——-
འཇམ་དབྱངས་དཀར་པོ།
ཏཱ་ལའི་བླ་མ་མཆོག་གིས་རེས་གཟའ་མིག་དམར་ཉིན་ལོ་རེ་བཞིན་འཛམ་གླིང་གི་ཚ་དྲོད་ཇེ་ཆེར་འགྲོ་བཞིན་པར་འཛམ་གླིང་སྤྱི་ཡོངས་ཀྱིས་ལས་འགུལ་སྤེལ་དགོས་པའི་སྐུལ་མ་ནན་པོ་གནང་བར་མ་ཟད། ཧི་མ་ལ་ཡ་དང་མཐོ་སྒང་བོད་ཀྱི་འཁྱག་རོམ་ཚུད་པའི་འཛམ་གླིང་གི་ཁོར་ཡུག་ཉམས་ཆག་ལ་ངོ་རྒོལ་གནང་ཡོད།
དགུང་ལོ་ ༨༠ ཕེབས་པའི་བོད་ཀྱི་ཆོས་ལུགས་ཀྱི་དབུ་ཁྲིད་མཆོག་གིས་གནམ་གཤིས་འགྱུར་ལྡོག་ཐད་ལ་”དཀའ་ངལ་དེ་དག་མིས་བཟོས་པ་ཡིན་”པས་ད་ལྟ་འགྲོ་བ་མི་ཚང་མས་འགན་བླང་སྟེ་ལས་འགུལ་སྤེལ་དགོས་ཚུལ་གསུངས་པར་མ་ཟད། ཡང་ཁོང་གིས་”ང་ཚོས་དཀའ་ངལ་དེ་དག་སེལ་བར་འཇིག་རྟེན་བཀོད་པ་པོ་དང་། ཡང་ན་སངས་རྒྱས་ལ་ཡིད་རྟོན་བྱས་ཏེ་སྨོན་ལམ་རྒྱག་གི་ཡོད། མཚམས་རེར་ང་རང་གིས་དེ་ནི་ཧ་ཅང་རྒྱུ་མཚན་མེད་པ་ཚོར་གྱིན་འདུག་”ཅེས་ཀྱང་གསུངས་ཡོད།
བཙན་བྱོལ་སྒྲིག་འཛུགས་ཀྱི་ངོས་ནས་ཀྱང་སྤྱི་ཟླ་ ༡༡ ཚེས་ ༣༠ ཉིན་ཧྥ་རན་སིའི་རྒྱལ་ས་ཕེ་རི་སི་ནས་འཚོག་རྒྱུ་ཡིན་པའི་《གནམ་གཤིས་འགྱུར་ལྡོག་》ཐད་ཀྱི་འཛམ་གླིང་གི་ཚོགས་ཆེན་ཐོག་སྐུ་ཚབ་གཏོང་རྒྱུ་ཡིན་འདུག
ཏཱ་ལའི་བླ་མ་མཆོག་གིས་”འདི་ནི་རྒྱལ་ཁབ་གཅིག་དང་གཉིས་ཀྱི་དྲི་བ་ཞིག་མིན་པར། འགྲོ་བ་མིའི་དྲི་བ་ཞིག་ཡིན། ང་ཚོའི་འཛམ་གླིང་འདི་ང་ཚོའི་ཁྱིམ་གཞིས་ཡིན་” ཞེས་དང་། ཡང་ཁོང་གིས་”ང་ཚོ་འཇིག་རྟེན་གཞན་ཞིག་ལ་འགྲོ་བའམ་གནས་སྤོར་ས་མེད་”ཅེས་བཤད་པར་མ་ཟད། ཏཱ་ལའི་བླ་མ་མཆོག་གིས་འདས་ལོར་ཡང་”མཐོ་སྒང་བོད་འཚུད་པའི་འཛམ་གླིང་འདི་སྲུང་སྐྱོབ་ཆེད་གཞོན་སྐྱེས་ཚོས་གཞན་ལས་ལྷག་པའི་འགན་འཁུར་དང་ཧུར་བརྩོན་བྱེད་དགོས་”ཞེས་ཀྱང་གསུངས་ཡོད།
འཛམ་གླིང་གི་ཡང་རྩེ་ཡིན་པའི་བོད་མཐོ་སྒང་གི་གནམ་གཤིས་དྲོད་ཚད་དེ་འཛམ་གླིང་སྤྱིའི་གནམ་གཤིས་དྲོ་ཚད་ལས་རིམ་པ་གསུམ་གྱིས་བརྒྱ་ཟུར་ ༡.༣ འཕར་ཚད་ཧ་ཅང་མགྱོགས་པོ་ཆགས་ཏེ་ལོ་ ༥༠ ཕྱིན་ཡོད། ཧེ་མ་ལ་ཡ་ལ་འཛམ་གླིང་གི་སྣེ་གསུམ་པ་ཞེས་འབོད་པ་དང་། ཧི་མ་ལ་ཡའི་རི་རྒྱུད་ཡོངས་འཁྱག་རོམ་ཡིན་པར་མ་ཟད། དེས་འཛམ་གླིང་གི་བྱང་དང་ཤར་སྣེ་གཉིས་ཀྱི་གནམ་གཤིས་ལ་ཡང་འགྱུར་ལྡོག་ཆེན་པོ་འགྲོ་བར་བྱེད།
ལོ་རྒྱུས་ཐོག་བོད་མཐོ་སྒང་གི་ཁོར་ཡུག་གཉོམ་ཆུང་དེར་རྒྱུས་ཡོད་ཆེ་ཤོས་ནི་རྒྱ་ནག་ཡིན་པར་མ་ཟད། འཛམ་གླིང་གི་ཆུ་གཙང་བརྒྱ་ཆ་ ༤༠ འབྱུང་ཁུངས་ཀྱི་སྒམ་ཆུང་དེ་ཡང་ཧི་མ་ལ་ཡའི་འཁྱག་རོམ་ཡིན་པ་དང་། ཧི་མ་ལ་ཡའི་འཁྱག་རོམ་གྱིས་གནང་བའི་གཙང་པོ་ཆེན་པོ་བདུན་རྒྱ་ནག་དང་བལ་ཡུལ། རྒྱ་གར། པཱ་ཀི་སི་ཐན། བྷང་ལ་དྷེ་ཤི་བཅས་བརྒྱུད་ནས་བཞུར་བ་ཡང་གསལ་བོ་ཤེས་ཀྱི་ཡོད།
རྒྱ་ནག་གི་ཁོར་ཡུག་དང་གནམ་གཤིས་འགྱུར་ལྡོག་ཚན་རིག་གཙུག་ལག་སློབ་གཉེར་ཁང་གི་ཡན་ལག་བོད་མཐོ་སྒང་ཞིབ་འཇུག་སློབ་གཉེར་ཁང་གིས་བཤད་པ་ལྟར་ན། སྤྱི་ལེ་གྲུ་བཞི་མ་ས་ཡ་ ༢.༥ (ལེ་དབར་གྲུ་བཞི་མ་ ༩༦༦,༠༠༠) རྒྱ་ཁྱོན་ཡོད་པའི་བོད་རང་སྐྱོང་ལྗོངས་དང་མཚོ་སྔོན། སི་ཁྲོན་གྱི་ཆ་ཤས། ཡུ་གར་གྱི་ལྷོ་རྒྱུད་ཤིན་ཅང་རང་སྐྱོང་ལྗོངས་བཅས་མཐོ་སྒང་གི་འཁྱག་རོམ་དང་འཁྱག་པ་བརྒྱ་ཆ་ ༧༠ ལྷག་སྲོག་རླུང་ཉིས་ལྡན་གྱི་ཁམས་རྫས་ནག་པོ་དང་རླངས་རླུང་གི་རྙི་ལ་འཚུད་ཡོད་པ་དང་། ཚན་རིག་པས་དྲོད་ཁང་གི་ལྡོག་འཕྲོའི་རླངས་གཟུགས་ཀྱིས་མཐོ་སྒང་གི་འཁྱག་རོམ་ཞུ་ནས་དྲོད་ཚད་འཕར་བ་དེ། ཁམས་རྫས་ནག་པོས་འཁྱག་རོམ་ཞུ་སྟེ། འཛམ་གླིང་གི་དྲོད་ཚད་འཕར་བ་ལས་དུས་ཚོད་ ༣༠ ལྷག་ནུས་ཤུགས་ཆེ་བར་ཡང་བཤད་འདུག
གནའ་བོའི་དུས་སུ་ཆུ་ཙམ་བཙལ་བས་ཚིམས། །
དེ་ནས་ཆུ་གཙང་གར་ཡོད་བཙལ་བ་ལ། །
ད་ལྟ་བཙོག་ཆུ་གཙང་སྒྱུར་ཅིག་ལ་རེ། །
སྙིགས་ལྔ་དར་དུས་འབྱུང་བའང་སྙིགས་ལ་ལྟོས། །