གཞུང་པ་ཚེ་དབང་བསོད་ནམས།
ཀ་ཁའི་འོག་ཏུ་གསོ་སྐྱོང་བྱས་པའི་བོད་ཕྲུག་ཚོ།
ཁ་བ་གངས་ཅན་ཆོས་སྲིད་གཉིས་ལྡན་བོད་ཡུལ་དེ།
ག་འདྲ་བྱས་ནས་རྒྱ་མིའི་ལག་ཏུ་ཤོར་བ་རེད།
ང་ཚོར་སློབ་སྦྱོངས་མེད་ནས་རྗེས་ལུས་ཤོར་བ་རེད།
ཅ་ཅོ་མ་མང་བདེན་མཐའ་གསལ་ལ་སློབ་སྦྱོངས་དགོས།
ཆ་རྐྱེན་འཛོམས་པའི་དུས་སྐབས་འདི་ལ་རིག་པ་སྒྲིམ།
ཇ་ཆང་རྗེས་ལ་མགོ་བོ་འཁོར་ནས་མ་བསྡད་པར།
ཉིན་རེ་བཞིན་དུ་རང་གི་ལས་འགན་ཚུལ་བཞིན་སྒྲུབ།
ཏ་ལའི་བླ་མས་ལམ་སྟོན་འོག་ཏུ་མང་གཙོ་བཙུགས།
ཐ་ན་གང་གི་སྐུ་དབང་ཡོངས་རྫོགས་བོད་མིར་གནང།
ད་ལྟའི་དུས་ལ་ང་ཚོའི་རིག་པ་མ་སྒྲིམ་ན།
ནམ་ཞིག་རྫོགས་མཐའ་མེད་པའི་འགྱོད་པ་བསྐྱེད་ཡོང་ངོ།
པ་ཕ་ཨ་མས་བསྟན་པའི་བཟང་སྤྱོད་མ་བརྗེད་དགོས།
ཕ་བཟང་བུ་རབས་ཕ་ཡུལ་ལེན་ལ་སློབ་སྦྱོང་དགོས།
བ་ཕྱུགས་དུད་འགྲོ་བསམ་མེད་བཞིན་དུ་མ་འཁྱམས་པར།
མ་འོངས་བོད་ལྗོངས་གསར་པའི་འཛུགས་བསྐྲུན་ན་གཞོན་འགན།
རྩ་བ་བོད་དོན་བདེན་མཐའ་གསལ་ལ་ཤེས་ཡོན་དགོས།
ཚ་གྲང་དཀའ་སྡུག་ཀུན་ལ་བཟོད་སྲན་ཐུབ་པ་དགོས།
ཛ་དྲག་དུས་ཚོད་ནམ་ཡོང་ངེས་པ་མེད་པ་ནས།
ཝ་ལེར་གསོན་དང་གྲ་སྒྲིག་ཨང་སར་སྔོན་ནས་དགོས།
ཞར་དང་ཞོར་ལ་རྒྱལ་སྤྱིའི་ཆབ་སྲིད་རྒྱུས་ལོན་དགོས།
ཟས་ནོར་ལོངས་སྤྱོད་འཚོ་བ་གཞན་བསྟེན་བསམ་བློ་དོར།
འ་ར་འུར་རེ་མ་མང་དོན་དངོས་ལག་ལེན་ཟབ།
ཡ་རབས་བཟང་སྤྱོད་ཕ་མེས་སྒོམ་བཤིས་བརླག་མི་ཉན།
ར་བ་གངས་རིའི་བསྐོར་བའི་བོད་ཀྱི་ཡུལ་ལྗོངས་དེ།
ལ་ལུང་ས་མཐར་འཁྱར་ཡང་ནམ་ཡང་བརྗེད་མི་ཉན།
ཤེས་ཡོན་ལྷག་བསམ་ཆིག་སྒྲིལ་བོད་མིའི་བླ་སྲོག་རེད།
ས་ཕྱོགས་འདི་ནི་ཕ་ཡུལ་མ་རེད་མི་ཡུལ་རེད།
ཧ་ཅང་འཁྲུལ་བ་མ་གནང་མི་ཡུལ་ལུང་པ་རེད།
ཨི་བདེན་མི་བདེན་མནོ་བསམ་ཞིབ་ཏུ་བཏང་ན་ཤེས།
ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས་ནས་སྤྱི་ལོ་ ༢༠༢༢/༡༡/༡༡ ཉིན་རང་ཁྱིམ་དུ་ཟིན་བྲིས་སུ་བཏབ།