བོད་དོན་འཐབ་རྩོད་ཀྱི་རྣམ་ཤེས་གསར་བ།

ཨ་རིའི་བོད་པ་ནས་་་་་

རྒྱ་ནག་ནི་འཛམ་གླིང་ཐོག་གི་ཡར་རྒྱས་བཞིན་པའི་སྟོབས་ཆེན་རྒྱལ་ཁབ་ཨང་དང་པོ་ཡིན་ལ།བོད་བཙན་བྱོལ་གཞུང་ནི་འཛམ་གླིང་ཐོག་གི་བཙན་བྱོལ་བའི་ནང་གི་སྟོབས་ཆེན་བཙན་བྱོལ་གཞུང་ཨང་དང་པོ་ཡིན། རྒྱ་ནག་པོའི་གཞུང་གིས་ཕྱིའི་རྣམ་པར་བོད་ལ་མཐོང་ཆུང་བྱས་ནས་བོད་ལ་གནད་དོན་ཞིག་མེད་པར་བརྗོད་ཀྱིན་ཡོད། དོན་དངོས་སུ་བོད་ནི་རྒྱ་ནག་གི་འཇིགས་སྣང་བྱེད་ས་དང་དོགས་ཟོན་བྱེད་ས་གཙོ་བོ་ཡིན་པ་བོད་ལ་དམག་འབོར་ཆེན་དང་།དངུལ་འབོར་ཆེན། རྒྱ་མི་འབོར་ཆེན་གཏོང་བཞིན་པས་ཧ་གོ་ཐུབ།
རྒྱ་གཞུང་གིས་༧་གོང་ས་མཆོག་གི་སྐུ་རྒས་པ་དང་མཉམ་དུ་བོད་དོན་ཉམས་རྒུད་ལ་འགྲོ་བ་དང་ཁོང་གི་སྐུ་མ་བཞུགས་ན་བོད་དོན་རྩད་མེད་ལ་འགྲོ་བར་རེ་སྨོན་བྱེད་ཀྱིན་ཡོད། རེ་སྨོན་དེ་ལ་རྒྱ་མི་དང་རྒྱལ་སྤྱིའི་དཔྱད་བརྗོད་པ་མང་པོས་ཚོད་དཔག་བྱེད་པ་ལས་དེ་ལ་སྒྲུབ་བྱེད་རྣོན་པོ་ཞིག་མི་འདུག བཙན་བྱོལ་བོད་གཞུང་གིས་བོད་པ་སྐྱབས་བཅོལ་བ་རྣམས་རྒྱ་གར་ནས་ཡང་བསྐྱར་ལོ་ལྔ་བཅུར་སྐྱབས་བཅོལ་ལ་སྡོད་ཆོག་པའི་ཆོག་མཆན་ཐོབ་ཡོད་པ་དང་། རྒྱལ་བ་ཀརྨ་བའི་སྐུ་ཡོན་དང་མཛད་འཕྲིན་ཞོགས་གསར་གྱི་ཉི་མ་དང་འདྲ་ལ། ལོ་གཉིས་ཀྱི་སྔོན་བཙན་བྱོལ་བོད་མིའི་ཁྲོད་ཀྱི་ཚོགས་པ་ཆེས་ཤོས་དང་ནུས་པ་ཆེས་ཤོས་གཞོན་ནུ་ལྷན་ཚོགས་ཀྱི་གཙོ་སྟོབས་ཆེན་བྱང་ཨ་རི་ལ་གནས་བསྡོད་པ་ཞིག་འོས་འདེམས་བྱུང་ནས་ཕྱིར་རྡ་རམ་ས་ལར་ཕེབས་སྟེ་བྱ་བ་སྒྲུབ་བཞིན་ཡོད་པ་དེས་ནུབ་ཕྱོགས་ན་གནས་པའི་ཤེས་ལྡན་པས་ནུས་པ་ཤར་ཕྱོགས་ནས་འདོན་པ་མགོ་བཙུགས་པ་མཚོན་ཡོད།
རང་མིན་ནུབ་ཕྱོགས་སུ་བསྡོད་པའི་བོད་མིའི་སྤྱི་འཐུས་ཇེ་མང་ལ་གཏོང་རྩིས་ཡོད་པར་མ་ཟད།ལོ་བཅོ་ལྔ་ཙམ་གྱི་སྔོན་ནས་བོད་པ་མི་ཉུང་ཞིག་ནུབ་ཕྱོགས་སུ་གནས་སྤོར་བྱས་དང་བྱེད་བཞིན་པ་དེས་བོད་གཞུང་དང་རྡ་སའི་གཙོས་རྒྱ་བལ་འབྲུག་གསུམ་གྱི་བོད་པ་སྐྱབས་བཅོལ་བ་ཚོའི་དཔལ་འབྱོར་ལ་སྟོགས་ཤུགས་གསར་བ་ཞིག་ཐོབ་ཀིན་འདུག
དེ་ལས་ཀྱང་དགའ་སྤྲོ་དང་རེ་བའི་ཁེངས་བའི་ལས་དོན་ཞིག་ཡོད་པ་ནི་༢༠༡༡་ལོའི་བཀའ་བློན་ཁྲི་བའི་འོས་འདེམས་ཆེན་མོའི་འགྲན་རྩོད་ཀྱི་མགོ་ཡང་བྱང་ཨ་རི་ནས་ཚུགས་སོང་བ་དེ་ཡིན། མི་གཅིག་ཁྲི་ཙམ་གྱི་ནང་འགྲན་རྩོད་པ་གསུམ་བྱུང་བ་ནི་གནས་ཚང་ཨ་རི་ཚང་མང་གཙོ་དང་ཆབ་སྲིད་ཀྱི་ཚོར་ཤུགས་རྣོ་བའི་རྐྱེན་ཡིན་རྒྱུ་རེད་ལ། འགྲན་རྩོད་པ་གསུམ་གྱིས་བོད་ཆས་གཙང་མ་གྱོན་ནས་ཀུན་སྤྱོད་ལེགས་པ་ནི་ཨ་རི་ཚང་སྲོལ་རྒྱུན་གྱི་ལྟ་བ་མཁྲེགས་ཤིང་ཆོས་སེམས་ཆེ་བའི་མཚུངས་རྐྱེན་གྱིས་ཡིན་རྒྱུ་རེད།
སྐུ་ཞབས་ཕུར་བུ་རྡོ་རྗེ་ལགས་འགྲན་རྩོད་པ་གཅིག་ཡིན། ཁོང་གིས་ཨ་རིའི་མཐོ་སློབ་ཞིག་གི་ནང་ཁྲིམས་ལུགས་སློབ་མཐར་ཕྱིན་ནས་བོད་པའི་སྤྱི་ཚོགས་ནང་ཕྱག་ལས་གནང་མྱོང་བར་མ་ཟད།བོད་ཀྱི་ལོ་རྒྱུས་ཐོག་བཀའ་ཁྲིར་བཞེངས་མཁན་དང་པོ་ཡིན།
དེང་སྐབས་ཨ་རིའི་སློབ་གྲ་ཆེན་མོ་ཞིག་ན་ཕྱག་ལས་གནང་བཞིན་པའི་བཀྲས་མཐོང་བསྟན་འཛིན་རྣམས་རྒྱལ་ཡང་འགྲན་རྩོད་པ་གཅིག་ཡིན། ཁོང་གིས་ནེའུ་ཡོག་དང་ཝ་ཤིན་ཀྲོན་ནས་དོན་གཅོད་དང་སྐུ་ཚབ་ཀྱི་ཕྱག་ལས་གནང་མྱོང་ལ།ཁོང་བཀའ་ཁྲིའི་སྐབས་བོད་མི་ཆིག་སྟོང་ཨ་རིར་གཞི་ཆགས་ལ་བཏང་བ་དང་དོན་གཅོད་ཁང་འགའ་ཤས་སྒོ་ཕྱེ་ཐུབ་ཡོད་པའི་ཁར་ཁོས་གྲོས་འཚོགས་ཀྱིས་ཐགས་གཅོད་ལས་བརྒལ་ནས་ལས་དོན་སྒྲུབ་ཡོད། བཀྲས་མཐོང་ཁོང་ནི་མི་མང་གིས་ཐད་འདེམས་བྱུང་བའི་བཀའ་ཁྲི་ལས་ཐོག་འདིའི་སྔོན་གྱི་བཀའ་བློན་ཕྱག་རྗེས་ཆེས་ཤོས་དང་།ཤེས་ཡོན་དང་འཇོན་ཐང་།ལྷག་བསམ་དང་ཉམས་མྱོང་བཅེས་ལྡན་པ་ཞིག་ཡིན་པས།ཁོང་ལ་མི་མང་གིས་ཐད་འདེམས་བཀའ་ཁྲི་སྐབས་གསུམ་པར་འོས་ཤོག་འཕེན་འདོད་མཁན་མང་པོ་ཡོད།
ཕྱི་སྡོད་བོད་མི་མང་པོས་དོ་སྣང་བྱེད་སའི་བཀའ་ཁྲིའི་འགྲན་རྩོད་པ་གཞན་ཞིག་ཡོད་པ་ནི་ལོ་ན་གཞོན་ཞིང་ཡོན་ཏན་ཆེ་བའི་སྐུ་ཞབས་བློ་བཟང་སེང་གེ་ཡིན། ཁོང་འཛམ་གླིང་གི་གཙུག་ལག་སློབ་ཆེན་ཨང་དང་པོ་ཧ་བར་ཌེ་གཙུག་ལག་སློབ་ཆེན་་Harvard University དུ་ཁྲིམས་ལུགས་མཐར་ཕྱིན་ནས་སློབ་དཔོན་གྱི་མཚན་རྟགས་བླངས་ཡོད། ཨེ་ཤ་ཡའི་གཞོན་སྐྱེས་ཤེས་ལྡན་པའི་མཚན་སྙན་ཐོབ་པའི་བློ་བཟང་སེང་གེ་ཁོང་གིས་ཆབ་སྲིད་རྣོ་ངར་ཆེ་བའི་བོད་ཀྱི་གཞོན་ནུ་ལྷན་ཚོགས་ཀྱི་ས་གནས་དང་དབུས་རྒྱུན་ལས་ཁང་ནས་ཕྱག་ལས་གནང་མྱོང་བར་མ་ཟད་ནུབ་ཕྱོགས་དང་རྒྱ་ནག་གི་མཁས་པ་མང་པོར་འབྲེལ་བ་ཆེན་པོ་ཡོད། བོད་པ་རྣམས་སེང་གེ་ལ་དགའ་བ་དང་ཁོང་གི་མིང་རྗེས་མ་སེང་གེ་ཡིན་པ་དེས་ཡང་སེམས་ཁམས་རིག་པས་དཔྱད་ན་ཡིད་འགུགས་ཀྱི་འབྲེལ་བ་ཞིག་ཡང་འདུག་ཟེར། བློ་སེང་ཁོང་སྐབས་གསུམ་པའི་བཀའ་ཁྲིའི་འགྲན་རྩོད་ཁྲོད་ཀྱི་སྐར་མ་འོད་ཆེན་ཞིག་ཡིན།
གོང་གི་གནས་ཚུལ་འདི་དག་གིས་བློ་སྟོབས་ལྡན་པའི་བོད་པ་ཚོས་རང་དབང་འཐབ་རྩོད་ཀྱི་མི་ལོ་ལྔ་བཅུ་གཞན་པ་ཞིག་གི་ལེའུ་གསར་བ་ཞིག་གི་མགོ་རྩོམ་བཞིན་ཡོད་པ་མཚོན་ལ།ནུབ་ཕྱོགས་ཀྱི་དཔལ་འབྱོར་དང་ཆབ་སྲིད་ཀྱིས་རྡ་རམ་ས་ལར་གསོན་ཤུགས་རྒྱས་བཞིན་ཡོད་པ་ཤེས།
གནས་ཚུལ་འདིས་རྒྱ་གཞུང་གི་སྟོང་བསམ་རེ་སྨོན་ལ་སེམས་ཁྲལ་གསར་བ་ཞིག་སྤྲད་པར་མ་ཟད།བོད་པ་རྣམས་ནུབ་ཕྱོགས་ནས་དངུལ་ཁོ་ནར་མགོ་འཁོར་ནས་ཡོད་པར་བསམ་པ་ལ་ལན་ཚ་བོ་ཞིག་ཡང་བརྒྱབས་འདུག
བོད་དོན་ནམ་ཡང་ཤི་གི་མ་རེད།འདི་ནི་བོད་དོན་འཐབ་ཀྱི་རྣམ་ཤེས་གསར་བ་ཡིན།