སྤྱི་འཐུས་ཨ་ཀྲུག་ཚེ་བརྟན།
བོད་ནི་ད་ལྟའི་ཆར་འཛམ་གླིང་ཐོག་འགྲོ་བ་མིའི་ཐོབ་ཐང་རྡོག་རོལ་ཐེབས་ཡུལ་ཆེ་ཤོས་དང་། ཛ་དྲག་ཆེ་ཤོས་ཀྱི་ཡུལ་ཞིག་རེད་ཅེས་གསུངས།
ལྷོ་ཕྱོགས་མངའ་སྡེ་ཞུ་གཏུག་ལས་འགུལ་ཚོགས་ཆུང་གི་ཞུ་གཏུག་ཐེངས་དང་པོ་༢༠༡༣ ཟླ་༡ ཚེས་༡ ཉིན་ནས་ཚེས་༢༥ བར་ཀརྣ་ཀྲ་ཀའི་མངའ་སྡེ་དང་། ༢ ཨ་དཱར་པརྡེ་ཤི། ༣ ཀེ་ར་ལ། ༤ ཏ་མུན་ན་དུ། ༥ པོན་འདྲི་ཅ་རི་བཅས་མངའ་སྡེ་ལྔར་བསྐོར་ཟིན་པ་དང་། ཞུ་གཏུག་ཐེངས་གᩡཉིས་པ་དེ་བཞིན་ཟླ་འདིའི་ཚེས་༢༤ ནས་མགོ་བཙུགས་ཏེ། ༡ རྒོ་བ་མངའ་སྡེ། ༢ མ་ཧ་ར་སིར་ཏིན་མངའ་སྡེ། ༣ སྒུ་རྗུ་ར་ཏིན་མངའ་སྡེ། ༤ ར་རྗི་སི་ཏན་མངའ་སྡེ་བཅས་མངའ་སྡེ་བཞིར་སྐོར་རྒྱུ་ཡིན་ཞིང་། ཚེས་༢༤ ཉིན་སྒོ་བ་མངའ་སྡེའི་ཀ་ལེན་རྒོ་ཏྲི་ས་གནས་ལ་སྤྱི་འཐུས་འཇིགས་མེད་ལགས་དང་། སྤྱི་འཐུས་བློ་བཟང་ཡེ་ཤེས་ལགས། སྤྱི་འཐུས་ཚེ་རིང་གཡུ་སྒྲོན་ལགས། ཕྲན་སྤྱི་འཐུས་ཨ་ཀྲུག་ཚེ་བརྟན་བཅས་ལྷན་འཛོམས་ཀྱིས་ཕྱི་དྲོ་ཆུ་ཚོད་༧ པར་ཁྲིམས་རྩོད་པ་བེ་ཀ་རམ་བེ་མར་མཆོག་དང་། ཆུ་ཚོད་༨་༣༠ ཐོག་སྨན་པ་ཨ་ནི་ཏ་མཆོག་དང་མཇལ། བོད་ནང་གི་ཛ་དྲག་གནས་ཚུལ་དང་ཞུ་གཏུག་ལས་འགུལ་གྱི་དགོས་དམིགས་སོགས་ངོ་སྤྲོད་ཞུས། ཁོང་གཉིས་ནི་བོད་དོན་ལ་ཐུགས་སྣང་ཆེ་ཞིང་བོད་པར་གདུང་སེམས་མཉམ་བསྐྱེད་གནང་མཁན་བོད་ཀྱི་ས་གནས་འདིའི་གྲོགས་པོ་ཡག་ཤོས་རེད་འདུག མངའ་སྡེ་འདིར་ལས་འགུལ་གང་སྤེལ་ལ་ཁོང་གཉིས་ཀྱིས་ཕྱག་རོགས་གནང་གི་ཡིན་གསུངས་བྱུང་།
ཚེས་༢༥ ཉིན་གྱི་སྔ་དྲོ་ཆུ་ཚོད་༩་༣༠ ཐོག་མངའ་སྡེའི་སྤྱི་ཁྱབ་བློན་ཆེན་གཞོན་པ་ཕྷ་རན་སེས་ཀོ་སྒྲིས་སུ་ས་མཆོག་ལ་མཇལ་འཕྲད་གནང་། རྒྱ་གར་ནི་བོད་ཀྱི་འདས་མ་ད་གསུམ་ལ་གལ་དང་དཀའ་དྲིན་ཇི་ལྟར་ཆེ་ཚུལ་དང་། དེ་བཞིན་རྒྱ་ནག་གི་ཡ་ང་སྙིང་རྗེ་མེད་པའི་གདུག་ཙུབ། གདུག་ཙུབ་དེའི་འོག་གི་བོད་ཀྱི་ཛ་དྲག་སྤྱི་དང་ལྷག་པར་སྐུ་ལུས་མེར་སྲེག་སྐོར་ངོ་སྤྲོད་ཞུས། བློན་ཆེན་མཆོག་ཀྱང་བོད་དོན་ལ་ཐུགས་སྣང་དང་ཐུགས་ཁུར་ཧ་ཅང་ཆེན་པོ་གནང་མཁན་ཞིག་རེད་འདུག་པ་དང་། ཁོང་གིས་གསུངས་དོན་ལ། བོད་ནི་ད་ལྟའི་ཆར་འཛམ་གླིང་ཐོག་འགྲོ་བ་མིའི་ཐོབ་ཐང་རྡོག་རོལ་ཐེབས་ཡུལ་ཆེ་ཤོས་དང་། ཛ་དྲག་ཆེ་ཤོས་ཀྱི་ཡུལ་ཞིག་རེད། འོན་ཀྱང་རྒྱལ་སྤྱིའི་སྤྱི་ཚོགས་དང་འཛམ་གླིང་གིས་དེ་ཙམ་ཐུགས་ཁུར་གནང་གི་མི་འདུག་པས་དེ་ནི་ཧ་ཅང་གི་བློ་ཕམ་རེད་ཅེས་དང་། བློན་ཆེན་མཆོག་གིས་ནམ་ཡང་བོད་དང་བོད་མི་ལ་གདུང་སེམས་མཉམ་བསྐྱེད་ཡོད་ཅེས་སོགས་གསུངས།
ཕྱི་དྲོའི་ཆུ་ཚོད་༧ པར་ཁུལ་དེར་ཡོད་པའི་བོད་རིགས་ཚོ་དང་ཐུག་སྐབས་དེར་རྒྱ་གར་དབུས་གྲོས་ཚོགས་འཐུས་མི་སྐུ་ཞབས་ཤིརི་པད་ན་ཡར་མཆོག་ཚེས་༢༦ ཉིན་གྱི་སྔ་དྲོ་ལྡི་ལིར་ཕེབས་དགོས་ཡོད་པས། མཚན་མོའི་ཆུ་ཚོད་༩་༡༥ ཐོག་མཇལ་རྒྱུ་གནང་བ་བཞིན་བཅར། ཁོང་དང་ལྷན་དུ་གསར་འགོད་པ་གྲགས་ཅན་སན་ཇེ་སིན་ཧ་མཆོག་ཀྱང་ཕེབས་འདུག བོད་དོན་ཐོག་ཆུ་ཚོད་གཅིག་ལྷག་ཙམ་རིང་བགྲོ་གླེང་གནང་། ཁོང་གིས་བོད་དོན་ལ་རྒྱབ་སྐྱོར་དང་བོད་མི་ལ་གདུང་སེམས་མཉམ་བསྐྱེད་ཡོད་ཅེས་ཡང་ཡང་གསུངས་སོང་། མཚན་མོའི་ཆུ་ཚོད་༡༠་༣༠ ཐོག་མགྲོན་ཁང་དུ་འབྱོར་བ་སོགས་ཀྱི་ཞུ་གཏུག་ལས་འགུལ་ཐེངས་གཉིས་པ་སྒོ་བ་ནས་མགོ་བཙུགས་པའི་ལས་བསྡོམས་མདོར་བསྡུས་བཅས།
ཕྱི་ལོ་༢༠༡༣ ཟླ་༨ ཚེས་༢༦ ཉིན་གྱི་སྔ་དྲོ་བོད་མི་མང་སྤྱི་འཐུས་ཨ་ཀྲུག་ཚེ་བརྟན་ནས།
འབྲེལ་བ་གནང་ཡུལ་གྱི་ཁ་པར་ཨང་གྲངས། 8628858376 86379329912
ཡག་པོ་བྱུང་་འདུག་་་་་བཀུར་འོས་སྤྱི་འཐུས་རྣམ་པར་ཐུགས་རྗེ་ཆེ་ཞུ་་་་་་
་་་་་ ཁོང་གིས་གསུངས་དོན་ལ། བོད་ནི་ད་ལྟའི་ཆར་འཛམ་གླིང་ཐོག་འགྲོ་བ་མིའི་ཐོབ་ཐང་རྡོག་རོལ་ཐེབས་ཡུལ་ཆེ་ཤོས་དང་། ཛ་དྲག་ཆེ་ཤོས་ཀྱི་ཡུལ་ཞིག་རེད། འོན་ཀྱང་རྒྱལ་སྤྱིའི་སྤྱི་ཚོགས་དང་འཛམ་གླིང་གིས་དེ་ཙམ་ཐུགས་ཁུར་གནང་གི་མི་འདུག་པས་དེ་ནི་ཧ་ཅང་གི་བློ་ཕམ་རེད་ཅེས་དང་། བློན་ཆེན་མཆོག་གིས་ནམ་ཡང་བོད་དང་བོད་མི་ལ་གདུང་སེམས་མཉམ་བསྐྱེད་ཡོད་ཅེས་སོགས་གསུངས། ་་་་