གཞུང་པ་ཚེ་དབང་བསོད་ནམས།
ཆེས་སྔ་བའི་དུས་སུ་བོད་ཀྱི་ས་ཆ་ཡོངས་རྫོགས་རྒྱ་མཚོ་ཡིན་པ་དང་། རིམ་གྱིས་རྒྱ་མཚོའི་ཆུ་ས་འོག་ལ་ཐིམ་ནས་སྐམ་སར་རྒྱུར་ནས་མི་གི་འགྲོ་བ་འཕེལ་བའི་བརྒྱུད་རིམ་ནས་ཕ་སྤྲེའུ་བྱང་ཆུབ་སེམས་པ་འཕགས་པ་སྤྱན་རས་གཟིགས་ཀྱི་སྤྲུལ་པ་དང་། མ་བྲག་སྲིན་མོ་རྗེ་བཙུན་སྒྲོལ་མའི་སྤྲུལ་པ་གཉིས་འདུས་པ་ལས་སྤྲེ་ཕྲུག་མི་འདྲ་བ་དྲུག་སྐྱེས་ནས་བོད་དུ་མི་གི་འགྲོ་བ་དེ་ནས་འཕེལ་ནས་དང་པོ་འབྲོག་གི་རྣམ་པ་ནས་རིམ་གྱིས་ཡར་རྒྱས་ལ་ཁ་ཕྱོགས་ནས་བཟའ་ཚང་མཉམ་འདུས་ཀྱིས་བུ་ཕྲུག་སྐྱེ་འཕེལ་བརྒྱུད་ནས་མི་འབོར་མང་དུ་ཕྱིན་ནས་མི་མང་མཉམ་འདུས་ཀྱི་འཚོ་རྟེན་ལ་ས་ཞིང་འདེབས་ལས་བྱེད་མཁན་ལ་ཞིང་པ་ཟེར་བའི་ཐ་སྙད་དེ་དར་བ་དང་། དུད་འགྲོ་སེམས་ཅན་གསོ་ཉར་བྱེད་མཁན་ལ་འབྲོག་པ་ཟེར་བའི་ཐ་སྙད་དེ་དར་བ་དང་། ཞིང་པ་ཚོ་ས་ཆ་གཅིག་ཏུ་གཞིས་ཆགས་ནས་སྡོད་ས་ཁང་པ་རྒྱབ་ནས་འཚོ་བའི་རྟེན་གཞི་སོ་ནམ་ཞིང་ལས་དང་སྒོ་ཕྱུགས་སེམས་ཅན་མཛོ་དང་། བ་ཕྱུགས། རྟ། གཡག་སོགས་ཉར་ནས་མཛོ་དང་བ་ཕྱུགས་བཏང་ནས་ས་ཞིང་རྨོས་རྒྱབ་ནས་འབྲུ་དང་ནས་སོགས་བཏབ་ནས་སོ་ནམ་ལས་གཞིའི་འཚོ་བ་སྐྱེལ་བཞིན་པ་དང་། འབྲོག་པ་ཚོ་དུད་འགྲོ་སེམས་ཅན་འབྲི་གཡག་དང་། ར་ལུག རྟ་སོགས་གསོ་སྐྱོང་འོག་ཁྱིམ་ཚང་གི་འཚོ་བ་ལ་འགན་སྲུང་བྱས་ནས་ས་ཆ་གཅིག་ཏུ་མ་བསྡད་པར་རྩ་ཆུ་འཛོམས་ས་ལ་གཞིས་སྤོས་ནས་ཁང་པ་མེད་པ་གུར་ནང་མི་ཚེ་སྐྱེལ་བཞིན་པ་དང་། འབྲོག་པའི་སྡོད་གུར་ལ་རིགས་གཉིས་ཡོད་པ་གཡག་གི་སྤུ་རྩིད་པ་ལ་བཟོས་པའི་སྦྲ་གུར་ནག་པོ་ལ་འབའ་ཟེར་བ་དང་། ཕར་ཚུར་ཁྱེར་བདེའི་ཆེད་རས་གུར་དཀར་པོ་ལ་མཐའ་རྒྱན་དང་གུར་གྱི་དཀྱིལ་ལ་རི་མོ་འཁོར་ལོ་སོགས་འབྲི་སྲོལ་ཡོད་པ་དང་། འབྲོག་པའི་ཕ་རྒན་ཚོ་འཛོམས་ནས་དབྱར་ས་དང་དགུན་ས་རྒྱན་རྒྱག་གི་ལམ་ནས་སོ་སོར་ཐོབ་པའི་ས་ཆའི་སྟེང་དུད་འགྲོ་སེམས་ཅན་འཚོ་དགོས་པ་ལས་མི་གཞན་གྱི་ས་ཆའི་སྟེང་དུད་འགྲོ་འཚོ་མི་ཉན་པ་དང་། འབྲོག་པའི་ཁ་ཟས་དུད་འགྲོ་སེམས་ཅན་གྱི་འོ་མ། ཞོ། དར་ར། ཆུར་ར། ཐུད། ཤ་དང་རྩམ་པ་སོགས་བེད་སྤྱོད་མང་བ་བྱེད་བཞིན་པ་དང་། ཞིང་པའི་ལག་ནས་ཉོས་པའི་ནས་རྩམ། འབྲུ་རྩམ། བྲོ། འབྲས། སྲན་མ། ལ་ཕུག ཞོ་གོག མངར་ཆའི་རིགས། གུ་རམ། རས་ཆའི་རིགས་སོགས་ཚུར་བླང་ནས་ཕར་མར། ཆུར་ར། ཐུད། ཤ། དུད་འགྲོའི་པག་རིགས། བལ་དང་ལེ་ན། གཡག་གི་རྔ་མ། ཚ་དང་ཚ་ལེ་སོགས་སྤྲད་དེ་ཞིང་འབྲོག་བར་ཚོང་འབྲེལ་བྱེད་པ་དང་། འབྲོག་པས་གྱོན་གོས་དབྱར་གོས་ལ་རས་གོས་ཀྱི་ཕྱུ་པ་དང་དགུན་དུས་ལ་ཚར་རྩག་དང་སློག་པའམ་པགས་རྩག་སོགས་གྱོན་པ་དང་། རྩ་ཆུ་འཛོམས་ས་ལ་གཞིས་སྤོ་སྐབས་རྒྱུ་དངོས་ཆ་ཚང་དོ་བོ་རྒྱབ་ནས་རྟ་དང་གཡག་ལ་ཁལ་བཀལ་ནས་ས་གནས་གཅིག་ནས་གཞན་ལ་གཞིས་སྤོ་བྱེད་པ་དང་། འབྲོག་པ་ཁྱིམ་ཚང་རེ་ཙམ་གཉིས་ཙམ་བྱས་ནས་མི་མེད་ལུང་སྟོང་ལ་རྩ་ཆུ་འཛོམས་སར་ཟླ་གྲངས་གསུམ་བཞི་སྡོད་དགོས་པ་ནས་གཅན་ཟན་དང་རྐུ་ཇག་གི་སྲུང་སྐྱོབས་ཆེད་འབྲོག་པ་ཁྱིམ་ཚང་རེར་འབྲོག་ཁྱི་ངར་མ་བཞི་ལྔ་ཉར་ནས་ཉིན་ཚན་མེད་པར་ཁྱི་གི་སྲུང་བྱ་དམ་པོ་བྱེད་ཀྱི་རེད། ཞིངའབྲོག་ཚང་མས་རང་སྲུང་ཆེད་གོ་མཚོན་མེ་མདའ་དང་གྲི་རིང་ཐུང་སོགས་བདག་ཉར་བྱེད་པ་དང་། ཞིང་པ་ཚོ་ལོ་རེར་སྟོན་འབྲས་ཐེང་གཉིས་འདེབས་ལས་བྱེད་མཁན་ཡང་ཡོད་པ་ནི་གནམ་ཆུ་དང་རྒྱུགས་ཆུ་གཉིས་ལ་སྐྱབས་བཅོལ་ནས་རྒྱུགས་ཆུ་ལ་ཡུར་བ་བྲུས་ནས་ཞིང་ཆུ་འདྲེན་གཏོང་གི་སྟོན་འབྲས་འདེབས་ལས་བྱེད་པ་དང་། ཉེ་འགྲམ་ལ་རྒྱུགས་ཆུ་མེད་མཁན་གྱི་ཞིང་པ་ཚོ་གནམ་ཆུ་ལ་སྐྱབས་བཅོལ་རྒྱུ་ཙམ་ལས་དེང་སང་ནང་བཞིན་ས་འོག་ནས་ཆུ་བྲུ་རྒྱུའི་ཆ་རྐྱེན་མེད་པ་ནས་ཐབས་ཤེས་རྫོགས་པ་དང་། བོད་ཀྱི་ཞིང་ལས་ཡོངས་རྫོགས་སྲོལ་རྒྱུན་ཞིང་ལས་ཁོ་ན་ཡིན་པ་ལུད་སྦྱོར་མང་ཆེ་བ་སྒོ་ཕྱུག་སེམས་ཅན་ར་ལུག་སོགས་ཀྱིས་བཙོག་གཅིན་དང་ཐབ་ཀྱི་སྒོ་ཐལ་དང་མི་གི་བཙོག་གཅིན་སོགས་ལས་སྒྲུབ་པའི་ལུད་སྦྱོར་ལས་དེང་སང་ནང་བཞིན་རྫས་ལུད་རིགས་སྣེ་གཅིག་ཀྱང་མེད་པ་སྲོལ་རྒྱུན་ངོ་མ་ཡིན་པ་ནས་སྟོན་འབྲས་ཐོན་འབབ་ཡང་ནང་མིའི་འཚོ་བ་ཁུངས་ཁྱོལ་ཙམ་ལས་དེང་སང་རྫས་ལུད་ནང་བཞིན་གྱི་ཐོན་འབབ་མེད་པ་ནས་ཞིང་པ་ཉམས་ཆུང་ཚོ་རང་ཁ་རང་གསོ་ཐུབ་ཙམ་ལས་མེད་པ་དང་། ས་ཞིང་མང་བ་དང་རྒྱུགས་ཆུའི་མཐུན་རྐྱེན་འཛོམས་པའི་ཞིང་པ་ཚོ་ལོ་རེར་སྟོན་འབྲས་ཐེངས་གཉིས་བཏབ་ནས་སྟོན་འབྲས་ཐོན་འབབ་ནས་ཁྱིམ་ཚང་གི་དགོས་མཁོ་ཕུད་པའི་འཕྲོས་ལྷག་ཕྱི་ཚོང་བྱེད་པ་དང་། འབྲོག་པ་ཕྱུག་བདག་ལ་དཀར་ཁྲི་ནག་སྟོང་གི་བདག་པོ་ཟེར་བ་ལྟར་ར་ལུག་ཁྲི་ལྷག་དང་། འབྲི་གཡག་སྟོང་ཚོ་ཁ་ཤས་དང་། རྟ་དྲེལ་གསུམ་བརྒྱ་བཞི་བརྒྱ་སྐོར་ཡོད་མཁན་གྱི་འབྲོག་པ་ཕྱུག་བདག་དེ་འདྲ་ཡང་ཡོད་འདུག་ལ་འབྲོག་པ་ཉམས་ཆུང་ཚོར་ར་ལུག་བཅུ་བཅོ་ལྔ་ཙམ་ལས་མེད་པའི་ཁྱིམ་ཚང་དེ་འདྲ་ཡང་ཡོད་པ་འདི་དག་ནི་སྔོན་བསགས་ཀྱིས་འབྲས་བུ་ཁོ་ན་ཡིན་པ་ནང་བསྟན་ཆོས་ལུགས་ལ་དད་པ་དང་ཡིད་ཆེས་ཡོད་མཁན་ཚོའི་ངོས་འཛིན་དེ་རང་བྱེད་པ་ལས་འབད་བརྩོན་ཙམ་གྱི་མིན་པ་དང་། འབྲོག་པ་ཚོ་ཚོང་ལ་འགྲོ་སྐབས་རྟ་དང་། དྲེལ། གཡག། ལུག་སོགས་ལ་ཁལ་བཀལ་ནས་ཞིང་པའི་མཉམ་ཚོང་ལས་བྱེད་པ་དང་། འབྲོག་པ་སྡེ་འཚོ་རེར་འགོ་ཁྲིད་སྤྱི་ཁྱབ་རེ་དང་། འགོ་པ་བཞི། དྲུང་ཡིག་བཅས་སྤྱི་འགོ་ལྷན་རྒྱས་ཀྱིས་སྡེ་འཚོའི་ལས་དོན་ཡོངས་རྫོགས་ཐག་གཅོད་གནང་དགོས་པ་དང་སྤྱི་འགོའི་ལས་འགན་ལོ་གསུམ་ཡིན་པ་དང་མི་མང་ནས་རང་འཇགས་བཞུགས་དགོས་པའི་བསམ་འཆར་སླེབས་ཚེ་སླར་ཡང་ལོ་གསུམ་བཞུགས་དགོས་པ་བཅས་འབྲོག་པའི་འཚོ་བའི་གནས་སྟངས་འདི་ཙམ་དང་། ཞིང་པ་ཡུལ་ཚོ་རེར་འགོ་པ་དང་། རྒན་པོ། དམག་དཔོན་དང་། བཅུ་དཔོན། ཟེར་བ་སོགས་མིང་ངམ་གོ་གནས་མི་འདྲ་བ་མང་པོ་ཡོད་འདུག་པ་འགོ་ཁྲིད་དེ་དག་ནས་ཞིང་པའི་ལས་དོན་ཡོངས་རྫོགས་ཐག་གཅོད་གནང་དགོས་པ་བཅས་ཞིང་པའི་འཚོ་བའི་གནས་སྟངས་འདི་ཙམ་དང་། ཞིང་འབྲོག་གཉིས་ཀྱི་འཚོ་བའི་མདུན་ལམ་ནི་དཀའ་ཚེགས་ཆེ་ལ་ཉེན་ཁ་ཡང་ཆེ་བའི་མི་ཚེའི་མདུན་ལམ་ཞིག་ཡིན་པ་འདྲ།