བོད་ནི་རྒྱ་ནག་མང་གཙོར་འགྱུར་བའི་འགག་རྡོ་ཆེན་པོ་ཞིག་རེད།

བསམ་གླིང་ཚེ་རིང་ལྷ་མོ།

དེང་དུས་འཛམ་གླིང་སྟེང་གི་ཡར་ཐོན་ཅན་དང་བསམ་བློ་བ། སྤྱི་ཕན་པ། གོ་རྟོགས་ཡོད་པ། མི་མང་གི་ཆེད་དུ་དང་། མི་མང་གི་གཞུང་ཞིག་ཡིན་ན། མང་གཙོའི་ལམ་དུ་བསྐྱོད་ཅིང་། མང་གཙོའི་ལམ་ནས་རྒྱབ་ཁབ་སྐྱོང་ཞིང་། མང་གཙོའི་ལམ་ནས་རྒྱལ་ཁབ་གཞན་ལ་འགྲན་སྡུར་དང་། སྤོབས་པ་ལྡན་པའི་ངང་ཡར་ཐོན་ཅན་གྱི་གྲས་སུ་བསྐྱོད་ཅིང་ཡོད། འོན་ཀྱང་རྒྱ་ནག་གུང་ཁྲན་གཞུང་ནི་ཁ་ཐུར་ནས་ཐུར་དུ་དུད་ཅིང་། མཁྲེགས་བཟུང་དང་གུ་དོག  བཅོས་མ། གཉའ་གནོན། བཙན་ཤེད། བརྙས་བཅོས་རྡུང་རྡེག  རུལ་སྲུངས་བཅས་ཀྱི་ལམ་དུ་བསྐྱོད་ཅིང་ལོ་རབས་དྲུག་བཅུ་པའི་སྨྱོ་མཆོངས་དེར་ད་དུང་ཡང་། དཔྱད་སྟོབས་ཀྱི་རྣམ་དཔྱོད་མེད་པར་ལོངས་མཆོངས་བྱེད་བཞིན་ཡོད། དེ་དག་ནི་འཛམ་གླིང་སྐྱེ་བོའི་ཁྲོད་དུ་ཆེད་མུན་ནག་དང་། སྡུག་རྩུབ། གཉའ་གནོན་གྱི་རྒྱལ་ཁབ་ཆེ་ཤོས་དེ་ཆགས་ཡོད། མ་གཞི་བྱས་ན་རྒྱ་ནག་ནི་ལོ་རྒྱུས་ཡུན་རིང་ལྡན་པའི་ནང་པའི་རྒྱལ་ཁབ་གཅིག་ཡིན་ཞིང་། རྒྱལ་ཁབ་དེར་མི་རིགས་མང་ལ་རིགས་གཞུང་ཕུན་སུམ་ཚོགས་པོ་ཡོད་པ། ཁོང་ཚོའི་ལག་ཤེས་བཟོ་ལས་གང་ཅིར་འཛམ་གླིང་སྟེང་ངོམས་སུ་ཆོག་པ་ཡོད།  ལྷག་པར་དུ་རྒྱ་མི་རིགས་འདི་ལས་ལ་བརྩོན་ཞིང་ཤེས་དཔལ་ལྡན་པའི་མི་རིགས་ཤིག་ཡིན།

འོན་ཀྱང་རྒྱ་ནག་དམར་པོའི་དབང་སྒྱུར་འོག་ཚུད་པའི་དུས་རབས་འདི་དག་ནང་། མའོ་ལ་སོགས་པའི་དམར་པོའི་ལྟ་གྲུབ་རེ་རེའི་འོག་ནས་ཁོང་ཚོའི་མི་མང་གི་རང་དབང་བསམ་བློའི་བདེ་སྐྱིད་ཀྱི་ཚད་གཞི་བོར་བརླག་ཐོག  ཡོད་ཚད་གུང་ཁྲན་རིང་ལུགས་ལ་རེ་བ་བཅོལ་ཞིང་། མཐའ་ན་རིག་གསར་གྱི་སྡུག་སྦྱོང་དང་། ཡ་ང་བའི་འཚོ་བ་དེ་དག་ཀྱང་གུང་ཁྲན་རིང་ལུགས་ཀྱི་ཕྱོགས་སུ་བསྐྱོད་པའི་ཐེམ་སྐས་ཡིན་ཁུལ་བྱས་མྱོང་ཡོད།  མཐའ་མཇུག་ཏུ་ཐའི་ཝན་ལ་སོགས་པའི་རིགས་མཐུན་རྒྱལ་ཁབ་དེ་དག་གི་དཔལ་འབྱོར་གྱི་གནས་སྟངས་ཡར་ཐོན་ཅན་དུ་འགྱུར་ཏེ། རྒྱ་ནག་དམར་ཤོག་དེ་རྗེས་ལུས་ཡིན་པ་གཞི་ནས་ངོས་འཛིན་བྱུང་ཐོག ལོ་རབས་༨༠ པར་དམར་ཤོག་ཚོགས་པས་ཕྱི་ཕྱོགས་སུ་སྒོ་དབྱེ་བྱས་རྗེས་དང་། དམར་ཤོག་སྐྱར་དར་རམ། ཆབ་སྲིད་ཅུང་གུ་ཡངས་ཀྱི་དུས་རབས་དེ་དག་ནང་ཁོང་ཚོའི་མི་རིགས་འདིས། དཔལ་འབྱོར་གྱི་ཁེ་ཕན་འཚོལ་རྒྱུ་ཁོ་ན་དང་། དམར་ཤོག་ཚོགས་པའི་ལྟ་གྲུབ་ལ་བརྩི་འཇོག་ཞུ་རྒྱུ་ཙམ་ལས། རང་རང་སེམས་ཀྱི་ཞི་བདེའི་བདེ་སྐྱིད་དང་། ལས་རྒྱུ་འབྲས། མེས་པོའི་ལམ་ལུགས་སྲོལ་ལ་སོགས་པའི་ཡ་རབ་བཟང་སྤྱོད་སོགས་དང་བར་ཐག་ཇེ་རིང་དུ་འགྲོ་བཞིན་ཡོད། དེ་ནི་ཁོ་ཚོར་དམར་ཤོག་གི་ལྟ་གྲུབ་དེ་ས་ཁྱབ་རྡོ་ཁྱབ་ཏུ་གྱུར་བའི་རྗེས་འབྲས་དངོས་དེ་ཡིན།

ད་ཡོད་རྒྱ་ནག་གི་ཆབ་སྲིད་སྐྱོང་སྟངས་དངོས་དེ། དཔོན་རིགས་ཁག་གི་གཉེན་ཚན་ཚོས་ཁེ་ལས་གང་བྱུང་དུ་གཉེར་བ་དང་། ཁེ་ལས་གཉེར་བའི་ཁ་ཕྱོགས་ས་དེ་ཡང་བོད་དུ་ལྡིར་ཞིང་། རྒྱ་ནག་མི་མང་དཀྱུས་མ་ཚོར་ཁེ་ལས་དེ་དག་ལས་ཤ་སྟི་ག་བགོ་འགྲེམས་བྱེད་ཐུབ་ཐབས་དེ་ཡིན་པ་དང་། དེ་ཡང་བོད་སྐྱོར་གྱི་ཁ་གཡང་འོག་ཏུ་གནས་རི་དང་། ཆུ་བོ་རྩ་ཆེན་སོགས་སུ་གང་བྱུང་གི་འཛུགས་སྐྲུན་ལས་གཞི་སྤེལ་བ་དེས་བོད་མི་མང་གི་སེམས་པར་ཕོག་དུག་ཆེན་པོ་བཟོ་ཞིང་ཡོད། རྒྱ་ནག་ནང་ཁུལ་དུ་ཡང་མི་མང་དཀྱུས་མའི་འཚོ་ཐབས་ལ་གཞུང་དང་མི་སྒེར་ནས་དོ་ཕོག་བྱུང་ན་དེ་དག་གི་དཀའ་ངལ་ཞུ་ཐབས་དཀའ་བ། དཔོན་ངན་རིང་ལུགས་ཀྱི་དཔུང་ཁག་ཆེན་པོའི་འོག་ནས།  མི་མང་རང་རང་གི་ལྟ་གྲུབ་དང་འཚོ་བའི་བདེ་སྐྱིད་ཀྱི་ཆེད་དམར་གཞུང་ལ་ངོ་རྒོལ་གང་ཞིག་བརྩམས་ཀྱང་། དེ་དག་དྲག་པོའི་དཔུང་གིས་འབུར་འཇོམས་བྱེད་པ་དེ་ཡིན།

མཐའ་ན་མང་གཙོ་ཡར་ཐོན་ཅན་གྱི་རྒྱལ་ཁབ་གཞན་དུ་གསར་འགྱུར་བརྒྱུད་ལམ་ནི་མི་མང་གི་མགྲིན་ཚབ་པའི་ངོ་བོར་གནས་ཀྱང་། རྒྱ་ནག་དམར་ཤོག་ནང་། གསར་འགྱུར་བརྒྱུད་ལམ་ཡོངས་རྫོགས་དམར་པོའི་ལྟ་གྲུབ་འགྲེལ་བརྗོད་དང་། འཁྲབ་སྟོན་བྱེད་པའི་ལག་ཆ་གཙོ་བོར་འགྱུར་ཏེ། དྲང་བདེན་གྱི་རྒྱབ་སྐྱོར་ཐོབ་རྒྱུ་ཕར་བཞག དེ་ལས་ལྡོག་པར་རྒྱ་ནག་གུང་ཁྲན་ཡག་རབ་དང་། རྒྱལ་ཁབ་ལ་དགའ་ཚུལ་གྱི་སྐད་ཆ་ཁོ་ན་སྦྱོང་བརྡར་བྱས་ནས་ཤོད་དུ་འཇུག་རྒྱུ་དེ་གསར་འགྱུར་བརྒྱུད་ལམ་གྱི་མདུན་ལམ་ཉག་ཅིག་དེ་ཡིན།  མཐའ་ན་གསར་འགྱུར་བཅའ་དྲིི་བ་དག་གིས་གསར་འགྱུར་བཅའ་དྲིའི་སྐབས་ཀྱི་ལན་ཚང་མ་ཁོ་པ་ཚོའི་འདོད་འདུན་བཞིན་སྨྲ་དགོས་པའི་བཙན་བཀའ་གཏོང་གི་ཡོད་པ་དེ་ནི་ཁོང་ཚོའི་སྲོལ་རྒྱུན་དུ་གྱུར་ཡོད།

གཞན་ཡང་དམར་ཤོག་གིས་འགྲིག་མེད་པའི་རྣམ་པ་བསྟན་པའམ་ཡང་ན་མང་གཙོའི་ལམ་ལ་ཁ་ཕྱོགས་ཚེ། དམར་གཞུང་ནས་དམར་ཤོག་ལྟ་གྲུབ་ཀྱིས་སློབ་བཅུན་བྱེད་པ་མ་ཟད། གལ་ཆེ་ཤོས་དང་འཚབ་ཆེ་ཤོས་དེ་བོད་བཙན་བཟུང་བྱེད་སྐབས་ཀྱི་གནས་ཚུལ་རྣམས་རྒྱུད་སྟོན་བྱ་རྒྱུའི་ལང་ཤོར་དུ་གྱུར་ཡོད། དེ་ཡང་བོད་རྒྱལ་ཁབ་བཙན་བཟུང་བྱེད་པའི་སྐབས་དམག་སྡེ་བཅོ་བརྒྱད་པས། དཀའ་སྡུག་ག་ཚོད་མྱངས་པ་དང་།དམག་མི་ག་ཚོད་ཤི་བ། དཔེར་ན་འཁོར་ལམ་བཟོ་བའི་སྐབས་དང་བོད་དུ་སྐྱོད་པའི་སྐབས་གྲོད་པ་ལྟོགས་པ་སོགས་ཁོ་པ་ཚོས་བྱས་རབས་དང་བཏང་རབས་སོགས་ཀྱི་བརྙན་འཕྲིན་དཔར་ཤུས་རྣམས་ཡང་ཡང་བསྟན་ཏེ། ཁོ་པ་ཚོའི་མི་མང་གིས་གལ་སྲིད་མང་གཙོའི་ལམ་ཕྱོགས་འདམ་ག་བྱས་ཚེ། དྲག་པོའི་སྟོབས་ཤུགས་ཉམས་དམས་སུ་ཕྱིན་ཏེ། བོད་དང་ཤིན་ཅང་སོགས་རང་བཙན་རྒྱལ་ཁབ་ཏུ་ཐོན་སྲིད་པའི་ཉེན་བརྡ་གཏོང་གི་ཡོད།

གལ་སྲིད་བོད་དང་ཤིན་ཅང་སོགས་རང་བཙན་ཐོག་ཐོན་ན་ཁོ་པ་ཚོའི་རྒྱལ་ཁབ་ལ་གྱོང་གུད་ཆེན་པོ་ཞིག་ཡིན་པ་དང་། ནུས་པའི་འབྱུང་ཁུངས་གཙོ་བོ་དག་ཤོར་ནས་རྒྱ་ནག་མི་མང་ལ་དཔལ་འབྱོར་དཀའ་ངལ་ཕྲད་རྒྱུ་ཡིན་པའི་ཉེན་བརྡ་གཏོང་གི་ཡོད། དམར་ཤོག་གི་ལྟ་སྤྱོད་སེམས་ཁམས་སུ་སིམ་པའི་རྒྱ་ནག་མི་མང་ནི་དཔལ་འབྱོར་ལས་བསམ་རྒྱུ་མེད་པས་རང་དབང་མང་གཙོའི་བདེ་སྐྱིད་ལས། བཙན་འཛུལ་དང་།  དཔལ་འབྱོར་ཁེ་ཕན་ལེན་རྒྱུ་ནི་ཁོ་པ་ཚོའི་རེ་འདུན་ཉག་ཅིག་དང་། དེ་དག་ལས་འདས་པའི་མདུན་ལམ་ལ་བསམ་བློ་འཁོར་གྱི་མེད།

ཁོང་ཚོའི་སེམས་ནང་བོད་ཀྱི་དྭངས་ཤིང་གཙང་བའི་ཆུ་དང་། ནགས་ཚལ་སྟུག་པོ། གཏེར་ཁུངས་ཕུན་སུམ་ཚོགས་པའི་རི་བོ་དག་གི་རིན་ཐང་ཞལ་དུ་མེད་པ་དག ཡིད་ངོར་འཆར་བས་རྒྱ་ནག་དབུས་གཞུང་གི་ཆབ་སྲིད་ཀྱི་ལྟ་བ་དེ་དྲང་བདེན་ཡིན་མིན་གྱི་རྣམ་དཔྱོད་བེད་སྤྱོད་བྱེད་ཁོམས་ཡོང་གི་མེད།

དེ་བཞིན་དུ་རྒྱ་ནག་གི་ཁེ་ལས་པ་ཚོས་བོད་ནང་གི་མཚོ་དང་གཙང་པོའི་ཉ་དང་མཐོ་སྒང་གི་གཡག་ཤ་ལ་སོགས་པའི་བོད་ཀྱི་ཐོན་ཁུངས་ཡོད་དོ་ཅོག་ལ་ཡིད་དབང་འཕྲོག་པ། གཞན་ཡང་རྫོགས་རྒྱུ་མེད་པའི་བོད་སྐྱོར་ཁ་གཡར་གྱི་འཛུགས་སྐྲུན་ཁེ་བཟང་དག་མིིག་མདུན་དུ་འཁོར་དེ་མང་གཙོར་འགྱུར་བའི་དབང་དུ་བཏང་ན་བོད་དེ་ལོག་ཏུ་ཐོན་ཏེ་གནམ་ནས་ཟགས་པའི་ཤ་བག་ལེབ་དེ་ཤོར་བར་དོགས་ནས་སེམས་འཚབ་སྐྱེ་ཡི་ཡོད། དེ་དག་ནི་མང་གཙོ་ཡར་ཐོན་གྱི་ཕྱོགས་སུ་མཆོངས་སྐྱོད་བྱེད་པར་གེགས་སུ་འགྱུར་བའི་དཔེ་མཚོན་འགའ་ཤས་ཡིན།

རྒྱ་ནག་དམར་ཤོག་གི་བྱེད་སྟངས་གཞན་ཞིག་ནི་རྒྱ་ནག་གི་ཤེས་ཡོན་ཅན་དང་དད་ལྡན་པ་ཚོས་༸གོང་ས་མཆོག་གྱི་ལངས་ཕྱོགས་དེ་ཡང་དག་ཡིན་པ་ར་སྤྲོད་དང་། བོད་འདི་རྒྱ་ནག་དང་ཡུན་རིང་ཁ་བྲལ་དུ་མི་འགྲོ་བའི་ཐབས་ལམ།བོད་དུ་རྒྱ་མིའི་མི་འབོར་གནས་སྤོ་དཀའ་བའི་གནད་དོན། སོགས་ལ་དཔྱད་རྩོམ་སྤེལ་བ་ཁག་ནས་མེ་འཁོར་ལྕགས་ལམ་བཟོས་ཏེ་རྒྱ་མི་ལས་སླ་པོའི་ངང་བོད་དུ་གནས་སྤོ་བྱེད་ཐུབ་པ་དང་། མི་འབོར་དེ་དག་ཀྱང་ཟས་རིགས་ཀྱི་ཆ་ནས་དཀའ་ངལ་མེད་པའི་ཆེད། བོད་དུ་ས་ཞིང་གང་མང་ནང་དུ་ཚལ་རིགས་འདེབས་ལས་བྱས་ཏེ་ཁོ་པ་ཚོའི་འཚོ་བ་སྟབས་བདེ་རུ་གཏོང་ཐབས་བྱས་ཡོད།  འོན་ཀྱང་བོད་དེ་ཡུན་རིང་དང་སྟབས་བདེའི་ངང་ནས་རྒྱ་ནག་གི་ཆ་ཤས་སུ་འགྱུར་ཐབས་ཏེ། ༸གོང་ས་སྐྱབས་མགོན་ཆེན་པོའི་དགོངས་གཞི་སྟེ། གཉིས་སྨན་དབུ་མའི་ལམ་དེར་རྒྱ་ནག་དམར་པོའི་གཞུང་ནས་ལྡེ་མིག་ལྟ་བུའི་འདུ་ཤེས་དུ་བརྩིས་ནས་མགྱོགས་མྱུར་བཙན་བྱོལ་བོད་གཞུང་དང་གྲོས་མོལ་བྱེད་དགོས་པའི་བསླབ་བྱ་དེ་དག་དང་ལེན་བྱེད་ཕོད་པའི་བློ་ཁོག་དེ་མེད་པ་རེད།

ཕྱིར་སྡོད་རྒྱ་མི་ཤེས་ཡོན་ཅན་དང་། རྒྱ་ནག་གི་ཤེས་ཡོན་ཅན་གང་མང་ཞིག་ནས་ཀྱང་སྲིད་ཇུས་དེ་ནོར་འཁྲུལ་ཞིག་ཡིན་པ་དྲན་སྐུལ་ཡང་ཡང་བྱས་ཤིང་། མགྱོགས་མྱུར་གུ་ཡངས་ཀྱི་ལམ་ཆེན་ཐོག་བསྐྱོད་དགོས་པའི་ཁ་ཏ་བསླབ་བྱ་བྱས་ཀྱང་། ད་ལྟ་གུ་ཡངས་ཀྱི་སྣེ་འཁྲིད་ལྡན་པའི་སྲིད་འཛིན་དག་རྒྱ་ནག་གི་ཆབ་སྲིད་སྡིང་ཆའི་ཐོག་སླེབས་རྒྱུ་ཡིན་པ་འདྲ་ལ། གཅིག་བྱས་ན་སྐྱེ་རྒྱུའང་ཡིན་སྲིད།

ད་བྱས་ན་རྒྱ་ནག་དམར་པོས་གུ་ཡངས་ཕྱོགས་ལ་བསམ་བློ་གཏོང་མི་ཐུབ་པ་གང་ཡིན་ནམ།

རྒྱ་ནག་གི་དམར་ཤོག་ཚོགས་པ་དེ་ཡང་ཤོག་ཁག་ཆེ་ཆུང་དང་། དབང་ཆའི་འཐབ་རྩོད་ཀྱི་རྣོ་ངར་ཤིན་ཏུ་ཆེ་བའི་ནང་དུ་གནས་ཡོད་སྟབས། ཧུའུ་ཡའོ་པང་ལྟ་བུའི་གུ་ཡངས་ཅན་གྱི་ལྟ་བ་བསམ་བློར་འཁོར་མཁན་ཡོད་ནའང་། རང་གི་ལྟ་གྲུབ་ཐོག་གོམ་པ་སྤོ་ཐུབ་པའི་ནུས་པ་དེ་མེད། གལ་སྲིད་དེ་ལས་ལྡོག་ན་དམར་ཤོག་རིང་ལུགས་ཀྱིས་སྤྲད་པའི་གསེར་གྱི་ཕོར་པ་ཤོར་བ་དང་། ཐབས་སྡུག་ན་བཙོན་ཁང་ནང་རང་སྡུག་ཉོ་དགོས་ཁེལ་ཉེན་ཡོད།

དེས་ན་ཁོ་པ་ཚོས་སཱ་ཙྪ་པར་བཏབ་པ་ལྟར་སྒང་ནས་འོག་བར་གྱི་འབོད་ཚིག་གཅིག་པ་གཅིག་རྐྱང་དང་བསྟོད་དབྱངས་གཅིག་ལས་གཞན་པ་གང་ཡང་སྒྲོགས་ཕོད་ཀྱི་མེད། མདོར་བསྡུས་ན་བོད་མིའི་མངོན་འདོད་༸གོང་ས་སྐྱབས་མགོན་ཆེན་པོ་བོད་ལ་གདན་འདྲེན་ཞུ་བའི་འབོད་སྒྲ་དེར་ཡང་། དང་ལེན་བྱེད་པའི་སྤོབས་པ་མེད་པར་དེ་ལས་ལྡོག་སྟེ། དགྲ་བོ་ངོ་མའི་མིང་ཚིག་བེད་སྤྱོད་དང་། མཚོན་ཆ་བེད་སྤྱོད། དྲག་དམག་བེད་སྤྱོད་ཀྱིས་བོད་རྒྱ་ཆེའི་མི་མང་རྣམས་དྲག་པོ་ཁོ་ནས་འབུར་འཇོམས་བྱེད་པ་ལས་གང་ཡང་མ་འཇོན་པ་དེ་རེད།

དེ་ནི་རྒྱ་ནག་རྒྱལ་རབས་ནང་མུན་ནག་གི་དུས་རབས་དང་། འུ་ཐུག་ཐབས་ཟད་ཀྱི་ཆབ་སྲིད་ལྟ་བ་ཡ་ང་བ་ཞིག་ལས་གང་ཡང་མིན་པ་རེད།

རྒྱ་ནག་དམར་ཤོག་རིང་ལུགས་པར་ངོ་ཚ་ཁྲེལ་གཞུང་རྩ་བ་ནས་མེད་པ་རེད་དམ།

རྒྱ་ནག་དམར་གཞུང་དེ་ཡང་འཛམ་གླིང་རྒྱལ་ཁབ་སྤྱི་ཡོངས་ལྟར་རང་ཉིད་ལ་ངོ་སོ་དང་མཚན་སྙན་ཡོད་པར་དགའ་བ་ཙམ་མ་ཟད། མཚན་སྙན་ཆེད་དུ་ཁོང་ཚོས་བོད་ནང་གི་སྤྲང་པོ་ཕྱི་རྒྱལ་བའི་མིག་མདུན་དུ་མི་མངོན་པ་བྱེད་པ་དང་གཅིག  བོད་ཀྱི་ཆབ་སྲིད་བཙོན་པ་རྒྱལ་སྤྱིའི་མིག་གི་མདུན་དུ་མི་མངོན་པ་བྱེད་ཐབས་དང་གཉིས། བོད་མི་རིགས་ཀྱིས་རྒྱ་ནག་དམར་ཤོག་ལ་དགའ་པོ་ཡོད་པའི་རྣམ་པ་སྟོན་ཐབས་དང་གསུམ་ལ་སོགས་པ་དེ་དག་དང་དེ་དག་ལ་འབད་བརྩོན་རབ་དང་རིམ་པ་བྱས་ཡོད།

འོན་ཀྱང་ཁོང་ཚོར་ཐོབ་པ་ནི་ཕྱི་རྒྱལ་ས་ཕྱོགས་གང་དུ་སོང་ཡང་ངོ་རྒོལ་སྐད་འབོད་འཚམས་ཆད་མྱོང་མེད་པ།  བོད་ནང་གི་བོད་མི་རྣམས་བདེ་སྐྱིད་ལྡན་པའི་འཚོ་བ་སྐྱེལ་རྒྱུ་ཡོད་པའི་རྣམ་པ་འཁྲབ་སྟོན་བྱེད་པའི་མུར་བོད་མི་དེ་དག་དང་། དེ་དག་གིས་དྲག་པོའི་མཚོན་ཆའི་འོག་ཏུ་ཡར་ལངས་ངོ་རྒོལ་བྱས་པས་མ་ཚད། བསམ་ན་ཡང་བསམ་ཕོད་ཐབས་བྲལ་བའི་མེར་སྲེགས་ལས་འགུལ་གྱིས་ངོ་རྒོལ་འདི་ཙམ་བྱས་པ་ནི་རྒྱ་ནག་གཞུང་འུ་ཐུག་ཐབས་ཟད་ཀྱི་གནས་སུ་གྱར་བའི་དུས་རབས་ཤིག་ཏུ་བསྐྱལ་ཡོད།

བོད་མི་རིགས་འདི་ཉིད་ཀྱི་ལངས་ཕྱོགས་ནི་རྒྱ་ནག་དམར་པོའི་དཔལ་འབྱོར་བསླུ་སྦྲིད་ཀྱིས་ཁ་སྒྱུར་བྱེད་མི་ཐུབ་ལ། དྲག་པོའི་མཚོན་ཆ་དང་དཔུང་གིས་ཁ་ལོ་བཅུན་མི་ཐུབ་པ་ཞིག་ཡིན་པས། ད་ཆ་རྒྱ་ནག་དམར་པོའི་གཞུང་བྱ་དཀའ་བྱེད་གཏད་དུ་འགྱུར་ཡང་། ཁོ་པ་ཚོས་ལྐུགས་པས་ཚ་ཟས་པ་ལྟར་སྡོད་ཐབས་མེད་པར། འཛམ་གླིང་མི་མང་ལ་གཅོས་མའི་གདོང་པ་བསྟན་ཐུབ་ཆེད། གཡོ་སྒྱུའི་ཐབས་ལམ་གཅིག་རང་ལས་མེད་པ་ནི། དཔལ་འབྱོར་ཡར་རྒྱས་ཀྱི་དར་ཆ་མཁའ་ལ་ཕྱར་རྒྱུ་དེ་དང་། བོད་མིའི་སེམས་ནང་གི་མངོན་འདོད་དེ་དག་ནི་༸སྤྱི་ནོར་གོང་ས་སྐྱབས་མགོན་མཆོག་ནས་ངན་སྐུལ་བྱས་པ་རེད་ཅེས་པའི་ཁ་གཡང་རྙིང་པ་དེ་སྒྲོག་རྒྱུ་ཙམ་ལས་ལྷག་མེད།

མ་གཞི་བྱས་ན་བཙན་བྱོལ་བོད་གཞུང་དང་། ༸གོང་ས་སྐྱབས་མགོན་མཆོག་གིས་དེ་ལྟར་བཀའ་གནང་གི་མེད་པ་ཁོ་པ་ཚོས་ཤེས་ཀྱི་ཡོད། འོན་ཀྱང་འཛམ་གླིང་མི་མང་མདུན་དུ་གཤད་གཡམ་འདི་འདྲ་ཞིག་མ་སྤེལ་རང་སྤེལ་རེད་ལ། ཉེ་བའི་ལོ་ཤས་ནང་བོད་ཕྱི་ནང་གཉིས་ཀྱི་བོད་མིས་རང་ལུས་མེར་སྲེགས་ཀྱིས་དམར་གཞུང་ལ་ངོ་རྒོལ་བྱས་པ་འདི་ནི། རྒྱ་ནག་དམར་ཤོག་གིས་འགྲེལ་བཤད་བྱེད་ཐབས་བྲལ་བའི་ཆབ་སྲིད་ཀྱི་ཕམ་ཁ་ཆེན་པོ་ཞིག་རེད།

མདོར་བསྡུས་ན་བོད་བཙན་བཟུང་བྱས་པ་འདིས་རྒྱ་ནག་འདི་པ་འཛམ་གླིང་ནང་གི་ཆེས་སྡུག་རྩུབ་ཆེ་བའི་ཆབ་སྲིད་ཀྱི་ལངས་ཕྱོགས་དང་། ཁ་བྲལ་མི་ཐུབ་པར་འགྱུར་འདུག་ལ། འཛམ་གླིང་ནང་མགོ་བོ་བཀྱག་ཐབས་བྲལ་བའི་གནད་འགག་དེ་ཆགས་ཡོད། གཞན་ཡང་རྒྱ་ནག་མི་མང་ལ་རང་དབང་མང་གཙོའི་ལམ་བཟང་ལ་འགྲོ་བསྐྱོད་བྱེད་པའི་དགག་རྡོ་ཆེ་ཤོས་སུ་གྱུར་ཡོད། རྒྱུ་མཚན་ནི་གོང་དུ་བཀོད་པ་ལྟར་དང་། རྒྱ་ནག་མང་གཙོར་འགྱུར་རྗེས་ཨུ་རུ་སུ་ལྟར་རྒྱ་ནག་གིས་བཙན་བཟུང་བྱས་པའི་རྒྱལ་ཁབ་རྣམས་ཁ་བྲལ་དུ་འགྲོ་བར་དོགས་པ་དེ་རེད།

འབྱུང་འགྱུར་རྒྱ་ནག་དང་བོད་རྒྱལ་ཁབ་གཉིས་ཀྱི་མདུན་ལམ་ཇི་ལྟར་འཚོལ་ཐུབ་བམ།

བོད་རྒྱལ་ཁབ་དང་རྒྱ་ནག་རྒྱལ་ཁབ་གཉིས་ནི་ལོ་ངོ་སྟོང་ཕྲག་ཡན་གྱི་ནང་ལོ་རྒྱུས་ཡུན་རིང་ལྡན་པའི་རྒྱལ་ཁབ་གཉིས་ཡིན་ཞིང་། རྒྱ་ནག་རང་ཉིད་ནས་ནམ་རྒྱུན་ཁ་ན་ན་གྲངས་བཞིན་པའི་བོད་ཀྱི་ཆོས་རྒྱལ་སྲོང་བཙན་སྒམ་པོ་དང་། རྒྱ་ནག་རྒྱལ་པོའི་སྲས་མོ་ཝུན་ཤིང་ཀོང་ཇོ་གཉིས་ཀྱིས་རྒྱ་བོད་མི་རིགས་གཉིས་དབར་མཛའ་མཐུན་སྐྲུན་ཡོད། ཅེས་པར་ཆ་བཞག་ན། ལོ་ངོ་སྟོང་ཕྲག་ཡན་གྱི་མཛའ་མཐུན་དཔུང་པ་མཉམ་གཤིབ་བྱེད་པའི་རྒྱལ་ཁབ་གཉིས་གཅིག་འོག་གཅིག་གིས་བསྡུས་དགོས་པ་གཙོ་བོ་མ་ཡིན་པར། ངེས་པར་དུ་མཛའ་མཐུན་མཉམ་གནས་ཀྱི་མཐུན་ལམ་འཛུགས་རྒྱུ་ནི་སྐབས་དེ་དུས་ཀྱི་ང་ཚོའི་མེས་པོ་ཚོའི་དགོངས་གཞི་དང་། ང་ཚོ་རྒྱལ་ཁབ་གཉིས་ཀྱི་མི་མང་གི་མངོན་འདོད་རེད་ཟེར་ཀྱང་ཆོག

གལ་སྲིང་ང་ཚོ་རྒྱལ་ཁབ་གཉིས་པོ་མཛའ་མཐུན་མཉམ་གནས་ཤིག་བྱུང་ན། ཆོས་ལུགས་ཀྱི་ཆ་ནས་དང་། ལོ་རྒྱུས་ཀྱི་ཆ།མི་ཆོས་རིང་ལུགས་ཀྱི་ཆ། ས་བབ་ཀྱི་ཆ་བཅས་གང་ཅིའི་ཆ་རྐྱེན་ཚང་བ་ཞིག་ཡིན། དེ་ལྟར་བྱུང་བར་༸སྤྱི་ནོར་གོང་ས་སྐྱབས་མགོན་ཆེན་པོ་བོད་དུ་གདན་འདྲེན་ཞུ་རྒྱུ་དང་། དམར་ཤོག་ཚོགས་པས་བསམ་བློ་གུ་ཡངས་ཙམ་བྱེད་དགོས།གལ་ཏེ་ཕན་ཚུན་གཉིས་སྨན་གྱི་གྲོས་བསྡུར་བྱུང་ཚེ། ད་བར་རྒྱ་ནག་དམར་ཤོག་གིས་ནོར་འཁྲུལ་གྱི་ལམ་ནས་བོད་ནང་མི་གསོད་ཁྲག་སྦྱོར་དང་། རྡུང་འཕྲོག་བཅོམ་གསུམ་བྱས་པའི་ལོ་རྒྱུས་ཀྱི་ནག་ཉེས་དེ་དག་ལ་ང་ཚོ་བོད་མིའི་ངོས་ནས་ཀྱང་གུ་ཡངས་ཀྱི་ལྟ་བ་ཞིག་འཛིན་དགོས་ངེས་ཡིན།

གལ་སྲིད་འབྱུང་འགྱུར་རྒྱ་ནག་མང་གཙོའི་ལམ་དུ་འགྱུར་ཐུབ་ན། ང་ཚོ་བོད་མི་རིགས་འདི་ངེས་པར་ལོག་ཏུ་འདོན་པའི་དགོས་པ་རྒྱུ་མཚན་མེད་ལ། ང་ཚོའི་ངོས་ནས་ཀྱང་ཆིག་སྒྲིལ་སྟོབས་ཆེན་རྒྱལ་ཁབ་གཅིག་འཛུགས་པར་རྒྱབ་འགལ་བྱེད་མི་སྲིད་པ་ཡིན།

དེ་ནི་ང་ཚོ་བོད་མི་རིགས་འདི་ཉིད་ཀྱིས་ཉམས་སུ་ལེན་པའི་ནང་པའི་ཆོས་ཀྱི་ལྟ་གྲུབ་དེ་ཡོད་པས་ཡིན་ལ། ༸སྤྱི་ནོར་གོང་ས་སྐྱབས་མགོན་མཆོག་གི་རླབས་ཆེན་དགོངས་གཞི་ཞི་མཐུན་མཉམ་གནས་ཡིན་པ། གཞན་ཡང་ཁོང་གི་བྱམས་བརྩེའི་ལྟ་གྲུབ་དེ་བོད་མིའི་སེམས་ནང་སིམ་ཡོད་པས་ཀྱང་ཡིན།