པདྨ་བསམ་གྲུབ། དྷེ་ར་རྡོན་ནས།
བོད་རྒྱལ་སྲོང་བཙན་གྱི་ཡུལ་ཡར་ལུང་ཁོག་ཏུ་མ་ཤོང་པའི་དཀྱེལ་ཡངས་ཀྱི་ཐུགས་དགོངས་ཟབ་མོ་དེ། ཁོང་ནས་རྩིས་པའི་མི་རབས་འགའི་རྗེས་སུ་ཕྱོགས་རིས་བའི་བློ་ཇུས་ཤིག་གིས་དོག་དོག་པོར་བསྒྱུར་སོང་བ་ན།འདོད་འདུན་དང་ཞེན་ཆགས་སྣ་ཚོགས་པའི་འཁྲུག་ལོང་གིས་སྲ་ཐག་པའི་ལྕགས་ཀྱི་གོང་བུ་དེ་སིལ་བུར་གཏོར་སོང།སིལ་བུར་གཏོར་ནས་བཟུང་ད་ལྟའི་བར་དུ་བཅོས་སྒྲིག་ལ་བླ་ལྷག་གིས་འབད་མྱོང་བའི་སྐྱེ་བུ་མང་དུ་བྱུང་མོད།སུས་ཀྱང་ཆ་ཚང་བ་ཞིག་ཏུ་བསྒྱུར་མ་ཐུབ།ལྷག་པར་དུ་ཕྱི་ལོ་༡༩༥༩ལོ་ནས་བཟུང་བོད་པ་རྣམས་འཛམ་གླིང་གི་ཕྱོགས་བཞི་ཀུན་ཏུ་ལྡོམ་ཞིང་གྱེས་ལ།གྱེས་ནས་རྒྱལ་ཁོངས་སོ་སོའི་ཡིག་ཐོག་གི་མི་སེར་དུ་གྱུར་དང་འགྱུར་བཞིན་ཡོད།འདི་ནི་སྔོན་ཆད་བོད་པ་ཚོ་བོད་ཡུལ་ནས་ས་ཁུལ་བཅད་བཟུང་གིས་ཁ་ཐོར་བྱུང་བ་ལས་ཀྱང་ཉམས་ཉེས་འཚབ་ཆེན་བྱུང་བ་ཡིན།བདག་གིས་རྒྱུས་ལོན་བྱས་པ་ལྟར་ན།སྔོན་ཆད་ཡིག་ཐོག་ཙམ་ནས་མི་སེར་དུ་གྱུར་བ་དག་གི་བུ་ཕྲུག་རྣམས།ད་ནི་ཞེ་བསམ་པའི་གཏིང་ནས་རྒྱལ་ཁབ་དེ་དག་གི་མི་སེར་རམ་བུ་ཕྲུག་དངོས་མ་ཞིག་ཆགས་པ་དང་།ཁོང་ཚོས་ཀྱང་ཕྱི་གླིང་བ་ཞིག་དང་འདྲ་བར་རང་དབང་མེད་པའི་བོད་ཕྱི་ནང་གི་བོད་མི་ཚོ་སྙིང་རེ་རྗེ་ཨང་ཟེེར་བ་ལས། མི་རིགས་འཐབ་རྩོད་ཀྱི་ཁྲག་རྩའི་འཕར་ལྡིང་དེ་གར་སོང་ཆ་མེད་དུ་ཉམས་ནས་འདུག་ཚོད།
མདང་ནུབ་ངས་དྲ་ལམ་ནས་ཨ་རི་རླུང་འཕྲིན་ཁང་གི་ཀུན་གླེང་ལས་ཚན་དུ་སྲིད་སྐྱོང་མཆོག་ལ་བཅར་འདྲི་བྱས་པ་ཞིག་ཉན་རྒྱུ་བྱུང།ཁོང་གིས་བོད་པ་སྐྱབས་བཅོལ་བ་རྒྱ་གར་མི་སེར་བཟོ་འདོད་ཡོད་པ་ཚོར་དགག་བྱ་མེད་པའི་ཡི་གེ་ཞིག་སྤྲོད་ཀྱིན་ཡོད་པ་དང་།ད་ལྟའི་བར་དུ་བོད་མི་༡༣ཙམ་ཡི་གེ་དེ་ལེན་དུ་ཡོང་ཡོད་ཚུལ་གསུངས་བྱུང་།
བསམ་བློ་ཞིབ་ཏུ་མ་བཏང་ཚེ།གནས་ཚུལ་འདིས་ང་ཚོའི་སེམས་ངོར་དངངས་འཚབ་ཅིག་བསྐྱེད་པར་བྱེད་ནའང།རྒྱ་གར་ཙམ་དུ་མ་གཏོགས་འཛམ་གླིང་གང་སར་ཁྱབ་པའི་བོད་མི་ཐམས་ཅད་རྒྱལ་ཁབ་དེ་དག་གི་མི་སེར་དུ་གྱུར་དང་འགྱུར་བཞིན་ཡོད་པ་མིན་ནམ། ཁོང་ཚོ་ལ་ནི་དེ་བཞིན་བྱ་བ་ལས་འདམ་ག་གཞན་ཅི་ཡང་མེད་པ་ཡིན་འདུག འོན་ཀྱང་རྒྱ་གར་གྱི་བོད་མི་སྐྱབས་བཅོལ་བ་ཚོ་དེ་ལྟ་མིན་ནའང།ཕྱི་ལོ་ལྔ་དགུ་ཚུན་ཆད་ནས་ད་ལྟའི་བར་བོད་མིས་རྒྱ་
གར་མི་སེར་བཟོས་པའི་གྲངས་ཚད་ནི་སྲིད་སྐྱོང་མཆོག་གིས་གསུངས་པ་དེ་ཙམ་མིན།ཁོང་གིས་གསུངས་པའི་གྲངས་ཚད་དེ་ནི་ཁྲིམས་མཐུན་གྱི་སྒོ་ནས་དང་མངོན་གསལ་དུ་བཟོ་བཞིན་ཡོད་པའི་གནས་ཚུལ་གསར་བ་ཞིག་རེད།གནས་ཚུལ་གསར་བ་འདི།བོད་མོ་གཞོན་ནུ་མ་རྣམ་རྒྱལ་སྒྲོལ་དཀར་ལགས་ཀྱིས་ཐོག་མའི་མགོ་བཙུགས་པ་རེད།མོའི་འབད་པ་དང་འུ་ཚུགས་ཀྱིས་བོད་མི་ཞིག་རྒྱ་གར་དབུས་ཁྲིམས་ཁང་ནས་མི་སེར་གྱི་ཆོག་མཆན་ཐོབ་པ་ཐོག་མར་གྱུར།
ཁོང་མོས་དྲིས་ལན་ཞིག་ཏུ་“སེམས་གཏིང་ནས་ང་ནི་བོད་པ་ཞིག་ཡིན།འོན་ཀྱང་ད་ནི་ང་རྒྱ་གར་གྱི་མི་སེར་ཞིག་ཏུ་གྱུར།ངའི་ཡིད་ཆེས་ལ་སུས་ཀྱང་རང་གི་ཐོབ་ཐང་ལ་ངེས་ཤེས་སྐྱེས་དགོས།དེ་བས་ང་ལའང་རང་ཉིད་ཀྱི་ཐོབ་ཐང་རང་གིས་ཤེས་རྟོགས་ལས་ཐོབ་པ་ཡིན།”གསུངས།ངའི་དྲན་ཕྱོགས་ཤིག་ལ་“ང་ནི་བོད་མི་ཞིག་ཡིན་ཀྱང་བློ་དཀྱེལ་ཡངས་པའི་རྒྱ་གར་རྒྱལ་ཁབ་ཀྱིས་འཛམ་གླིང་ཀུན་ཁྱབ་ཀྱི་བསམ་ཤེས་དང་།གོ་ལའི་ཁྲིམས་ལུགས་ལ་རྩིས་འཇོག་གིས་བདག་ལ་རྒྱ་གར་མི་སེར་གྱི་ཐོབ་དབང་བྱིན་པར་བཀའ་དྲིན་ཆེའོ།”ཞེས་ཁོང་མོའི་གསུང་ལན་དེ་འདི་འདྲ་ཞིག་ཡིན་ན་ཅི་མ་རུང་སྙམ།འོན་ཀྱང་ཁོ་མོས་དེ་ནི་རང་ཉིད་ཀྱི་ཐོབ་ཐང་ཞིག་ཏུ་སྨྲ་བའི་སེམས་ཚོར་དེ་གང་ནས་ཅི་ལྟར་བྱུང་བ་ཡིན་ནམ།སྐད་ཆ་འདི་དུས་རབས་ཉི་ཤུ་པའི་མགོ་སྟོད་དུ་ཕར་དེད་དེ་བསམས་ཚེ་ཅི་འདྲའི་ཧམ་བཤད་ཅིག་ཡིན་ངེས་ཨང།འཛམ་གླིང་འགྱུར་སོང་།ལྟ་ཚུལ་འགྱུར་སོང་ཟེར་ན།བོད་མིའི་དྲན་པའི་རྒྱུན་འདི་ཧ་ཅང་ཐུང་དྲག་པ་མིན་ནམ།
ཡང་ཁྲིམས་ལུགས་འདུ་ཤེས་ཀྱི་ངོས་ནས་བལྟས་ན།སྔ་མ་ཚོས་ནག་ཁྲོམ་བརྒྱུད་དེ་བཟོས་པ་ལས་ད་ལྟའི་བཟང་སྤྱོད་འདི་ལ་ཡི་རང་ཞུ་འོས་པ་ཡིན་ཚོད་ཀྱང།གནད་དོན་འདིས་ཅི་ཞིག་མཚོན་པ་ཡིན་ནམ།མི་སྒེར་བ་ཞིག་གི་ངོས་ནས་བསམས་ཚེ།དེ་ནི་རང་ཉིད་ཀྱི་རང་དབང་རེད།འགྲོ་བ་མིའི་ཐོབ་ཐང་རེད་ཟེར་རམ།གནད་དོན་འདིའི་དཔེ་མཚོན་དུ་འོས་པའི་ཁོང་མོ་ནི་བོད་མི་རང་ག་བ་ཞིག་མ་རེད།བོད་རྒྱལ་སྲོང་བཙན་གྱི་རྒྱུད་པར་གྲགས་པའི་ལྷ་རྒྱ་རི་ཁྲི་ཆེན་གྱི་སྲས་མོ་རེད།ལོ་རྒྱུས་ཀྱི་དོན་དངོས་ལ་སྦྱར་ཏེ་སྐད་ཆ་བཤད་སྟངས་གཞན་དུ་བསྒྱུར་ན།ཁོང་མོ་ནི་དགོངས་པའི་དཀྱེལ་ཡངས་བའི་རྒྱལ་པོ་སྲོང་བཙན་གྱི་རྒྱུད་པ་རེད་ཟེེར་བ་ལས།ནང་ཆོས་ལ་དད་ཞེན་ཆེ་བའི་ཆོས་རྒྱལ་ཁྲི་སྲོང་གི་རྒྱུད་པར་བཤད་ན་ལུགས་དང་
མཐུན་ལ།དེ་བས་ཀྱང་ཆབ་སྲིད་ལ་བློ་དཔའ་བའི་རྒྱལ་པོ་གླང་དར་གྱི་ཡང་ཚར་བཤད་ན་ནི་ཤིན་ཏུ་འོས་པ་ཡིན་མོད་ཀྱང།ང་ཚོ་བོད་མིའི་འདུ་ཤེས་ཀྱི་ཁྱབ་ཁོངས་སུ་འདི་ལྟར་ཤོད་མ་སྤོབས་པ་འདྲ་ཡང།ད་ནི་ཁོང་མོ་ཁྲིམས་ཐོག་ནས་རྒྱ་གར་བ་ཞིག་ཏུ་གྱུར་ཟིན་པ་མ་ཟད།དེ་ནི་ཁོང་མོས་ཧ་ཅང་སྤོབས་སེམས་ཆེན་པོས་བསྒྲགས་པ་རེད།ཁོང་མོས་བོད་མི་རིགས་
འདི་ལོ་རྒྱུས་ཀྱི་དཀྱོགས་མཚམས་གསར་བ་ཞིག་ཏུ་ཁྲིད་པ་ཡིན་ནམ།ཁོང་མོ་ལྟ་བུའི་ཡུལ་གྱེར་བོད་རིགས་གཞོན་ནུ་རྣམས་ལ་རྒྱལ་ཁོངས་ཤིག་ཡོད་པར་བྱས་སམ།ཡང་ན་ཁོང་མོའི་རྒྱུད་པ་ཡར་དེད་ན།བོད་བཙན་པོའི་རྒྱལ་རབས་ཀྱི་ཐོག་མ་གཉའ་ཁྲི་ཡིན་དགོས་ལ།གཉའ་ཁྲི་བཙན་པོའི་རྒྱུད་པ་ནི་རྒྱ་གར་ལ་གཏུགས་པའི་བཤད་ཡམས་ཤིག་ཡོད་པ་ལྟར།ད་ནི་ཁོང་མོ་གཙོས་པའི་རིགས་རྒྱུད་གཅིག་པའི་བོད་རིགས་ན་གཞོན་ཚོ་རང་གི་མེས་པའི་རྒྱལ་ཁུངས་སུ་བཙུད་པ་རེད་དམ།གང་ལྟར་བོད་མི་རྒྱ་གར་མི་སེར་བཟོ་མཁན་ཇེ་མང་དུ་འགྲོ་ངེས་རེད་ལ།མ་གཞི་རྒྱ་གར་ནང་གི་བོད་མིའི་གནས་སྟངས་ནི་རྒྱལ་སྤྱིའི་ཁྲིམས་དང་རྒྱ་གར་རང་གི་ཁྲིམས་གང་ལའང་ཁུངས་གཏུགས་ས་དང་གཞི་འཛིན་ས་མེད་པའི་གནས་བབ་ཞིག་ཏུ་ཡོད་འདུག་ལ།༧གོང་ས་མཆོག་ནི་རྒྱ་གར་གྱི་སྐུ་མགྲོན་ཞིག་དང་བོད་མི་ཚོ་རྒྱལ་ཁབ་འདིར་ཐོ་འགོད་ཙམ་བྱས་པའི་ཕྱི་རྒྱལ་བའི་ངོ་བོར་གནས་ཡོད། འདི་ནི་རྒྱ་གར་རྒྱལ་ཁབ་ཀྱིས་རྒྱ་ནག་དང་མཐུན་གྲོགས་སུ་གནས་རྒྱུ་དང་བོད་ལ་སེམས་གཏིང་ནས་བརྩེ་བ་སྤྲོད་རྒྱུ་ཟེར་བ་དེ་ཡིན་ནམ།འདི་ནི་དམིགས་གསལ་གྱི་གོ་སྐབས་ཤིག་ཡིན་ནམ།ཡང་ན་ཡིད་ཆེས་བྲལ་བའི་ཉེན་ཁ་ཞིག་རེད་དམ།གང་ལྟར་བོད་མི་སྐྱབས་བཅོལ་བ་ཇེ་ཉུང་དུ་འགྲོ་ངེས་རེད།གནད་དོན་འདིས་བོད་མི་ཚོ་བོད་དོན་བདེན་མཐའ་གསལ་མིན་ལ་ཡིད་ཐང་ཆད་པ་མཚོན་ཨི་ཐུབ།ཡང་ན་མི་ཡུལ་དུ་གཏན་སྡོད་ཀྱི་གཞིས་ཁང་མི་བརྒྱག་པར་དམ་བཅས་མྱོང་སྐད་ཀྱི་བློ་དཔའ་ལ་ཡིད་གཞུང་བའི་མི་རབས་རྒན་པ་ཚོའི་དུར་ས་གནམ་ལ་བཏབ་རྗེས།མི་ལོ་ང་གསུམ་སོང་རྗེས་ཀྱི་དེ་རིང་གི་མི་ཐོག་འདིར་ཅི་ཡང་ཤུལ་ལུས་མ་བྱུང་བ་ཡིན་ནམ།འདི་ནི་བོད་དོན་གྱི་ཉེན་ཁ་ཞིག་ཡིན་ནམ།ཡང་ན་ཐབས་ལམ་ཞིག་རེད་དམ།དེ་ལྟ་ནའང།ང་ཚོའི་འཐབ་རྩོད་ཀྱི་ལས་ཀྱི་སྣེ་མོ་ལ་འཐམ་པའི་བོད་པ་ཧ་ཅང་མང་པོ་སྔ་མོ་ནས་རྒྱ་གར་གྱི་མི་སེར་བཟོས་ཟིན་པ་ལ་བལྟས་ན།དེ་ནི་བོད་ཀྱི་བདེན་མཐའ་གསལ་བར་ངེས་པར་མཁོ་བའི་དོན་གནད་ཅིག་ཡིན་ཡང་སྲིད་དམ།ཕྱི་མིས་བྲིས་པའི་རྩོམ་ཡིག་ཅིག་ཏུ་ད་ལྟའི་བོད་གཞུང་གི་བཀའ་བློན་ཁྲོད་དུའང་ཆོས་རིག་བཀའ་བློན་པདྨ་ཆོས་འབྱོར་ལགས་ཨ་རི་བ་ཡིན་པ་དང་ཕྱི་འབྲེལ་བཀའ་བློན་བདེ་སྐྱིད་ཆོས་དབྱངས་ལགས་ཁ་ན་ཊན་པ་དང་ནང་སྲིད་བཀའ་བློན་རྒྱ་རི་སྒྲོལ་མ་ལགས་རྒྱ་གར་བ་ཡིན་པ་རེད་ཟེར།སེམས་མ་འཚབ།ཁོང་རྣམ་པ་ནི་ལྷག་བསམ་དང་ཤེས་འཇོན་ལྡན་པའི་ཡུལ་གྱེར་བོད་མིའི་མི་རབས་ཤིག་གི་ཚབ་མཚོན་མི་སྣ་ཡིན་པས།ཁོང་ཚོས་གནང་ཕྱོགས་ལ་འགལ་འཛོལ་ཅི་ཡང་ཡོད་མི་སྲིད།འདི་ནི་རང་སེམས་གསོས་པའི་སྐད་ཆ་ཙམ་ཡིན་ནམ།ཡང་ན་ཁོང་རྣམ་པ་རིགས་རྒྱུད་གཅིག་པའི་ལར་ཞེན་གྱིས་བཙན་བྱོལ་བོད་མིའི་སྒྲིག་འཛུགས་ལ་རོགས་བྱེད་དུ་ཡོང་བར་ངོས་འཛིན་དགོས་སམ།དེ་མིན་རྒྱལ་ཁབ་གང་གི་མི་སེར་དུ་གྱུར་བ་དེ་ང་ཚོའི་སྟོབས་ཤུགས་ཤིག་ཏུ་འགྱུར་བའི་རེ་བ་འདུག་གམ སྐབས་འདིར་ངས་སྙན་ངག་པ་ཚེ་རིང་དོན་པ་དབང་མོའི་སྙན་ཚིག་དང་།བསྟན་འཛིན་བརྩོན་འགྲུས་ཀྱི་རྩོམ་ཡིག་ཏུ་བཀོད་པའི་རང་ཉིད་ལ་རྒྱལ་ཁོངས་མེད་པར་སྡུག་ཡུས་བཏོན་པ་དེའང་དྲན་འོངས།ཁོང་གཉིས་ནི་མི་ཡུལ་དུ་སྐྱེས་ཤིང་འཚར་བ་དང།དཔེ་མཚོན་དུ་འོས་པའི་མི་བུ་རུས་རྐང་ཅན་གཉིས་ཡིན་ལ།ཁོང་གཉིས་ཀྱིས་ཀྱང་འདི་ལྟར་རང་སེམས་ཀྱི་སྐྱོ་བ་མཚོན་པར་བྱས་པའིི་དམིགས་དོན་ཅི་ཞིག་ཡིན་ནམ།ང་ཚོར་ང་ཚོའི་རྒྱལ་ཁབ་མཁོ་བ་ཡིན་ནམ།ཡང་ན་ང་ཚོ་གང་ཡང་རུང་བའི་རྒྱལ་ཁོངས་ཤིག་ཏུ་གཏོགས་ན་ཆོག་གམ ང་དངོས་གནས་མགོ་འཐོམ་སོང་།ངས་ད་རུང་བསམ་བློ་གཏོང་གི་ཡོད།
ཉེ་སྔོན་ཞིག་ནས་རྒྱ་གར་བའི་རྩོམ་པ་པོ་དང་ནུབ་གླིང་བའི་རྩམ་པ་པོ་རེ་འགས་ཀྱང་ད་ནི་བོད་པ་རྣམས་རྒྱ་གར་གྱི་ཁྲིམས་མཐུན་མི་སེར་དུ་བསྒྱུར་དགོས་པ་ནན་གྱིས་སྨྲ་བཞིན་འདུགའོ་ན་ཁོང་ཚོས་སེམས་ཚོར་གང་འདྲ་ཞིག་གིས་འདི་ལྟར་
བརྗོད་པ་ཡིན་ནམ།ཕྱི་མི་རྩོམ་པ་པོ་ཞིག་གིས་གསུངས་རྒྱུར་བོད་པ་ཚོ་ཁེར་བཀྱེད་སྡོད་སྒར་གྱི་ལམ་ལུགས་འདིའི་རྣམ་པའི་འོག་དུ་བསྡད་པས།ཁོང་ཚོར་ལས་ཀ་དང་འོས་འདེམས།སྡོད་ཁང་ཉོ་བ།ཚོང་གཉེར་ཐོ་འཁོད་བྱ་བ་བཅས་ཀྱི་ཁེ་དབང་ཡོངས་སུ་བྲལ་ཡོད་པར་བཤད།སྙིང་ཉེ་བའི་སྐད་ཆ་འདི་ནི་བོད་པ་མང་མང་གི་སེམས་སུ་བརྣག་པའི་དོན་དངོས་ཤིག་ཡིན་ངེས་ལ།བོད་མི་སྒེར་བའི་འཇོན་ནུས་དང་མངོན་འདོད་ལ་ཚད་བཀག་དང་ཕོག་ཐུག་ཐེབས་ཀྱིན་ཡོད་པ་ཡང་དོན་དངོས་ཡིན།འོན་ཏེ་ངའི་ཡིད་ལ་བསམ་ཕྱོགས་གཞན་ཞིག་འདི་ལྟར་དྲན་འོངས།ང་ཚོར་མཚོན་ན་གནས་ཡུལ་འཚོ་གནས་ཀྱི་གྱོང་དེ་དག་རང་ཉིད་ཀྱི་བློས་བཏང་ཞིག་དང་།མི་རིགས་ཤིག་གི་འོས་འགན་དེ་ཡིན་ནམ།སྐད་ཆ་གསལ་བོར་བཤད་ན།གནས་སྟངས་འདི་དག་ནི་ང་ཚོ་བོད་མི་སྒེར་བ་དང་མི་རིགས་ཐུན་མོང་ལ་ཕྲད་དང་འཕྲད་འོས་པའི་དགོས་ངེས་ཀྱི་གནོད་འཚེ ་ཞིག་མ་རེད་དམ།བོད་པ་སྐྱབས་བཅོལ་བའི་མིང་ཙམ་ཡང་མ་ལྷག་ན།ད་དུང་བོད་པ་ཚོར་བོད་དོན་རྩོད་པའི་འོས་བབ་ཡོད་དམ།ཡང་ན་བོད་ཀྱི་དོན་གྱི་བདག་པོ་བོད་ནང་གི་བོད་མི་ཚོ་ཡིན་པས་དེ་ཅི་ལ་སྐྱོན།ང་ཚོ་ནི་ཁོང་རྣམས་ལ་གདུང་སེམས་མཉམ་བསྐྱེད་བྱེད་མཁན་ཙམ་རེད་ཟེེར་རམ།སྤུ་རྒྱལ་བཙན་པོའི་སྐབས་སུ་བོད་རིགས་རྣམས་ཨི་ཤ་ཡའི་སྙིང་དབུས་ནས་དཔའ་སྤོབས་ཀྱིས་ཕྱོགས་བཞིར་གྱེས་པ་དང་།ཕྱི་ལོ་ལྔ་དགུ་ནས་བཟུང་བོད་མི་ཚོ་འཛམ་གླིང་གི་ཕྱོགས་སུལ་ཀུན་ཏུ་ཉམ་ཆུང་གིས་སྐྱབས་བཅོལ་ཞུ་བའི་དམིགས་ཡུལ།མི་རིགས་དང་རྒྱལ་ཁབ་ཀྱི་དོན་བྱ་མིན་ནམ།འདི་གཉིས་ཀ་ལ་མི་འདྲ་བའི་ཁྱད་པར་ཅང་ཡོད་དམ།དེང་འདིར་འཛམ་གླིང་དུ་ཁྱབ་ཆེ་བའི་དུས་ཀྱི་ལྟ་བ་སྣ་ཚོགས་ཀྱིས་ཀྱང་།ང་ཚོའི་སེམས་ངོར་བསླུ་བྲིད་བྱས་པ་མང་སོང་ངམ།ང་ཚོས་མི་རིགས་རང་ལུགས་ཀྱི་ཕུགས་བསམ་གླེང་མ་ཕོད་པར་ཡོད་ལ།ང་ཚོས་’གང་སྐྱིད་ཕ་ཡུལ།སུ་བྱམས་ཕ་མ་’ཡིན་པའི་རྣལ་འབྱོར་བའི་སྤྱོད་པ་དེ་ཡང་ཁ་སྒོ་རུ་གླེང་ཚར་ནས་འདུགམ་གཞི་ཚན་ཉིད་བསམ་བློ་དང་རིན་ཐང་ལྟ་བ་ནི་ཁ་བཏགས་ཤིག་ཡིན་པའི་དབང་དུ་བཏང་ཚེ།དེང་གི་དུས་སུ་བོད་མི་ཚོས་སྔོན་ཆད་བཀྲ་ཤིས་ཁ་བཏགས་སུ་བསྒྲོན་པ།ད་ནི་མྱ་ངན་ཁ་བཏགས་སུ་སྤྱོད་པས་མི་ཚད།ག་ས་གང་ལ་གང་དྲན་དྲན་དུ་བེད་སྤྱོད་ཀྱིན་ཡོད་པ་ཁྱེད་ཀྱིས་མ་མཐོང་ངམ། དེ་བས་ང་རང་དངོས་གནས་མཁོ་འཐོམ་སོང། ངས་ད་རུང་བསམ་བློ་གཏོང་གི་ཡོད།
དབུ་མའི་ལམ་དམར་ཕྱོགས་ཚོགས་པས་བོད་མི་རིགས་ཡོངས་རྫོགས་རྒྱ་དམར་གུན་ཁྲན་གྱི་མི་སེར་ལག་ཁྱེར་ལེན་གྱི་ཡིན་གསུངས་ཀྱི་ཡོད་པ་འདི་ལ་བལྟས་ན་རྒྱ་གར་བའི་མི་སེར་ལག་ཁྱེར་དེ་སྤོབས་པ་མཐོ་པོའི་ཐོག་ནས་ལེན་ན་འགྲིག་པ་རེད།
་་་་་ །༧གོང་ས་མཆོག་ནི་རྒྱ་གར་གྱི་སྐུ་མགྲོན་ཞིག་དང་བོད་མི་ཚོ་རྒྱལ་ཁབ་འདིར་ཐོ་འགོད་ཙམ་བྱས་པའི་ཕྱི་རྒྱལ་བའི་ངོ་བོར་གནས་ཡོད། ་་་་་ཟེར།
་་་་་་ ཕྱི་མིས་བྲིས་པའི་རྩོམ་ཡིག་ཅིག་ཏུ་ད་ལྟའི་བོད་གཞུང་གི་བཀའ་བློན་ཁྲོད་དུའང་ཆོས་རིག་བཀའ་བློན་པདྨ་ཆོས་འབྱོར་ལགས་ཨ་རི་བ་ཡིན་པ་དང་ཕྱི་འབྲེལ་བཀའ་བློན་བདེ་སྐྱིད་ཆོས་དབྱངས་ལགས་ཁ་ན་ཊན་པ་དང་ནང་སྲིད་བཀའ་བློན་རྒྱ་རི་སྒྲོལ་མ་ལགས་རྒྱ་གར་བ་ཡིན་པ་རེད་་་་་་་་ ཟེར།
་་་་་ ཕྱི་མི་རྩོམ་པ་པོ་ཞིག་གིས་གསུངས་རྒྱུར་བོད་པ་ཚོ་ཁེར་བཀྱེད་སྡོད་སྒར་གྱི་ལམ་ལུགས་འདིའི་རྣམ་པའི་འོག་དུ་བསྡད་པས།ཁོང་ཚོར་ལས་ཀ་དང་འོས་འདེམས།སྡོད་ཁང་ཉོ་བ།ཚོང་གཉེར་ཐོ་འཁོད་བྱ་བ་བཅས་ཀྱི་ཁེ་དབང་ཡོངས་སུ་བྲལ་ཡོད་པར་བཤད།སྙིང་ཉེ་བའི་སྐད་ཆ་འདི་ནི་བོད་པ་མང་མང་གི་སེམས་སུ་བརྣག་པའི་དོན་དངོས་ཤིག་ཡིན་ངེས་ལ།བོད་མི་སྒེར་བའི་འཇོན་ནུས་དང་མངོན་འདོད་ལ་ཚད་བཀག་དང་ཕོག་ཐུག་ཐེབས་ཀྱིན་ཡོད་པ་ཡང་དོན་དངོས་ཡིན། ་་་་་་ཟེར།
ང་ཚོས་ཨིས་རེལ་གྱི་རྗིའུ་མི་རིགས་ལ་དཔེ་བླངས་ནས་ཆོས་དང་རིག་གནས། སྐད་ཡིག་དང་རིགས་བརྒྱུད་གང་ཐུབ་བསྲུང་དགོས་རྒྱུ་དེ། བོད་མི་གར་གནས་སུ་ལྕོགས་ཀྱི་ལས་འགན་རེད་སྙམ་ལགས།
བོད་མི་རྒྱལ་ཁབ་གང་རུང་གི་མི་སེར་ལག་འཁྱེར་དང་ཐོབ་ཐང་ལེན་ན་མ་འགྲིག་པ་གང་ཡང་མེད། གཙོ་བོ་བོད་པའི་ཆོས་རིག་དང་བོད་པའི་ངོ་བོ་མ་བརླགས་བྱ་རྒྱུ་གལ་ཆེ།
གཉའ་ཁྲི་བཙན་པོ། ཆོས་རྒྱལ་སྲོང་བཙན་སྒམ་པོ། ཆོས་རྒྱལ་ཁྲི་སྲང་སྡེ་བཙན། བཙན་པོ་གླང་དར་མ། ཆོས་རིགས་བཀའ་བློན། ཕྱི་འབྲེལ་བཀའ་བློན། ནང་སྲིད་བཀའ་བློན། ལྷ་རྒྱ་རི་སྲས་མོ་རྣམ་སྒྲོལ། བཅས་འབྲིས་འདུག། བསམ་གྲུབ་ཟེར་བ་ཁྱོད་བོད་མི་བཅའ་ཁྲིམས་དོན་མཚན་༡༣ ནང་གི་བོད་མི་ལས་འགན་དང་ཐོབ་ཐང་ ཤེས་པ་བྱེད་ ཁྱོད་རང་རྒྱ་གར་ལ་མ་དགའ་མཁན། ཕ་ཡུལ་འཕྲོག་མཁན་རྒྱ་མར་ལ་དགའ་མཁན་ཞིག་ཡི་པའི་བཟོ་འདུག།།།་ཧག་ཧག་་ཧག་