བོད་མིའི་བྱ་སྤྱོད་ལ་དཔྱད་པའི་ཀ་བཤད་ཉི་ཤུ་པ།

ཀོ་ལི་གྷ་གཞུང་པ་ཚེ་དབང་བསོད་ནམས།

 
ཀ་ར་གུ་རམ་རྒྱ་དངུལ་ཏ་ཡང་བོད་ཀྱི་ལས་བྱེད་རྒྱ་ཡིས་བསླུས།།
ཁ་ནས་ཆོལ་གསུམ་ཆིག་སྒྲིལ་ཟེར་ཡང་དོན་དངོས་ཕྱོགས་གཏོགས་མགོ་འདྲེན་མང་།།
ག་པར་བལྟས་ཀྱང་རང་དོན་སྒྲུབ་མཁན་སྐབས་འཚོལ་རིང་ལུགས་དངོས་སུ་དར།།
ང་ཡིན་ཁོ་ཡིན་ཟེར་མཁན་མང་བས་བོད་མིའི་འཐབ་རྩོད་སྒྲུང་གི་འགྱངས།།
ཅ་ཅོ་ཀླ་ཀློའི་དུག་གི་ཆབ་སྲིད་བོད་དོན་ལས་འགུལ་ཁ་འཐོར་བཏང་།།
ཆ་རྒྱུས་མེད་པའི་འཛམ་གླིང་མི་མང་རྒྱ་ཡི་དཔལ་འབྱོར་རིག་པས་བསླུས།།
ཇ་ཆང་ཞིམ་པོར་མགོ་བོ་འཁོར་ནས་འཛམ་གླིང་དབུ་ཁྲིད་རྒྱ་ལ་དགའ།།
ཉ་ཤ་ཕག་ཤ་རྒྱ་ཡི་ཟས་ནས་ས་གནས་བོད་མིར་སྡུག་སྦྱོང་བཏང་།།
ཏཱ་ལའི་བླ་མས་དུས་གསུམ་གསལ་གཟིགས་མ་ནོར་ལམ་སྟོན་དབུ་མའི་ལམ།།
ཐ་མའི་ཐག་གཅོད་ཆོལ་གསུམ་གཞིས་བྱེས་ས་ཡ་དྲུག་གི་མདུན་དུ་བཞག །
ད་ལྟའི་སྐབས་སུ་བོད་མིའི་བྱ་སྤྱོད་ཁ་ཕྱོགས་མ་ནོར་ཐུགས་རྗེས་གཟིགས།།
ན་གཞོན་ལོ་ཆུང་ཆབ་སྲིད་མ་རྟོགས་དོན་མེད་སྤྱི་ཚོགས་ཉེན་ཁར་བསྐྱལ།།
པ་སངས་འདྲ་བའི་རྒན་རབས་བོད་མིའི་བཙན་བྱོལ་སྒྲིག་འཛུགས་སྲ་བརྟན་བཟོས།།
ཕ་བཟང་འདྲ་བའི་གཞུང་གི་ལས་བྱེད་འཛིན་སྐྱོང་ལས་དོན་ཚགས་ཚུད་བཟོས།།
བ་དན་ཕྱོགས་བཅུའི་ནམ་མཁར་སྒྲེང་ནས་ཁྲིམས་བཟོའི་ལས་དོན་མང་གཙོ་སྲུངས།།
མ་འོངས་བོད་རྒྱའི་དཀའ་རྙོག་སེལ་ལ་བོད་རྒྱའི་འགོ་འཁྲིད་ངོ་ཐུག་ཟབ།།
རྩ་བ་རང་བཙན་ས་ཆའི་བདག་དབང་མ་་གླེང་རྒྱལ་རབས་ནུས་མེད་ཆགས།།
ཚ་གྲང་ཇི་བྱུང་གདོང་ལེན་ཐུབ་པར་ནུས་ལྡན་འཆར་གཞི་གལ་ཆེར་མངོན།།
མཛའ་བརྩེའི་མཛུམ་མདངས་ཀུན་ལ་བསྟན་ནས་འཛམ་གླིང་མི་མང་ཆོས་ལ་བསྒྱུར།།
ཝ་ལེར་བསམ་དང་བྱང་ཆུབ་སེམས་དཔའ་རྒྱལ་སྲས་སྤྱོད་པ་སྤྱན་རས་གཟིགས།།
ཞྭ་མོ་ནག་པོའི་ཁྲིམས་གཞི་བསྡམས་ནས་ས་གནས་བོད་མིའི་མགོ་ལ་བསྐོན།།
ཟ་རྒྱུ་འཐུང་རྒྱུར་ཚད་བཀག་བཟོས་ནས་ས་གནས་བོད་མི་ལྟོགས་ཤི་ཐེབས།།
འ་སྤྱང་འདྲ་བའི་གུང་བྲན་ཇག་ཚོགས་མི་ཤ་དམར་པོ་འཁྱུར་མིད་བཏང་།།
ཡ་མེད་དགྲ་བོ་རྒྱ་དམར་ཀླ་ཀློས་འཛམ་གླིང་ཁྱུར་མིད་གཏོང་ཉེན་ཆེ།།
ར་བ་གངས་རིས་བསྐོར་བའི་ཡུལ་ལྗོངས་ཆོས་ལྡན་རྒྱལ་ཁབ་ཀླ་ཀློས་བཟུང་།།
ལ་ལུང་བགྲོད་ཀྱང་ཕ་མེས་རིག་གཞུང་སྲ་བརྟན་ཐུབ་པའི་སྒྲིག་འཛུགས་བཙུགས།།
ཤ་ཚ་ཡོད་ན་རང་ཡུལ་བསམ་ནས་གོང་ས་མཆོག་གི་བཀའ་གསུང་སྒྲུབས།།
ས་ཕྱོགས་གང་དུ་འཚོ་བ་བསྐྱལ་ཀྱང་ཕ་ཡུལ་བོད་ལྗོངས་བརྗེད་མི་ཉན།།
ཧ་ཅང་མང་བའི་ཚོགས་པ་སྐྱིད་སྡུག་བཙན་བྱོལ་སྤྱི་ཚོགས་མང་གཙོོ་དངོས།།
ཨ་གསར་ཆེ་བའི་ཚོགས་པ་སྒྲིག་འཛུགས་མཇུག་མ་ཐུང་ནས་ནང་འཁྲུག་མང་།།