སྤྱི་ཟླ12པའི་ཚེས22ཉིན། བོད་ཀྱི་སློབ་གསོ་ལ་མཛད་རྗེས་ཆེ་བའི་དགེ་རྒན་ནག་ཀྱཱ་བ་ཤ་བོ་ཚེ་རིང་ལགས་སྙུང་གཞིའི་རྐྱེན་གྱིས་དགུང་ལོ་ང་བཅུའི་སྟེང་སྐུ་གཤེགས་པར་གདུང་སེམས་དྲག་པོས་མྱ་ངན་ཞུ།
ནག་ཀྱཱ་བ་ཤ་བོ་ཚེ་རིང་། (1973-2022)
༡༩༧༣ལོའི་ཟླ༡༢བའི་ཚེས༡ཉིན་མདོ་སྨད་རེབ་གོང་སྨད་པ་ནག་ཀྱཱ་སྡེ་བ་སྐྱེས་ཤིང་། ༡༩༩༠ལོའི་ཟླ༩ནས་མཚོ་སྔོན་མི་རིགས་སློབ་གྲྭ་ཆེན་མོའི་གྲངས་ཉུང་མི་རིགས་སྡེ་ཁག་ཏུ་བོད་ཀྱི་རྩོམ་རིག་དང་ལོ་རྒྱུས། མཚན་ཉིད། སྐར་རྩིས་སོགས་ལ་སློབ་གཉེར་བྱས། ༧པར་དངོས་གཞི་སློབ་གྲྭ་ཆེན་མོའི་ཆེད་རྩོམ་དམ་བཅའ་འཇོག་སྐབས། «རོ་སྒྲུང་དང་ཏུང་ཧོང་ལས་ཐོན་པའི་གནས་བོའི་བོད་ཀྱི་དམངས་ཁྲོད་གཏམ་རྒྱུད་ཁག་གཅིག་གི་འབྲེལ་བའི་སྐོར་ཐོག་མར་གླེང་བ»ཞེས་པ་དེ་འཛིན་གྲྭ་ཡོངས་ནས་ཕུལ་བྱུང་དཔྱད་རྩོམ་གྱི་གྲས་སུ་བདམས་ཐོན་བྱུང་བ་དང་། རྒྱལ་ཁབ་རིམ་པའི་དུས་དེབ«ཀྲུང་གོ་བོད་ཀྱི་ཤེས་རིག»སྟེང་བཀོད་པར་མ་ཟད། ཕྱིས་སུ་ནུབ་བྱང་མི་རིགས་སློབ་ཆེན་གྱིས་གཙོ་སྒྲིག་མཛད་པའི་བོད་ཁམས་རང་བཞིན་གྱི་ཕུལ་བྱུང་དཔྱད་རྩོམ་ཕྱོགས་བསྒྲིགས«བོད་ཀྱི་གནའ་བོའི་ཡིག་རྙིང་ཞིབ་འཇུག»ཏུ་བདམས་ལ། ཆེད་རྩོམ་གྱི་ལྟ་གྲུབ་རྣམས་འཇར་ཕན་གྱི་ཡི་གེར་ཡང་བསྒྱུར་ཡོད།
༡༩༩༥ལོའི་ཟླ༩པར་ཀྲུང་གོ་སྤྱི་ཚོགས་ཚན་རིག་ཁང་ཞིབ་འཇུག་སློབ་མའི་སློབ་གླིང་གི་གེ་སར་སྒྲུང་དང་བོད་ཀྱི་རྩོམ་རིག་ལས་ཐོག་ཞིབ་འཇུག་སློབ་མའི་འཛིན་གྲྭ་ཞུགས་ཏེ། གེ་སར་ཞིབ་འཇུག་ཆེད་མཁས་འཇམ་དཔལ་རྒྱ་མཚོ་དང་ཡོངས་ཀྱི་དགེ་བའི་བཤེས་གཉེན་ཆེན་པོ་བསེ་ཚང་བློ་བཟང་དཔལ་ལྡན་སོགས་ཀྱི་སྐུ་དྲིན་ལས་ཕྱི་ནང་གི་རིག་གནས་ཀུན་ལ་སྦྱངས་བརྩོན་མཛད། ཁོས་རྒྱ་ཡིག་གི་ལམ་ནས་བྲིས་པའི«གེ་སར་སྒྲུང་གི་དམངས་སྲོལ་གྱི་རབ་དབྱེ་འགའ་བརྗོད་པ»ཞེས་པར་ཀྲུང་གོ་སྤྱི་ཚོགས་ཚན་རིག་ཁང་གི་དགེ་རྒན་ཆེན་མོ་དབྱངས་ཨེན་ཧོང་ལགས་ཀྱིས་ཞིབ་འཇུག་སློབ་མའི་དཔྱད་རྩོམ་ཞིབ་བསྡུར་གྲོས་ཚོགས་སུ་བསྔགས་བརྗོད་ཚད་མེད་གནང་། ༡༩༩༨ལོའི་ཟླ༧པར་རྒྱལ་ཡོངས་སུ་མིང་དུ་གྲགས་པའི་བོད་ཀྱི་ཤེས་རིག་སྨྲ་བ་ཁྲིན་ཆིན་དབྱིན་སོགས་ཀྱི་མདུན་སར«གེ་སར་སྒྲུང་ལས་བླའི་རིག་གནས་སྐོར་རགས་ཙམ་བརྗོད་པ»ཞེས་པའི་མཐར་ཕྱིན་ཆེད་རྩོམ་དམ་བཅའ་བཞག་སྟེ་སློབ་མཐར་ཕྱིན།
ལོ་དེའི་ཟླ༩པར་ཕ་ཡུལ་དུ་ལོག་ནས་བོད་ཀྱི་སློབ་གསོའི་བྱ་བར་ཞུགས་ཤིང་། ལས་ཞོར་དུ་བོད་ཀྱི་ཤེས་རིག་དང་གླིང་སྒྲུང་། སློབ་གསོའི་སྐོར་ལ་ཞིབ་འཇུག་གནངས་པ་དང་། སྐྱེས་ཆེན་དམ་པ་དུ་མའི་སྐུ་དྲིན་ལ་བསྟེན་ནས་ནང་དོན་རིག་པའི་སྐོར་ལའང་སློབ་གཉེར་བྱས་པར་མ་ཟད། ༢༠༠༩ལོའི་ཟླ༩བར་རེབ་གོང་དབྱི་ཧྥུ་མི་རིགས་སློབ་འབྲིང་ནས་རྫོང་སློབ་དཔྱོད་ཁང་དུ་ལས་གནས་སྤར་བས། རེབ་གོང་གི་སློབ་ཁུལ་དང་སློབ་འབྲིང་སོ་སོར་སོང་ནས་དགེ་རྒན་སུམ་བརྒྱ་ལྷག་གི་སློབ་ཁྲིད་ལ་ཉམས་ཞིབ་མཛད་ཅིང«རེབ་གོང་སློབ་གསོ»དང«རེབ་གོང་སློབ་གསོའི་བརྙན་དེབ»སོགས་དཔེ་དེབ་བཞི་ལྔ་ཙམ་རྩོམ་སྒྲིག་མཛད། ༢༠༡༠ལོར་པེ་ཅིན་སློབ་གསོ་སློབ་གླིང་དུ་བསྐྱོད་ནས་མཐོ་འབྲིང་དབྱིན་ཡིག་བསླབ་གཞི་གསར་བའི་སྐོར་ལ་སློབ་སྦྱོང་མཛད་ཅིང་པེ་ཅིན་ནས་རྒྱལ་སའི་དགེ་ཐོན་སློབ་ཆེན་གྱི་ཁོངས་གཏོགས་སློབ་འབྲིང་སོགས་སློབ་འབྲིང་བཞི་ལྷག་ཏུ་བསྐྱོད་ནས་དངོས་སུ་སློབ་ཁྲིད་ལ་ཉན་ཞིང་དགེ་རྒན་དང་སློབ་མ། འབྲེལ་ཡོད་སློབ་གསོ་དོ་དམ་པ། སློབ་གསོ་སློབ་གླིང་གི་ཆེད་མཁས་པ་དང་དགེ་རྒན་ཆེན་མོ་དག་ལ་སློབ་ཁང་སློབ་ཁྲིད་ཀྱི་ཐད་ནས་ཉམས་མྱོང་བརྗེ་རེས་བགྱིས།
༢༠༡༢ལོའི་ཟླ་གཉིས་པར་ཕྱི་རྒྱལ་དུ་སློབ་འགྲིམས་སུ་བསྐྱོད། དབྱིན་ཇིའི་རེན་ཇེན་སློབ་གྲྭ་ཆེན་མོ་ནས་དབྱིན་ཇིའི་སློབ་གསོ་གཙོ་བྱས་ཏེ་དེ་གའི་གཉུག་མའི་ཤེས་རིག་ལ་ཉམས་ཞིབ་མཛད་པའི་གོ་སྐབས་ཐོབ་པར་མ་ཟད། ལའེ་ཐའོ་ཧེ་སློབ་གྲྭ་རུ་ཕྱིན་ནས་སློབ་གསོ་དོ་དམ་དང་སློབ་གསོའི་སྒྲིག་གཞི། ཁོར་ཡུག་སློབ་ཁང་། སློབ་ཁྲིད། དགེ་སློབ་བར་གྱི་བྱ་འགུལ། སློབ་མའི་སེམས་ཁམས་དང་འཚོ་བ་སོགས་ཀྱིས་མཚོན་པའི་སློབ་གསོ་ལ་དངོས་ཡུ་ཡུལ་དངོས་རྟོག་དཔྱོད་མཛད་པ་དང་། «བོད་ཀྱི་ཤེས་རིག་ལས་སྙིང་རྗེའི་རིག་གནས་གླེང་བ»ཞེས་པ་དེ་དབྱིན་ཇིའི་སློབ་མ་རྣམས་ལ་འཆད་ཁྲིད་བྱས་པས། དགེ་སློབ་རྣམས་ཀྱིས་དགའ་བསུ་ཐོབ། ཅན་ཆའོ་དང་ཉིག་ཅིན་སློབ་ཆེན་སོགས་ས་གནས་དང་གྲོང་ཁྱེར་བཅོ་ལྔ་ཙམ་ལ་བསྐྱོད་དེ་ཡོ་རོབ་གླིང་གི་ཤེས་རིག་ལ་འཚོལ་ཞིབ་མཛད།
ཁོང་གིས་རྒྱལ་ཁབ་དང་ཞིང་ཆེན་རིམ་པའི་དུས་དེབ«ཀྲུང་གོ་བོད་ཀྱི་ཤེས་རིག»དང«བོད་ལྗོངས་ཞིབ་འཇུག»«ཀྲུང་གོའི་བོད་ལྗོངས»«བོད་ཀྱི་སློབ་གསོ»«བོད་ལྗོངས་སློབ་གསོ»སོགས་དུས་དེབ་དང་དྲ་ལམ་སྣ་ཚོགས་ཀྱི་སྟེང་དཔྱད་རྩོམ་བཞི་བཅུ་ལྷག་སྤེལ་ཞིང་སྙན་རྩོམ་དང་ལྷུག་རྩོམ་སོགས་རྩོམ་ཡིག་ཉིས་བརྒྱ་ལྷག་དངོས་འབྲི་བྱས། ༢༠༡༡ལོའི་བོད་ཀྱི་ཤེས་རིག་དཔྱད་འབྲས་སུ་ཕུལ་བའི«གེ་སར་སྒྲུང་དང་གནའ་བོའི་བོད་ཀྱི་གནའ་སྲོལ»ཞེས་པའི་ཆེད་རྩོམ་ཡིག་འབྲུ་ཁྲི་ཚོ་ལྔ་ལྷག་བརྒལ་བ་དེ་ཉིད་ཀྲུང་དབྱང་མི་རིགས་དཔེ་སྐྲུན་ཁང་གིས་དཔེ་ལེགས་པར་སྐྲུན་འཆར་འགོད་དུ་བཞག་སྟེ་དངོས་སུ་པར་སྐྲུན་བྱས་ཤིང་། ༢༠༡༢ལོར་ཆེད་རྩོམ་འདི་ཉིད་ལ་མཚོ་སྔོན་ཞིང་ཆེན་རྩོམ་རིག་སྒྱུ་རྩལ་ལྷན་ཚོགས་དང་ཞིང་ཆེན་གེ་སར་སྒྲུང་ཞིབ་འཇུག་སོའོ་གཉིས་ཀྱིས་གཙོ་སྒྲུབ་མཛད་པའི་ཞིང་ཆེན་ཡོངས་ཀྱི་སྐབས་དང་པོའི་གེ་སར་ཞིབ་འཇུག་བརྩམས་ཆོས་རྒྱ་བོད་སྤྱི་ཚན་གྱི་གྲུབ་འབྲས་བྱ་དགའ་ཨང་གཉིས་པ(བོད་ཡིག་གི་ཨང་དང་པོ)བསྩལ་ཞིང་། ཁོང་ཉིད་ལ་མཚོ་སྔོན་ཞིང་ཆེན་གེ་སར་ཞིབ་འཇུག་ཆེད་མཁས་ཀྱི་ཐོབ་ཐང་གནངས་ནས་ཆེད་ལས་མཁས་པའི་ཨུ་ཡོན་དུ་གདན་ཞུ་མཛད། རྩོམ་པ་པོ་ཁོང་ཉིད་ཀྱིས་མདོ་སྨད་རེབ་གོང་རྫོང་སློབ་དཔྱོད་ཁང་དུ་ལོ་མང་ལ་ཕྱག་ལས་གནང་བ་རེད།
༢༠༢༢ལོའི་སྤྱི་ཟླ༡༢པའི་ཚེས༢༢ཉིན་སྐུ་གཤ།