བོད་ཀྱི་དུས་བབ་ནས་བཏུས།
ཝི་སི་ཀོན་སིན་མངའ་སྡེའི་གྲོས་ཚོགས་ཀྱིས་བོད་ཀྱི་ཉིན་མོ་སྲུང་གཙིའི་ཆེད་གྲོས་ཆོད་བཞག་ཡོད་པ་རེད།
ཕྱི་ལོ་ ༢༠༡༠ ཟླ་ ༣ ཚེས་ ༤ ཉིན་གྱི་སྔ་དྲོ་ཆུ་ཚོད་ ༩ ཡས་མས་སྟེང་། ཝི་སི་ཀོན་སིན་མངའ་སྡེའི་རྒྱལ་ས་མལ་ཌི་སིན་དུ་གནས་འཁོད་རེས་གཟའ་སྤེན་པའི་བོད་རིགས་སློབ་ཕྲུག་ཆུང་བ་ཚོས་ཚོན་མདོག་རྣམ་པར་བཀྲ་བའི་གོས་འཇམ་ཕྱུ་བ་གོན་ཞིང་གདོང་ལ་འཛུམ་དམུལ་དང་བཅས་ཕ་མའི་ལག་མགོར་འཇུ་བཞིན་ཨ་རི་དབུས་གཞུང་གྲོས་ཚོགས་ཁང་ཆེན་དང་བཟོ་བཀོད་གཅིག་མཚུངས་ཡིན་པའི་ཝི་སི་ཀོན་སིན་མངའ་སྡེའི་གྲོས་ཚོགས་ཁང་ཆེན་ཕྱོགས་སུ་ལས་དོན་གལ་ཆེན་ཞིག་གི་ཆེད་བསྐྱོད་བཞིན་པའི་རྣམ་པར་བལྟས་ཚེ། བོད་དོན་འཐབ་རྩོད་བྱེད་མཁན་གྱི་མ་འོངས་སོན་རྩ་ཁག་ཅིག་འདི་ཚོ་ཡིན་ནོ་སྙམ་པའི་བློ་ཞིག་ཅིག་ཅར་དུ་སྐྱེ་ཡོང་། ཉིན་འདི་རེས་གཟའ་ཕུར་བུར་འཁེལ་ཡོད་པས་སློབ་ཕྲུག་འདི་ཚོ་དང་བོད་མི་ཁག་ཅིག་གིས་སློབ་གྲྭ་དང་ལས་ཀ་ནས་དགོངས་པ་ཞུ་དགོས་བྱུང་ཡོད།
དེ་ཡང་ཉིན་འདིར་ཝི་སི་ཀོན་སིན་མངའ་སྡེའི་གྲོས་ཚོགས་ཀྱིས་བོད་མིའི་རང་དབང་འཐབ་རྩོད་ལ་གདུང་སེམས་མཉམ་སྐྱེད་དང་བོད་རྒྱལ་ཁབ་མི་རིགས་རིག་གཞུང་དང་བཅས་པར་ཆེ་མཐོང་དོ་སྣང་འདྲེན་ཆེད་འདི་ལོའི་ཕྱི་ཟླ་ ༣ ཚེས་ ༡༠ སྟེ། བོད་མིའི་རང་དབང་གྱེན་ལངས་ཀྱི་ཉིན་འདི་བོད་ཀྱི་ཉིན་མོ་ཡིན་ཞེས་གྲོས་ཆོད་ཡིག་ཨང་ ༡༡༢ ཅན་ཞིག་མང་མོས་ཀྱིས་གཏན་འབེབས་བྱས་ཤིང་། ལོ་རེའི་ཕྱི་ཟླ་ ༣ ཚེས་ ༡༠ ནམ་འཁེལ་གྱི་གཟའ་འཁོར་གཅིག་རིང་མལ་ཌི་སིན་གྲོང་ཁྱེར་ལས་ཁུངས་མདུན་དུ་བོད་ཀྱི་རྒྱལ་དར་སྒྲེང་འཛུགས་བྱེད་ཀྱི་ཡོད།
གྲོས་ཚོགས་ཁང་དུ་གྲོས་ཆོད་འཇོག་པའི་རྒྱུད་རིམ་གྱི་བརྙན་འཕྲིན་ལ་གཟིགས་ཚེ་གཤམ་འོག་འབྲེལ་ཐག་ལ་བསྣུན་རོགས།
བྱ་བ་འདི་འདྲ་ཞིག་སྤེལ་བར་ཡང་སྙིང་ནས་གུད་འདུད་དང་ཐུགས་རྗེ་ཆེ་ཞུ། ད་དུང་མུ་མཐུད་ནས་རོགས་སྐྱོར་གང་ཐུབ་གནང་རོགས་ཞུ།
སྙིང་ཐག་པ་ནས་ཁྱེད་ཚོར་ཐུགས་རྗེ་ཆེ་ཞུ།
ཐུས་རྗེ་ཆེ།