དེ་འདྲ་ཞིག་ཡིན་ཏེ།སྐུ་ཞབས་ཞོགས་དུང་ལགས་བཙོན་དུ་སོང་བ་ནས།སྐྱ་སེར་གཉིས་ཀས་ད་གཟོད་སྐུ་ཞབས་ཁོང་གི་རིན་ཐང་རྟོགས་སོང་བ་ཇི་བཞིན་སྨེ་ངགས་འདོན་བཞིན་ཡོད།ཡིན་ནའང་དེ་ནི་སྐུ་ཞབས་ཁོང་གིས་ཆབ་སྲིད་ཀྱི་གཉའ་གནོན་ལ་མགོ་མི་སྒུར་བའི་རྣམ་འགྱུར་དེ་ལ་ཡིད་སྨོན་གྱིས་དགའ་བསུ་བྱེད་པ་ལས།ཁོང་གིས་རིག་གནས་དགག་སྒྲུབ་དང་བོད་མིའི་བློ་འབྱེད་ཀྱི་ཕྱིར་དུ་སྐད་འབོད་གཏོང་གིན་པའི་དོན་དེ་ནི་བོད་མི་དག་གིས་ད་ལ་ཐུག་གི་བར་དུ་ཡང་ཧ་གསལ་བོ་ཞིག་གོ་ཡི་མི་འདུག
ཞོགས་དུང་ལ་མཚོན་ན་དོན་དག་གཉིས་ཀྱི་སྟེང་ནས་རྩོམ་ཡིག་བྲིས་མྱོང་།གཅིག་ནི་རིག་གནས་དགག་བཞག་དང་།གཅིག་ནི་ཆབ་སྲིད་དགག་གཞག་རེད།ངས་ཐ་སྙད་དེ་གཉིས་འདི་ལྟར་བཀོལ་སྤྱོད་བྱས་ན་ཆོག་མིན་གསལ་བོར་མི་ཤེས།གང་ལྟར་ཁོང་གིས་ཕྱོགས་འདི་གཉིས་ནས་རྩོམ་ཡིག་བྲིས་པ་རེད།ཁོང་གིས་ང་ལ་དད་པ་མེད་ཅེས་པའི་སྐད་ཆ་ཞིག་བཤད་མྱོང་ལ།དོན་དེས་ཁོང་ཉིད་ལྟ་ལོག་པ་དང་ནང་བསྟན་ཆོས་ལུགས་ཀྱི་དགྲ་བོ་ལྟར་དུ་གྱུར།བོད་དུ་ཆོས་ལུགས་ལ་བརྒྱབ་འགལ་བྱས་པ་ལས་ཉེས་ཅན་ཞིག་མེད་པ་འདྲ།ཡང་ན་ནུབ་ཕྱོགས་སུའང་ཆོས་ལུགས་ལ་བརྒྱབ་འགལ་བྱས་པ་ལས་ལྷག་པའི་ཉེས་ཅན་ཞིག་མེད་པ་འདྲ།ཡིན་ནའང་དགེ་རྒན་གདུད་ལྷ་རྒྱལ་གྱི་སྐད་ཆ་ལྟར་དུ་བཤད་ན།ང་ལ་དད་པ་མེད་ཅེས་པའི་སྐད་ཆ་དེ་ནི་ཐབས་ཤིག་ཡིན་གྱི་དོན་གྱིས་འདུ་ཤེས་ཀྱི་གཏིང་རིམ་ན་དད་པའི་རྒྱུ་ཙམ་ཡང་མེད་པའི་མི་ཞིག་གཏན་ནས་མེད་ཟེར།ངས་སྐད་ཆ་དེ་གཏན་ནས་ཁས་ལེན་བྱེད་མི་འདོད་ནའང་དོན་གྱིས་དེ་འདྲ་ཞིག་ཡིན་པ་འདྲ།ངས་ཀྱང་དེ་འདྲ་ཞིག་མིན་ན་བསམ་པ་ལས་དེ་འདྲ་ཞིག་མིན་པའི་བདེན་དཔང་ཅི་ཡང་སྟོན་རྒྱུ་མེད།
སྔོན་ཆད་གྲོགས་པོ་ཞིག་གིས་ཞོགས་དུང་ནི་ནང་བའི་སྟོན་པའི་ཁ་གཏད་དུ་ལངས་པའི་གདོན་འདྲེ་ཞིག་རེད་ཅེས་བཤད་མྱོང་།ངས་གྲོགས་པོ་དེ་ལ་ཁྱོད་ཀྱིས་ཞོགས་དུང་གདོན་རེད་ཟེར་བ་ནི་ནང་བའི་སྟོན་པ་གདོན་རེད་ཟེར་བ་དང་ཁྱད་པར་མི་འདུག་ཅེས་བཤད་པ་ཡིན།ཁོས་ང་ལ་རྒྱུ་མཚན་འདྲི་དུས་ངས་ཞོགས་དུང་གིས་ཀྱང་བདེན་ལུགས་བཤད་ཀྱིན་ཡོད་ལ།སྟོན་པ་སངས་རྒྱས་ཀྱིས་ཀྱང་དེ་ལས་གཞན་ཤོད་མེད་ཅེས་བཤད་པ་ཡིན།ངས་ད་ལྟ་ཡང་དེ་ལྟར་བསམ་བཞིན་ཡོད་དེ།འཇིག་རྟེན་གྱི་འགལ་ཟླ་མཐའ་དག་ནི་ཤེས་བྱའི་རྣམ་བཞག་གི་གོ་བརྡ་མ་འཕྲོད་པ་ལས་བྱུང་གིན་ཡོད་པར་འདོད་ཡོད།དཔེར་ན་མར་ཁེ་སུ་ནི་དངོས་གཙོ་སྨྲ་བ་དང་ཤཀྱ་ཐུབ་པ་ནི་སེམས་གཙོ་སྨྲ་བ་རེད།མར་ཁེ་སུ་གསོན་ཐོག་ཏུ་ཡོད་ཚེ་སྔར་བཞིན་ཆོས་ལུགས་ནི་ཉལ་ཐ་ཡིན་པར་སྒྲོགས་ངེས་ཡིན་ལ།ཤཀྱ་ཐུབ་པ་གསོན་ཐོག་ཏུ་ཡོད་ཚེ་དངོས་གཙོ་སྨྲ་བའང་གཏན་ནས་ཁས་ལེན་བྱེད་མི་སྲིད།ཡིན་ནའང་སེམས་གཙོ་དང་དངོས་གཙོ་ཞེས་པའི་བརྡ་དོན་འདི་དག་ཡུན་ཙམ་བསྐྱུར་ནས་མི་བུ་རང་སྟེང་དུ་སོང་ན།ཤཀྱ་ཐུབ་པ་དང་མར་ཁེ་སུ་ལ་དོན་ངོ་མར་ཁྱད་པར་ཅི་ཞིག་ཡོད་དམ།ངས་ནམ་རྒྱུན་འདི་ལྟར་བཤད་ཀྱིན་ཡོད་དེ།ཤཀྱ་ཐུབ་པས་དངོས་གཙོ་འགོག་ཆེད་དུ་ཟས་མི་ཟ་བ་དང་གོས་མི་གྱོན་པའི་ཚུལ་མི་གནང་སྟེ།དེ་ལྟར་བྱས་ན་གྲང་བ་དང་ཚ་བ།སྐོམ་པ་དང་ལྟོགས་པའི་སྡུག་བསྔལ་མྱོང་བར་འགྱུར་ཏེ།ཆོས་ལུགས་པ་ལ་ལས་དེ་ནི་ནང་པའི་སྤྱོད་ལམ་མོ་ཟེར་ན།ཁོ་བོས་སྡུག་བསྔལ་དེ་དག་ལས་མཐར་བའི་ཐབས་ནི་ད་གཟོད་ནང་བའི་སྤྱོད་ལམ་མོ་ཟེར་བར་འདོད།གལ་ཏེ་མི་ཞིག་གིས་འཇིག་རྟེན་དུ་ལྟོགས་སྐོམ་གྲང་འཁྱགས་ཀྱི་སྡུག་བསྔལ་མྱོང་བ་ནི་ཕྱིན་ཆད་སྡུག་བསྔལ་དེ་དག་མི་མྱོང་བའི་ཕྱིར་དུའོ་ཟེར་ན།ཁོ་བོས་ནང་བའི་ཆོས་པ་དང་ཡེ་ཤུ་ཆོས་ལུགས་ཀྱི་ཆོས་པ་གང་གིས་ཀྱང་རྒྱུ་ནོར་དོན་དུ་མི་གཉེར་བ་མཐོང་མ་མྱོང་སྟེ།མཐའ་ན་སྲོག་གི་རྒྱུ་བ་ཆད་རྗེས་མི་རྟག་རྒྱུ་མའི་མཚོན་བྱེད་དུ་གྱུར་བའི་གཟུགས་ཀྱི་བེམ་པོའང་གསེར་གྱི་ཕྱི་ཐུམ་དང་དངུལ་གྱི་ནང་ཐུམ་བརྒྱབ་ཡོད་པ་པོ་ཏ་ལའི་ནང་དུའང་མཐོང་མྱོང་བའི་ཕྱིར།དེ་བཞིན་དུ།མར་ཁེ་སུས་ཀྱང་སེམས་གཙོ་སྨྲ་བ་དང་ཆོས་ལུགས་ཁས་མི་ལེན་པའི་ཕྱིར་ན་མི་གསོད་པ་དང་གཞན་ལ་གནོད་བྱེད་པ།སྐྱེ་བ་ཕྱི་མ་ཁས་མི་ལེན་པའི་ཕྱིར་ན་རྐུ་བྱེད་པ་དང་ཚིག་ངན་སྨྲ་བ་སོགས་ཀྱང་བྱེད་མི་སྲིད་དོ།།སེམས་གཙོ་སྨྲ་བ་དང་དངོས་གཙོ་སྨྲ་བ་གང་ཡིན་ཀྱང་ཀུན་སྤྱོད་མ་ལག་སྔར་བཞིན་གཅིག་མཚུངས་ཡིན།ལ་ལས་མར་ལེ་རིང་ལུགས་པས་སྐྱེ་བ་ཕྱི་མ་དང་ལས་རྒྱུ་འབྲས་ཁས་མི་ལེན་པའི་ཕྱིར་ན་རིག་གསར་ལྟ་བའི་མུན་ནག་ལོག་སྤྱོད་ཀྱི་ལས་འགུལ་བྱུང་བ་ཡིན་ལ།མིའི་ཚེ་སྲོག་ལ་བརྒོལ་བའི་དོན་རྐྱེན་མང་དུ་བྱུང་བ་ཡིན་ཟེར་ན།དེ་ནི་བདེན་པ་ཡིན་མོད།ཆོས་ལུགས་པའི་བར་དུའང་མི་ཤི་རྟ་འགྱེད་ཀྱི་དོན་རྐྱེན་མང་དུ་བྱུང་མྱོང་ལ་ཁྲག་བྲི་ཁ་བའི་ལོ་རྒྱུས་ཀྱི་བྱུང་བ་ཡོད་པ་ཡོ་གླིང་གི་དུས་རབས་བར་མ་དང་ཡ་གླིང་དབུས་མའི་དབྱི་སི་ལན་ཆོས་པའི་གཡུལ་འགྱེད་ལྟ་བུ་ཙམ་མ་ཡིན་ཏེ།རྒྱ་གར་གྱི་ཆོས་རྒྱལ་མྱ་ངན་མེད་ཀྱིས་ཀྱང་མི་ཁྲག་གི་མཚོ་མོ་བསྐྱིལ་ནས་བེམ་པོའི་རི་རབ་བརྩིགས་མྱོང་ལ།བོད་དུའང་གྲུབ་མཐའ་ཁག་གི་བར་དུ་ཉི་མ་དམར་པོ་ཤར་མྱོང་བ་མཁས་དབང་དུང་དཀར་གྱི་ཆོས་སྲིད་ཟུང་འབྲེལ་དུ་ཧ་ཅང་གསལ་བོར་བཀོད་འདུག་པ་སུས་ཀྱབ་ཤེས།འོ་ན་དེ་ནི་བདག་ཅག་གི་མཉམ་མེད་སྟོན་པ་ཤཀྱ་ཐུབ་པའི་བྱས་ཉེས་ཡིན་ནམ།ང་ཚོས་ནམ་ཡང་འབྲས་བུ་ཡིས་རྒྱུ་ཡི་རིན་ཐང་ལ་དཔྱད་འཇོག་བྱེད་རྒྱུར་གོམས་ཡོད།དཔེར་ན་གཟའ་མི་གཉིས་གཟའ་འཐོར་བྱུང་བ་ཡིན་ཚེ།གཟའ་མི་དེ་གཉིས་ཀྱི་ཐོག་མའི་བརྩེ་དུང་ལ་དོགས་པ་ཟ་ཁུལ་བྱེད།ང་ཚོས་དེ་ནི་སྤྱང་གྲུང་ལྡན་པའི་བསམ་གཞིགས་བྱེད་སྟངས་ཤིག་ཡིན་པར་འདོད་ཀྱིན་ཡོད།དོན་གྱིས་གཟའ་མི་དེ་གཉིས་གཟའ་མཐོར་བྱུང་བ་ནི་ཐོག་མའི་བརྩེ་དུང་དྭངས་གཙང་མིན་པས་མིན་ཏེ།རྗེས་སུ་དངོས་ཡོད་ཀྱི་འཚོ་བའི་ཁྲོད་དུ་རིམ་བཞིན་འགྱུར་ལྡོག་བྱུང་བ་ཡིན།སྐྱེས་པ་ཞིག་ཕོ་ལོ་བཅོ་བརྒྱད་ཀྱི་སྟེང་དུ་བུ་མོ་ཞིག་ལ་སེམས་ཆགས་པ་ཡིན་ན་ཕོ་ལོ་ཉེར་བརྒྱད་ཀྱི་སྟེང་དུའང་ད་དུང་སེམས་ཆགས་ནས་སྡོད་རྒྱུ་ནི་མི་དཔེ་སྟེ།ཕོ་ལོ་ཉེར་བརྒྱད་ཀྱི་སྟེང་དུ་ཆགས་པའི་སེམས་འགྱུར་བ་ཡིས་ཕོ་ལོ་བཅོ་བརྒྱད་སྟེང་གི་བརྩེ་དུང་ལ་དོགས་པ་ཟ་མ་རུང་།འབྲས་བུ་རྒྱུ་ལས་བྱུང་རུང་རྒྱུ་ཡིས་འབྲས་བུ་མཚོན་མི་ཐུབ།དེ་བཞིན་འབྲས་བུས་རྒྱུ་ཡང་མཚོན་ཐུབ་པ་མིན།ནས་འབྲུ་བཏབ་པ་ལ་ནས་འབྲུ་སྐྱེས་པ་ཡིན་མོད།ནས་འབྲི་ལེགས་པོ་བཏབ་པ་ལ་འབྲས་བུ་རུལ་བ་མི་འབྱུང་བའི་ངེས་པ་མེད།
དེ་བས་ན།ཤཀྱ་ཐུབ་པ་དང་མར་ཁེ་སུ་གང་ཡིན་རུང་།ཕན་ཚུན་མི་མཐུན་པ་བརྒྱ་བཤད་རུང་།ཁོང་གཉིས་མི་སྒེར་གྱི་མི་གཤིས་ཀུན་སྤྱོད་ཀྱི་སྟེང་ནས་ཆེས་ཕུལ་བྱུང་གི་མི་བུ་ཡིན་ལ།ཁོང་རྣམ་པ་ལས་སུ་ཡིན་ཀྱང་ང་ཚོ་མིའི་རིགས་ཡོངས་ཀྱིས་བཀུར་བསྟི་བྱ་འོས་པ་ཡིན།ང་ཚོས་ནམ་རྒྱུན་སྐྱེས་བུ་ཞིག་ལ་གདེངས་འཇོག་བྱེད་པའི་ཚེ་ཀྲུང་གུང་དབུས་གཞུང་ལྟར་དངོས་གཙོ་སྨྲ་བ་ཡིན་མིན་གྱི་སྟེང་ནས་བཞག་ན་མི་འགྲིག་ལ།རང་ཅག་གི་ཆོས་པ་བཞིན་སྐྱེ་བ་སྔ་ཕྱི་ཁས་ལེན་མིན་གྱི་སྟེང་ནས་བཞག་ནའང་མི་འགྲིག།སྐྱེས་བུ་སྒེར་ནི་དེ་གཉིས་ལས་གང་ཡིན་རུང་ཁོང་གི་འགྲོ་འདུག་ཆགས་ཉལ་གྱི་ཁྲོད་དུ་མིའི་རིགས་ཀྱི་ཆེས་བླ་ན་མེད་པའི་དྭངས་གཙང་དང་མཐོ་ལ་སྲིད་དུ་རིང་བའི་རྒྱུ་འབྲས་བློ་མིག་ཡོད་པ་ཡིན་ན།དེ་ནི་གྲུབ་མཐའ་དང་ས་ཁོངས།རིགས་རྒྱུད་སོགས་གང་ལའང་མ་ཐེ་བར་རླབས་ཆེན་དུ་བགྲངས་རུང་བ་ཡིན།
ཆེས་ཡིད་སྐྱོ་བ་ནི་སྐུ་ཞབས་ཁོང་བདེན་པའི་དོན་དུ་མུན་བཙོན་དུ་ཞུགས་པ་དེ་མ་ཡིན་པར།ཁོང་མུན་བཙོན་དུ་བཅུག་པའི་སྐབས་སུ་ང་ཚོས་བདེན་པའི་དོན་དུ་རྣམ་འགྱུར་ཙམ་ཡང་སྟོན་མ་ཐུབ་པ་དེ་ཡིན།བདེན་ལུགས་ལ་བར་མི་ཆད་པར་རྣམ་འགྱུར་སྟོན་དགོས་པ་ཡིན་ཏེ།བདེན་ལུགས་ནི་བསམ་མི་ཤེས་པའི་བྱིས་པ་ལོ་ཆུང་ཞིག་དང་འདྲ།ང་ཚོས་བར་མི་ཆད་པར་བདེན་ལུགས་ཀྱི་ཕྱོགས་སུ་ང་ཚོ་ཁྱོད་ལ་དགའ་བཞིན་ཡོད་ང་ཚོས་ཁྱོད་རང་གླེང་བཞིན་ཡོད།ང་ཚོས་ཁྱོད་རང་བརྗེད་ཀྱིན་མེད་ཅེས་མ་བཤད་ཚེ།བདེན་ལུགས་ཀྱིས་ང་ཚོ་བསྐྱུར་ནས་རང་གཅིག་པུ་ཐག་རིང་ཐག་རིང་དུ་བུད་འགྲོ་ངེས་རེད།བདེན་ལུགས་ནི་དངོས་ནས་བྱིས་པ་བསམ་མེད་ཅིག་ཡིན་ཏེ།བར་མེད་པར་གཏམ་སྙམ་གྱི་འོ་ཆུ་མ་བླུད་ཚེ་ངུ་རྒྱངས་བྱས་ནས་ངུ་མཚམས་མི་ཆོད་པ་ཡིན།ཡིན་ནའང་།ཏག་ཏག་བར་སྐབས་དེར།བདེན་པའི་བུ་ཆུང་ཤིན་ཏུ་སྐོམ་པའི་བར་སྐབས་དེར།ང་ཚོས་ཁོང་ལ་འོ་མ་དཀར་ཡོལ་གང་ཡང་ལྡུད་མ་ཐུབ།དེ་བས།བདེན་པའི་བུ་ཆུང་ང་ཚོ་དང་བར་ཐག་གིས་གྱེས་ཏེ་འགྲོ་བཞིན་ཡོད།ད་ནི་ང་ཚོས་ཅི་ཞིག་བཤད་ཀྱང་དེ་ནི་བདེན་པའི་བུ་ཆུང་གི་འཛུམ་ཟེར་གྱིས་མ་བྱུགས་པའི་ངོ་གདོང་སྐམ་པོ་ཞིག་ཁོ་ན་རེད།
དེ་བཞིན་དུ་ད་ལྟའི་ན་གཞོན་དག་ལ་གོ་ནོར་ཞིག་འཐེབས་ཀྱིན་ཡོད་པ་ནི།མི་གང་ཞིག་གིས་རིགས་ཀྱི་འདུ་ཤེས་དང་རིགས་ཀྱི་ལ་རྒྱ།དེ་བཞིན་ཏུ་རིགས་ཀྱི་ཁེ་དབང་ལ་སྐད་འབོད་གཏོང་བ་ཡིན་ཚེ།ཀྲུང་གུང་གཞུང་ཕྱོགས་ནས་དེ་ལ་རྒྱལ་ཁབ་ཁ་གཏོར་བའི་ཉེས་མིང་འདོགས་པའི་མི་ཚད་རང་རིགས་ཀྱི་སྤུན་ཟླ་དག་གིས་ཀྱང་དེ་ནི་མི་རིགས་སྒེར་ཚུགས་པ་ཞིག་ཡིན་ནོ་བསམ་གྱིན་ཡོད།དཔེར་ན་ཞོགས་དུང་གིས་གནམ་ས་གོ་འབྱེད་བྲིས་པ་ནས་ཞོགས་དུང་ནི་བོད་སྒེར་ཚུགས་བྱེད་པར་འཐད་མིན་ལ་དོགས་པ་ཟ་མཁན་གར་ཡང་ཡོད་སྲིད་རྒྱུ་མ་རེད།ངས་ཀྱང་ཞོགས་དུང་གི་བསམ་ཚུལ་ག་འདྲ་ཡིན་མིན་མི་ཤེས་མོད།ངས་བཤད་འདོད་པ་ནི་བདེན་པའི་དོན་དུ་སྐད་འབོད་གཏོང་བ་དང་སྲིད་དབང་སྒེར་ཚུགས་ནི་དོན་ཁ་ཁ་རེད།རིགས་ཀྱི་ལ་རྒྱ་རྩོད་གཏང་ལ་ཕྱོགས་གཉིས་ཡོད་རྒྱུ་རེད།ཕྱོགས་གཅིག་ནི་ཐད་ཀར་རྩ་དོན་གྱི་སྟེང་ནས་མི་རིགས་ཤིག་ཡིན་ན་སྒེར་གྱི་སྲིད་དབང་ཞིག་ཡོད་དགོས་རྒྱུ་རེད་ཟེར་བའི་འབོད་བརྡ་གཏོང་མཁན་དེ་ཡིན་ལ།ཕྱོགས་གཞན་ཞིག་ནི་མིག་མཐོང་ལག་ཟིན་གྱི་མིའི་དབང་ཆ་བརྩོན་ལེན་བྱེད་པ་དེ་ཡིན།དེ་ཡང་ག་འདྲ་ཞིག་ཡིན་ནམ་ཟེར་ན།ང་ཚོས་དམངས་གཙོ་དང་རང་དབང་ལ་སྐད་འབོད་གཏོང་བ་ཡིན་ཏེ།དེ་ནི་ང་ཚོའི་ཁོར་ཡུག་ཏུ་རང་དབང་དང་དམངས་གཙོ་མེད་པས་ཡིན།ང་ཚོས་ང་ཚོར་རང་དབང་དང་དམས་གཙོ་དགོས་ཟེར་བ་རེད།ཡིན་ནའང་དོན་དེ་ཙམ་གྱིས་ང་ཚོར་སྲིད་དབང་གསར་བ་ཞིག་དགོས་པ་མི་མཚོན་ལ།གལ་ཏེ་སྲིད་དབང་གསར་བ་ཞིག་ཡོད་པར་གྱུར་ཚེ་ད་གཟོད་རེ་བ་འགྲུབ་སོང་བ་རེད་དམ་ཟེར་ན་དེ་ཡང་གཏན་ནས་མ་ཡིན་ནོ།།སྲིད་དབང་གསར་བ་ཞིག་བཙུགས་པ་ཡིན་ན་ཆོག་ལ་སྲིད་དབང་རྙིང་བ་རུ་མི་མཐུད་དུ་གསོན་པ་གང་ཡིན་ཀྱང་ཆོག།ང་ཚོར་སྔར་བཞིན་རེ་བ་ཞིག་ཡོད་པ་ནི་རང་དབང་དང་དམངས་གཙོ་ཡོད་དགོས་པ་དེ་ཡིན།དེ་ནི་རིགས་ཀྱི་འདུ་ཤེས་ཙམ་གྱི་དོན་དུ་མི་འགྱུར་དེ།དེ་ནི་མི་བུ་ཞིག་འཇིག་རྟེན་དུ་གསོན་པ་ལ་རྩོད་པར་འདོད་ཅིང་རྩོད་དགོས་པའི་རྩ་བའི་ཁེ་དབང་ཡིན།དེ་ནི་སྲིད་དབང་གཅིག་གྱུར་དང་མི་རིགས་རང་བཙན་སོགས་ཀྱི་དོན་དངོས་ཀྱིས་སྒྱུར་བ་གཏོང་ཐུབ་པ་ཞིག་ཡིན་ན་ནི་རང་དབང་དང་དམངས་གཙོ་ལ་དམའ་ཕབ་པ་ཡིན་ཏེ།རང་དབང་དང་དམངས་གཙོ་ནི་མི་བུ་སྒེར་གྱི་ཚེ་སྲོག་གི་སྙིང་སྟོབས་འཚོལ་བའི་གྲོགས་སུ་མ་གྱུར་བར་ཐུན་མོང་ཞིག་གི་རྨི་ལམ་འགྲུབ་པའི་ལག་རྟེན་དང་ཅ་ལག་ཏུ་གྱུར་བ་ཡིན་ན།རང་དབང་དང་དམངས་གཙོ་ཞེས་པའི་ཐ་སྙད་འདི་གཉིས་ལ་སྦགས་གཙོག་བཟོས་པ་རེད།
ཀློག་པོ་སུས་ཀྱང་ཕྱི་གླིང་དང་ལོ་རྒྱུས་དྲུད་ཡོང་ནས་ལོ་རྒྱུས་དོན་རྐྱེན་ག་གེ་མོར་ཡང་དམངས་གཙོ་དང་རང་དབང་ནི་ལག་ཆ་ཙམ་ཏུ་གྱུར་ཡོད་ཚུལ་བདེན་དཔང་བྱེད་པ་ཡིན་ན་ངའི་མིག་མདུན་དུ་ཁྱེར་ཡོང་མི་དགོས་ཏེ།ངས་བདེན་ལུགས་ཀྱི་དབྱེ་ཐག་གཅོད་དུས་ལོ་རྒྱུས་ལ་ཕྱིར་ལྟ་བྱེད་པ་ཤིན་ཏུ་ཉུང་།ཁ་སང་དེ་རིང་གི་དུས་རབས་འདི་ནི་སྔོན་ཆད་ཀྱི་དུས་རབས་གང་དང་ཡང་མི་མཚུངས་པའི་དུས་རབས་གསར་བ་ཞིག་ཡིན་ལ།སྔོན་ཆད་ཀྱི་ལོ་རྒྱུས་བསླབ་བྱ་གང་གིས་ཀྱང་དེ་རིང་གི་དུས་རབས་འདི་ལ་དཔེ་སྟོན་གྱི་རིན་ཐང་ཆེན་པོ་ཞིག་འདོན་མི་ཐུབ།དེར་མ་ཟད་སྔོན་ཆད་འཛམ་གླིང་ཤར་ནུབ་གང་ཞིག་ཏུའང་རང་དབང་དང་དམངས་གཙོ་ལག་ཆ་ཙམ་ཏུ་མ་གཏོགས་དོན་དངོས་སུ་ལག་ལེན་བྱེད་མ་མྱོང་བ་དེ་ཙམ་གྱིས་ང་ཚོས་འཚོལ་ཅིང་སྙེགས་ཀྱིན་པའི་བདེན་པ་སྟེ་རང་དབང་དང་དམངས་གཙོ་ཡང་ལག་ཆ་རུ་འགྱུར་དགོས་པའི་གནས་ལུགས་ཅི་ཡང་མེད།
འཇིག་རྟེན་དུ་དམིགས་ཡུལ་ཅན་གྱི་བདེན་པ་འཚོལ་མཁན་ཡོད་པ་ལས།ཤིན་ཏུ་དྭངས་གཙང་གི་བདེན་པ་འཚོལ་མཁན་ནི་ཤིན་ཏུ་ནས་དཀོན་པོ་ཆགས་ཡོད།ཁ་ཤས་ཀྱིས་ཞོགས་དུང་གིས་གནམས་གོ་འབྱེད་བྲིས་པ་ལས་མ་བྲིས་པ་བཟང་སྟེ།ཞོགས་དུང་གིས་ཆབ་སྲིད་ཀྱི་ཕྱོགས་ནས་ཆེན་པོ་ཞིག་མི་གྱོང་བས་སྔར་བཞིན་རིག་གནས་དགག་བཞག་གི་ཕྱོགས་ནས་རྩོམ་ཡིག་བྲིས་ན་ལེགས་པོ་རེད་ཟེར།ཡང་ལ་ལས་ང་ཚོ་རིག་གནས་པ་ལ་རིག་གནས་པའི་འོས་འགན་ཡོད།ཆབ་སྲིད་ཀྱི་འོས་འགན་ཆབ་སྲིད་པས་འགྲུབ་དགོས་ཟེར།ཟུར་གྱིས་བལྟས་ན་བདེན་པ་འདྲ་ཞིག་འདུག་མོད།ནན་གྱིས་བལྟས་ན་དེ་ནི་ནོར་འཁྲུལ་ཅན་གྱི་བསམ་ཕྱོགས་ཤིག་ཡིན་པ་འདྲ།རྒྱུ་མཚན་ནི་ཞོགས་དུང་གིས་གནམ་ས་གོ་འབྱེད་བྲིས་པ་དེས་རིག་གནས་པའི་འགན་ཁུར་བསྐྱུར་ཡོད་པ་མི་མཐོང་ལ་ཆབ་སྲིད་པའི་འགན་ཁུར་ཁྲག་ཏུ་བླངས་ཡོད་པའང་མི་མཐོང་།འཇིག་རྟེན་དུ་འདི་ནི་རིག་གནས་པའམ་ཤེས་ཡོན་ཅན་གྱི་འགན་ཁུར་ཡིན་ལ་འདི་ནི་ཆབ་སྲིད་པའི་འགན་ཁུར་ཡིན་ཟེར་རྒྱུ་ཞིག་རྩ་བ་ནས་ཡོད་པ་མིན།དཔེར་ན་འཇིག་རྟེན་ཏུ་ཉི་མ་མེད་པར་གྱུར་བ་ཡིན་ཚེ།འཇིག་རྟེན་ཏུ་སླར་ཡང་འོད་སྣང་འདྲེན་རྒྱུ་ནི་མུན་ནག་གི་ཁྲོད་དུ་འཚོ་བའི་མི་ཐམས་ཅད་ཀྱི་འགན་ཁུར་ཡིན་གྱི་མི་ག་གེ་མོའི་དམིགས་གསལ་གྱི་འགན་ཁུར་ག་ལ་ཡིན།དེ་བཞིན་དུ་ཞོགས་དུང་གིས་གནམ་ས་གོ་འབྱེད་བྲིས་པ་ཡིས་བདེན་པ་ཞིག་འཚོལ་གྱིན་ཡོད་ལ་བདེན་པ་ཞིག་གླེང་གིན་ཡོད་པ་ལས།བདེན་པ་ལས་ལོག་པའི་ཁེ་ཕན་ཆིག་རྐྱང་བ་ཞིག་གཏན་ནས་གླེང་གིན་མི་འདུག
དེ་ཡང་དཔེར་ན་རྒྱ་གར་གྱི་རང་བཙན་ལས་འགུལ་གྱི་དེད་དཔོན་ཆེན་པོ་གན་རྡི་རེད།མི་རྣམས་ཀྱིས་ཁོང་ཉིད་ཆོས་ལུགས་པ་ཞིག་ཏུ་བཀུར་རམ་ཆབ་སྲིད་པ་ཞིག་ཏུ་བརྩི།ཡང་ན་ཤེས་ཡོན་ཅན་ཙམ་ཞིག་ཏུ་བལྟ།ངས་བསམ་ན་དེ་དག་གི་བར་དུ་འགལ་བ་ཆེན་པོ་མི་འདུག་སྟེ།གན་རྡི་ནི་དེ་དག་ཚང་མ་རེད་ལ་དེ་དག་ལས་གཅིག་ཀྱང་མ་རེད་ཟེར་ཀྱང་ཆོག།ཅིའི་ཕྱིར་ཟེར་ན་གན་རྡི་ནི་བདེན་པ་ལ་སྐྱབས་སུ་སོང་བའི་མི་ཞིག་ཡིན་པ་ལས་རྣམ་གཞག་གཞན་དེ་དག་གང་གི་ཡ་གྱལ་དུའང་མི་འགྲོ།མི་རྣམས་གཞུང་ལུགས་ལ་གཞོལ་ཆེ་བས་རྣམ་གཞག་རེ་རེ་ལ་དབྱེ་ཐག་གསལ་བོ་རེ་བགར་བར་བྱེད།དོན་ངོ་མར་འཇིག་རྟེན་དུ་རྣམ་གཞག་ཞིག་ཕན་ཚུན་ལ་བསྣོལ་འདྲེས་མེད་པ་ཞིག་མེད་ལ་དེ་དག་གི་བར་དུ་འབྱེ་ཐག་གསལ་བོ་ཞིག་དེ་ལས་ཀྱང་ཡོད་མི་འོས།ང་ཚོས་རིག་གནས་པ་ལ་རིག་གནས་པ་གཙང་རྐྱང་གི་ངོས་ནས་རེ་བ་ཞུ་བ་ནི་དེང་རབས་སློབ་གསོ་རུ་སློབ་མ་ལ་ཆེད་ལས་གཙང་རྐྱང་གི་ངོས་ན་རེ་བ་བྱེད་པ་དང་ཤིན་ཏུ་མཚུངས།ང་ཚོས་མི་བུ་ཞིག་གམ་སློབ་མ་ཞིག་གང་ཡིན་ནའང་ཕྱོགས་ཡོངས་ཆུ་ཚད་ཀྱི་སྟེང་ནས་རེ་བ་བཟུང་ན་འགྲིག་ལ།ཆིག་རྐྱང་བའི་ངོས་ནས་བསམ་བློ་བཏང་ན་གོ་ནོར་ཐེབས་སླ་བ་ཡིན།དེ་བཞིན་དུ་ཞོགས་དུང་གིས་ཆབ་སྲིད་ཀྱི་ངོས་ནས་མི་བུའི་ཁེ་དབང་ལ་གདུང་འབོད་བྱས་པ་དེ་རིག་གནས་པའི་འགན་ཁུར་དང་རྒྱབ་འགལ་ཅི་ཡང་བྱས་མེད་དེ།དོན་གྱི་རྩ་བ་ནི་མི་བུའི་ཁེ་དབང་ཡིན་ན་ཕྱོགས་ཡོངས་ནས་བརྩོན་ལེན་བྱེད་དགོས་རྒྱུ་རེད།མི་བུ་ལ་རིག་གནས་བཀག་རྒྱ་ཡོད་པ་མ་ཟད་ཆབ་སྲིད་བཀག་རྒྱའང་ཡོད་པའི་ཕྱིར།བཀག་རྒྱ་གཏོར་དགོས་ན་ཕྱོགས་གཅིག་གཏོར་བ་ཙམ་གྱིས་མི་ཆོག་སྟེ་ཕྱོགས་ཡོངས་ནས་གཏོར་དགོས་པ་ཡིན།
ཡང་དཔེར་ན་ཞོགས་དུང་གིས་གནམ་ས་གོ་འབྱེད་དུ་ཞི་བའི་ལམ་བཤད་པ་ཡིན་ན།ཀུན་གྱིས་ཀྱང་དེ་ནི་ཆབ་སྲིད་ཀྱི་ཐབས་ལམ་ལེགས་པོ་ཞིག་རེད་ཅེས་སྨྲ་བཞིན་འདུག།ཡིན་ནའང་ཞི་བའི་ལམ་ནི་ཚེ་སྲོག་གི་རྨི་ལམ་ཞིག་ཡིན་པ་ལས་ཐབས་ཤིག་ཏུ་ལྟ་བ་ནི་ཅི་ནས་ཀྱང་སྐྱོ་གར་རྨ་མེད་པ་ཞིག་ཡིན་པར་འདོད་ཀྱིན་ཡོད།མ་ཏིན་ལོ་རྡིར་ཅིན་གྱིས་ཞི་བའི་ལམ་ཅི་ལྟར་བེད་སྤྱོད་བཏང་ཚུལ་མ་གླེང་ན།གན་རྡི་རང་ངོས་ནས་ཞི་བའི་ལམ་དུ་བསྐྱོད་པ་ནི་ཚེ་སྲོག་གི་རྨི་ལམ་ཞིག་འཚོལ་བ་ཡིན་གྱི་ཆབ་སྲིད་ཀྱི་ཐབས་ཤིག་ཏུ་ཁོ་བོས་ནམ་ཡང་བལྟ་ཐུབ་མི་འདུག།དཔེར་ན་གན་རྡི་ལ་མཚོན་ན་རྒྱ་གར་རང་བཙན་བྱེད་པ་ལས་ཀྱང་དོན་དག་གལ་ཆེན་ཞིག་ཡོད་པ་ནི།རྨུ་རྒོད་དང་རྩུབ་དྲགས་ཅན་གྱི་ནུབ་གླིང་བ་དག་ལ་བདེན་པའི་འོད་སྣང་གིས་བྱིལ་བྱིལ་གནང་ཏེ་ཁོ་ཚོའི་གཤིས་ཀའང་ཞི་བ་ཅན་ཏུ་གཏོང་འདོད་པ་དེ་རེད།དེ་ནི་ང་གཅིག་པུའི་འདོད་ཕྱོགས་ཤིག་ཡིན་ཀྱང་སྲིད་མོད།ངས་བསམ་ན་དོན་དག་གང་ཡང་ཐབས་སུ་བྱེད་པ་ནི་ཤིན་ཏུ་ནས་མི་ལེགས་སྟེ།ལྷག་དོན་ཞི་བའི་ལམ་ལྟ་བུ་འོད་ཟེར་སྟོང་ལྡན་གྱི་ལམ་བུ་འདི་དག་མིའི་སྲིད་མཐའ་བའི་ལམ་གྱི་ཐབས་སུ་བྱེད་པ་ནི་ཤིན་ཏུ་ནས་མི་ལེགས་པར་མཐོང་ངོ་།།དོན་དག་འདིའི་ཐད་དུ་མི་ལ་ལས་ཅི་ཞིག་བཤད་སོང་བར་ཧ་མི་གོ་བ་ལྟ་བུ་བྱུང་ཡང་སྲིད་མོད།ངས་བཤད་འདོད་པ་ནི།ཞི་བའི་ལམ་ཡིན་ཀྱང་རུང་།རང་དབང་དང་དམངས་གཙོ་ཡིན་ཀྱང་ཆོག།དེ་ནི་ང་ཚོའི་ཚེ་སྲོག་གི་ཆེས་རྟག་བརྟན་གྱི་རྨི་ལམ་ཞིག་ཡིན་པ་ལས།མིག་སྔར་གྱི་དམིགས་ཡུལ་གང་ཞིག་འགྲུབ་ཆེད་དུ་ལག་ལེན་བྱེད་པའི་དགོས་དབང་གི་ལག་རྟེན་ཞིག་ལར་ཡང་མིན་ཞེས་བཤད་འདོད་པ་དེ་ཡིན།ང་ཚོའི་མིག་སྔར་གྱི་ཁེ་ཕན་དོན་ཐོག་ཏུ་འཁྱོལ་བ་བྱུང་ན།དེ་ནས་ང་ཚོས་རང་དབང་དང་དམངས་གཙོ་ཞེས་པའི་བདེན་པ་འདི་དག་གི་འཚོལ་མཚམས་བཞག་ན་ཆོག་གམ།ང་ལ་མཁོ་བ་དང་ངས་འཚོལ་གྱིན་པ་ནི་ཆེས་མཐར་ཐུག་གི་རང་དབང་དང་དམངས་གཙོ་རང་ཉིད་ཡིན་པ་ལས།དེ་ལ་རྐྱེན་བྱས་ནས་འགྲུབ་འགྱུར་གྱི་སྲིད་གཞུང་ཞིག་ཅིས་ཀྱང་མིན།
མང་པོ་ཞིག་བཤད་སོང་བ་འདྲ་ཡང་སྐུ་ཞབས་ཞོགས་དུང་གི་ཕྱོགས་ནས་སྐད་ཆ་ཅི་ཡང་བཤད་མི་འདུག་པར་ང་རང་ཉིད་ཀྱིས་བརྗོད་འདོད་པ་གཅིག་པུ་བརྗོད་ཀྱིན་འདུག།དེ་སྔོན་སྐུ་ཞབས་ཁོང་བཙོན་ཏུ་འཇུག་དུས་གྲོགས་པོ་དག་གིས་ཞོགས་དུང་བཙོན་དུ་བཟུང་བ་ལ་འགྲིག་མིན་གཉིས་དང་བཟང་མིན་གཉིས་ཀྱི་ཕྱོགས་ནས་བཤད་ཀྱིན་འདུག།དོན་གྱིས་དེ་ཡང་དམིགས་ཡུལ་ཅན་གྱི་ལྟ་བུ་རུ་སོང་བས་འགྲིག་མིན་དང་བཟང་མིན་གྱི་རིན་ཐང་ཐག་གཅོད་བྱེད་མཁན་བྱུང་བ་ཡིན་ལ།ཡང་དོན་གྱིས་ཞོགས་དུང་བཙོན་དུ་སོང་བ་འགྲིག་འདུག་ཟེར་མཁན་དང་འགྲིག་མི་འདུག་ཟེར་མཁན་གྱི་བར་དུ་འགལ་བ་དངོས་མ་ཞིག་མེད་དེ།སྐུ་ཞབས་ཞོགས་དུང་བཙོན་དུ་སོང་བ་ནི་མིའི་རིགས་ཀྱི་མཐའ་མེད་པའི་སྐྱོ་གར་གྱི་རྒྱ་མཚོའི་ནང་གི་ཆུ་ཐིགས་ཤིག་ཡིན་ལ།དེ་ལྟ་བུའི་སྐྱོ་གར་ནི་སྔར་བཞིན་རང་ཅག་གི་མདུན་སར་འཁྲབ་སྲིད་པས།དོན་གྱིས་སྐྱོ་གར་དེའི་བྱེད་པོ་དངོས་མ་ནི་མིའི་རིགས་སྤྱི་ཡོངས་ཀྱི་ཤེས་རྨོངས་ཀྱིས་བྱས་པ་རེད།དོན་གྱིས་ཤེས་རྨོངས་ཀྱི་གྲོག་རོང་དུ་ལུས་ཡོད་པ་ནི་ང་ཚོ་གཅིག་པུ་མ་ཡིན་ཏེ་མིའི་རིགས་ཀྱི་སྤྱི་ཚོགས་མང་ཆེ་བ་ཡིན།ང་ཚོས་ནམ་ཞིག་མིའི་རིགས་ཀྱི་ཤེས་རྨོངས་གྲོག་རོང་ལ་བདེན་པའི་འོད་ཟེར་གྱིས་དཀར་ས་ཕྱེ་ཐུབ་པ་བྱུང་ཚེ།དེ་ནི་ད་གཟོད་མིའི་རིགས་ཀྱི་སྐྱོ་གར་ལ་རྫོགས་ཚིག་འགོད་པའི་དུས་སྐབས་ཡིན་ངེས་མོད།དེ་བར་དུ་ང་ཚོ་མི་རབས་ནས་མི་རབས་སུ་དཀའ་ལས་རྒྱག་དགོས་པ་ཡིན།ཡིན་ནའང་།སྐྱོ་གར་གྱིས་ནམ་ཡང་ང་ཚོའི་གོམ་སྟབས་ལ་བཀག་རྡོ་བཟོ་མི་ཐུབ།འདི་ནི་སྐུ་ཞབས་ཞོགས་དུང་བསྐྱོད་ཀྱིན་པའི་ལམ་དེ་ཡིན་ལ།ང་ཚོའང་བསྐྱོད་ཀྱིན་པའི་ལམ་དེ་ཡིན།ལམ་དེ་ནི་དྭངས་གཙང་གི་ཞི་བ་དང་བདེན་པའི་ལམ་བུ་ཡིན།
2010_10_15
གསལ་བཤད།རྩོམ་འདི་ནི་ཞོགས་དུང་བཙོན་གྲོལ་བཏང་བའི་ཉིན་མོ་དེར་བྲིས་པ་ཡིན་ལ།ད་ལ་ཐུག་གི་བར་དུ་རང་གི་རྩིས་འཁོར་གྱི་ནང་དུ་བཅུག་པ་ཡིན།ཡང་བསྐྱར་ཐེངས་ཤིག་བཀླགས་དུས་སྐྱོན་ཀྱང་མི་ཉུང་བ་མཐོང་མོད།སྐབས་དེའི་བདག་གི་སེམས་པ་མཚོན་ཕྱིར་འདི་ལྟར་བསྐྱུར་བའོ།།
རྩོམ་ཡིག་འབྱུང་ཁུངས། རང་གྲོལ་སྨྱུག་གསར་དྲ་བ། 03/25/2011 – 01:26
མཁོ་སྤྲོད་པ། ལྷ་སྡེ་གནམ་ལོ་ཡག
༼མཁོ་སྤྲོད་པའི་མཆན། རྩོམ་ཡིག་གི་ཁ་བྱང་ལ་རྩོམ་པ་པོ་ཁོང་གིས་མཆན་ལན་ལྟར་འགྱུར་བ་བཏང་ཡོད།༽