བོད་ཀྱི་རང་དབང་ལས་འགུལ་ཡུན་གནས་ཐུབ་པའི་ལམ་གཅིག་དེ་གང་རེད་ཅེས་ན། དེ་ཆབ་སྲིད་ཀྱི་ཚོགས་པ་༼Political Party༽འཛུགས་རྒྱུ་དེ་རེད། དེ་འཛུགས་ཐུབ་ནས་མང་ཚོགས་ཀྱི་རྒྱབ་སྐྱོར་ཡོད་པ་དང་། གོང་ནས་བླ་ཆེན་རྣམས་ཀྱིས་མཐུན་རྐྱེན་གནང་ན། དེ་ནི་བོད་ཀྱི་རང་དབང་གི་འཐབ་རྩོད་དེ་རྡོ་རྗེའི་ས་གཞི་ལྟ་བུར་བརྟན་པོར་གནས་ཐུབ་པའི་ལམ་རེད་སྙམ
ཆབ་སྲིད་ཚོགས་པའི་དགེ་དགེ་མཚན་ནི།
༡༽སྤྱི་ཐུས་ཀྱི་མིའི་སྤུས་ཚད་ལེགས་སུ་འགྲོ་བ།
དེ་གང་འདྲ་རེད་ཟེར་ན། ང་ཚོ་ད་ལྟ་སྤྱི་ཐུས་ཚང་མ་ལུང་ཆུང་གི་ཕྱོགས་བཞེན་ལ་བརྟེན་ནས་འདེམས་དགོས་ཀྱི་ཡོད། ཨ་མདོ་ཡིན་ན་ཨ་མདོ་ཞར་བ་གཅིག་ཡིན་ནའི་ཨ་མདོ་བ་ཚོས་་ཁོ་ལ་འདེམས་ཤོག་དེ་བླུག་དགོས་ཀྱི་ཡོད་ལ། དབུས་གཙང་བ་གཅིག་ཡིན་ན། ཡུལ་དེའི་སྤྱི་ཐུས་དེ་ཉིན་གང་ཁ་ཆང་དང་བྲལ་མི་ཐུབ་པའི་མི་ར་གཟི་བ་གཅིག་ཡིན་ནའི་ཁོ་ལ་དབུས་གཙང་གི་འདེམས་ཤོག་འདི་མ་ཕེན་ཐབས་མེད་རེད། འདིའི་འབྲས་བུ་དེ་ང་ཚོའི་སྤྱི་ཚོགས་ནང་མི་འཇོན་ཐང་ཅན་དང་ཡོན་ཏན་ཅན་ཚོ་གཞུང་ཞབས་ལ་སླེབས་ལམ་འགག་པ་རེད། གལ་ཏེ་ཆབ་སྲིད་ཀྱི་ཚོགས་པ་ཞིག་འཛུགས་ཐུབ་པ་ཡིན་ན། ཚོགས་པ་དེའི་ཐུས་མི་འདེམས་པའི་སྒོ་ཡངས་པོར་ཕྱེ་ནས། ཐོག་མའི་འདེམས་ཤོག བར་གྱི་འདེམས་ཤོག མཐའ་མའི་འདེམས་ཤོག་བཅས་ལ་བརྟེན་ནས་མི་འཇོན་ཐང་ཅན་རྣམས་ཡར་སླེབས་པའི་འགྲོ་ལམ་བཟོ་ཐུབ།
༢༽ ལུང་ཆུང་གི་ཕྱོགས་བཞེན་འགྲོལ་ནས་ལྟ་བ་དང་ལངས་ཕྱོགས་ཀྱི་ཕྱོགས་བཞེན་ལ་འགྱུར་བ།
ཆོལ་ཁར་བརྟེན་ནས་སྤྱི་ཐུས་འདེམས་པ་ཡིན་ན། སྤྱི་ཐུས་ནང་ལ་ལུང་ཆུང་དང་དོན་ཆུང་གི་བརྩོད་པ་རྒྱབ་མཁན་མི་སྤྱོད་ངན་ཤ་སྟག་སླེབས་པ་ལས་སྤྱིའི་བདེ་སྡུག་ལ་བསམ་བློ་གཏོང་མཁན་གྱི་མི་སླེབས་ཐུབ་ཡས་མེད། ང་ཨ་མདོ་ཞིག་ཡིན་ན། རྟག་ཏུ་དབུས་ཙང་དང་ཁམས་པས་ཨ་མདོ་ལ་མགོ་སྐོར་གཏོང་གི་འདུག་མིན་འདུག་བསམ་བློ་གཏོང་ནས་སྡོད་རྒྱུ་ཡིན། ཁམས་པས་གྲོས་གཞི་ཞིག་བཏོན་ན་འདི་ཨ་མདོར་གྱོང་འདུག་མིན་འདུག་བསམ་བློ་གཏོང་རྒྱུ་རེད་མ་གཏོགས་དེས་བོད་པ་སྤྱིར་ཕན་གྱི་ཡོད་མིན་བསམ་བློ་གཏོང་ཐུབ་ཀྱི་མ་རེད། ངའི་ལས་འགན་འདི་ཨ་མདོའི་ཁེ་ཕན་ལེན་རྒྱུ་རེད་མ་གཏོགས་བོད་པ་སྤྱིའི་ཁེ་ཕན་ལེན་ཡས་འདི་མ་རེད་པཱ།
གལ་ཏེ་ཆབ་སྲིད་ཀྱི་ཚོགས་པ་ཞིག་གི་ངོས་ནས་སྤྱི་ཐུས་ལ་ཞུགས་པ་ཡིན་ན། གནས་ཚུལ་ཁག་ཁག་ཆགས་པ་རེད། ང་་ཆབ་སྲིད་ཀྱི་ཚོགས་པ་ཞིག་གི་ཐུས་མི་ཡིན་པའི་ངོས་ནས་དང་པོ་ཚོགས་པ་འདིའི་ཁེ་ཕན་ལ་བསམ་བློ་གཏོང་དགོས་ཀྱི་ཡོད། ཆབ་སྲིད་ཀྱི་ཚོགས་པ་དེར་སྒྲིག་གཞི་དང་དམིགས་ཡུལ། རྩ་དོན། ལྟ་བ་ཅས་ཞིང་ཅིང་ཕྲ་བ་ཡོད་སྟབས། དེས་ལམ་སྟོན་བྱས་པའི་འོག་ལ་འགྲོ་དགོས་སྟབས། ལུང་ཆུང་དང་ཡུལ་བཞེན་སྐམ་པོ་རྣམས་ལྟག་ཆུ་ཆད་པའི་འཛིང་ཆུ་བཞིན་མགྱོགས་མྱུར་སྐྱོན་དེ་མཇུག་སྒྲིལ་ཐུབ། དཔེར་ན་ཆབ་སྲིད་ཀྱི་ཚོགས་པ་དེར་ཆོལ་ཁ་ཚང་མའི་མི་ཡོད་སྟབས་ཡུལ་ལུང་གི་ཕྱོགས་བཞེན་མེད་པར་འགྲོ། དཔེར་ན་རྒྱ་ནག་དམར་ཤོག་གི་ཚོགས་པའི་འོག་ལ་རྒྱའི་ལུང་ཆུང་གི་རྙོག་ཟིང་མང་པོ་མེད་པར་འགྱུར། ཨ་རི་ཡིན་ནའི་དེ་འདྲ་རེད། ང་ཚོ་ཆབ་སྲིད་ཀྱི་ཚོགས་པ་ཞིག་འཛུགས་ཐུབ་ན། ཁྱོད་ཨ་མདོ་ང་ཁམས་པ་ཟེར་བའི་དམར་རྫིང་འདི་རྒྱག་དགོས་ཀྱི་མེད།
༣༽བོད་ཀྱི་རང་དབང་ལས་འགུལ་ཤུགས་ཆེར་འགྲོ་བ།
ཆབ་སྲིད་ཚོགས་པའི་འོག་ལ་དམངས་གཙོ་སྤེལ་ཐུབ་ན། ཚོགས་པ་ཁག་གི་ལྟ་བ་རྣམས་ཇེ་གསལ་ལ་འགྲོ་བ་དང་དེར་མང་ཚོགས་ཀྱི་རྒྱབ་སྐྱོར་གསལ་པོར་སྟོན་ཐུབ་ནས་བོད་ཀྱི་རང་དབང་གི་ལས་འགུལ་དེ། ལས་ཞོར་ཆབ་སྲིད་ལས་འགུལ་ལས་ཡོངས་རྫོགས་ཆབ་སྲིད་ཀྱི་ལས་འགུལ་ལ་འགྱུར་ཐུབ། དེ་གང་འདྲ་ཟེར་ཡིན་མིན་ཁྱེད་རྣམས་ཀྱི་ཚོད་དཔག་བྱས་ནས་གཤམ་ལ་མཆན་བུའི་ཐོག་འགོད་རོགས། ང་ད་ལྟ་ལས་ཞོར་ཆབ་སྲིད་པ་ཡིན་པའི་དབང་གིས་སྔོན་ལ་ལྟོ་གོས་༼$$༽སྒྲུབ་པར་འགྲོ་དགོས་ཀྱི་འདུག
ཐེངས་རྗེས་མར་ཆབ་སྲིད་ཀྱི་ཚོགས་པ་འཛུགས་མ་ཐུབ་ན་བོད་ཀྱི་རང་དབང་ལས་འགུལ་དེ་གོང་ས་མཆོག་གི་སྐུ་ཚེ་དང་མཉམ་འདུ་མཇུག་སྒྲིལ་རྒྱུ་དང་། གོང་ས་མཆོག་སྐུ་གཤེགས་རྗེས། ཆོལ་ཁ་དང་ཆོས་ལུགས་ཀྱི་མིང་ཁྱེར་ནས་བོད་མིའི་སྐུ་ཚབ་ཡིན་ཟེར་མཁན་གྱི་ཚོགས་པ་གྲངས་ལས་འདས་པ་ཞིག་པེ་ཅིང་ལ་བསྐྱོད་ནས་རང་མགོ་གང་འཐོན་བྱེད་པའི་གནས་ཚུལ་ཡོང་རྒྱུའི་སྐོར་ལ་འབྲི་རྩིས་ཡིན།