ཁང་ཟླ་སྲས།
བྷར་སི་ལོ་ན་ས་སྐྱ་བཀྲ་ཤིས་གླིང་གི་དྲུང་ཡིག་ནས་འདི་གར་འགྲེལ་བརྗོད་བྱས་དོན་ལྟར། ༧གོང་ས་སྐྱབས་མགོན་ཆེན་པོའི་སྐུའི་འཁྲུངས་སྐར་ཉིན་ས་སྐྱ་བཀྲ་ཤིས་གླིང་གི་བསྟན་བདག་བླ་མ་འཇམ་དབྱངས་བཀྲ་ཤིས་རྡོ་རྗེ་རིན་པོ་ཆེ་དབུ་བཞུགས་ཐོག དད་ལྡན་མང་ཚོགས་བརྒྱ་ཕྲག་བརྒལ་བས་མགོན་པོ་མཆོག་གི་སྐུ་བསྟོད་འུར་འདོན་དང་སྦྲགས་དགུང་གྲངས་བརྒྱད་ཅུར་ཕེབས་པའི་འཁྲུངས་སྐར་བསུ་བའི་མཛད་སྒོ་དངོས་སུ་སྤེལ། དམིགས་བསལ་ཐེངས་འདིར་དབྱིན་ལན་དུ་ཆེད་མངགས་བྱས་ཏེ་བཟོས་པའི་དབུགས་ལྒང་ཞིག་མགོན་པོ་གང་ཉིད་ཀྱི་ཞབས་པད་ཡུན་རིང་བརྟན་ཅིང་། མཛད་འཕྲིན་མཁའ་ཁྱབ་ཏུ་ཡོང་བ་དང་། བོད་ཀྱི་བདེན་མཐའ་མྱུར་དུ་གསལ་བའི་རྟེན་འབྲེལ་ལ་དམིགས་ཏེ།
བོད་རྒྱལ་ཁབ་ཆེན་པོའི་རྒྱལ་དར་ལས་བཟོས་པའི་དྲོད་རླངས་དབུགས་ལྒང་ཆེན་པོ་ཞིག་བཟོས་ཡོད་ལ། འདི་ནི་ད་ཕན་འཛམ་གླིང་སྟེང་བོད་ཀྱི་དར་ཆ་ལས་བཟོས་པའི་དྲོད་རླངས་དབུགས་སྒང་ཆེས་ཐོག་མ་དེ་ཆགས་ཡོད།
ལས་འགུལ་འདིའི་གོ་སྒྲིག་པ་ Professor Heaven, Mr. Dobson, Mr. Chris and Mr. Richard ཐུན་མོང་ནས་བླ་མ་བཀྲ་ཤིས་རྡོ་རྗེ་མཆོག་ལ་དབུགས་ལྒང་འདིར་མིང་ཞིག་འདོགས་རོགས་ཞུས་དོན་ལྟར། བཀྲ་ཤིས་རྒྱལ་མཚན་དབུགས་ལྒང་ཞེས་བཏགས། ཐོག་མར་རབ་གནས་དང་འབྲེལ་༧གོངས་ས་མཆོག་སྐུ་ཚེ་རིང་དུ་འཚོ་བའི་ཐུགས་སྨོན་བྱས་མཐར། མཁའ་སྐྱོད་དྲོད་རླངས་དབུགས་ལྒང་དེ་ཉིད་དུ་བོད་ཀྱི་གྲྭ་བ་གསུམ་གཙོར་ཞུགས་ཀྱིས་ས་སྐྱ་བཀྲ་ཤིས་གླིང་གི་མཁའ་དབྱིངས་སུ་འཕུར་མགོ་བརྩམས།
དབུགས་སྒང་དེ་ཉིད་བྷར་སི་ལོ་ན་དང་ཐག་ཉེ་བའི་ས་ Garraf, སྒ་ར་ཕི་ས་སྐྱ་བཀྲ་ཤིས་གླིང་གི་སྐྱེད་ཚལ་དུ་མང་ཚོགས་ལ་ཐོག་མར་འགྲེམ་སྟོན་བྱས་ཤིང་། འདི་ཉིད་༧གོང་ས་མཆོག་གི་འཛམ་གླིང་ཀུན་ཁྱབ་ཀྱི་ཐུགས་ཁུར་དང་། བླ་ན་མེད་པའི་ལམ་སྟོན་ལ་བཀའ་དྲིན་རྗེས་དྲན་དང་། ལོ་རྒྱུས་རང་བཞིན་ལྡན་པའི་བོད་རིགས་མང་ཚོགས་ཀྱི་འཚེ་མེད་ཞི་བའི་སྙིང་སྟོབས་ལ་གཟེངས་བསྟོད་ཆེད་ད་ལོར་འདི་ག་ཆོས་ཚོགས་ནས་ཡུ་རོབ་ཀྱི་ས་གནས་གང་སར། སྙིང་རྗེ་དང་། ༧གོང་ས་སྐུ་ཕྲེང་བཅུ་བཞི་པ། ཞེས་པའི་བྱ་འགུལ་ཞིག་འགྲོ་བཞིན་པའི་ཚན་པ་ཞིག་ཀྱང་ཡིན་ཞེས་ངོ་སྤྲོད་གནང་སོང་།
མཐའ་དོན་བྱ་འགུལ་འདིའི་མཚོན་དོན་གཙོ་བོ་ནི། དབུགས་ལྒང་འདི་ནི་མིས་བཟོས་ཀྱི་དངོས་པོ་གནམ་ལ་ཐོག་མར་འཕུར་མཁན་ཡིན་པ་བཞིན། དུས་རབས་འདིར་༧གོང་ས་མཆོག་གཅིག་པུ། ཆོས་ལུགས་དང་། མི་རིགས། རིག་གཞུང་། སྐད་ཡིག རྒྱལ་ཁབ་བྱེ་བྲག་པའི་གུ་དོག་གི་ལམ་བུ་ལས་རིང་དུ་བརྒལ་ཏེ་འཇིག་རྟེན་སྤྱི་སྨན་གྱི་བཟང་སྤྱོད་འཆད་པའི་རླབས་ཆེན་གྱི་སྟོན་པ་དང་། དབུ་ཁྲིད་ཐོག་མ་དེ་ཡིན་པ་མཚོན་གྱི་ཡོད་པ་རེད་ཅེས་འགྲེལ་བརྗོད་བྱས་སོང་།
ཟུར་མཆན། hot air balloon དྲོད་རླངས་དབུགས་ལྒང་། ཞེས་ཁོ་བོས་ཐད་བསྒྱུར་བྱས་ཁུལ་ལགས། གསར་འགྱུར་འདི་འབྲེལ་ཡོད་ཚོས་རེ་བ་བཞིན་རྒྱ་གར་ཤར་ཕྱོགས་རྡོར་གླིང་ནས་ཁང་ཟླ་སྲས་ཀྱིས།