བོད་མིའི་སྒེར་ལངས་ལ་དཔྱད་པའི་གཏམ།

ཚེ་དབང་བསོད་ནམས།

ཕྱི་ལོ་༡༩༥༩་ལོར་རྒྱ་མིའི་བོད་དུ་བཙན་གནོན་གྱིས་བོད་མི་ཁྲི་ཚོ་མང་པོ་དམར་བསོད་བཏང་བ་དང་བོད་མི་སྟོང་ཚོ་མང་པོ་རྨས་སྐྱོན་འོག་ཤི་གསོན་གྱི་ས་མཚམས་སུ་ལྷག་པ་དང་ཕ་མ་བུ་ཕྲུག་སྟོང་ཚོ་མང་པོ་གསོན་བྲལ་བཏང་བ་དང་བཟའ་ཚང་སྟོང་ཚོ་མང་པོ་ཁ་བྲལ་བཏང་བ་དང་བོད་མི་སྟོང་ཚོ་མང་པོ་ལྟོག་ཤི་ཐེབ་པ་དང་བོད་མི་བརྒྱ་ཕྲག་མང་པོ་རང་ཤི་རྒྱབ་པ་སོགས་དམྱལ་བ་མི་ཡུལ་དུ་དངོས་སུ་བོད་མིའི་མྱོངས་བའི་སྐབས་འདིར་བོད་ཀྱི་རྒྱལ་ས་ལྷ་སའི་ནང་བོད་ཆོལ་ཁ་གསུམ་གྱི་རྒྱལ་གཅེས་དཔའ་བོ་དཔའ་མོ་ཚོའི་རྒྱ་མིར་ཞི་བའི་ངོ་རྒོལ་གྱིས་ལས་འགུལ་སྤེལ་ནས་འབོད་ཚིག་ཏུ་བོད་རང་བཙན་ཡིན་བོད་ཀྱི་བདག་པོ་བོད་མི་ཡིན་རྒྱ་དམར་བོད་ནས་ཕར་རྒྱུགས་ཤིག་རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པ་ཤོག་ཟེར་བའི་དེང་དུས་རྒྱལ་སྤྱིའི་སྲིད་དོན་ཚན་རིག་དང་མཐུན་པའི་ཆབ་སྲིད་རིག་པའི་ཐ་སྙད་འོག་རྒྱ་མིར་ངོ་རྒོལ་གྱིས་ལས་འགུལ་གནམ་ས་གྲགས་པ་སྤེལ་པ་ནས་བཟུང་ལོ་ལྟར་ང་ཚོའི་ཕྱི་ཟླ་གསུམ་པའི་ཚེས་བཅུ་ཉིན་བོད་མི་གནས་སྡོད་བྱེད་སའི་ལུང་པ་ཚང་མའི་ནང་གསུམ་དུས་སྲུང་རྩི་ཞུ་བཞིན་པ་ནས་སྐད་འབོད་ཀྱི་འབོད་ཚིག་ལ་རིམ་པས་འགྱུར་བ་ཕྱིན་ནས་བར་ལམ་ཞིག་ནས་འཚེ་མེད་ཞི་བའི་ལྟ་སྒྲུབ་འོག་བྱང་ཆུབ་སེམས་མཆོག་ལ་སྐྱབས་བཅོལ་ནས་གསུམ་བཅུའི་སྒེར་ལངས་དུས་དྲན་སྲུང་རྩི་ཞུ་བཞིན་པ་དང་ལོ་རབས་ཉི་སྟོང་ཤར་ནས་ང་ཚོའི་ཆབ་སྲིད་ཀྱི་ཁ་ཕྱོགས་ལ་འགྱུར་བ་ཆེན་པོ་ཕྱིན་ནས་དབུ་མའི་ལམ་ལ་འགན་ཁུར་ནས་བོད་རྒྱ་ནང་འགྲིག་གི་སྲིད་ཇུས་འོག་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱིས་སྒྲོམ་གཞིའི་འོག་མི་རིགས་ས་གནས་རང་སྐྱོང་གི་བཅའ་ཁྲིམས་ནང་གསལ་བའི་རང་སྐྱོང་གི་གནས་བབས་ཚད་ལྡན་ཞིག་གི་དགོས་འདུན་སྟོན་པ་ནས་དེ་སྔ་ཕྱི་ལོ་༡༩༥༩ ལོར་བོད་མིའི་རང་དབང་སྒེར་ལངས་ཀྱིས་འབོད་སྒྲ་བོད་ཀྱི་བདག་པོ་བོད་མི་ཡིན་རྒྱ་དམར་བོད་ནས་ཕར་རྒྱུགས་ཤིག་ཟེར་བའི་ཐ་སྙད་དེ་དག་འཇུག་བསྡུས་ནས་བོད་ནང་འགྲོ་བ་མིའི་ཐོབ་ཐང་སྐོར་དང་བོད་ཀྱི་འཁོར་ཡུག་ཉམས་ཆགས་སྐོར་སོགས་རྩལ་དུ་གཏོད་ནས་དེ་སྔའི་འབོད་སྒྲ་བོད་རང་བཙན་ཡིན་རྒྱ་དམར་བོད་ནས་ཕར་རྒྱུགས་ཤིག་བོད་ཀྱི་བདག་པོ་བོད་མི་ཡིན་ཟེར་བའི་ཐ་སྙད་དེ་དག་གོ་རྒྱུ་དང་ཐོས་རྒྱུ་མེད་པ་ནས་གསུམ་བཅུའི་དུས་དྲན་དེ་ཆོ་ག་ཕྱག་ལེན་ཙམ་དུ་སླ་བཅོས་སུ་ཁ་ཕྱོགས་ནས་སྔ་དྲོ་ཆུ་ཚོད་གཅིག་ཙམ་རིང་ས་གནས་སོ་སོར་མི་མང་འདུ་འཛོམས་ཐོག་བྱང་ཆུབ་སེམས་མཆོག་འུར་འདོན་དང་བཀའ་ཤག་དང་སྤྱི་འཐུས་ཀྱིས་གཏམ་བཤད་བཅས་ལ་གསུམ་དུས་ཀྱི་ངོ་བོ་ཙམ་ལས་ཕྱི་ལོ་༡༩༥༩ ལོར་ཆོལ་གསུམ་བོད་ཀྱི་དཔའ་བོ་དཔའ་མོ་ཚོའི་མི་མང་ལས་འགུལ་གྱི་སྒེར་ལངས་ལ་རྗེས་མཐུད་ཐུབ་པའི་རྣམ་འགྱུར་ཆུང་དུ་ཕྱིན་པ་ནི་བོད་མི་རིགས་ལ་བསམ་ན་སྔ་འགྱེལ་རྗེས་ལངས་ཐུབ་པའི་ཆོད་སེམས་བརྟན་པོ་ཨ་ཡོད་བསམ་པ་དང་ཕྱི་ལོ་༡༩༥༩ ས་མོ་ཕག་གི་ལོ་ལ་བོད་རྒྱ་མིའི་འོག་ཏུ་ཤོར་བ་ནས་ད་ལོ་བར་མི་ལོ་དྲུག་བཅུ་ཐམ་པ་འཁོར་ནས་འདི་ལོ་༢༠༡༩ ས་མོ་ཕག་གི་ལོ་འདི་ལ་བོད་ཀྱི་བདེན་མཐའ་གསལ་ཐུབ་པའི་འགན་ཁུར་དབུས་བོད་མིའི་སྒྲིག་འཛུགས་ཀྱི་འཆར་སྣང་ལྔ་དང་ལྔ་བཅུ་ལས་ལྔ་ལ་འགན་ཁུར་ནས་འཛིན་སྐྱོང་བཀའ་ཤག་གི་དབུ་འཁྲིད་འོག་འགོ་འཁྲིད་གཅིག་དང་དར་ཆ་གཅིག་གི་འོག་ཏུ་འཆར་གཞི་གཅིག་དང་དགོས་འདུན་གཅིག་དང་འབོད་སྒྲ་གཅིག་དང་རྣམ་འགྱུར་གཅིག་དང་ལས་འགུལ་གཅིག་གི་རྒྱུད་ནས་ཆོལ་གསུམ་རྒྱ་ཆེ་མི་མང་ནས་བོད་དོན་བདེན་མཐའ་གསལ་ཐུབ་པའི་འགན་ཁུར་བླངས་མ་ཐུབ་ཚེ་ལོ་རྒྱུས་ཀྱི་ང་ཚོར་ནམ་ཡང་དགོངས་སེལ་ཞུ་མི་སྲིད་པ་དེ་ཡང་ང་ཚོ་ཚང་མས་ངེས་པར་དུ་མཁྱེན་པའི་ཐོག་ནས་གསུམ་དུས་ཐེངས་དྲུག་བཅུ་པ་འདི་ལ་ང་ཚོའི་གཞི་རྒྱ་ཆེ་བའི་ནུས་ལྡན་གྱིས་་ལས་འགུལ་སྤེལ་རྒྱུའི་སྒྲ་སྒྲིག་ད་ལྟ་ནས་དབུས་བོད་མིའི་སྒྲིག་འཛུགས་འཛིན་སྐྱོང་བཀའ་ཤག་ནས་གནང་དགོས་པ་དེ་ང་ཚོ་བོད་མི་གཞིས་བྱེས་གཉིས་ཀྱི་གཡོལ་ཐབས་མེད་པའི་ལས་འགན་ངོ་མ་དེ་ཡིན་པ་ནས་མ་འོངས་མི་རབས་གསར་པའི་མདུན་ང་ཚོ་ངོ་གནོང་མི་དགོས་པའི་འགན་དེ་ད་ལྟའི་མི་ཐོག་འདི་ལ་ཡོད་པའི་ངོས་འཛིན་དང་བཅས་བདེན་པ་ཉིད་རྒྱལ་རྒྱུར་ཅིག་བོད་རྒྱལ་ལོ།

སླར་སྨྲས་པ།

རྒྱལ་ཁབ་མི་རིགས་རྩ་དོན་ཆེད་དུ་ཆོལ་གསུམ་བོད་མིའི་སྒེར་ལངས་སྤེལ།
སྤེལ་བའི་ལས་འགུལ་་འཛམ་གླིང་གྲགས་ནས་བོད་ཅེས་རྒྱལ་ཁབ་ངོ་སྤྲོད་གནང།
གནང་བའི་བྱ་བ་རླབས་ཆེན་གུང་རྒོལ་བོད་མིའི་སྒེར་ལངས་གཟི་བརྗིད་ཆེ།
ཆེ་བཙན་ཀླ་ཀློ་ཆོས་མེད་དམར་པོའི་གངས་ལྗོངས་ཡུལ་གྱི་གནོད་བཅུད་བཅོམ།

ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས་ནས་ཕྱི་ལོ་༢༠༡༩ ཕྱི་ཟླ་ ༢ པའི་ཚེས་ ༡༦ ཉིན་སྦེང་ལོར་ཀམ་པུ་གྷོ་ཊའི་གནམ་ཐང་དུ་ཟིན་བྲིས་སུ་བཏབ།