བོད་ཀྱི་སྤྲུལ་སྐུའི་ལམ་ལུགས་ཀྱི་བྱུང་རིམ་དང༌། བླ་སྤྲུལ་རེ་ཟུང་གི་བྱས་ཉེས་སོགས་གླེང་བ་བརྒྱུད་འབྱུང་འགྱུར་བོད་ཀྱི་བླ་སྤྲུལ་ངོས་འཛིན་བྱེད་ཐབས་ཀྱི་ལམ་ལུགས་ལ་འགྱུར་བཅོས་ཇི་ལྟར་བྱས་ནས་གཏང་དགོས་མིན་ཐད་ཀྱི་བསམ་ཚུལ་རགས་བསྡུས།
སྡ་སའི་མུག་པ།
སྤྱིར་བླ་སྤྲུལ་ངོས་འཛིན་བྱེད་པའི་ལམ་སྲོལ་འདི་ནང་པ་ཚོས་གསར་དུ་རྙེད་པ་ཞིག་ཏུ་སེམས་ཤིང༌། ལུགས་སྲོལ་འདིས་དུས་ཕྱིས་སུ་བྱུང་བའི་འཛམ་གླིང་གི་ཆོས་ལུགས་ཧ་ཅང་མང་པོར་་ཤུགས་རྐྱེན་ཆེན་པོ་ཐེབས་ཡོད། རྒྱ་གར་དུ་ལུགས་སྲོལ་དེ་ཡོངས་ཁྱབ་རང་བཞིན་ཅན་དུ་གྱུར་ཐུབ་མེད་པ་རེད།
རང་རེའི་བོད་དུ་མི་རྗེ་སྲོང་བཙན་གྱི་མདུན་བློན་ཚོས་ཐོག་མར་སྲོང་བཙན་ཐུགས་རྗེ་ཆེན་པོའི་རྣམ་སྤྲུལ་ཡིན་ཚུལ་འུད་སྒྲོག་བྱས་པ་དང༌། སྲོང་བཙན་གྱིས་ཀྱང་བལ་རྗེའི་སྲས་མོ་ཁྲི་བཙུན་དང་རྒྱ་རྗེའི་སྲས་མོ་ཀོང་ཇོ་གཉིས་རིམ་བཞིན་ཁྲོ་གཉེར་མ་དང་རྗེ་བཙུན་སྒྲོལ་མའི་རྣམ་སྤྲུལ་ཡིན་པས་དེ་གཉིས་རང་གི་མདུན་ཐབས་སུ་ལེན་དགོས་པའི་བཙན་བཀའ་བཏང༌། མ་ཟད་བལ་ཡུལ་ནས་འཕགས་པ་ལོ་ཀེ་ཤོ་ར་གདན་འདྲེན་མཁན་གྱི་དགེ་སློང་དེ་ཡང་ཁོ་བོས་སྨིན་མཚམས་ཀྱི་མཛོད་སྤུ་ལས་སྤྲུལ་ཚུལ་བཤད། དེ་རྗེས་འཕྲུལ་སྣང་གཙུག་ལག་ཁང་དང་ར་མོ་ཆེའི་གཙུག་ལག་ཁང་གཉིས་བཞེངས་བསྐྲུན་བྱེད་པའི་ལས་མི་ཡོངས་རྫོགས་ལྷ་ཀླུ་གཉན་གསུམ་གྱི་སྤྲུལ་པ་ཡིན་ཚུལ་གླེང་བ་མ་ཟད། ནང་བར་འཕྲུལ་སྣང་གཙུག་ལག་ཁང་དུ་ཐུགས་རྗེ་ཆེན་པོ་སྤྱན་འདྲེན་པའི་རྟ་གོན་སྐབས་གློ་བུར་དུ་སྐུ་དེ་བོར་བརླག་བྱུང༌། རྗེས་སོར་རྙེད་སོན་བྱུང་སའི་ས་ཕྱོགས་དེ་དང་ཉེ་བ་ཞིག་ནས་ནེ་ཙོ་ཞིག་གིས་སྐད་ཡུན་རིང་རྒྱབ་པའི་རྒྱུ་མཚན་གྱིས་ནེ་ཙོ་དེ་ཡང་ལྷ་མངོན་ཤེས་ཅན་ཞིག་གི་སྤྲུལ་པར་ངོས་འཛིན་བྱས་འདུག དེ་བཞིན་དུ་བཙན་པོ་ཁྲི་སྲོང་ལྡེ་བཙན་རྗེ་བཙུན་བསྟན་པའི་འཁོར་ལོའི་སྤྲུལ་སྐུ་དང༌། བསམ་ཡས་གཙུག་ལག་ཁང་བཞེངས་མཁན་གྱི་ལས་མི་ཡོངས་རྫོགས་ལྷ་དང་འདྲེ་སྲིན་སེམས་བཟང་ཅན་ཤ་སྟག་གི་སྤྲུལ་པ་ཡིན་ཚུལ་སོགས་ཀྱང་གོང་བཞིན་གླེང༌།
ཤུགས་རྐྱེན་དེ་དག་ལ་བརྟེན་ནས་བོད་ཀྱི་ལོ་རྒྱུས་ནང་རྟོགས་པ་མཐོན་པོར་སླེབས་ཁུར་གྱི་སྔགས་པ་དང༌། དབང་ཆ་དང་གོ་གནས་མཐོ་བའི་དཔོན་པོ་སོགས་ཀྱིས་ཀྱང་རང་རང་གི་ཟླ་མོ་དང༌། བུ་ཕྲུག་སོགས་ཀྱང་གསང་སྔགས་ཀྱི་གཞུང་ནས་བཤད་པའི་མཁའ་འགྲོ་མ་དང་རྟ་མགྲིན། དེ་བཞིན་ནོར་རྒྱུན་མ་དང་དབྱངས་ཅན་མ། རྗེ་བཙུན་འཇམ་དབྱངས་སོགས་ཀྱི་རྣམ་སྤྲུལ་ཡིན་ཚུལ་གྱིས་འུད་སྒྲོག་ཤུགས་ཆེ་བྱེད་པའི་ལམ་སྲོལ་དར་བ་མ་ཟད། སྐབས་རེ་རང་གིས་རང་ཉིད་ཀྱང་སྐབས་དེ་དང་དེའི་བོད་མི་ཚོས་རྩ་ཆེར་བརྩི་བའི་འཇིག་རྟེན་དང་འཇིག་རྟེན་ལས་འདས་པའི་ལྟ་མཐུ་བོ་ཆེ་སོགས་ཀྱི་སྤྲུལ་སྐུ་ཡིན་མདོག་གིས་རྣམ་འགྱུར་སྟོན་མཁན་ཀྱང་ཤུགས་ཆེ་བྱུང་ཡོད། འོལ་ཚོད་དང་གཡམ་རྒྱུག་བྱས་ཏེ་རང་ཤེད་ཀྱིས་བླ་སྤྲུལ་ངོས་འཛིན་བྱེད་སྟངས་ཀྱི་ལམ་སྲོལ་འདིས་ཅུང་ཞིབ་ཚགས་ཤིང་ཁྲུག་ཆ་བཏོད་པའི་བོད་ཀྱི་ཡང་སྲིད་ངོས་འཛིན་བྱེད་པའི་ལམ་སྲོལ་གྱི་ཐོག་མའི་རྨང་གཞི་བྱས་འདུག་པར་སེམས།
ཕྱི༡༢༨༤ལོར་གྲུབ་ཐོབ་ཨུ་རྒྱན་པ་རིན་ཆེན་དཔལ་གྱིས་ཀརྨ་རང་བྱུང་རྡོ་རྗེ་ཀརྨ་པཀ྄-ཤའི་ཡང་སྲིད་དུ་ངོས་འཛིན་བྱས་པ་ནས་བཟུང་སྐྱེས་ཆེན་དམ་པ་གཅིག་གི་ཡང་སྲིད་རྒྱུན་མཐུད་ནས་ངོས་འཛིན་བྱེད་པའི་ལམ་སྲོལ་དར་ཞིང༌། རིམ་པས་སྔར་བྱས་ལ་དཔེ་ལྟོས་ཀྱིས་བོད་ཀྱི་མདོ་དབུས་ཁམས་གསུམ་དུ་དུས་ཡུན་ཐུང་ཐུང་ནང་ཡང་དག་མིན་གྱི་བླ་སྤྲུལ་འབོར་ཆེན་ཞིག་བྱུང་འགོ་ཚགས་པ་མ་ཟད། བོད་མི་རྨོངས་དད་པ་ཚོས་བླ་སྤྲུལ་དེ་ཚོར་ཚད་ལས་བརྒལ་བའི་མཐོང་ཆེན་དང་བརྩི་བཀུར་བྱས་པའི་ཉེར་ལེན་གྱིས་སྤྲུལ་རྫུན་གྱི་རིགས་དང༌། མ་འདས་སྤྲུལ་སྐུ་ཟེར་བ། དེ་བཞིན་འབྲུག་པ་ཀུན་མཁྱེན་པད་དཀར་ལྟ་བུས་མཚོན་བླ་མ་གཅིག་ལ་ཡང་སྲིད་གཉིས་གསུམ་དང་བཅུ་གྲངས་བྱུང་བ་སོགས་ཀྱིས་ཞལ་སློབ་དང་སྦྱིན་བདག་ཞབས་གྲས་དང་གཉེན་ཉེ་སོགས་ཀྱིས་དུས་ནས་དུས་སུ་འཐེན་འཁྱེར་བྱས་ཏེ་བོད་ནང་སྡེ་གཟར་གྲངས་ཀྱིས་མི་ལངས་པ་བྱུང༌།
གང་ལྟར་ལཽ་ངོ་བརྒྱད་བརྒྱ་ལྷག་གི་རིང་ལ་བོད་ཀྱིས་བླ་སྤྲུལ་མང་ཆེ་བས་དབུས་གཞུང་དང་ས་གནས་ཁག་གི་དཔོན་ངན་ཚོ་དང་ངན་པ་ལག་སྤྲེལ་བྱས་ཏེ་ས་འབྲུ་བར་དང་ས་ཕག་བར། དེ་བཞིན་རིན་སྤུངས་དང་དགེ་ལུགས་བར། གཙང་པ་སྡེ་སྲིད་དང་དགེ་ལུགས་བར། རྙིང་མ་དང་དགེ་ལུགས་བར། གཙང་འབྲུག་བར་བཅས་ལ་མི་གསོད་ཁྲག་སྦྱོར་གྱི་དམག་འཁྲུག་གྲངས་མེད་བསླངས་ཤིང༌། ཐ་ན་སེ་འབྲས་གཉིས་མི་ལོ་ཉི་ཤུའི་རིང་ལྷ་ལྡན་སྨོན་ལམ་ཆེན་མོར་ཕེབས་མ་ཆོག་པ་བཟོས་པ། སྡེ་སྲིད་སངས་རྒྱམ་དམར་གསོད་དང༌། རྒྱལ་པ་ཚངས་དབྱངས་རྒྱ་མཚོ་རྒྱང་ཕུད་དུ་བཏང་བ། རྒྱལ་དབང་ལྔ་བའི་ཡང་སྲིད་རྫུན་མ་བཟོས་པ། མཁས་དབང་དགེ་ཆོས་ཉེས་མེད་བཙོན་འཇུག་བྱས་པ་ཚུན་ཆད་ཀྱི་རྒྱབ་ཕུགས་བླ་སྤྲུལ་འགས་བྱས་པ་ཤ་སྟག་ཏུ་སྣང༌།
བླ་སྤྲུལ་དེ་རིགས་ཀྱིས་མི་སེར་གྲངས་མེད་པར་མགོ་སྐོར་བསླུ་བྲིད་ཀྱིས་འབུལ་སྡུད་ཤུགས་ཆེ་བྱས་ཏེ་རང་ཉིད་ཀྱི་གཉེན་ཉེ་བུ་ཚ་དག་ཁྱི་ཕག་བཞིན་གསོ་ཐབས་ལ་འབད་པ་མ་གཏོགས། སྤྱི་དམངས་ལ་དབང་བའི་འཁོར་ཡུག་འཛུགས་སྐྲུན་དང་ཤེས་ཡོན་དང་འབྲེལ་བའི་ལྟེ་གནས་ཁག་གསར་བཞེངས༌། ཉམས་ཐག་རྣམས་བདག་གཉེར་བྱེད་སའི་རྒས་གསོ་ཁང་དང་བུ་གསོ་ཁང་སོགས་བརྒྱབས་པའི་ལོ་རྒྱུས་ཀྱི་དྲི་ཙམ་མི་སྣང་བ་མ་ཟད། གློ་བུར་དུ་འཆི་བ་ཐོག་ཏུ་བབ་སྐབས་སུའང་རང་ཉིད་ཀྱི་རྒྱུ་ནོར་ལྷག་ལུས་དག་གཉེན་ཉེ་དང་སྤུན་མཆེད་སོགས་ཀྱིས་ཧམ་རྩོད་བྱས་ཏེ་ཁྱོད་ཤི་ང་གསོན་གྱི་འཐབ་རྩོད་ཡ་ང་བ་བྱུང་བའི་ལོ་རྒྱུས་ཧ་ཅང་མང༌།
གནག་ཕྱོགས་ལ་དགའ་བའི་འདྲེ་སྲིན་འགའ་ཤས་ཀྱིས་བོད་མི་རེ་ཟུང་བླ་སྤྲུལ་ག་གེ་མོ་ཞིག་གི་ཡང་སྲིད་ཡིན་ཚུལ་བཤད་པས་མི་ཚད། རང་ཉིད་ཀྱིས་ཀྱང་བླ་སྤྲུལ་དེ་དང་དེའི་ཡང་སྲིད་ཡིན་མདོག་དང་རྟོགས་པ་ལྷ་དང་མཉམ་མདོག་གིས་བླ་སྤྲུལ་དེ་རིགས་ཀྱི་མཚན་གནས་བེད་སྤྱོད་བྱས་ཏེ་དད་ལྡན་མང་ཚོགས་ཚོ་བསླུ་ཐབས་སྣ་མང་གིས་རང་ཉིད་འབྱོར་ལྡན་ཅན་དུ་བསྒྱུར་བཞིན་ཡོད་པ་མ་ཟད། རྗེས་སུ་ཀུན་གྱིས་སྤྱི་མོས་ཡོད་པའི་བླ་མ་ཚད་ལྡན་པ་ཚོས་བླ་སྤྲུལ་དེ་དང་དེའི་ཡང་སྲིད་མིན་པའི་དངོས་དོན་ར་སྤྲོད་བྱས་དུས། ད་དུང་སྔར་འགྱོད་ཕྱིས་་རྡོམ་བྱེད་རྒྱུ་ཕར་བཞག་ནས་སྔར་དད་ལྡན་མང་ཚོགས་ཚོའི་ལག་ནས་བླངས་པའི་དངུལ་དངོས་དག་ལ་བག་མེད་ལོངས་སྤྱོད་བྱས་ཏེ་སྤྱི་ཚོགས་ནང་གདོང་ནག་པོ་བསྟན་ནས་འགྲོ་བཞིན་ཡོད།
གཞན་ཡང༌། སྟོབས་དང༌། གོ་གནས་སཽགས་ཀྱི་ཆེད་དང་ཆབ་སྲིད་ཀྱི་དགོས་དབང་ཁོ་ནའི་ཆེད་དུ་ངོས་འཛིན་བྱས་པའི་བླ་སྤྲུལ་རྫུན་མའི་རིགས་ཀྱང་ཇེ་མང་ནས་ཇེ་མང་དུ་འགྲོ་བཞིན་ཡོད།
ལྷག་པར་དུ་བླ་མ་དང་སྤྲུལ་སྐུ་ཡིན་ཟེར་མཁན་རེ་ཟུང་གིས་སྤྲུལ་ལོག་བྱས་ཐོག་བུད་མེད་བརྒྱ་ཕྲག་མང་པོར་འཁྲིག་སྤྱོད་ཀྱི་འབྲེལ་ལམ་བཟོས་ཏེ་ཁྱིམ་ཚང་གི་བདེ་འཇགས་གཏོར་བཤིག་གཏོང་བ་དང༌། སྤྱི་ཚོགས་ཟང་ཟིང་ཅན་དུ་བཟོས་པ་སོགས་ཚུལ་མིན་གྱི་མིག་དཔེ་ངན་པ་འདྲ་མིན་འཇོག་བཞིན་ཡོད།
གཞན་ཡང་བླ་སྤྲུལ་རེ་ཟུང་གིས་བླ་སྤྲུལ་ཚོའི་གཅིན་སྐྱག་གི་བྱིན་རླབས་ཀྱི་ཚན་ཁ་གཞན་དང་མི་འདྲ་བ་བཅོམ་ལྡན་འདས་ཀྱི་མདོ་ལུང་གིས་ཟིན་ཚུལ་སོགས་བཤད་དེ་འོ་མ་དང་སྦྲང་རྩི་སོགས་ཀྱི་ནང་དུ་བཏབ་ནས་རང་ཉིད་ལ་གློ་སྙིང་བྲང་གསུམ་གཏོད་མཁན་གྱི་མི་སེར་དཀྱུས་མ་ཚོའི་ལུས་ཀྱི་སྟོད་སྨད་བར་གསུམ་དུ་བྱུགས་པ་དང་ཁར་འཐུང་དུ་འཇུག་པ་སོགས་འགྲོ་བ་མིའི་སྤྱོད་ཚུལ་དང་ཡོངས་སུ་འགལ་བའི་སྣང་བ་གང་དྲན་བྱས་དང་བྱེད་བཞིན་ཡོད།
དེར་བརྟེན་རྒྱ་ནག་དམར་གཞུང་གིས་བོད་ནང་མི་ལོ་བཅུ་ཕྲག་གཅིག་གི་རིང་རིག་གནས་གསར་བརྗེ་ཟེར་བའི་ལས་འགུལ་སྤེལ་སྐབས་བོད་མི་བསམ་མེད་རེ་ཟུང་གིས་གོ་སྐབས་དམ་འཛིན་བྱས་ཏེ་བླ་སྤྲུལ་འགར་རང་ཉིད་ཀྱི་གཅིན་སྐྱག་བླུགས་པའི་ལོ་རྒྱུས་ཀྱང་བྱུང་མྱོང་ཡོད་པ་ཡོངས་གྲགས་ཡིན། མི་སེར་ཚོས་ཀྱང་རང་ཉིད་དད་འདུན་ཆེས་ཆེ་སའི་བླ་སྤྲུལ་ཚོའི་གཅིན་སྐྱག་དང་སོ་ལག་གདོང་གསུམ་རྐང་པ་སོགས་ཀྱི་ཚི་དྲེག་བཀྲུས་པའི་ཁུ་བ་སྣོད་ཆས་གཙང་མའི་ནང་དུ་བླུགས་ཏེ་ནད་རིགས་བཞི་བརྒྱ་རྩ་བཞི་འཇོམས་པའི་སྨན་མཆོག་ཡིན་ཚུལ་བཤད་དེ། སངས་རྒྱས་དང་བྱང་སེམས་སོགས་ཀྱི་སྐུ་གསུང་ཐུགས་རྟེན་དང༌། འོད་ཆེམ་ཆེམ་དུ་འབར་བའི་མཆོད་མེ་སོགས་ཀྱི་མདུན་གྲར་དུ་བཞག་སྟེ་གུས་བཀུར་མཚོན་ཐབས་བྱེད་ཀྱི་ཡོད།
མ་ཟད་བོད་མི་མང་ཆེ་བས་བླ་སྤྲུལ་ཚོའི་རྒྱབ་ལྗོངས་ཀྱི་ལོ་རྒྱུས་དང་མིག་སྔའི་སྤྱོད་ཚུལ་སོགས་ལ་དབྱེ་ཞིབ་གཏན་ནས་མི་བྱེད་པར་བླ་སྤྲུལ་ཚོ་ལ་སྐྱེ་འཆིའི་རང་དབང་ཡོད་ཚུལ་དང༌། ལྷག་དོན་བླ་སྤྲུལ་ཚོར་དད་གུས་ཚུལ་བཞིན་མི་བྱེད་པའི་མི་ཚོ་དམྱལ་བའི་གཏིང་རྡོར་འཕེན་པའི་ནུས་པ་ཡོད་སྟངས་བཤད་པས་མི་ཚད། བླ་སྤྲུལ་དེ་ཚོའི་མགོ་སྐེ་གང་རུང་ཞིག་ལ་སྐྲང་འབུལ་ཞིག་བྱུང་ནའང་དེ་ནི་སངས་རྒྱས་ཀྱི་མཚན་བཟང་ཞིག་ཡིན་ཚུལ་ཨུ་ཚུགས་ཀྱིས་གླེང༌། མ་ཟད་བོད་མི་ཚོས་སངས་་རྒྱས་དང་བྱང་སེམས་ཚོའི་བཀའ་དང་བསྟན་བཅོས་དག་ལས་ལུང་ཚིག་འགའ་རེ་དྲངས་ནས་ལུང་ཚིག་དེ་དག་གི་ནང་རང་རང་གི་བླ་སྤྲུལ་ཚོའི་མིང་གི་ཆ་ཤས་རེ་ནན་ཀྱིས་བཅུག་་ནས་ངའི་བླ་མ་དང་ངའི་སྤྲུལ་སྐུ་ལུང་བསྟན་ཚུལ་བཤད་ཀྱི་ཡོད།
དགོད་བྲོ་བ་ཞིག་ལ་བོད་མི་ཚོས་རང་རང་གི་བླ་སྤྲུལ་ཚོའི་ཐུན་མོང་མ་ཡིན་པའི་སྐྱེས་འཕྲེང་བགྲང་སྐབས་སྟོད་རྒྱ་གར་གྱི་ཆོས་དཔོན་དང་རྒྱལ་བློན་མི་དྲག་ནས་་བཟུང་སྟེ་རང་རེའི་བོད་ཀྱི་ཆོས་དཔོན་དང་རྒྱལ་བློན་མི་དྲག་ཡོད་ཚད་འདྲེན་བཞིན་འདུག རིམ་པས་ན་གཞོན་དོན་འགྲུབ་རྒྱལ་གྱིས་མཚོན་བོད་མི་ཤེས་ལྡན་པ་ཚོས་བླ་སྤྲུལ་དེ་རིགས་ཀྱི་སྤྱོད་ཚུལ་ལ་སེམས་གཏིང་ནས་མ་བཟོད་པར་ཁོང་ཚོའི་སྐྱུག་བྲོ་བའི་ལོ་རྒྱུས་དངོས་དམར་རྗེན་དུ་བཏོན་པའི་རྩོམ་ཡིག་མང་དུ་སྤེལ་ཐབས་བྱས་ཡོད་ནའང་ཁོང་ཚོའི་ཐོག་ཏུ་མི་ཤུགས་དང་དབང་ཤུགས་འདྲ་མིན་དངོས་ཤུགས་བརྒྱུད་གསུམ་ནས་བཤམས་པར་བརྟེན་རྩོམ་པ་པོ་དེ་རིགས་མི་རིང་བར་སྤྱི་ཚོགས་ནང་གྲགས་འགུལ་མེད་པ་ཆགས་ཀྱི་ཡོད་པ་མ་ཟད། མཚམས་རེར་སྲོག་ཉེན་ལ་ཐུག་པའང་ལན་གཅིག་མིན་པར་བྱུང་ཡོད།
མདོར་བསྡུས་ནས་བཤད་ན། ཐའེ་ལན་ཌའི་རྒྱལ་ཡོངས་ནང་རླབས་ཆེན་དུ་བརྩི་བའི་ཕ་ར་ཡན་ཌ་ཨ་མ་རོ་ཞེས་པའི་བླ་མ་དེས་ཡུལ་དེའི་ནང་གི་བུད་མེད་ལོ་གཞོན་མང་པོར་ལོ་གཡེམ་བྱས་པ་དང་དད་ལྡན་མང་ཚོགས་ཚོའི་ལག་ནས་འབུལ་སྡུད་ཤུགས་ཆེ་བྱས་པའི་ནག་ཉེས་བཙུགས་ཏེ་ཁྲིམས་ལ་སྦྱར་བ་་ལྟ་བུས་མཚོན་ནང་ཆོས་དར་སའི་རྒྱལ་ཁབ་མང་པོའི་ནང་བླ་སྤྲུལ་རེ་ཟུང་གིས་ནང་པའི་བསྟན་པ་སྤྱི་དང༌། ཡང་སྒོས་བླ་སྤྲུལ་སྤྱིའི་མཚན་ལར་གནོད་པའི་བྱུས་ངན་འདྲ་མིན་སྤེལ་བཞིན་ཡོད། ལྷག་དོན་རང་རེའི་བོད་ཀྱི་བླ་སྤྲུལ་རེ་ཟུང་གིས་ཀྱང་གོང་དུ་ཞིབ་གསལ་བཀོད་པ་ལྟ་བུས་མཚོན་ལོ་རྒྱུས་ཐོག་བརྗེད་དཀའ་བའི་དོན་རྐྱེན་འདྲ་མིན་བསླངས་ཡོད། དེར་བརྟེན་རྗེས་སོར་གཞུང་འབྲེལ་ཐོག་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་ཟེར་བ་ཞིག་བཙུགས་ཏེ། ཚོགས་པ་དེས་བླ་སྤྲུལ་སྤྱི་ཡོངས་ལ་ཁྱབ་པའི་ཡང་སྲིད་ངོས་འཛིན་བྱེད་སྟངས་ཀྱི་ལམ་སྲོལ་དང༌། བླ་སྤྲུལ་སྤྱིའི་མཛད་སྤྱོད་ལ་ཕྱོགས་ཡོངས་ནས་བཏང་འཛིན་བྱེད་ཐབས་ཀྱི་སྒྲིག་གཞི་ཞིབ་གསལ་བཟོ་དགོས། སྒྲིག་གཞིའི་མིང་ལ་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གི་ཡང་སྲིད་ངོས་འཛིན་བྱེད་ཐབས་ཀྱི་རྩ་འཛིན་མ་ཡིག་ཅེས་འཁོད་རྒྱུ། སྒྲིག་གཞི་དེའི་སྤྱི་ཁོག་རགས་བསྡུས་འཁོད་པའི་དཔེ་གཞི་གཤམ་གསལ།
ཚོགས་ཆུང་འདིའི་མིང་བྱང༌།
དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་ཞེས་འཁོད་རྒྱུ།
ཚོགས་ཆུང་འདིའི་སྒྲིག་གཞིའི་མིང་བྱང༌།
་ ་ དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གི་ཡང་སྲིད་ངོས་འཛིན་བྱེད་ཐབས་ཀྱི་རྩ་འཛིན་མ་ཡིག་ཅེས་འཁོད་རྒྱུ།
སྒྲིག་གཞིའི་སྤྱི་ཁོག་རགས་བསྡུས།
ལེའུ་དང་པོ།
༡།༡ དབུས་བོད་ཀྱི་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གི་ཚོགས་མིར་བོད་ཀྱི་ཆོས་བརྒྱུད་ཆེན་མོ་བཞི་དང་གཡུང་དྲུང་བོན་དང་བཅས་པའི་བླ་སྤྲུལ་ཚོའི་ནང་ནས་ཀུན་གྱིས་སྤྱི་མོས་ཡོད་པའི་འཐུས་མི་གཉིས་ལས་མ་ཉུང་བ་རེ་དྲག་འདེབས་བྱ་རྒྱུ་དང༌། འདེམས་བསྐོ་བྱེད་སྟངས་ཀྱི་སྒྲིགས་གཞི་ཟུར་དུ་གཏན་འབེབས་བྱ་རྒྱུ།
༡།༢ སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་ནས་ཚོགས་ཆུང་འདིའི་ཆེས་མཐོའི་ངེས་སྟོན་པ་དང༌། ཆོས་དོན་བཀའ་བློན་ནས་ཚོགས་གཙོའི་མཛད་འགན་བཞེས་རྒྱུ།
༡།༣ འཐུས་མི་དེ་ཚོའི་གྲས་ནས་རེ་ཟུང་སྐུ་གཤེགས་པའམ་ལས་དོན་གཞན་གྱི་ཆེད་དུ་ངེས་པར་དུ་བརྗེ་བསྒྱུར་བྱེད་དགོས་བྱུང་ཚེ་ཆོས་དོན་ལས་ཁུངས་དང་ཚོགས་ཆུང་མཉམ་སྦྲེལ་གྱིས་གྲོས་བསྡུར་བྱས་ཏེ་འཐུས་མི་གསར་བ་འདེམས་བསྐོ་བྱ་རྒྱུ་དང༌། འདེམས་བསྐོ་བྱེད་སྟངས་ཀྱི་སྒྲིག་གཞི་དོན་ཚན་དང་པོའི་འཐུས་མི་འདེབས་བསྐོ་བྱེད་སྟངས་ཀྱི་སྒྲིགས་གཞི་ཟུར་གསལ་ལྟར་ལག་བསྟར་བྱ་རྒྱུ།
༡།༤ ཚོགས་ཆུང་དེའི་དྲུང་ཆེ་ལ་བླ་སྤྲུལ་ཞིག་དགོས་པའི་ངེས་པ་མེད་ཀྱང་དྲུང་ཆེ་དེ་རང་ལོ་བཞི་བཅུ་བརྒལ་བའི་ཐོག མདོ་སྔགས་གཉིས་ཀར་སློབ་སྦྱོང་དཔྱིས་ཕྱིན་པ་བྱས་པའི་དགེ་བཤེས་ཀྱི་མཚན་རྟགས་ཡོད་པ་ཞིག་ངེས་པར་དུ་དགོས།
༡།༥ ཚོགས་ཆུང་དེའི་གཞུང་འབྲེལ་གྱི་གཞི་རྩའི་འགྲོ་གྲོན་དང་ཚོགས་མིའི་ཟླ་ཕོག་དང་ཟུར་ཕོག་གང་ཡོད་བོད་གཞུང་གི་ལས་བྱེད་ཚོ་དང་གཅིག་མཚུངས་བོད་གཞུང་ནས་ནར་གཏོང་བྱ་རྒྱུ།
༡།༦ དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གི་ཡན་ལག་བོད་ཀྱི་མངའ་སྡེ་སོ་སོའི་ནང་འཛུགས་རྒྱུ་དང༌། ཁོང་སོ་སོའི་གཞི་རྩའི་སྒྲིག་གཞི་ཡོངས་རྫོགས་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་བྱེད་ཐབས་ཀྱི་རྩ་འཛིན་མ་ཡིག་དང་སྤྱི་ཡོངས་ཀྱི་ཆ་ནས་གཅིག་མཚུངས་བྱ་རྒྱུ།
༡།༧ ཚོགས་པ་དེ་ཚོའི་གྲས་ནས་ས་གནས་སོ་སོའི་བླ་སྤྲུལ་ངོས་འཛིན་བྱེད་སྐབས་མཐའ་མའི་ཐག་གཅོད་དེ་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་དང་གྲོས་བསྡུར་གྱིས་ཅག་གཅོད་བྱ་དགོས་པ་མ་ཟད། དབུས་དང་ས་གནས་ཚོགས་ཆུང་ཐུན་མོང་ནས་གཞུང་འབྲེལ་ཐོག་ཡང་སྲིད་འདི་དང་འདི་ཞེས་བྱ་བ་ངོས་འཛིན་བྱས་ཟིན་པའི་ཡོངས་ཁྱབ་གསལ་བསྒྲགས་བྱ་དགོས།
ལེའུ་གཉིས་པ།
༢།༡ དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གི་ལས་དོན་འགོ་འཛུགས་མ་ཞུས་པའི་སྔོན་དུ་ངོས་འཛིན་བྱས་པའི་བླ་སྤྲུལ་རྣམས་ཕུད། དེ་མིན་ཚོགས་ཆུང་འདི་མ་བརྒྱུད་པར་ཡང་སྲིད་གང་ཞིག་ཡིན་རུང་སྔར་སྲོལ་ལྟར་རང་མོས་ཀྱིས་ངོས་འཛིན་བྱེད་མི་ཆོག གལ་སྲིད་དེ་ལྟར་བྱས་ཚེ་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གིས་ངོས་ལེན་མེད་པའི་ཡོངས་ཁྱབ་གསལ་བསྒྲགས་བྱ་རྒྱུ།
༢།༢ དོན་ཚན་དང་པོའི་ནང་གསལ་ལྟར་སྔར་ནས་ཡང་སྲིད་ངོས་འཛིན་བྱས་ཟིན་ནས་ཡོད་པ་རྣམས་ཕུད། དེ་མིན་དགོན་སྡེ་ཁག་གི་མཁན་པོ་དང་དགེ་བཤེས། བླ་སྤྲུལ་ཚོའི་ཡོངས་འཛིན་སོགས་ཀྱིས་མཚོན་གསར་དུ་ཡང་སྲིད་ངོས་འཛིན་བྱེད་དགོས་རིགས་བྱུང་ཚེ། དེ་དང་དེའི་ཡང་སྲིད་ངོས་འཛིན་བྱེད་ཆོག་པའི་འོས་ཆོས་ལྟ་བུར་གདན་ས་གང་རུང་ཞིག་ནས་སྔར་སྲོལ་བརྒྱུད་པའི་ཕྱག་ལེན་གཞིར་བཟུང་ཐོག་མདོ་སྔགས་རིག་གནས་དང་བཅས་པར་སློབ་སྦྱོང་དཔྱིས་ཕྱིན་པ་གནང་མྱོང་བ་ཞིག་དགོས་པ་མ་ཟད། སྐུ་ཚེ་ཧྲིལ་པོར་འཆད་རྩོད་རྩོམ་གསུམ་གྱིས་བསྟན་པ་འཛིན་སྐྱོང་སྤེལ་གསུམ་བྱས་པའི་དཔང་རྟགས་ཡིད་ཆེས་འོས་པ་ལྟ་བུ་ཞིག་མིག་སྔར་སྟོན་རྒྱུ་ཡོད་དགོས།
༢།༣ ཡང་སྲིད་གང་ཞིག་ངོས་འཛིན་སྐབས་་ཐོག་མར་ཡང་སྲིད་དེའི་སྐུ་སྐྱེ་གོང་མས་དངོས་སུ་གསོ་སྐྱོང་གནང་བའི་དགོན་སྡེ་དང་ཞལ་སློབ་སྦྱིན་བདག་དང་བཅས་པའི་སྤྱི་མགྲིན་མཚོན་ཐུབ་པའི་འཐུས་མི་བཅུ་ལས་མ་ཉུང་བ་ཞིག་ནས་དོགས་གཞི་ཡོད་པའི་འོས་གཞི་འཚོལ་ཞིབ་བགྱིས་ཏེ་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གི་ཡན་ལག་ས་གནས་ཚོགས་པ་ཁག་ལ་སྐུ་སྐྱེ་གོང་མའི་ཡང་སྲིད་ངོས་འཛིན་ཡོང་བའི་རེ་འདུན་ཞུ་ཡིག་བཅས་ངེས་འབུལ་ཐུབ་པ་བྱ་དགོས།
༢།༤ དེ་སྔོན་བོད་དུ་ཡང་སྲིད་ངོས་འཛིན་བྱེད་པའི་ཐབས་ལམ་ཡོངས་གྲགས་ཡིན་པ་དཔེར་ན། གསེར་བུམ་དཀྲུག་པ་དང་སྐུ་སྐྱེ་གོང་མའི་ཕྱག་རྫས་ངོས་འཛིན་བྱེད་པ། སྐུ་སྐྱེ་གོང་མའི་ཞལ་ཆེམས་དང་ལྷ་བླའི་ལུང་བསྟན་ལ་བརྟག་པ། འོས་གཞི་སོ་སོའི་འཁྲུངས་ལྟས་དང་མིག་སྔའི་མཛད་སྤྱོད་ལ་བརྟག་པ་སོགས་འདྲ་མིན་ཡོད་པ་དག ཆོས་ལུགས་དང་ཆོས་བརྒྱུད་སོ་སོའི་ཆོ་ག་ཕྱག་ལེན་དང་སྤྲགས་ནས་སྐབས་སུ་གང་བབ་ཇི་ལྟར་ལག་ལེན་བསྟར་སྟངས་ཀྱི་རྣམ་བཞག་དབུས་བོད་ཀྱི་ཆེས་མཐོའི་ཡང་སྲིད་ངོས་འཛིན་ཚོགས་ཆུང་ནས་མ་ཟིན་འབྲི་རྒྱུ་དང༌། གྲོས་ཚོགས་ཐོག་སྦྱང་བཤད་ཀྱིས་མཐའ་མའི་ཐག་གཅོད་བྱ་རྒྱུ།
༢།༥ བླ་སྤྲུལ་གང་ཞིག་ངོས་འཛིན་བྱས་པའི་རྗེས་སུ་ཆོས་ལུགས་ཀྱི་རྨང་གཞིའི་ཤེས་བྱ་ཙམ་ཡང་སློབ་གཉེར་མི་བྱེད་པར་དད་ལྡན་མང་ཚོགས་ཀྱི་དཀྱིལ་དུ་ཕེབས་ནས་བྱེད་སྒོ་འདྲ་མིན་སྣ་ཚོགས་སྤེལ་བ་སོགས་གཏན་ནས་མི་ཆོག མ་མཐའ་ཡང་ཆོས་ལུགས་དང་ཆོས་བརྒྱུད་སོ་སོའི་རང་རང་ལུགས་ཀྱི་ཆོས་སློབ་སྦྱོང་བྱེད་སྟངས་ཀྱི་ཕྱག་སྲོལ་གཞིར་བཟུང་ཐོག་ཆོས་ལུགས་ཀྱི་བསམ་བློའི་ཚད་གཞི་ངེས་ཅན་ལ་སླེབས་པའི་ཕྱག་འཁྱེར་མིག་སྔར་སྟོན་རྒྱུ་ཡོད་དགོས། དེ་ལྟར་མ་བྱུང་ཚེ་གཞུང་ཐོག་ནས་མཐའ་གཅིག་ཏུ་བཀག་འགོག་བྱ་རྒྱུ།
༢།༦ བླ་སྤྲུལ་སུ་ཞིག་ཡིན་རུང་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གིས་ས་གནས་ཡན་ལག་ཚོགས་ཆུང་བརྒྱུད་ནས་ཆོག་མཆན་མེད་པར་དད་ལྡན་མང་ཚོགས་ཚོའི་ལག་ནས་འབུལ་སྡུད་ཀྱི་རིགས་གཏན་ནས་བྱེད་མི་ཆོག དབུས་གཞུང་ནས་ཆོག་མཆན་ཡོད་པའི་དབང་དུ་བཏང་ཡང་གང་གི་ཆེད་དུ་འབུལ་སྡུད་བྱས་པའི་དངུལ་དངོས་དག་དོན་མེད་ཆུད་ཟོས་སུ་མི་འགྲོ་ཆེད་དབུས་གཞུང་ནས་བཏང་འཛིན་ནན་པོ་བྱ་རྒྱུ། འོན་ཀྱང་དད་ལྡན་མང་ཚོགས་ཚོས་རང་མོས་ཀྱིས་ཕུལ་བར་དབུས་གཞུང་ནས་བྱུས་གཏོགས་གང་ཡང་མེད།
༢།༧ བླ་སྤྲུལ་སུ་ཞིག་གིས་ཀྱང་ས་གནས་དཔོན་ངན་ཚོ་དང་མཉམ་སྤྲེལ་གྱིས་ཆོས་ལུགས་དང་ཆོས་བརྒྱུད་དགོན་སྡེ་ཕན་ཚུན་བར་འཐེན་འཁྱེར་བྱས་ཏེ། མངའ་འབངས་དང་སྤྱིན་བདག་སོགས་འཕྲོག་རྩོད་ཀྱིས་སྡེ་གཟར་བསླངས་པ་དངོས་སུ་ར་འཕྲོད་བྱུང་ཚེ། གཞུང་འབྲེལ་ཐོག་ནས་སྔར་འགྱོད་ཕྱིས་སྡོམ་དགོས་པའི་བཀའ་ཤོག་ནན་པོ་གནང་རྒྱུ། ད་དུང་ཉན་འཇོག་ཚུལ་བཞིན་མ་བྱས་ཚེ་བླ་སྤྲུལ་དེ་ཚོའི་རིགས་ཀྱི་སྐུ་སྐྱེ་གཞིག་མ་ངོས་འཛིན་བྱ་མི་ཆོག་པའི་གཞུང་འབྲེལ་གསལ་བསྒྲགས་བྱ་རྒྱུ།
ལེའུ་གསུམ་པ།
༣།༡ གདུང་རྒྱུད་འདེད་པའི་ལམ་ལུགས་དེ་སྔར་སྲོལ་གཞིར་བཟུང་ལས་དམིགས་བསལ་འགྱུར་བཅོས་གཏོང་དགོས་མ་མཆིས་ཀྱང༌། གདུང་རྒྱུད་ཀྱི་མཚན་གནས་ཐོག་མང་ཚོགས་ནང་ཆོས་ཕྱོགས་ཀྱི་བྱེད་སྒོ་སྤེལ་སྟངས་དེ། ལེའུ་གཉིས་པའི་ནང་གསལ་དོན་ཚན་ལྔ་བ་གཞིར་བཟུང་བྱས་ནས་འགྲོ་དགོས་རྒྱུ།
༣།༢ དགོན་པ་ཕྱག་འདེབས་དང་དེ་མིན་འཛུགས་སྐྲུན་གཞན་གྱི་ཆེད་དུ་དད་ལྡན་མང་ཚོགས་ཚོའི་ཁྲོད་ནས་འབུལ་སྡུད་བྱེད་དགོས་རིགས་བྱུང་ཚེ། ལེའུ་གཉིས་པའིནང་གསེས་དོན་ཚན་གཉིས་པའི་ནང་གསལ་ལྟར་ལག་བསྟར་བྱ་དགོས་རྒྱུ།
༣།༣ གདུང་རྒྱུད་ཀྱི་མཚན་གནས་བརྒྱུད་སྤྲོད་བྱེད་སྐབས་མཚན་གནས་དེ་སུ་ལ་སྤྲོད་མིན་ཐད་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་ངོས་ནས་ཐེ་གཏོགས་མེད་པ་བྱ་རྒྱུ། འོན་ཀྱང་མཚན་གནས་གཏན་ཁེལ་བའི་གསལ་བསྒྲགས་དབུས་དང་ས་གནས་ཡན་ལག་ཚོགས་ཆུང་གང་རུང་བརྒྱུད་ནས་བྱེད་དགོས་རྒྱུ།
༣།༤ གདུང་རྒྱུད་ཀྱི་མཚན་གནས་བརྒྱུད་སྤྲོད་བྱེད་སྐབས་མཚན་གནས་རྩོད་རྙོགས་ཀྱི་རིགས་བྱུང་ཚེ། མང་གཙོའི་ལམ་སྲོལ་དང་མཐུན་པར་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གིས་བཏང་་འཛིན་འོག་རང་རང་གི་འབྲེལ་ཡོད་དགོན་སྡེ་ཁག་དང་དད་ལྡན་མང་ཚོགས་ནས་འོས་གཞི་གང་ཡོད་གཞིར་བཟུང་ཐོག་འོས་འཕེན་གྱིས་མཐའ་མའི་མཚན་གནས་ཐག་གཅོད་གསལ་བསྒྲགས་གནང་རྒྱུ། འདིའི་ཐད་ཀྱི་སྒྲིག་གཞི་ཞིབ་གསལ་ཟུར་དུ་བཟོ་དགོས།
༣།༥ གདུང་བརྒྱུད་དེས་ལེའུ་གཉིས་པའི་ནང་གསེས་དོན་ཚན་བདུན་པའི་ནང་གསལ་ལྟར་གྱི་གླེང་རྙོག་རིགས་བཟོས་པ་ཁྲིམས་ཐོག་ནས་ར་སྤྲོད་བྱུང་ཚེ། རང་ཉིད་ཀྱི་གདུང་རྒྱུད་ཕྱི་མར་རང་གི་མཚན་གནས་བརྒྱུད་སྤྲོད་ཀྱི་དབང་ཚད་དེ་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་ནས་བཞེས་རྒྱུ། འདིའི་ཐད་ཀྱི་སྒྲིག་གཞི་ཞིབ་གསལ་ཟུར་དུ་བཟོ་དགོས་རྒྱུ་བཅས་ཡིན།
གསལ་བཤད། ཕྲན་གྱིས་རྩོམ་ཡིག་འདི་འདྲ་ཞིག་སྤེལདགོས་དོནནི། བླ་སྤྲུལ་གྱི་གྲངས་འབོར་ལས་སྤ྄ུས་ཀ་གཙོ་བོར་འཛིན་པའི་ཆེད་དུ་ཡིན་པ་མ་གཏོགས། བོད་དུ་བླ་སྤྲུལ་ལམ་ལུགས་ཤིག་གཏན་ནས་མི་དགོས་པའི་དོན་མིན། དེར་བརྟེན་བླ་སྤྲུལ་གྱི་གྲངས་འབོར་ལས་སྤུས་ཀ་རྩ་དོན་དུ་བཞག་ནས་་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་དང༌། ཚོགས་ཆུང་དེས་རྩ་དོན་དུ་འཛིན་དགོས་པའི་དབུས་བོད་གཞུང་ཆེས་མཐོའི་ཡང་སྲིད་ངོས་འཛིན་ཚོགས་ཆུང་གི་ཡང་སྲིད་ངོས་བྱེད་ཐབས་ཀྱི་རྩ་འཛིན་མ་ཡིག་ཅེས་འཁོད་པའི་དཔེ་མཚོན་ཅན་གྱི་རྩོམ་ཡིག་འདི་བྲིས་པ་ཡིན་པས། རྩོམ་ཡིག་འདིའི་ཐོག་དོན་གཉེར་ཅན་ཚོས་ཐུགས་ཞིབ་མང་ཙམ་གནང་ཐུབ་པའི་རེ་བ་ཡོད།
སྐུ་ཞབས་རྡོར་དབང་ལགས་སུ། ཁྱེད་རང་གིས་བོད་ཀྱི་བླ་སྤྲུལ་དང་རྣམ་སྤྲུལ་མང་པོ་མང་པོ་དེ་ཚོའི་སྐོར་ལ་སྒྲིག་གཞི་རིང་པོ་རིང་པོ་ཞིག་བྲིས་འདུག་པར་ཁོ་བོས་བསམ་ཚུལ་ཐུང་ཐུང་ཐུང་ཐུང་ཞིག་ཞུ་ཆོག་པ་གྱིས། དང་པོ། དེའི་སྐོར་ལ་དྲི་བ་ཞིག་ཡོད་པ་ནི། ང་ཚོའི་དགེ་སློང་། དགེ་ཚུལ། དགེ་བསྙེན་ཞེས་མང་པོ་ཞིག་ཡོད་པ་དེ་ཚོ་ལ་འདུལ་བའི་གཞུང་ན་བསྲུང་དགོས་པའི་ཁྲིམས་བརྒྱ་ཕྲག་དུ་མ་ཡོད་སྐད་འདུག་པ་དེ་ཚོས་འདང་གི་མེད་པ་ཡིན་ནམ་ཡང་ན་ཁྲིམས་དེ་ཚོས་དུས་རབས་ཀྱི་རྗེས་མ་ཟིན་པ་ཡིན།
ཁྱེད་ཀྱི་སྒྲིག་གཞི་དེའི་ནང་མི་ཆོག་མི་ཆོག་ཟེར་བ་མང་པོ་ཞིག་ཡོད་པར་བལྟས་ན་གུང་ཁྲན་དམར་གཞུང་གི་སྲིད་བྱུས་ཀྱི་ཤན་ཞུགས་མེད་ནའང་གནའ་བོའི་རྒྱལ་ཁྲིམས་ཤིག་གམ་ཡང་ན་ཆོས་ཁྲིམས་བཙན་པོ་ཞིག་གི་ཤན་ཞུགས་ཡོད་ལས་ཆེ། ཁོང་ཚོ་འབུལ་སྡུད་ལ་བསྐྱོད་ཆོག་པའི་ཐོབ་ཐང་ཙམ་ཡང་མེད་ན་གཞུང་འབྲེལ་ཡིན་མིན་གྱི་ཚོགས་པ་གང་ཞིག་ཞལ་འདེབས་བསྡུ་བར་ཡང་བསྐྱོད་ག་ལ་ཆོག སྤྲུལ་སྐུ་གང་ཞིག་ནས་ཁྲིམས་འགལ་ལ་བརྟེན་ནས་ཡང་སྲིད་གཞུག་མ་ངོས་འཛིན་མི་ཆོག་པ་ནི་ཕ་ཉེས་བུ་ལ་འགེལ་བ་དང་མཚུངས། རྒྱ་ནག་དབུས་གཞུང་གིས་བླ་སྤྲུལ་ངོས་འཛིན་ལ་སྟངས་འཛིན་བྱེད་པ་དང་འདྲ་སེ་འདུག་ག་གྲོགས་པོ།
ཡང་སྤྲུལ་སྐོར་གླེང་ཡོང་དུས་ང་ཚོར་སྤོབས་པ་སྐྱེ་ཆོག་པ་ཞིག་ཡོད་པ་ནི། རྒྱལ་ཁབ་གཞན་པ་གང་ཞིག་ཡིན་ནའང་། སྔོན་བྱོན་གྱི་སྐྱེས་བུ་དམ་པ་རྣམས་རྗེས་རབས་པ་ཚོའི་སེམས་སུ་དུས་གཏན་ཏུ་གནས་པའི་ཕྱིར་རྡོ་བྱང་དང་སྐུ་འདྲ་སོགས་དྲན་རྟེན་བཞེངས་པ་ཙམ་ལས་གཞན་གང་ཡང་དམིགས་སུ་མེད་དོ། ང་ཚོར་སྔོན་བྱོན་གྱི་སྐྱེས་ཆེན་དམ་པ་དེ་དག་ད་ལྟའང་དངོས་སུ་གསོན་པོར་མཇལ་དུ་ཡོད་པ་ནི་ཐུན་མོང་མ་ཡིན་པའི་རླབས་ཆེ་བའི་གསར་བཏོད་ཅིག་ཅི་ལ་མིན། ཡིན་ན་ཡང་ད་ལྟ་མང་དྲགས་པའི་ཚོར་བ་ཞིག་སྟེར།
རིགས་གསུམ་མགོན་པོའི་སྤྲུལ་བ་ཆོས་རྒྱལ་མེས་དབོན་རྣམ་གསུམ་སོགས་ཁོང་རང་ཚོས་ང་འདི་དང་འདིའི་སྤྲུལ་པ་ཡིན་ཞེས་བརྗོད་པ་ཞིག་མིན་པར་རྗེས་འཇུག་དད་ལྡན་མང་ཚོགས་ཀྱིས་ཁོང་རྣམ་པའི་འཇིག་རྟེན་ལས་འདས་པའི་མཛད་རྗེས་ལ་འཇིག་རྟེན་ལས་འདས་པའི་དཔེ་ཞིག་བཀོད་པ་ཙམ་མོ།