ཀོ་ལི་གྷ་གཞུང་པ་ཚེ་དབང་བསོད་ནམས།
བོད་མི་རིགས་ངོས་འཛིན་ཐུབ་པའི་བོད་ཀྱི་ཡིག་གེ་ཀ་མད་སུམ་ཅུ་ལ་ཆེ་མཐོང་དགོས་པའི་ཀ་བཤད་བཅུ་བདུན་པ།
ཀ་མད་སུམ་ཅུའི་སངས་རྒྱས་བསྟན་པ་སྲུང་།།
ཁ་རྩེད་ལག་རྩེད་རྩེད་ཆས་ཀ་ཁ་མིན།།
ག་དུས་ཡིན་ཀྱང་ཀ་ཁར་ཆེ་མཐོང་ཞུས།།
ང་ཚོ་བོད་མིའི་འབྱུང་ཁུང་ཀ་ཁ་ཡིན།།
ཅ་ཅོའི་ཆགས་གཏམ་གླེང་ས་ཀ་ཁ་མིན།།
ཆ་རྐྱེན་བསྐྲུན་ནས་ལྟོ་གོས་འཚོལ་བྱེད་མིན།།
ཇ་མིན་ཆུ་མིན་འདྲ་བུའི་རྩོམ་འབྲི་མང་།།
ཉ་དང་ཉུང་མ་མཉམ་བསྲེ་བྱེད་ས་མིན།།
ཏ་ཐ་ག་ཏའི་བསྟན་པ་ཀ་ཁས་བསྐྱངས།།
ཐ་དད་མ་ཡིན་ཀ་ཁས་ངོ་སྤྲོད་གནང་།།
ད་སྐབས་རྩོམ་རིག་སྨྲ་བའི་དྲ་འབུ་ཚོ།།
ན་ཟུག་སྦྱིན་པའི་རྩོམ་ངན་ཉུང་ན་དགའ།།
པ་ཕ་འདྲ་བའི་ཀ་ཁ་དྲིན་ཆེན་གྱི།།
ཕ་ལམ་བཞིན་དུ་ནང་བསྟན་དམ་པོར་ཉར།།
བ་ཕྱུགས་འདྲ་བའི་བསམ་མེད་དྲ་འབུ་འགས།།
མ་རབས་ཚིག་གི་ཀ་ཁའི་ཆེ་མཐོང་རླག།
རྩ་བ་སྨྲ་བརྗོད་རྒྱལ་སྤྱིའི་ཁྲིམས་ཀྱི་བསྟན།།
ཚ་གྲྲང་ཇི་བྱུང་རང་གི་ཚོར་བས་མྱོང་།།
རྫ་བརྩེ་ཡོད་ན་ཀ་ཁར་བྱམས་སྐྱོངས་བགྱིས།།
ཝ་ལེར་བསམ་དང་ཀ་ཁ་བཀའ་དྲིན་ཆེ།།
ཞ་བགད་སློང་བའི་ཆགས་གཏམ་ཀ་ཁ་ཉོབ།།
ཟ་ང་ཟིང་ངེའི་རྩོམ་ཡིག་ཚིག་ཉོག་འདིའི།།
འ་འོ་མ་རྒྱལ་ཀ་ཁ་རིན་པོ་ཆེ།།
ཡ་རབས་ཚིག་དོན་ཀ་ཁའི་མཛེས་རྒྱན་ཡིན།།
ར་བ་གངས་རིའི་འཕྲོད་དུ་ཀ་ཁས་བསྐྱངས།།
ལ་ལུང་བགྲོད་ཀྱང་ཀ་ཁ་རྗེས་སུ་འབྲངས།།
ཤ་ཚ་ཡོད་ན་ཀ་ཁར་ཆེ་མཐོང་ཞུས།།
ས་ཕྱོགས་འདི་རུ་ཀ་ཁ་མ་རླག་བགྱིས།།
ཧ་ཧ་རྩོམ་གྱི་རིག་་བརྩལ་དྲ་འབུ་མང་།།
ཨ་གསར་རྩོམ་གྱི་ཀ་ཁའི་རིན་ཐང་བོར།།
སྔོན་བྱོན་མཁས་པའི་ལེགས་བཤད་ཀ་ཁའི་བསྐྱངས།།
དེང་རབས་དྲ་འབུའི་ཆགས་གཏམ་ཀ་ཁར་བཀུར།།
དུས་ནི་མི་འགྱུར་མི་རྣམས་འགྱུར་བ་ཡིན།།
དེ་དུས་མི་ལ་བསོད་ནམས་སྙན་གྲགས་མེད།།
མཐོ་རིམ་མི་སྣས་དབྱིན་་སྐད་ཆག་ཀྱོག་གླེང་།།
ལྷན་ཁང་ཁག་ཏུ་དབྱིན་ཡིག་ནོར་ཀྱོག་འབྲི།།
སློབ་གྲྭ་ཁག་ཏུ་ཧིན་སྐད་བོད་སྐད་བསྲེ།།
གྲྭ་ཚང་ཁག་ཏུ་བོད་སྐད་གོར་སྐད་བསྲེ།།
སྔོན་འབྱོར་བོད་མིའི་ནེ་ཙོའི་སྐད་གསར་གླེང་།།
གསར་འབྱོར་བོད་མིའི་རྒྱ་མིའི་སྐད་ཡིག་གླེང་།།
བལ་ཚོང་མི་གི་ཚོང་སྐད་ཡུལ་སྐད་གླེང་།།
གཞིས་ཆགས་མི་མང་བོད་སྐད་གཙང་མ་གླེང་།།
བོད་པའི་སྐད་ཡིག་བོད་མི་རང་གི་སྣུབས།།
རང་སྡེའི་རིགས་ལ་ཞེན་པ་དཀར་པོའི་མདངས།།
རང་བྱུང་སྙིང་གི་དབུས་ན་གནས་པ་འདི།།
རང་གི་རིགས་ལ་ངོ་སྤྲོད་ཞུས་པ་ནས།།
རང་སྟོད་མིན་པ་ཀུན་སློང་བཟང་པོའི་ཕུལ།།